KUZOYA 31

Jakobo kumkimbia Labani

1Nao Jakobo ukasikira seji wana wa Labani werekoghe wikizughunuka wei, “Jakobo wameria kuwusa kula kilambo cherekoghe cha aba, kufugha kwake kose koofumanya na mali ra aba.” 2Jakobo ukawona angu Labani nderekoghe ukimmbona nicha sa imbiri. 3Nao BWANA ukamzera Jakobo, “Wuya isangenyi ja weke ndeyo na wakenyu, na ini nichakaianya andwamweri na oho.”

4Jakobo ukawidumiria Raheli na Lea wiche mlambenyi aja mfugho rake rerekoghe, 5ukawizera, “Naawuyawona ndeyo ndewuyeniwona nicha sa iji orekoghe kiimbiri. Ela Mlungu wa aba orekoghe andwamweri nani. 6Mwamanya angu namdumikie ndeyo kwa ndighi rapo rose, 7na ndeyo wanikalie kalazi, ukighalusa ifungu japo mando ikumi ghose, ela Mlungu ukamghiria usenibonye kiwiwi. 8Iji oreghorieghe, ‘Mfugho rose ra vitaranga richakaia ifungu jako,’ niko mfugho rose rikava ra vitaranga, na iji oreghorieghe angu ‘Iro ra njaria-njaria richakaia ifungu jako,’ niko mfugho rose rikava ra njaria-njaria. 9Kwa huwu Mlungu ukamsoka ndeyo mfugho ukanineka.

10“Ngelo ya mfugho kupata vifu, nerewonieghe ndodonyi, iro fwandi rose rerekoghe rikidedia rerekoghe ra njaria-njaria, na ra vitaranga na ra maboli-maboli. 11Malaika wa Mlungu ukanizera aho ndodonyi, ‘Jakobo!’ Nani ngadika, ‘Neko aha.’ 12Ukanizera, ‘Zighana kuwone iro fwandi ridediagha andenyi ya chagha ni ra njaria-njaria na ra vitaranga, na maboli-maboli; kwa kukaia namerie kuwona agho ghose Labani wawuyakubonyera. 13Ini ne Mlungu uo orekufutukieghe Betheli, aja korejiwikieghe igho wakfu kwa kujidunga mavuda, na kuniwikia ighemi. Idana wuka kufume isanga iji, kuwuye ijo isanga korevaloghe.’”#Kuz. 28.18-22 14Nao Raheli na Lea wikamtumbulia wikighamba, “Welee, aha jeko ifungu jingi angu ifwa jisigharikie kwa wundu ghodu nyumbenyi kwa aba? 15Huwu isi ndadawuyatalika kwake sa waghenyi? Kwa kukaia uo wadiuzire, nao wamerie kutumia iro mali rose orelipiloghe kwa wundu ghodu. 16Mali rose Mlungu uwusire kwa aba ni redu isi na wana wedu. Idana ijo jose Mlungu ukuzerie kubonye bonya.”

17Niko Jakobo ukafunganya, ukawijosa wana wake na waka wake aighu ya ngamila; 18ukadwa mfugho rake na mali rake rose orerishamieghe Padan-aramu, ukazoya charo chewuya Kanaani kwa ndee Isaaka. 19Ngelo iyo Labani orekoghe waghenda kuridumbua ng'ondi rake mafuri; na Raheli ukaiiwa milimu ya ndee. 20Aho Jakobo ukamja akili uo Labani Muarami, kwa kukaia nderemmanyishireghe wei ookunda kughenda anduangi. 21Jakobo ukakimbia na vilambo vake vose, ukaruwuka moda ghwa Eufrate, ukaghenda cha Gileadi isanga ja mghondinyi.

Labani kumnugha Jakobo

22Ituku ja kadadu Labani ukaghorelwa kukaia Jakobo wakimbirie. 23Nao ukawada wakwawo, ukamnugha Jakobo kwa matuku mfungade; wikamvikia kaavui aja Gileadi isanga ja mighondinyi. 24Ela Mlungu ukamchea Labani Muarami ndodonyi na kio ukamzera, “Kukulindie kusemzere Jakobo ilagho jingi jiboie angu jizamie.” 25Nao Labani ukamvikia Jakobo. Na Jakobo orekoghe wadunga hema yake mighondinyi. Labani nao na wandu wake wikabonya kambi mighondinyi Gileadi.

26Nao Labani ukamzera Jakobo, “Kwabonya wada huwu? Kunikalie nao kuwido wai wapo seji waka widwalwagha wunyika wudenyi. 27Kwaki korekimbiagha kwa kiviso, kukanikalia kusenighorie; kumangu sikufumire kwa maseko na chumbo, na ngoma na zeze? 28Kwaki kuseninekie hata wulalo gholaghana na kuwisusugha wai wapo na weke wawa? Kwabonyere ilagho ja wukelu na ndighi. 29Nadima kukubonya kiwiwi, ela Mlungu wa ndeyo waghorie nani ikwau ukighamba, ‘Kukulindie kusemzere Jakobo ilagho jingi jiboie angu jizamie!’ 30Idana kwaghenda kwa kukaia na bea mbaa eghala kenyu, kwaki sena koreiwagha milimu yapo?” 31Nao Jakobo ukamtumbulia Labani, “Nedeobua kukughoria ngighesha wei kwadima kunisoka wai wako kwa ndighi. 32Idana zighana oho kumoni, kukammbona mndungi aha kwapo uko na milimu yako, ubwagho. Oke lola kuwonyere imbiri yedu isi diwose icho chose chiko chako kuwuse.” Ela Jakobo nderemanyireghe wei Raheli waiwie milimu ya ndee.

