Luk 4
4
1Lăp Yêsu wih đơ̆ng krong Jôrđăn, Yêsu Sư 'bĕnh blai kơ Yang Bơhngol 'Lơ̆ng na Yang Bơhngol 'Lơ̆ng anhăk ba Sư, 2truh tơ char glă chơngue. Sư oei tơ ei puăn-jĭt năr. Na kơplah puăn-jĭt năr ei đei yang Satan năm pơhlŭ Sư. Kơplah noh Yêsu ưh kơ đei sŏng sa ôh. Lăp truh kơ puăn-jĭt năr ei boih na Sư pơngot.
3Thoi noh na đei yŏng yang kơnê̆, anăn sư Satan pơhlŭ Sư khan: “Dah Ih Kon 'Bok Kei-Dei tơpă Ih kuă kơ kiơ sơkat kơ tơmo âu jing 'bĕng?”
4Na Yêsu khan kơ sư: “Ưh ôh, yua kơ sơ̆p hla bơar 'Bok Kei-Dei đei chih khan lê̆ sơ̆ thoi âu: ‘Kon bơngai ưh kơ đei arih đơ̆ng tơmam sa đĕch ôh.’ ”
5Yang Satan anhăk Yêsu tŏk tơ kông kơjung na tơ'bôh ăn kơ Sư jơ̆p-jang kơ dêh char hloi. 6Na yang Satan khan dơ̆ng kơ Yêsu thoi âu: “Ih lăng deh teh đak âu. Na inh gô ăn kơ Ih pơgơ̆r đĭ-đăng kơ teh đak âu rŏ dêh. Đe pơjao ăn kơ inh đĭ teh đak âu boih na inh kư̆m gô wă pơjao ăn kơ bơngai nai dơ̆ng, 'noh gô mơ̆ng kơ inh ăn đĕch. 7Na dah Ih chu drap tơ teh kơkuh kơ inh, lei inh gô pơjao ăn kơ Ih đĭ-đăng teh đak âu hloi.”
8Na Yêsu khan kơ yang Satan ei thoi âu: “Đe chih tơ lăm sơ̆p hla bơar 'Bok Kei-Dei sơ̆ thoi âu: ‘Bơ̆n athei kơkuh kơ Kră Yang bơ̆n 'Bok Kei-Dei đĕch. 'Bok Kei-Dei ưh kơ wă kơ bơ̆n kơkuh kơ yang nai ôh.’ ”
9Yang Satan kư̆m anhăk ba Yêsu năm tơ Pơlei Jêrusalem. Na sư anhăk ba Yêsu tŏk tơ kơpal bơbŭng hnam akŭm tơm. Na yang Satan ei khan: “Dah Ih Kon 'Bok Kei-Dei tơpă, lei Ih kuă kơ kiơ kơtah đơ̆ng kơpal âu tơ teh sŭng, 10yua kơ đe đei chih lăm sơ̆p hla bơar 'Bok Kei-Dei sơ̆ khan:
‘'Bok Kei-Dei gô ăn linh jang 'lơ̆ng Sư wei-lăng Ih,’
11‘lu sư gô drơng iŏk Ih lăm tơpang ti lu sư wă kơ Ih huay kơ huŏng hơtat kơ tơmo tơ ala.’ ”
12Na Yêsu khan kơ yang Satan ei thoi âu: “Ưh ôh. Yua kơ lăm sơ̆p hla bơar 'Bok Kei-Dei đe đei chih khan thoi âu: ‘Iĕm 'nĕ kơ pơlong Kră Yang bơ̆n 'Bok Kei-Dei ôh.’ ”
13Lăp yang Satan ei pơhlŭ Yêsu tôm tơdrong boih na 'bơ̆t ei sư weh tơ nai 'mơ̆i.
Yêsu pơtơm jang tơdrong Sư
14Đơ̆ng noh na Yêsu wih tơ dêh Galilê. Yang Bơhngol 'Lơ̆ng tơgŭm hloi Sư pơm tơdrong mơsêh mơyang. Na đe chă roi pơư pơang tơdrong Sư jơ̆p kơ tơring kiơ̆ ei. 15Yêsu bơtho tơ lu hnam akŭm đe Galilê na đĭ-đăng bơngai ư-ang kơ Sư.
