JOHANE 16

1“Namghoria malagho agha, eri msakejisigha irumirio jenyu. 2Wandu wichammbinga sunagoginyi rawo, sena ngelo iacha uo ose ucham'bwagha inyo, uchaghesha wei, uamdumikia Mlungu. 3Nawo wicham'bonya huwo kwa kukaia ndewimwichi uja Aba, hata ini anduangi. 4Nani namghoria agho kiimbiri, eri iji ngelo yaro yavika, mpate kukumbuka angu neremghorieghe.

Kazi ya Roho Mweli

“Seremghorieghe malagho agha kiimbiri angu nerekwanyeghe andwamweri nenyo. 5Ela idana niaghenda kwa uo orenidumieghe, hata ndekuwadie mndungi konyu unikotiagha, ‘Welee, kwenda hao?’ 6Nani angu namghoria maza iri, ngolo renyu rachulwa ni wasi. 7Elaima namghoria loli, ichamfwana inyo ini ngaghenda, angu ngera niseghendagha, uja Mtesia ndechaamchea anduangi; ela ngaghenda, nichamduma konyu. 8Nao moni kasikira wacha, uchaghuwonyera wurumwengu worinyi seji ghukosere; kwa kaung'a, na kwa hachi, na kwa kutanywa. 9Kwa kaung'a, angu wiserenirumirieghe ini; 10kwa hachi, angu niaghenda kwa Uja Aba, nenyo ndemchaaniwona sena; 11kwa kutanywa, angu m'baa wa wurumwengu ughu wameria kutanywa.

12“Neko na malagho mengi ghemghoria, ela ndemdimagha kughiwada idana anduangi. 13Ela kasikira wacha uja Roho wa loli, uchamghenja kwa loli rose; angu ndechaaghora kwa nguma yake moni anduangi, ela uchamghoria agho gheni ughisikiragha, sena uchamghoria maza richagha. 14Uo moni uchanikasa ini, angu uchamghoria agho gheni uchaaghiwusa kufuma kwapo. 15Vose viko na Aba ni vapo, niko namzera angu Uo Roho uchawusa ghapo, na kumghoria inyo.

Wasi na kuboilwa

16“Kwa ngelo ndini ndemchaaniwona, sena kuida ngelo ndini mchaniwona.” 17Wamu wa wanughi wake wikakotiana, “Kutambua kwaro niki ughoragha, ‘Kwa ngelo ndini ndemchaaniwona, sena kuida ngelo ndini mchaniwona?’ Na sena ‘Angu niaghenda kwa uja Aba.’” 18Nao wikaghamba, “Isi ndeditambukilwagha seji ughoragha, ‘Kwa ngelo ndini.’” 19Jesu oremanyireghe angu wakunda kumkotia, niko ukawizera, “Welee, mwaawuyakotiana kutambua kwaro agho naghora, ‘Kwa ngelo ndini ndemchaaniwona, sena kuida ngelo ndini mchaniwona?’ 20Namghoria loli, inyo mchalila na kudikwa ni mbori, ela wurumwengu ghuchaboilwa, mchakaia na wasi, ela wasi ghonyu ghuchaghaluswa kukaia kuboilwa. 21Iji muka wakakufungua, wadakaia na wasi angu ngelo yake ekumba lufu yameria kuvika; ela iji mwana wameria kuvalwa wadaliwa luja luwawo lose kwa kuboilwa, angu mundu wavalwa wurumwengunyi. 22Na inyo idana moko na wasi, ela nichamchea sena, na ngolo renyu richachulwa ni kuboilwa, na kuboilwa konyu mndungi ndedimagha kumsoka anduangi. 23Ituku ijo ndemchaanilomba kilambo chingi anduangi. Namghoria loli, icho chose mchaalomba kwa uja Aba kwa irina japo uchamneka. 24Jingi ndemlombie kilambo chingi kwa irina japo. Lombenyi, nenyo mchapata; kuboilwa konyu kukate.

Kughusima wurumwengu

25“Namghoria malagho agha kwa mifwano. Ngelo iacha nani sichaaghora nenyo kwa mifwano anduangi, ela nichamghoria worinyi maza ra uja Aba. 26Ngelo iyo mchalomba kwa irina japo. Siwueghora wei ini nichamlombia kwa Aba anduangi; 27angu uo moni wamkunde inyo, kwa kukaia inyo mwanikunda ini, na kurumiria angu nerefumieghe kwa Aba. 28Ini nerefumieghe kwa Aba, ngacha wurumwengunyi; nani idana niaghusigha wurumwengu, na kuwuya kwa Aba.”

29Nao wanughi wake wikamzera, “Ola idana kwaghora worinyi kuseko na mifwano. 30Idana damanya kwaichi vilambo vose, hata ndekukunde mndungi ukukotie ilagho jingi anduangi; kwa huwu darumiria angu korefumieghe kwa Mlungu.” 31Jesu ukawitumbulia, “Idana niko mwarumiria? 32Ngelo iacha, nayo yameria kuvika, inyo mmbose mchasaghiswa kula mundu ughende andu kwake; na ini nichasigharika niekeri. Ela siko niekeri anduangi, kwa kukaia Aba oko andwamweri nani. 33Namghoria malagho agha, mpate kukaia na sere andenyi kwapo; mchakaia na wasi wurumwengunyi, ela kaienyi na ngolo, ini naghusima wurumwengu.”

Currently Selected:

JOHANE 16: TAITA

Highlight

Copy