Luk 3

1-2'Bok Kei-Dei tơbăt kơ Yôhan mă kon Sachari nơ̆r Sư tơ char glă sơ̆. Kơplah noh sơ̆ 'bok Tiberi pơm pơtao tơm lu bơngai Rôm đei mơjĭt-pơđăm sơnăm boih. Bonsơ Pilat pơgơ̆r dêh char Juđê, na Hêrôt pơgơ̆r dêh char Galilê. Đơ̆ng noh dơ̆ng 'bok Philip, oh Hêrôt, sư pơgơ̆r dêh char Itur păng dêh char Trachônit. Na 'bok Lisan pơgơ̆r dêh char Abilen. Kơplah ei sơ̆ 'bok Ana păng 'bok Kaiphe oei pơm 'bok soi tơm đe Juđê. 3Na Yôhan năm jơ̆p kơ tơring kiơ̆ krong Jôrđăn. Na sư bơtho athei đe tơbral kơdih tơdrong yoch na iŏk 'batem wă kơ 'Bok Kei-Dei pơklaih yoch sư. 4Tơdrong noh 'blep trŏ thoi Êsai, bơngai pơtruh nơ̆r 'Bok Kei-Dei sơ̆, sư chih 'măn lê̆ hơdrol lăm sơ̆p hla bơar sư thoi âu:

“Đei minh 'nu bơngai bơtho tơ char glă chơngue ning-mônh khan:

‘Bĕ bơ̆n hơmet trong kơ Kră Yang păng pơm trong Sư mă tơpăt. Wă khan lu bơ̆n tơbral kơdih tơdrong yoch.

5Dah teh thŭng thong, bơ̆n choh 'bŭ mă mơnglei;

kiơ̆ kông lôk bơ̆n athei choh waih wă kơ sư mơnglei dang ăi;

kiơ̆ trong wing bơ̆n kư̆m hơmet ming mă tơpăt;

kiơ̆ trong kơnê̆ sơgol sơgônh bơ̆n athei choh ming mă tơhnă.

6Na đĭ-đăng kon bơngai gô 'bôh tơdrong 'Bok Kei-Dei wă pơklaih bơ̆n đơ̆ng tơdrong yoch tơpă.’ ”

7Na Yôhan khan kơ lu bơngai tơpôl wă năm iŏk 'batem ei thoi âu: “Iĕm âu dang lĕ kơ 'bih. Iĕm băt kơ 'Bok Kei-Dei wă phak iĕm ning-mônh na iĕm mah năm tơ âu wă iŏk 'batem đĕch khan gô klaih đơ̆ng tơdrong phak noh hă? 8Iĕm athei tŭk lê̆ đĭ dôm tơdrong kơnê̆ na pơm mă 'lơ̆ng tơpăt wă kơ đe băt kơ iĕm tơbral kơdih tơdrong yoch tơpă boih. Iĕm 'nĕ pơhơi khan kuă kơ tơbral kơdih tơdrong yoch, pơm khan sơđơ̆ng kơ Abraham bơ̆n tơbôl hăm 'Bok Kei-Dei. Inh khan kơ iĕm tơpăt, 'Bok Kei-Dei Sư gơh pơm kơ tơmo âu jing kon sâu Abraham lei-lăi thoi iĕm mơ̆n. 9'Bok Kei-Dei sek tơlang kon bơngai, Sư pơlong lăng thoi âu: Sung Sư, Sư 'măn hiă rim kơ tơnơm 'long boih. Dah 'long ayơ ưh kơ đei plei 'lơ̆ng lei 'Bok Kei-Dei gô kăl tŭk 'long noh klơ̆m tơ ŭnh.”

10Na lu bơngai tơpôl ei jet Yôhan: “Lei ih wă kơ nhôn pơm thoi yơ?”

11Na Yôhan khan dơ̆ng: “Dah bơngai bu đei 'bar blah ao lei sư athei asong minh blah ao sư kơ lu bơngai mă hoh kơ đei. Dah bơngai bu đei tơmam sa rơkah, lei sư athei chă asong kơ đe lei-lăi mơ̆n.”

12Na lu bơngai juăt iŏk jên thuê̆ đe, sư kư̆m năm iŏk 'batem mơ̆n, na lu sư jet Yôhan thoi âu: “Ơ 'bok thây, ih wă kơ nhôn pơm thoi yơ?”

13Na sư khan: “Iĕm 'nĕ pơlơ̆m sa jên đe.”

14Lu linh kư̆m jet sư mơ̆n: “Bĭ gah nhôn, ih wă kơ nhôn pơm thoi yơ?” Na Yôhan khan kơ sư: “'Nĕ pơgŏ iŏk tơmam đe, 'nĕ jâu ngơ̆r wă sa tơmam đe păng 'nĕ kơ mơmơnh kơ jên khei iĕm đei.”

15Lu kon tơring tơrang chang gô 'Bok Krist truh, na đĭ-đăng lu kon bơngai tơchĕng lăm jơhngơ̆m đon sư kơdih khan: “Yôhan âu dah kiơ 'Bok Krist?”

