Luk 23

1Đơ̆ng noh na đĭ-đăng kơ lu sư iung anhăk ba Yêsu năm tơ anăp 'bok tih pơgơ̆r dêh Juđê anăn sư Pilat. Sư bơngai Rôm. 2Lu sư jâu Yêsu 'bơ̆t anăp Pilat khan: “Nhôn 'bôh bơngai 'nâu boih pơchŭt đe kon tơring tơrang, Sư khă lu nhôn ưh kơ wă kơ nhôn ăn jên thuê̆ kơ 'bok pơtao bơ̆n Sêsar. Na Sư khan Sư kư̆m Pơtao mơ̆n, anăn Sư 'Bok Krist.”

3Na Pilat jet Yêsu khan: “Hăm trŏ kơ Ih pơm Pơtao đe Juđê?”

Na Yêsu tơl Pilat khan: “Trŏ kơ Inh boih.”

4Na Pilat khan kơ lu 'bok soi tih păng đĭ-đăng lu bơngai tơpôl oei kiơ̆ ei: “Inh 'bôh bơngai 'nâu ưh kơ đei tơdrong yoch kiơ ôh.”

5Mă-lei lu sư khan thoi âu dơ̆ng wă pơlŭt Pilat kư̆m jâu Sư bơngai yoch: “Yêsu âu chă pơchŭt đe kon tơring tơrang jơ̆p kơ dêh Juđê đơ̆ng tơring Galilê mah truh tơ bơ̆n âu.”

Pơtao Hêrôt sek tơlang Yêsu

6Lăp Pilat kơtơ̆ng thoi noh na sư jet lu đe noh thoi âu: “Yêsu âu hăm trŏ kơ bơngai Galilê dah ưh?”

7Lu sư khan kơ Pilat thoi âu: “Sư bơngai Galilê tơpă.” Na mă Pilat wơh đe anhăk ba Sư tơ pơtao Hêrôt, yua kơ Hêrôt pơgơ̆r dêh Galilê. Hêrôt hơtai ei sư năm ngôi tơ Pơlei Jêrusalem. 8Lăp Hêrôt 'bôh Yêsu na sư hiôk tơpă yua kơ Hêrôt đơ̆ng sơ̆ chang wă tơ'bơ̆p Yêsu ră, yua kơ sư kơtơ̆ng ang Yêsu gơh pơm tơdrong mơsêh mơyang na sư 'maih lăng dêh. 9Thoi noh na Hêrôt jet Sư lơ tơdrong mă-lei Yêsu 'nhŏ kơ drơ̆ng hơya minh nơ̆r 'biơ̆. 10Lu 'bok soi tih păng lu 'bok thây bơtho tơdrong juăt đe Juđê kư̆m oei 'bơ̆t ei mơ̆n na lu sư jâu Yêsu dêh. 11Na Hêrôt păng lu linh sư che bơle pơ'brơh kơ Yêsu. Lu sư pơhrŭk ăn kơ Yêsu ao tai rŏ tơpă pơm thoi pơtao na tơwih Sư tơ Pilat dơ̆ng. 12Đơ̆ng sơ̆ bre Hêrôt păng Pilat, bre sư areh arĕnh dih băl ră, mă-lei truh năr 'nei bre sư jing tơmơ̆t băl pôm jơhngơ̆m đon.

Đe apinh Pilat pơ̆ng pơlôch Yêsu tơ 'long pơglang

13Na Pilat krao akŭm lu 'bok soi tih, lu đe kră tơring păng lu kon pơlei pơla. 14Na Pilat khan kơ lu đe noh thoi âu: “Iĕm anhăk bơngai âu tơ inh hei, iĕm pơtă kơ Sư khan Sư pơchŭt lu kon tơring tơrang pơm ưh kơ lăp. Mă-lei inh sek tơlang Sư 'bơ̆t anăp lu iĕm hei inh ưh kơ 'bôh Sư pơm tơdrong yoch kiơ ôh gah tơdrong iĕm ată kơ Sư noh. 15Hêrôt kư̆m ưh kơ 'bôh Sư pơm tơdrong yoch mơ̆n, na sư mah tơwih Yêsu tơ bơ̆n dơ̆ng. Sư ưh kơ đei pơm tơdrong yoch ôh, na lơliơ bơ̆n pơlôch Sư gơh trŏ lĕ? 16Inh gô ăn kơ lu linh teh pơjĭ Sư păng sơnguĕt na đơ̆ng noh tơlĕch Sư đĕch.”

