Luk 9

Yêsu wơh mơjĭt-'bar 'nu bơngai pơhrăm năm chă bơtho tơdrong 'nao 'lơ̆ng

1Yêsu krao mơjĭt-'bar 'nu bơngai pơhrăm păng Sư, ăn kơ lu sư gơh pơpuh tơlĕch lu yang kơnê̆ đơ̆ng akâu bơngai păng ăn kơ lu sư gơh pơklaih tơdrong jĭ jăn. 2Đơ̆ng noh na Yêsu wơh lu sư năm chă bơtho đe tơdrong 'Bok Kei-Dei wă pơgơ̆r kon bơngai păng pơklaih lu đe jĭ jăn. 3Yêsu khan thoi âu: “Iĕm năm bơtho 'nĕ kơ chĕp ba tơmam kiơ kiơ. Iĕm 'nĕ kơ chĕp ba 'long jra, kư̆m 'nĕ kơ chĕp ba kơdŭng tah tơmam păng tơmam sa, mă jên. Păng iĕm hrŭk ba ao minh blah đĕch. 4Dah iĕm mơ̆t oei tơ hnam ayơ, iĕm oei hloi tơ hnam noh đĕch truh tơ năr iĕm wă năm tơ pơlei nai. 5Dah pơlei ayơ ưh kơ wă sơng iŏk iĕm, thoi noh na lăp iĕm brŏk đơ̆ng pơlei noh iĕm sơpuih 'bruih tơ jơ̆ng iĕm wă tơbăt ăn kơ lu sư 'Bok Kei-Dei wă phak ning-mônh.”

6Lăp Yêsu bơtho lu bơngai pơhrăm păng Sư đang boih, na lu sư năm jơ̆p kơ pơlei chă bơtho tơdrong 'nao 'lơ̆ng păng pơklaih bơngai jĭ jăn.

Hêrôt hơwơ̆l kơ Yêsu

7Pơtao Hêrôt kơtơ̆ng dôm tơdrong mă Yêsu pơm na sư hơwơ̆l kơ Yêsu, ưh kơ băt Sư bu, yua kơ lu bơngai mơ'nah khan Yêsu Yôhan mă pơm kơ đe 'batem ki, khan sư lôch iung arih. 8Lu bơngai mơ'nah dơ̆ng khan Yêsu Êli mă pơtruh nơ̆r 'Bok Kei-Dei sơ̆. Mơ'nah dơ̆ng kư̆m khan Yêsu minh 'nu bơngai pơtruh nơ̆r 'Bok Kei-Dei nai sơ̆ iung arih dơ̆ng. 9Hêrôt sư khan: “Gah Yôhan inh chơ̆ng ako sư boih, na bơngai mă pơm lơ tơdrong mơsêh noh bu dơ̆ng?” Na Hêrôt 'maih chă tơ'bơ̆p Yêsu.

Yêsu 'me pơđăm-rơbâu 'nu bơngai

10Lu jơ̆ng 'bang Yêsu wih roi kơ Sư dôm tơdrong sư jang. Na Yêsu anhăk ba kơdrô̆ lu sư tơ Pơlei 'Betsaiđa. 11Lăp lu kon pơlei pơla kơtơ̆ng Yêsu wă năm tơ pơlei ei lu sư kiơ̆ hloi Yêsu. Na Yêsu kư̆m ưh kơ khă lu sư ôh. Sư bơtho lu đe ei tơdrong 'Bok Kei-Dei wă pơgơ̆r kon bơngai. Na Yêsu kư̆m chă pơklaih rah dôm lu bơngai jĭ jăn mơ̆n.

12Lăp hiưp kơsơ̆, đei mơjĭt-'bar 'nu bơngai pơhrăm păng Sư năm tơ Sư na khan: “Ih kuă kơ kiơ athei lu đe kon pơlei pơla năm tơ lu pơlei kiơ̆ âu wă kơ lu sư răt kơdih tơmam sa, chă kơdih anih tep? Anih bơ̆n âu kueng dêh.”

13Mă-lei Yêsu khan kơ lu sư: “Iĕm 'me sư wăi.”

Lu sư khan: “Bơ̆n đei lăp pơđăm tŏ 'bĕng mi păng 'bar tŏ ka đĕch, na Ih wă kơ nhôn năm răt tơmam sa wă 'me lu đe tơpôl âu dah kiơ?”

14Lu đe ei đei dang pơđăm-rơbâu 'nu bơngai jô̆ gah drŏ-nglo đĕch. Na Yêsu khan kơ lu bơngai pơhrăm păng Sư dơ̆ng: “Iĕm athei lu sư tơoei akŭm hơdai, rim jơ'bôt dang pơđăm-jĭt 'nu.”