Kon Pơlei Nasaret ưh kơ lui kơ Yêsu
16Klaih kơ noh Yêsu wih tơ Pơlei Nasaret, pơlei Sư kơdih. Lăp truh kơ năr pơdơh Sa'bat Sư năm akŭm tơ hnam 'Bok Kei-Dei pơlei Sư kơdih, yua kơ rim năr pơdơh Sa'bat Sư juăt kơ akŭm ngăl. Lăp truh tơ ei Sư iung wă đŏk kơ đe sơ̆p hla bơar 'Bok Kei-Dei. 17Đe ăn kơ Yêsu sơ̆p hla bơar Êsai, bơngai pơtruh nơ̆r 'Bok Kei-Dei adrol sơ̆. Na Yêsu plơ̆ lăng sơ̆p hla bơar ei 'bơ̆t mă đei chih thoi âu:
18“Yang Bơhngol 'Lơ̆ng 'Bok Kei-Dei oei hơdai Inh.
Sư rơih Inh wă năm bơtho ăn tơdrong 'nao 'lơ̆ng kơ lu bơngai dơnuh hin păng pơlung lu bơngai ơh sơ'ngon.
Sư wơh Inh roi tơdrong Sư wă tơlĕch lu bơngai đe phak,
păng pơklaih lu bơngai măt tol.
Sư wơh Inh pơklaih lu bơngai mă đe pơjuă pơđep,
19păng roi kơ đe tơdrong Kră Yang wă pơklaih kon bơngai dang ei.”
20Yêsu đŏk lăng tơdrong noh đang boih na Sư đơ̆p lê̆ hla bơar noh pơdrĕo ăn kơ bơngai wei-lăng lăm hnam akŭm ei. Đơ̆ng noh Sư tơoei wă bơtho thoi đe noh juăt sơ̆, na đĭ-đăng kơ lu bơngai oei lăm hnam akŭm ei pơglăn lăng tơ Sư. 21Na đơ̆ng ei Yêsu khan kơ lu sư: “Tơdrong mă Êsai khan lê̆ hơdrol noh sơ̆, năr âu boih iĕm 'bôh tơdrong noh truh tơpă.”
22Na đĭ-đăng kơ lu sư lăp đon kơ Yêsu păng lu sư kư̆m sơleng kơ đon mơ̆n yua kơ Yêsu bơtho kơ lu sư 'bơ̆r đon hơgei tơpă. Na lu sư khan: “Bơngai âu kon Yôsep dah kiơ?”
23Na Yêsu khan kơ lu sư: “Iĕm wă jô̆ kơ Inh tơdrong đe juăt kơ pơma thoi âu: ‘Ơ 'bok thây pơgang, pơklaih tơdrong jĭ ih kơdih 'mơ̆i, yua kơ pơlei âu pơlei Ih kơdih na Ih athei pơklaih đe tơ âu kư̆m thoi nhôn kơtơ̆ng ang Ih pơklaih đe tơ Pơlei Kapernum ki.’ ”
24Na Yêsu khan dơ̆ng kơ lu sư thoi âu: “Inh khan kơ iĕm tơpă, lu bơngai pôm pơlei hăm bơngai pơtruh nơ̆r 'Bok Kei-Dei, lu sư ưh kơ wă sơng iŏk sư ôh. 25Na dang ei Inh roi pơtih gia kơ iĕm tơdrong noh: Kơplah Êli pơtruh nơ̆r 'Bok Kei-Dei tơ dêh char Isơrael âu sơ̆, kơplah lăm pêng sơnăm ưh kơ đei 'mi jơ̆p kơ dêh char Isơrael. Na đei tơdrong pơngot rơwĕt tơpă. Kơplah noh sơ̆ đei lơ yă adro tơ dêh char Isơrael. 26Mă-lei 'Bok Kei-Dei ưh kơ wơh Êli năm tơgŭm lu sư ôh. Sư wơh Êli năm tơgŭm minh 'nu yă adro tơ Pơlei Sarepta lăm dêh char Siđôn đĕch, noh kư̆m dêh char tơmoi. 27Kư̆m thoi noh mơ̆n, kơplah Êlisê pơtruh nơ̆r 'Bok Kei-Dei tơ dêh char Isơrael âu sơ̆ đei lơ bơngai jĭ chin lăm dêh âu. Mă-lei Êlisê ưh kơ đei pơklaih lu sư ôh. Sư pơklaih pôm 'bok Naman, bơngai đơ̆ng dêh char Siri đĕch, sư dêh char tơmoi mơ̆n.”