17Rim đe pơm Giĕng Năm Brih na Pilat ngăl juăt kơ tơlĕch ăn kơ kon pơlei pơla minh 'nu bơngai đơ̆ng hnam phak. 18Pilat wă tơlĕch Yêsu ră mă-lei đĭ-đăng kơ lu sư wang pơma 'bơ̆r re khan: “Pơlôch Sư đĕch na tơlĕch ăn kơ nhôn 'Barra'ba.”

19'Barra'ba noh đe tah sư lăm hnam phak yua kơ sư iung blah lu 'bok pơgơ̆r tơ lăm Pơlei Jêrusalem, na kơplah ei sư kư̆m chă pơlôch đe mơ̆n. 20Pilat oei pơma pơlung lu sư dơ̆ng yua kơ Pilat wă tơlĕch Yêsu tơpă ră. 21Mă-lei lu sư pơma 'bơ̆r re khan: “Pơ̆ng pơlôch Sư tơ 'long pơglang, pơ̆ng pơlôch Sư tơ 'long pơglang.”

22Pilat pơma dŏng ră Yêsu 'măng mă pêng thoi âu: “Kơlih kơ kiơ iĕm wă pơlôch Sư? Sư pơm tơdrong yoch kiơ? Inh ưh kơ 'bôh Sư pơm tơdrong yoch kiơ ôh na lơliơ iĕm khan wă pơlôch Sư lĕ? Na dang ei inh athei lu linh teh pơjĭ Sư păng sơnguĕt, na đơ̆ng noh tơlĕch Sư đĕch.”

23Mă-lei lu đe ei pơma 'bơ̆r re pơlŭt Pilat khŏm khŏm athei sư pơ̆ng pơlôch Yêsu tơ 'long pơglang. Na khŏm khŏm jing jei hĭ lu đe noh tơpă. 24Thoi noh na Pilat jing chu ăn kơ lu sư pơ̆ng pơlôch Yêsu tơ 'long pơglang. 25Pilat tơlĕch ăn kơ lu sư bơngai mă lu sư apinh noh, bơngai mă đêl đe tah lăm hnam phak yua kơ sư iung blah lu 'bok pơgơ̆r ki păng sư chă pơlôch đe. Mă-lei gah Yêsu, Pilat chu ăn kơ lu sư pơlôch đĕch.

Đe pơ̆ng pơlôch Yêsu tơ 'long pơglang

26Đơ̆ng noh na đe anhăk ba Yêsu wă năm pơ̆ng pơlôch. Đei minh 'nu bơngai, anăn sư Simôn, sư bơngai Pơlei Siren. Sư năm brih trong ei wă mơ̆t tơ Pơlei Jêrusalem ră, mă-lei lu linh dui pơgŏ sư tôi kơ Yêsu 'long pơglang, yak đơ̆ng rŏng Yêsu. 27Lu kon pơlei pơla lơ tơpă kiơ̆ lăng Yêsu. Kư̆m đei lơ drŏ-kăn mơ̆n, sư hmoi ơh sơ'ngon rah. 28Mă-lei Yêsu hue lăng tơ lu sư păng khan: “Ơ lu drŏ-kăn Pơlei Jêrusalem, iĕm 'nĕ pă hmoi kơ Inh. Iĕm athei hmoi kơ lu tơduă iĕm păng đe kon iĕm đĕch. 29Yua kơ ning-mônh gô đei tơdrong anat anot truh tơpă na đe gô khan thoi âu: ‘Lu bơngai akâu pôm păng lu bơngai ưh kơ lah đei kon, lu sư đĕch hiôk.’ 30Hơtai ei kơnh đe gô khan kơ kông thoi âu: ‘Hiŏng tơlơ̆ kơpal nhôn âu bĕ.’ Na đe kư̆m khan kơ groi thoi âu mơ̆n: ‘Klơ̆p lê̆ nhôn bĕ.’ 31Dah đe pơm kơnê̆ dang âu kơ Inh bơngai mă ưh kơ pơm yoch yua kơ Inh thoi lĕ kơ 'long adrih đĕch, bĭ đe gô pơm dang yơ kơ lu bơngai pơm yoch, yua kơ lu sư thoi lĕ kơ 'long ŭnh kro, ŭnh 'bônh kơ sa tơpă?”

