KUZOYA 9

Ilaghiro ja Mlungu kwa Nuhu

1Nao Mlungu ukamrasimia Nuhu na wana wake ukawizera, “Venyi mchurikie, muichure ndoe.#Kuz. 1.28 2Nyamandu rose, nyonyi rose, icho chose chiavuagha na samaki riko baharinyi richamuobua inyo; nani nariwika rose aisi ya nguma renyu. 3Icho chose chighendagha chiko moyo chichakaia vindo venyu, na sa iji koni neremnekieghe malemba ghikaie vindo venyu, namneka ivo vose wori. 4Ilagho jelindia ni iji: Msakeja nyama chia imweri na bagha, angu bagha ni irangi.#Wal. 7.26-27; 17.10-14; 19.26; Wuk. 12.16,23; 15.23 5Ngera mndungi wadia bagha enyu, loli nichaikotia angu bagha ni irangi ja mundu. 6Mdamu oreumbiloghe kufwanana na Mlungu, kwa huwo uo ose uchaidia bagha ya mdamu, bagha yake ichadilwa ni mdamu wokoni.#Kuz. 1.26; Kuf. 20.13 7Na inyo muve mchurikie, muichure ndoe kwa wungi.”#Kuz. 1.28

8Mlungu ukamzera Nuhu na wana wake, 9“Idana niabonya ilaghano japo nenyo, andwamweri na kivalwa chenyu chichaanugha nyuma, 10na icho chose chiko moyo chikwanye andwamweri nenyo: nyonyi, mfugho na nyamandu ra ndoenyi rose rerefumieghe safinenyi. 11Nabonya ilaghano japo na inyo, angu jingi wori, mimbi yose iko moyo ndeichaatoteshwa kwa machi anduangi, hata na jingi sena ndekuchaakaia na gharika enona wurumwengu anduangi.” 12Mlungu ukaghamba, “Ihi niyo alama ya ilaghano nijibonyagha aghadi ya ini na inyo, andwamweri na icho chose chiko moyo, na vivalwa vose vichaanugha nyuma. 13Nawika lusenge lwa vua andenyi ya mawingu nalo luchakaia alama ya ilaghano japo nijibonyagha na wurumwengu. 14Iji nareda mawingu aighu ndoenyi, na ulo lusenge luwoneke andenyi ya mawingu, 15nichakumbuka ilaghano japo jiko aghadi yapo na inyo, na mimbi yose iko moyo, na machi ndeghichaakaia gharika ebwagha mumbi ghungi jingi sena anduangi. 16Iji lusenge lwadunga andenyi ya mawingu, nichaluzighana kukumbuka ijo ilaghano ja kala na kala jerewikiloghe aghadi ya Mlungu na icho chose chiko moyo chiumbilo, na mimbi yose iko ndoenyi.” 17Nao Mlungu ukamzera Nuhu, “Ihi niyo alama ya ilaghano najimangisha aghadi yapo na kula mumbi ghuko ndoenyi.”

Nuhu na wana wake

18Wana wa Nuhu awa werefumieghe safinenyi ni Shemu, Hamu, na Jafethi. Hamu orekoghe ndee Kanaani. 19Awa wana wadadu wa Nuhu niwo weni wichurie wandu wurumwengu ghose.

20Nuhu nuo orekoghe mundu wa imbiri kuilima ndoe na kuwa mizabibu. 21Ukanywa divei ukawongia, ukalala andenyi ya hema yake usekufinikire wuduu ghwake. 22Hamu, ndee Kanaani, ukammbona ndee uko duu, ukawighoria waja waruna wawi werekoghe shighadi. 23Niko Shemu na Jafethi wikawada nguwo, wikaiwikiria maongenyi kwawo, na kughenda kinyuma-nyuma, wikaghufinikira wuduu ghwa ndee, na mawushu ghawo gherekoghe ghikizighana noko, hata ndewereghuwonieghe wuduu ghwa ndee anduangi. 24Hata iji Nuhu waelwa ni meso, na kumanya seji mwana wake mtini wam'bonyera, 25ukaghamba,

“Kanaani ndewado ni njowe;

uo uchakaia mzumba wa wazumba kwa waruna.”

26Nao ukaghamba sena,

“Mrasimie Shemu ee BWANA Mlungu wapo,

na Kanaani ndekaie mzumba wake.

27Mlungu ndem'bonye Jafethi uchurikie,

nao ukaieghe hemenyi ra Shemu, na Kanaani ukaie mzumba wake.”

28Nyuma ya gharika, Nuhu ukakaia miaka maghana adadu na mirongo misanu. 29Matuku ghose gha Nuhu orekaieghe ndoenyi ni miaka maghana ikenda na mirongo misanu, nao ukafwa.

Currently Selected:

KUZOYA 9: TAITA

Highlight

Copy