16Mă-lei Yôhan khan kơ lu sư thoi âu: “Inh pơm kơ iĕm 'batem păng đak đĕch, mă-lei đei minh 'nu Sư gô truh đơ̆ng rŏng kơ inh noh Sư 'Bok tih tơpă, dah Sư athei inh iŏk ăn pôm chơkhŏ Sư, inh chu iŏk đĕch, ưh kơ pơ̆n ngơk lăng Sư ôh. Sư ei gô pơm kơ iĕm 'batem thoi âu: Sư gô ăn kơ iĕm Yang Bơhngol 'Lơ̆ng pơm kơ iĕm tŭk lê̆ dôm tơdrong kơnê̆ kư̆m thoi ŭnh soh lê̆ hla đuih đăm. 17'Bok ei sek tơlang kon bơngai thoi lĕ kơ Sư chĕp minh hlak kơđum wă um tŭk đĭ dôm lu 'ba bo. Na Sư iŏk lu 'ba liĕng wă tah lê̆ lăm kŭ 'ba Sư. Na dôm lu 'ba bo noh Sư wă soh tŭk đĭ tơ ŭnh mă ưh kơ layơ păt.”

18Kơplah Yôhan oei bơtho tơdrong 'nao 'lơ̆ng kơ lu kon pơlei pơla, sư kư̆m đei bơtho khan lơ tơdrong nai mơ̆n. 19Yôhan khă pơtao Hêrôt yua kơ sư tơgar iŏk Hêrôđia, akăn oh sư păng Hêrôt kư̆m pơm lơ tơdrong kơnê̆ nai dơ̆ng. 20Na Hêrôt kư̆m pơm kơnê̆ kơ Yôhan tah hloi sư lăm hnam phak.

Yôhan pơm 'batem kơ Yêsu

21Kơplah đe tam mă phak Yôhan sơ̆ sư pơm 'batem kơ lu kon tơring tơrang. Đơ̆ng noh sư kư̆m pơm kơ Yêsu 'batem mơ̆n. Lăp Yêsu iŏk 'batem đang boih na Sư krao khan kơ 'Bok Kei-Dei, na plĕnh tơpơih. 22Yang Bơhngol 'Lơ̆ng thoi lĕ sem kơtơp jur oei tơ Yêsu. Păng kư̆m đei nơ̆r pơma đơ̆ng plĕnh khan: “Ih boih Kon Inh mă 'mêm kơeng tơpă. Inh lăp đon kơ Ih tôm tơdrong.”

Anăn lu 'bok kơdră Yêsu sơ̆

23Kơplah Yêsu pơtơm wă jang tơdrong Sư, kơplah noh Sư dang pêng-jĭt sơnăm. Đe ngêh kơ Yêsu kon Yôsep. Yêsu kon sâu Hêli. 24Hêli kon Matthat. Matthat kon Lêwi. Lêwi kon Mênchi. Mênchi kon Janê. Janê kon Yôsep. 25Yôsep kon Matathia. Matathia kon Amôt. Amôt kon Nahum. Nahum kon Êchli. Êchli kon Nagê. 26Nagê kon Maat. Maat kon Matathia. Matathia kon Sêmêin. Sêmêin kon Jôsêch. Jôsêch kon Jôđa. 27Jôđa kon Jôanan. Jôanan kon Rêsa. Rêsa kon Serupbabel. Serupbabel kon Sealtien. Sealtien kon Nêri. 28Nêri kon Mênchi. Mênchi kon Ađi. Ađi kon Kôsam. Kôsam kon Enmađam. Enmađam kon Êrơ. 29Êrơ kon Jôsuê. Jôsuê kon Êlisê. Êlisê kon Jôrim. Jôrim kon Matthat. Matthat kon Lêwi. 30Lêwi kon Simiôn. Simiôn kon Juđa. Juđa kon Yôsep. Yôsep kon Jônam. Jônam kon Êliakim. Êliakim kon Mêlêa. 31Mêlêa kon Menna. Menna kon Mattatha. Mattatha kon Nathan. Nathan kon Đawit. 32Đawit kon Jesê. Jesê kon Ôbêt. Ôbêt kon Bôas. Bôas kon Salmôn. Salmôn kon Nasôn. Nasôn kon Amminađap. 33Amminađap kon Atmin. Atmin kon Arni. Arni kon Hêsrôn. Hêsrôn kon Pêres. Pêres kon Juđa. 34Juđa kon Jakôp. Jakôp kon Isăk. Isăk kon Abraham. Abraham kon Tharê. Tharê kon Nakô. 35Nakô kon Sêruk. Sêruk kon Rêgâu. Rêgâu kon Phalek. Phalek kon Hêbê. Hêbê kon Sala. 36Sala kon Kainan. Kainan kon Abaksat. Abaksat kon Sem. Sem kon Nôê. Nôê kon Lamek. 37Lamek kon Matusêla. Matusêla kon Ênŏk. Ênŏk kon Jarêt. Jarêt kon Mêlêên. Mêlêên kon Kainan. 38Kainan kon Ênot. Ênot kon Set. Set kon Ađam. Ađam kon 'Bok Kei-Dei.

Yang Satan pơhlŭ Yêsu

Currently Selected:

Luk 3: bdq

Highlight

Copy