32Lu linh ei anhăk ba bre 'bar 'nu bơngai yoch, lu linh kư̆m wă pơ̆ng pơlôch bre sư hơdai păng Yêsu mơ̆n. 33Lăp lu sư truh tơ anih đe anăn anih kơting kơ̆l bơngai lôch, na lu sư pơ̆ng Yêsu tơ 'long pơglang tơ noh. 'Bar 'nu bơngai yoch noh hei sư kư̆m pơ̆ng hơdai păng Yêsu mơ̆n, minh 'nu gah 'ma, minh 'nu gah 'ngiĕo kơ Sư. 34Na Yêsu khan kơ 'Bă Sư 'Bok Kei-Dei thoi âu: “Ơ 'Bă, apinh Ih 'nĕ jô̆ yo kơ lu sư, yua kơ lu sư ưh kơ băt lu sư oei pơm kiơ ôh.” Na lu linh ei pơpơn dih băl wă kơ băt bu gơh iŏk ao Yêsu, bu iŏk ao ayơ, bu iŏk ao ayơ. Lu sư asong băl ao Yêsu thoi noh.

35Lu kon pơlei pơla dơ̆ng 'bơ̆t ei wă lăng đe pơlôch Yêsu. Lu đe 'bok tih Juđê che bơle kơ Yêsu khan thoi âu: “Sư gơh pơklaih đe sơ̆, na dang ei dah Sư 'Bok Krist tơpă mă 'Bok Kei-Dei rơih wă pơm Pơtao bơ̆n lei lê̆ Sư pơklaih akâu Sư kơdih lăng.”

36Lu linh che bơle kơ Yêsu mơ̆n. Lu sư năm tơ Yêsu pơm ăn kơ Sư sik athei et. 37Na lu sư khan thoi âu: “Dah Ih Pơtao bơngai Juđê tơpă, lei Ih pơklaih akâu Ih kơdih lăng.”

38Đe chih tơ gơ'bang iĕ kơpal kơ̆l Sư thoi âu: 'Bok 'nâu Pơtao đe Juđê.

39'Bar 'nu bơngai yoch noh mă đe pơ̆ng hơdai păng Sư, na minh 'nu pơma pơjăm Sư thoi âu: “Ih 'Bok Krist mă 'Bok Kei-Dei wơh wă pơm Pơtao nhôn hă, na lei Ih kuă kơ kiơ pơklaih akâu Ih kơdih, đơ̆ng noh pơklaih nhi hai?”

40Mă-lei gah bôl sư minh 'nu noh khă sư thoi âu: “E ưh kơ hli kơ 'Bok Kei-Dei hă? Đĭ-đăng kơ bơ̆n âu wă lôch kơ đe pơ̆ng bơ̆n yua kơ đe jô̆ bơngai yoch. 41Đe pơ̆ng pơlôch ba trŏ boih yua kơ ba pơm tơdrong yoch tơpă. Mă-lei Sư âu ưh kơ đei pơm tơdrong yoch kiơ ôh.”

42Na bơngai ei khan kơ Yêsu thoi âu: “Ơ Yêsu, apinh Ih mơnat kơ inh 'biơ̆ hŏ lăp Ih pơm Pơtao nhôn ning-mônh.”