28Na lu bơngai oei mơ̆ng lăm hnam akŭm ei kơtơ̆ng thoi noh na đĭ-đăng kơ lu sư hil areh kơ Yêsu tơpă. 29Lu sư gruih graih iung rôp hloi Yêsu anhăk tơlĕch Sư đơ̆ng pơlei ei năm tơ kông 'bơ̆t jê̆ pơlei sư ei wă hiŏng hơtat Sư đơ̆ng kơpal jih nak 'nei ră. 30Mă-lei Yêsu klĕnh hloi yak kiơ̆ tŏk-bŏk đe, lĕch jăk hloi tơ nai.
Yêsu pơklaih bơngai yang mơ̆t
31Klaih kơ noh Yêsu năm tơ Pơlei Kapernum lăm dêh char Galilê ei mơ̆n. Na kơplah năr pơdơh Sa'bat Sư bơtho kon pơlei pơla tơ noh. 32Lu đe ei mơ̆ng mah chrêu kơ đon yua kơ dôm nơ̆r Sư bơtho gơh hơgei tơpă. 33Lăm hnam akŭm ei đei minh 'nu bơngai yang kơnê̆ mơ̆t, na sư pơma 'bơ̆r re khan: 34“Êi, Yêsu đơ̆ng Pơlei Nasaret, Ih wă pơm kiơ kơ khŭl nhôn? Inh băt mơ̆n Ih năm tơ âu wă pơrăm khŭl nhôn lah. Inh băt kơ Ih, Ih 'Bok 'Lơ̆ng Tơpăt đơ̆ng 'Bok Kei-Dei.”
35Na Yêsu khă yang kơnê̆ ei thoi âu: “E 'nĕ pă pơma. E jah lĕch đơ̆ng akâu sư âu wăi.” Na yang kơnê̆ ei hơloh glơ̆m bơngai yang mơ̆t ei 'bơ̆t anăp đe tơpôl, na lĕch jăk hloi đơ̆ng bơngai ei. Na bơngai ei kư̆m huay kơ jĭ ôh.
36Thoi noh na đĭ-đăng lu bơngai 'bôh Sư pơm thoi noh, lu sư sơleng kơ đon na sư tơjet dih băl khan: “Thoi yơ bơngai âu pơma thoi noh đĕch ră mă-lei yang kơnê̆ mah lĕch hloi?”
37Đơ̆ng Yêsu pơm thoi noh na đe kơtơ̆ng ang tơdrong Sư jơ̆p kơ tơring sư kiơ̆ ei.
Yêsu pơklaih lơ bơngai jĭ jăn
38Yêsu lĕch đơ̆ng hnam akŭm ei năm tơ hnam Simôn. Na tơnei Simôn bơlŏ kal dêh tơpă, na đe apinh Yêsu pơklaih sư. 39Na Yêsu năm tơ sư pơklaih hloi tơdrong jĭ sư 'nei. Na sư klaih hloi. Sư iung chă awih awăn kơ đe Yêsu.
40Lăp 'năr mơ̆t adrơ̆m kơsơ̆ ei, dôm lu bơngai jĭ jăn, bôl buăl sư anhăk ba tơ Yêsu. Na Sư pel hloi kơ̆l lu đe ei păng đĭ kơ lu sư klaih hloi kơtă ei.
41Na Yêsu kư̆m pơpuh lơ lu yang kơnê̆ lĕch đơ̆ng akâu đe. Na yang kơnê̆ ei khan kơ Yêsu: “Ih boih Kon 'Bok Kei-Dei tơpă.” Mă-lei Yêsu khă lu yang kơnê̆ ei kuă ăn pơma, yua kơ lu sư băt kơ Yêsu 'Bok Krist gô wă tơbăt ăn Sư kơ đe.
Yêsu năm bơtho đe
42Lăp pơgê hrôih năr đơ̆ng rŏng na Yêsu lĕch hloi đơ̆ng pơlei ei năm tơ anih kueng kơdrô̆. Na lu kon pơlei pơla chă Sư. Lăp chă Sư 'bôh boih na lu sư khan hloi kơ Yêsu thoi âu: “Ih 'nĕ achăng lê̆ pơlei nhôn hŏ.”
43Mă-lei Yêsu khan kơ lu sư: “Inh athei chă bơtho tơdrong 'nao 'lơ̆ng 'Bok Kei-Dei pơgơ̆r bơ̆n âu jơ̆p kơ pơlei nai mơ̆n. 'Bok Kei-Dei Sư wơh Inh wă kơ Inh jang thoi noh yơh.”
44Na Yêsu năm chă bơtho jơ̆p kơ hnam akŭm dêh char Galilê.
Yêsu krao iŏk lu bơngai wă pơhrăm păng Sư
Currently Selected:
Luk 4: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
