KUZOYA 26

Isaaka kukaia Gerari

1Nao njala zima ikabuka sena iseko ija erekoghe ngelo ra Abrahamu. Isaaka ukaghenda Gerari kwa Abimeleki mzuri wa Wafilisti. 2BWANA ukamfutukia ukamzera, “Kusakeghenda cha Misri, kaia isangenyi iji nichaakughoria. 3Kaia aeni aha sa mghenyi nani nichakaia andwamweri na oho na kukurasimia; kwa kukaia masanga agha ghose nichakuneka oho na kivalwa chako, nani nichakatisha ighemi japo nijibonyere na ndeyo Abrahamu.#Kuz. 22.16-18 4Nichachichuria kivalwa chako sa nyerinyeri ra mlungunyi, nani nichachineka kivalwa chako masanga agha ghose. Na kwa kivalwa chako, mbari rose ra ndoenyi richanilomba irasimio; 5angu Abrahamu orelusikireghe lwaka lwapo, na kughiwadia malaghiro ghapo na sharia rapo.”

6Nao Isaaka ukakaia Gerari. Hata iji waisanga weremkotereghe malagho gha muka wake, 7ukawizera wei ni mruna kwa kukaia oreobueghe kuwighoria wei ni muka wake, ukighesha waisanga wicham'bwagha kwa wundu ghwa Rebeka, angu orekoghe ughokie na ndighi.#Kuz. 12.13; 20.2 8Hata iji wakaia aho matuku malazi, Abimeleki, mzuri wa Wafilisti, ukazighana idirishenyi, ukammbona Isaaka ukimmbwada-wada Rebeka mkake kwa lukundo. 9Nao Abimeleki ukammbanga Isaaka ukamzera, “Nachawona uhu ni mkako; kwaki kughorie wei ni mwanyinyu?” Isaaka ukatumbulia, “Ni angu neregheshereghe nadima kubwaghwa kwa wundu ghwake.” 10Abimeleki ukamzera, “Ni ilaghoki iji kwadibonyera? Eredimikagha mndumu ulale na muka wako, nao kudishekerie dingie ikosenyi.” 11Nao Abimeleki ukawilaghira wandu wose ukighamba, “Uo ose ucham'bonya kiwiwi mundu uhu angu muka wake uchabwaghwa.”

12Isaaka ukawa vindo andenyi ya isanga jija, na ugho mwaka ghoni ukakuwida mando ighana kuchumba seji orewaeghe. BWANA ukamrasimia, 13na mundu uo ukawuya mzuri. Nao ukachuria kufugha na kuwuya mundu m'baa wa mali nyingi. 14Orekoghe na ng'ondi, na mfugho na wadumiki wengi, hata Wafilisti wikammbonia iriso. 15Kwa huwo Wafilisti wikavisiria viriwa vose verekoteroghe ni wadumiki wa ndee Abrahamu iji orekoghe moyo. 16Nao Abimeleki ukamzera Isaaka, “Fuma kughende, angu oho kwakaia na ndighi kudichumba isi.”

17Isaaka ukafuma aho ukadunga kambi yake vololonyi ya Gerari, ukakaia aho. 18Isaaka ukavirua viriwa vose va machi verekoteroghe matuku gha ndee Abrahamu, angu Wafilisti werekoghe wavisiria nyuma ya kifwa cha Abrahamu. Niko aho ukavineka marina ghaja gheni ndee oreviwangieghe. 19Ela iji wadumiki wa Isaaka werekotereghe aja vololonyi na kupata kiriwa chiko na ndoria ya machi, 20walisha wa aho Gerari wikazoya kurashana na walisha wa Isaaka wikighamba, “Agha ni machi ghedu.” Isaaka ukachiwanga icho kiriwa, Eseki#26.20 Eseki: Kutambua kwaro ni “Marashano.” angu wererashaneghe nao. 21Wikakota kiriwa kizima na icho wikarashania wokoni; kwa huwu ukachiwanga Sitana.#26.21 Sitana: Kutambua kwaro ni “Wumaiza.” 22Nao ukasoghoda imbiri kufuma aja, ukakota kiriwa kizima, ela icho ndecherewikwanyireghe anduangi; niko icho ukachiwanga Rehobothi#26.22 Rehobothi: Kutambua kwaro ni “Wuhuru.” ukighamba “Angu idana BWANA wadipatira wulalo, nesi dichapata mvono isangenyi.”

23Isaaka ukafuma aho, ukaghenda hata Beer-sheba. 24Nao BWANA ukamfutukia icho kio cheni ukamzera, “Ini ne Mlungu wa ndeyo Abrahamu, kusakeobua angu ini neko andwamweri na oho, nani nichakurasimia na kuchichuria kivalwa chako kwa wundu ghwa mdumiki wapo Abrahamu.” 25Kwa huwo Isaaka ukaagha madhabahu aho, ukamtasa BWANA sena ukadunga hema yake aho, wadumiki wake wikakota kiriwa.

Mapatano aghadi ya Isaaka na Abimeleki

26Niko Abimeleki na Ahuzathi mnjama wake, andwamweri na Fikoli, mbaa wa majeshi ghake, wikafuma Gerari kumghendia Isaaka.#Kuz. 21.22 27Isaaka ukawikotia ukighamba, “Kwaki mchagha kwapo sena mkimanya angu morezamiloghe ni ini hata mkaniwinga?” 28Nao wikatumbulia, “Ni angu dawona worinyi kukaia BWANA oko andwamweri na oho, niko dawona ni nicha dibonye ighemi aghadi ya oho na isi, sena dibonye mapatano na oho, 29kukaia ndekuchaadibonyera kiwiwi chingi sa iji koni disekubonyere kiwiwi. Ela dakubonyere nicha, dikakusigha kughende kwa sere. Ola idana kwakaia mrasimilwa wa BWANA.” 30Nao ukawibonyera karamu nawo wikaja na kunywa. 31Ituku ja kawi wikawuka nakesho kio na kubonyerana ighemi, na Isaaka ukawifumira, nawo wikaghenda chia yawo kwa sere. 32Ituku jija jeni, wadumiki wa Isaaka wikacha na kumghoria malagho gha kiriwa werechikotereghe wikamzera, “Dapata machi.” 33Nao Isaaka ukachiwanga icho kiriwa Shiba;#26.33 Shiba: Kutambua kwaro ni “Ighemi.” kwa huwo muzi ugho ghwawangwa Beer-Sheba#26.33 Beer-sheba: Kutambua kwaro ni “Kiriwa cha Ighemi” angu “Kiriwa cha Rija Mfungade.” hata linu.

Waka wa kighenyi wa Esau

34Nao iji Esau wavika miaka mirongo ina, ukalowua wai wawi wa Wahiti: Judithi, mwai wa Beeri na Basemathi, mwai wa Eloni. 35Waka awo wikawiredia Isaaka na Rebeka irangi ja wasi.

Currently Selected:

KUZOYA 26: TAITA

Highlight

Copy