43Yêsu khan kơ sư: “Inh khan kơ ih tơpă, năr âu hloi boih ih gô oei hơdai păng Inh tơ Pơlei 'Lơ̆ng 'Bok Kei-Dei.”

Yêsu lôch

44Lăp 'năr dơ̆ng 'bôh glĭp kơ măng mu pă đei hơdah jơ̆p-jang kơ teh đak truh tơ pêng jơ kơsơ̆. 45Na che đe dăng pơgăn tơ hnam akŭm 'Bok Kei-Dei tơm kư̆m tơhek chuơ̆ng tŏk-bŏk mơ̆n. 46Yêsu pơma 'bơ̆r re khan: “Ơ 'Bă, Inh pơjao ăn kơ Ih Bơhngol Inh.” Na lăp Sư pơma đang boih, na Yêsu kơtĕch jơhngơ̆m hloi. 47'Bok tih linh 'bôh dôm tơdrong Yêsu lôch noh na sư ư-ang kơ 'Bok Kei-Dei khan: “Bơngai 'nâu Sư bơngai 'lơ̆ng tơpăt ưh kơ đei pơm yoch kiơ ôh.”

48Lu kon pơlei pơla mă năm lăng tơdrong ei lu sư 'bôh Yêsu lôch thoi noh, na lu sư ơh sơ'ngon tơpă, na tŭr kơtơh brŏk hloi tơ anih hnam sư kơdih. 49Đĭ-đăng kơ lu bơngai juăt păng Yêsu, lu sư mơ'nah bơngai drŏ-kăn mă kiơ̆ Sư đơ̆ng dêh Galilê, lu sư dơ̆ng đơ̆ng ataih 'biơ̆ wă răp lăng dôm tơdrong đe pơm kơ Yêsu.

Đe 'măn atâu Yêsu lăm bơsat

50Đei minh 'nu bơngai đơ̆ng Pơlei Armơthê lăm dêh Juđê, anăn sư Yôsep, sư khŭl bơngai kră sek tơlang kơ đe ră mă-lei sư bơngai 'lơ̆ng tơpăt. 51Na kơplah lu bôl sư sek tơlang kơ Yêsu khan wă pơlôch Sư hei, Yôsep ưh kơ wă mơ̆t đon lu đe noh ôh. Sư hơdai wang chang gô 'Bok Kei-Dei pơgơ̆r mơ̆n. 52Yôsep năm tơ Pilat wă apinh iŏk 'bŭ atâu Yêsu. 53Lăp Yôsep apinh đang boih na sư tơjur iŏk atâu Yêsu đơ̆ng 'long pơglang, na sư lôm atâu Yêsu păng minh blah che kok. Klaih kơ noh sư năm 'măn atâu Yêsu tơ lăm bơsat mă đe bŏk lăm tơmo. Bơsat noh đe tam mă đei 'măn bu ôh. 54Na năr ei trŏ kơ năr đe hơmet lê̆ hơdrol tôm tơdrong wă yua lăm năr pơdơh Sa'bat dơning. Kơsơ̆ năr 'nei boih Yôsep 'măn atâu Yêsu tơ lăm bơsat.

55Na lu bơngai drŏ-kăn mă kiơ̆ Yêsu đơ̆ng dêh Galilê ki, lu sư kư̆m kiơ̆ Yôsep kơplah sư năm 'măn atâu Yêsu tơ lăm bơsat mơ̆n. Thoi noh na lu sư băt anih Yôsep 'măn atâu Yêsu. 56Klaih kơ noh lu sư brŏk tơ hnam chă hơmet pơgang 'bâu phu wă năm pik tơ akâu Yêsu. Kơplah năr pơdơh Sa'bat lu sư kư̆m pơdơh kiơ̆ kơ tơdrong juăt 'Bok Kei-Dei mơ̆n.

Yêsu iung arih đơ̆ng lôch

Currently Selected:

Luk 23: bdq

Highlight

Copy