15Na lu bơngai pơhrăm păng Sư athei đĭ-đăng lu sư oei hơdai kiơ̆ thoi Yêsu athei.

16Na Yêsu iŏk pơđăm tŏ 'bĕng mi păng 'bar tŏ ka ei, ngoi tơ plĕnh krao khan bơnê kơ 'Bă Sư 'Bok Kei-Dei. Đơ̆ng noh Sư phĕ 'bĕng mi păng ka ei ăn kơ lu bơngai pơhrăm păng Sư chă asong kơ lu bôl buăl. 17Đĭ-đăng lu đe ei sa phĭ mah rơkah rơkai boih. Đơ̆ng noh lu bơngai pơhrăm păng Sư chă dônh tah tơ bai mă đơ̆ng đêl lu sư sa rơkah, kư̆m mah oei 'bĕnh kơ mơjĭt-'bar tŏ bai plơ̆ng dơ̆ng.

Pêtrôs băt kơ Yêsu 'Bok Krist

18Minh năr ei Yêsu oei krao khan kơdrô̆, na lu bơngai pơhrăm păng Sư năm tơ Sư. Na Yêsu jet lu sư: “Lu kon pơlei pơla sư krao anăn Inh bu?”

19Lu sư khan: “Mơ'nah đe krao Ih Yôhan, bơngai pơm kơ đe 'batem. Mơ'nah khan Ih Êli, bơngai mă pơtruh nơ̆r 'Bok Kei-Dei sơ̆. Mơ'nah dơ̆ng kư̆m khan Ih minh 'nu bơngai pơtruh nơ̆r 'Bok Kei-Dei nai sơ̆ iung arih dơ̆ng.”

20Na Yêsu jet lu sư dơ̆ng: “Bĭ iĕm khan Inh bu?”

Pêtrôs khan: “Ih 'Bok Krist mă 'Bok Kei-Dei wơh pơgơ̆r kon bơngai.”

Yêsu roi tơdrong sư wă lôch

21Na Yêsu khă lu bơngai pơhrăm păng Sư kuă ăn kơ lu sư chă roi kơ đe Sư boih 'Bok Krist. 22Na Sư khan dơ̆ng: “Inh Kon Bơngai gô đei tơdrong pơmat-tat. Lu đe kră dêh char Juđê, lu đe 'bok soi tih, lu thây bơtho tơdrong juăt đe Juđê kuă chu yom kơ Inh na athei đe pơlôch Inh. Mă-lei kơtĕch kơ pêng năr đơ̆ng rŏng kơnh 'Bok Kei-Dei gô tơiung arih Inh dơ̆ng.”

23Na Yêsu khan kơ bơngai tơpôl lơ mă năm mơ̆ng Sư: “Dah bơngai bu wă kiơ̆ Inh, sư athei tŭk đĭ dôm tơdrong sư kơdih na rim năr sư athei tôi kơdih 'long pơglang chu lôch yua kơ wă kiơ̆ Inh. 24Bơngai bu ưh kơ chu lôch yua kơ tơdrong Inh, bơngai noh lôch hoh hoh đĕch ưh kơ yua kiơ. Bơngai bu chu lôch yua kơ tơdrong Inh, sư 'noh gô arih ling-lang. 25Mă bu mơdrŏng đei tôm mŭk tơmam tơ ala teh âu, dah sư ưh kơ arih ling-lang lei truh sư lôch ưh pă đei yua kiơ boih. 26Ning-mônh Inh Kon Bơngai gô jur tơ ala teh âu dơ̆ng, hơdai păng lu linh jang 'lơ̆ng. Năr 'noh kơnh 'Bă Inh gô ăn kơ Inh mơsêh mơyang 'lơ̆ng rŏ tơpă. Na bơngai bu khan sư kiơ̆ Inh boih, mă-lei sư kơdơ̆ mơlâu kơ đe na kuă kơ bơtho kơ đe tơdrong Inh, năr 'noh kơnh Inh kư̆m kuă kơ sư mơ̆n. 27Inh khan kơ iĕm tơpă, đei lăm lu iĕm âu mơ'nah ưh tam lôch ôh, lu sư gô 'bôh tơdrong 'Bok Kei-Dei pơgơ̆r tơpă.”