33Labani ukangia hemenyi kwa Jakobo, na hemenyi kwa Lea, na hemenyi kwa waja wai wa kazi wawi; ela ndereiwonieghe anduangi. Ukafuma hemenyi kwa Lea ukangia kwa Raheli. 34Ela Raheli orekoghe waivisa iyo milimu matandikonyi gheseria aighu ya ngamila na kuiseria. Labani ukailola hemenyi kwake kose putu, ela ndereiwonieghe anduangi. 35Nao Raheli ukamzera ndee, “Mghosi, kusewawo ni ngolo angu nisekuwukiagha, ni angu nakaia na ghaja malagho gha kiwaka.” Nao Labani ukalola, ela ndereiwonieghe milimu yake anduangi.

36Niko Jakobo ukajokwa ni machu ukamrasha Labani ukamzera, “Nakosaki? Ni kaung'aki nabonya yakushekeria kukaniwinga na lubio lung'ane huwu? 37E hoku kwavisaka vilambo vapo vose, niki chako kwachiwona chiko kwapo? Chifunye idakoni imbiri ya wandu wapo na wandu wako, nawo witanye aghadi yapo na oho. 38Miaka ihi mirongo iwi nerekwanyeghe na oho, na jingi ng'ondi rako angu mburi rako nderikue vifu hata na jingi wori sijie bauru ingi yako kufuma kwa chagha chako. 39Iyo erebwaghiloghe ni nyamandu serekuredieghe anduangi, ela nedeilipa nimoni. Oho korenilawirieghe iyo yose ereiwiloghe na dime hata na kio wori. 40Najie wasi na ndighi; nadime ngibwaghwa ni iruwa, na nakio ngibwaghwa ni mbeo, na dilo rikanilema. 41Nakaie miaka ihi mirongo iwi nyumbenyi kwako. Miaka ikumi na inya nerekudumikieghe kwa wundu ghwa wai wako wawi na miaka irandadu ngilisha mfugho rako; hata huwo saki oho kwajighalusire ifungu japo mando ikumi. 42Ngera Mlungu wa aba, Mlungu wa Abrahamu, na Mlungu wa Isaaka umuobuagha nderekaieghe luwaru lwapo, kumangu loli kwanighalishire mikonu miduu. Mlungu wawonie wasi ghwapo na wudumiki ghwapo, niyo sababu ukacha ukakukemia ikwau.”

Mapatano aghadi ya Jakobo na Labani

43Nao Labani ukamtumbulia Jakobo, “Awa wai ni wana wapo, wana wawo ni wana wapo, mfugho rose kuko naro ni rapo, na vose kuviwonagha ni vapo. Neko na ilaghoki ini jebonya idime kwa awa wai wapo angu kwa wana wawo wiwivae? 44Nndoko dibonye mapatano, ghikaie wushahidi aghadi kodu.”

45Niko Jakobo ukawada igho ukajidunga sa nguro. 46Ukawizera wandu wake, “Tumbanyenyi magho.” Wikakwanya magho na kughiwika kitungu. Nawo wikajia kaavui na icho kitungu cha magho. 47Labani ukachiwanga icho kitungu cha magho Yegari-sahadutha,#31.47 Yegari-sahadutha: Kiarami, kutambua kwaro ni “Kitungu chedikumbusa.” na Jakobo ukachiwanga Galeedi#31.47 Galeedi: Kutambua kwaro ni kitungu chedikumbusa.. 48Nao Labani ukaghamba, “Ichi kitungu cha magho ni wushuhuda aghadi yapo na oho idime iji.” 49Kwa huwo niko cherewangiloghe Galeedi, na ija nguro ya igho ukaiwanga Mispa, angu oreghambieghe, “BWANA udizighane iji dameria kusighana.” 50Labani ukachuria kughora, “Kukawikoronga wai wapo, angu kukachuria waka wamu wazima, hata ngera mndungi ndekuwonagha, kumbuka angu Mlungu ni shahidi aghadi yapo na oho.”

51Nao Labani ukamzera Jakobo, “Wona ichi kitungu cha magho na ihi nguro ya igho naviwika aghadi yako na ini. 52Kitungu ichi cha magho ni wushuhuda, na igho iji ni wushuhuda angu ini sichaachiida ichi kitungu angu oho kuchiida ichi kitungu na iji igho kwa kubonyerana kiwiwi chingi. 53Mlungu wa Abrahamu na Mlungu wa Nahori, Mlungu wa weke aba ndetanye aghadi kodu.” Nao Jakobo ukaghema kwa Mlungu uo ndee Isaaka umuobuagha. 54Ukafunya kizongona ahoeni mghondinyi, ukawiwanga wandu wake wiche wije vindo, nawo wikaja vindo, wikalala aho mighondinyi kio chee.

55Nao nakesho kio, Labani ukawuka, ukawisusugha weke wawae na wai wake, ukawirasimia; ukawisigha ukaghala.

Currently Selected:

KUZOYA 31: TAITA

Highlight

Copy