KUZOYA 10

Kivalwa cha wana wa Nuhu

(1 Mal. 1.5-23)

1Ichi nicho kivalwa cha wana wa Nuhu. Shemu, Hamu na Jafethi, nawo werevaeghe wana wa womi nyuma ya gharika. 2Wana wa Jafethi ni: Gomeri, Magogu, Madai, Javani, Tubali, Mesheki, na Tirasi. 3Wana wa Gomeri ni: Ashkenazi, Rifathi, na Togarma. 4Wana wa Javani ni Elisha, Tarshishi, Kitimu, na Dodanimu. 5Awa niwo werevaeghe wandu wikaera pwani yose; nawo ni kivalwa cha Jafethi, kunughana na masanga ghawo, viteto vawo, nyumba rawo, na mbari rawo.

6Wana wa Hamu ni: Kushi, Misri, Puti, na Kanaani. 7Wana wa Kushi ni: Seba, Hawila, Sabta, Raama, na Sabteka. Wana wa Raama ni Sheba na Dedani. 8Kushi ni ndee Nimrodi, nao orekoghe ing'oni ja imbiri ndoenyi. 9Orewurieghe mdiwi m'baa kwa ndighi ra BWANA. Niko wandu wizeranagha, “BWANA ndekubonye kukaie mdiwi m'baa sa Nimrodi.” 10Kuzoya kwa kubonya nguma kwake ni aho Babeli, Ereki, na Akadi andenyi ya isanga ja Shinari. 11Kufuma isanga jija ukaghenda Ashuru, na aho ukaagha Nineve, Rehoboth-Iri, Kala, 12na Reseni, ghuja muzi m'baa ghuko ghadi na ghadi ya Nineve na Kala. 13Wana wa Misri ni Waludi, Wanami, Walehabi, 14Wanaftuhi, Wapathrusi, Wakusluhi, (aho niko Wafilisti wifumie) na Wakaftori.

15Kanaani orevaeghe mwana wake wa imbiri Sidoni, na Hethi; 16niwo werewurieghe kivalwa cha Wajebusi, Waamori, Wagirgashi, 17Wahivi, Waariki, Wasimi, 18Waarivadi, Wasemari, na Wahamathi. Konyuma icho kivalwa cha Wakanaani chikaera, 19na mwano ghwawo ghukachurikia kufuma Sidoni kulangaya cha Gerari hata Gaza cha kusinyi, na kulangaya cha Sodoma na Gomora, Adma na Zeboiimu, hata kuvika Lasha cha mashariki. 20Awo niwo wana wa Hamu kunughana na kichuku chawo, viteto vawo, masanga ghawo na mbari raro.

21Shemu, mruna m'baa Jafethi, ni ndee Waebrania. 22Wana wake ni: Elamu, Ashuru, Arpakishadi, Ludi na Aramu. 23Wana wa Aramu ni: Uzi, Huli, Getheri, na Mashi. 24Arpakishadi ni ndee Shela, na Shela, ni ndee Eberi. 25Eberi ukava wana wawi umu orewangwaghwa Pelegi, angu kwa matuku ghake wurumwengu ghorewaghikieghe, na mruna orewangwagha Joktani. 26Joktani ukawiva Almodadi, Shelefu, Hazarimawethi, Jera, 27Hadoramu, Uzali, Dikila, 28Obali, Abimaeli, Sheba, 29Ofiri, Hawila, na Jobabu; awa wose werekoghe wana wa Joktani. 30Isanga jawo werejikaieghe jerekoghe kufuma Mesha, kulangaya cha Sefari hata isanga ja mighondinyi ichia cha mashariki. 31Awo niwo wana wa Shemu kunughana na vichuku vawo, viteto vawo, masanga ghawo, na mbari rawo.

32Ichi nicho kichuku cha wana wa Nuhu kunughana na kivalwa chawo, na mbari rawo, na kufumanya nawo, wadamu wikaera kose wurumwengunyi nyuma ya iyo gharika.

Currently Selected:

KUZOYA 10: TAITA

Highlight

Copy