Yêsu tơwir akâu sư

28Dang tơhngam năr đơ̆ng rŏng kơ Yêsu bơtho tơdrong noh Yêsu anhăk lu bơngai pơhrăm păng Sư, anăn lu sư Pêtrôs, Yôhan păng Yakơ, lu sư tŏk tơ kông kơdrô̆ lu sư wă krao khan. 29Kơplah Yêsu oei krao khan, muh măt Sư tơwir hloi păng ao Sư rang hơdah mơnhal. 30Đơ̆ng noh 'bôh blư kơ Môis păng Êli jur pơma dơnuh păng Yêsu. 31Akâu jăn bre sư kư̆m rang hơdah mơ̆n. Bre sư pơma dơnuh păng Yêsu tơdrong Sư wă lôch iung arih tơ Pơlei Jêrusalem kiơ̆ thoi 'Bok Kei-Dei ată lê̆ hơdrol. 32Kơplah noh Pêtrôs păng bre bôl sư oei tep. Lăp lu sư hơđơ̆r, lu sư 'bôh akâu Yêsu mơnhal thoi noh păng 'bôh bre Môis păng Êli oei pơma dơnuh păng Yêsu. 33Lăp bre noh wă weh đơ̆ng Yêsu, na Pêtrôs khan kơ Yêsu: “Ơ 'Bok Thây, bơ̆n oei tơ âu hiôk dêh. Lê̆ kơ nhôn pơm kơ bơ̆n pêng tŏ bơsŭn; minh pôm pơm kơ Ih, minh pôm pơm kơ Môis, minh pôm pơm kơ Êli.” Pêtrôs pơma thoi noh, sư pơma hơdrol kơ đon. 34Kơplah Pêtrôs oei pơma thoi noh 'bôh glĭp kơ hơmơ̆l jur gom lu sư na lu bơngai pơhrăm păng Yêsu hli. 35Păng đei nơ̆r 'Bok Kei-Dei pơma đơ̆ng lăm hơmơ̆l noh khan: “Sư âu Kon Inh. Inh athei Sư jang tơdrong Inh. Na iĕm ling-lang athei chu yom kơ Sư.”

36Lăp 'Bok Kei-Dei pơma thoi noh đang boih, hơloh kơ jua kơ bre Môis păng Êli, pă minh 'nu Yêsu đĕch oei 'bơ̆t ei. Kơplah ei sơ̆ lu sư ưh kơ roi ôh kơ đe tơdrong noh.

Yêsu pơklaih bơngai 'lơ̆p yang mơ̆t

37Minh năr đơ̆ng rŏng lu sư jur đơ̆ng kông ei boih na tơ'bơ̆p hĭ kơ lu đe tơpôl. 38Đei minh 'nu lăm bơngai tơpôl ei pơma re khan kơ Yêsu thoi âu: “Ơ 'Bok Thây, apinh Ih lăng kon pôm inh 'biơ̆ bĕ. 39Phŏ phŏ yang kơnê̆ glơ̆m sư na sư ôr. Yang kơnê̆ pơm kơ sư lĕch đak hai djơdjih djơdjah. Yang kơnê̆ glơ̆m pơm kơ sư jĭ dêh 'mơ̆i na jăk jăi. 40Inh athei lu bơngai pơhrăm păng Ih pơpuh yang kơnê̆ noh ră mă-lei sư ưh kơ gơh.”

41Na Yêsu khan: “Ơ lu iĕm mă oei lui rơdu hơnơ̆ng kư̆m oei pơm yoch, iĕm wă kơ Inh oei hơdai iĕm đunh dang yơ 'mơ̆i na iĕm lui kơjăp? Iĕm wă kơ Inh gleh dang yơ 'mơ̆i na iĕm gơh pơklaih đe?”

Na Yêsu khan kơ bơngai ei: “Năm ba kon ih tơ âu năm.”

42Kơplah 'lơ̆p noh năm wă jê̆ Yêsu na yang kơnê̆ glơ̆m lê̆ sư arăng jơ'mro. Na Yêsu pơma pơpuh tơlĕch lê̆ hloi yang kơnê̆ 'nei đơ̆ng akâu sư ưh pă layơ mơ̆t dơ̆ng. Na Sư pơjao 'lơ̆p 'nei kơ 'bă sư dơ̆ng. 43Na đĭ-đăng lu đe 'bơ̆t ei sơleng kơ đon yua kơ 'bôh 'Bok Kei-Dei pơm tơdrong mơsêh mơyang thoi noh.

Yêsu roi dơ̆ng gah tơdrong Sư wă lôch

Kơplah lu bơngai tơpôl oei tơchĕng sơleng kơđon kơ dôm tơdrong Yêsu pơm, na Yêsu khan kơ lu bơngai pơhrăm păng Sư kơdrô̆ lu sư thoi âu: 44“Inh wă kơ iĕm tơguăt lăm đon tơdrong âu: Đe gô rôp pơjao Inh Kon Bơngai tơ ti kon bơngai tơ ala teh âu.” 45Mă khan Yêsu pơma hơdah tơdrong noh, lu sư ưh kơ hlôh păng lu sư kư̆m ưh kơ pơ̆n jet Yêsu.

Bu pơm tih kơ bơ̆n?

