KUZOYA 13

Kusighana kwa Abramu na Loti

1Nao Abramu ukajoka kufuma Misri, uo moni, mkake, na vose orekoghe navo, andwamweri na Loti, wikangia Negebu. 2Abramu orekoghe mzuri nandighi wa mfugho, feza na dhahabu. 3Ukaghenda kufuma Negebu hata ukavika Betheli, aja oredungieghe hema yake imbiri, ghadi na ghadi ya Betheli na Ai, 4andu orekoghe waagha madhabahu, niko aho ukamtasa BWANA. 5Na Loti, uo orenughaneghe na Abramu, orekoghe na mfugho wokoni, na hema wori. 6Kwa huwu isanga ndejeredimieghe kuwikata wose anduangi, angu werekoghe na mfugho nyingi nandighi. 7Marashano ghikawuka aghadi ya walisha wa Abramu na walisha wa Loti. Ngelo iyo, Wakanaani na Waperizi werekoghe wikikaia andenyi ya ijo isanga.

8Abramu ukamzera Loti, “Isi de wandu wamweri; ndeifane kodu walisha wako na wapo wirashaneghe. 9Nechi isanga heji ni iduu; ndedisighane. Kukasaghua kughenda mkonu ghwa kiwaka, nichaghenda mkonu ghwa kiwoni, kukaghenda mkonu ghwa kiwoni nichaghenda mkonu ghwa kiwaka.”

10Loti ukazighana kose, ukawona vololo yose ya Jordani hata kuvikia Soari yanyoshere machi kula andu sa mbuwa ya BWANA, karakara na isanga ja Misri; aho ni imbiri BWANA useinonie Sodoma na Gomora.#Kuz. 2.10 11Loti ukakusaghuya moni vololo yose ya Jordani, ukaghenda cha mashariki; huwo niko weresighaneghe. 12Ela Abramu ukakaia andenyi ya isanga ja Kanaani, na Loti ukakaia aghadi ya mizi iko vololonyi, ukasoghoda ukidunga hema yake hata ukavika Sodoma. 13Na wandu wa Sodoma werekoghe wawiwi na wakaung'a na ndighi imbiri ya BWANA.

Abramu kusoghoda cha Hebroni

14Nyuma ya Loti kughenda, Mlungu ukamzera Abramu, “Kufuma andu aho kuko, wusira meso ghako kuzighane kose; kaskazinyi, kusinyi, mashariki, na magharibi; 15angu isanga iji jose kujiwonagha, nichakuneka oho na kivalwa chako kwa kala na kala.#Mab. 7.5 16Nichakuneka kivalwa kingi sa teri ya ndoenyi, na ichakaia iji mndungi uchaadima kutala teri iko ndoenyi, niko uchaadima kutala kivalwa chako. 17Wuka kujisele isanga wulacha na wushapa ghwaro, kwa kukaia nichakuneka oho.” 18Abramu ukainja hema yake, ukaghenda na kukaia kaavui na midi ya kuela ya Mamre aja Hebroni, ukamuaghia BWANA madhabahu.

Currently Selected:

KUZOYA 13: TAITA

Highlight

Copy