46Lu bơngai pơhrăm păng Yêsu oei pơjah dih băl bu lăm lu sư pơm tih 'biơ̆ kơ tơduă lu sư. 47Yêsu ưh kơ kơtơ̆ng ră lu sư pơjah thoi noh mă-lei Sư băt. Na Yêsu năm dui iŏk minh 'nu 'lơ̆p athei dơ̆ng jê̆ Sư, 48na khan kơ lu đe ei: “Bơngai bu sơng iŏk bơngai 'lơ̆p âu, yua kơ bơngai 'lơ̆p âu lui kơ Inh, bơngai noh dang sơng iŏk Inh. Bơngai bu sơng iŏk Inh, bơngai noh dang sơng iŏk 'Bok Kei-Dei mă wơh Inh mơ̆n. Bơngai bu lăm lu iĕm pơm iĕ hloh, bơngai noh boih pơm tih.”

Bơngai bu huay ayăt kơ bơ̆n bơngai noh kiơ̆ đon bơ̆n.

49Na Yôhan khan kơ Yêsu: “Ơ 'Bok Thây, nhôn 'bôh minh 'nu bơngai gơnang kơ anăn Ih wă pơpuh yang kơnê̆ đơ̆ng đe, na nhôn khă sư yua kơ sư ưh kơ jang hơdai bơ̆n.”

50Mă-lei Yêsu khan kơ Yôhan: “'Nĕ pă khă sư yua kơ bơngai bu huay ayăt kơ bơ̆n, bơngai noh kiơ̆ đon bơ̆n.”

Yêsu wă năm tơ Pơlei Jêrusalem hơdrol kơ wih tơ plĕnh

51Lăp wă jê̆ năr Yêsu wă tŏk tơ plĕnh Sư pơkă khan Sư gô năm tơ Pơlei Jêrusalem hơdrol 'mơ̆i. 52Thoi noh na Sư wơh lu bôl Sư năm hơdrol kơ Sư wă hơmet kơ Yêsu minh pôm anih oei tơ pơlei đe lăm dêh char Samri. 53Lăp Yêsu truh tơ pơlei ei lu kon pơlei pơla ưh kơ ăn Yêsu oei tơ pơlei sư. Lu sư hil yua kơ lu sư băt kơ Yêsu wă năm tơ Pơlei Jêrusalem. 54Lăp bre Yakơ păng Yôhan bơngai pơhrăm păng Sư 'bôh thoi noh boih, bre sư khan kơ Yêsu: “Ơ 'Bok, Ih hăm wă kơ bơ̆n athei ŭnh jruh đơ̆ng plĕnh sa pơlei đe âu?”

55Na Yêsu hue tơ rŏng khan kơ bre sư: “Bơ̆n ưh kơ pơm kiơ̆ 'nei ôh.”

56Đơ̆ng noh na lu sư weh tơ pơlei nai đĕch.

Đei bơngai khan wă kiơ̆ Yêsu

57Kơplah lu sư oei năm rok trong đei minh 'nu bơngai khan kơ Sư: “Mă Ih năm tơ yơ yơ, inh wă kiơ̆ Ih ngăl.”

58Yêsu khan kơ sư: “Mơja đei anih tep, sem păr kư̆m đei tơpu. Inh Kon Bơngai ră mă-lei ưh kơ đei anih tep ôh.”

59Yêsu khan kơ minh 'nu bơngai nai dơ̆ng: “Kiơ̆ Inh bĕ.” Mă-lei bơngai ei khan: “Ơ 'Bok, gô inh năm 'bŭ 'bă inh 'mơ̆i.”

60Yêsu khan: “Ưh ôh, ih kiơ̆ Inh dang ei năm bơtho tơdrong 'Bok Kei-Dei wă pơgơ̆r kon bơngai. Tơdrong 'bŭ bơngai lôch, lê̆ tơduă lu bơngai lôch tơ'bŭ băl.”

61Đei minh 'nu dơ̆ng khan: “Ơ 'Bok, inh wă kiơ̆ Ih mơ̆n mă-lei gô inh pơtruh kơ đe mĕ 'bă inh 'mơ̆i.”

62Na Yêsu khan kơ sư: “Bơngai bu wă rơuơ mir sư wă kơ tơpăt, sư 'noh ưh kơ hue-huo 'ma 'ngiĕo ôh. Na bơngai bu wă kiơ̆ Inh kư̆m athei adrin thoi noh mơ̆n. Tơ̆ng sư hue-huo 'ma 'ngiĕo lei sư ưh kơ trŏ kơ bơtho tơdrong 'Bok Kei-Dei pơgơ̆r kon bơngai ôh.”

Kră Yang Yêsu wơh tơpơh-jĭt 'nu bơngai chă năm bơtho đe

Currently Selected:

Luk 9: bdq

Highlight

Copy