Bl 24

Abraham wơh Êliesê năm chă kơ Isăk akăn

1Abraham kră boih, sơnăm đĭ lơ, lăm tôm tơdrong Kră Yang đei ăn pŭn hiôk kơ sư. 2Abraham khan hăm đĭch sưa bơngai mă oei lăm hnam sư, đam âu bơngai jang wei-lăng mŭk tơmam sư khan thoi âu; “apinh dan bĕ ti ih 'bơ̆t blu inh. 3Păng inh athei ih pơkă hăm Kră Yang, jơ̆ Kră Yang 'Bok Kei-Dei plĕnh teh, ih ưh kơ chă kơ kon inh akăn minh 'nu adruh lăm char Kanaan, wă khan kon pơlei mă bơ̆n oei dang ei, 4mă-lei ih gô wih brŏk tơ tơring inh kơdih na chă ăn kơ Isăk akăn lăm lu kôn mon adrĕch inh.” 5Na đam sư tơl: “Băt bơngai drŏ-kăn 'nei ưh kơ chu kiơ̆ inh năm tơ char bơ̆n âu; thoi noh, ăn ưh, lê̆ kơ inh chông ba kon tơdăm ih âu hloi na nhi năm tơ char mă ih lĕch đơ̆ng ei noh?”

6Abraham tơl: “Kơchăng bĕ. Ih 'nĕ kơ chông ba kon tơdăm inh năm tơ dêh char noh! 7Kră Yang, Kră Yang 'Bok Kei-Dei plĕnh teh, jơ̆ Kră Yang mă chông ba inh, lê̆ mĕ 'bă, lê̆ 'nhŏng oh, lê̆ dêh char inh, đei pơma pơkăm pơkă hăm inh thoi âu: Inh gô ăn kơ adrĕch adrung ih dêh char âu. Sư gô wơh linh jang sư năm adrol kơ ih păng tơ anih ih gô chă ăn kơ kon inh akăn. 8Tơdah ưh kơ đei adruh ayơ wă chu kiơ̆, ih kư̆m huay kơ tơwŏk kơ nơ̆r mă inh athei ih pơkă âu ôh, mă khan thoi yơ hĭ, kư̆m 'nĕ kơ chông kon tơdăm inh năm tơ noh.” 9Đơ̆ng noh, đam sư dan ti 'bơ̆t blu Abraham yŏng tơ'ngla sư păng pơkă gô pơm kiơ̆ thoi nơ̆r sư đei pơma pơkă.

Êliesê păng adruh Rê'bêka tơ'bơ̆p băl

10Đơ̆ng noh, đam sư rôp mơjĭt tŏ aseh lăk-đa yŏng tơ'ngla sư păng chĕp ba dôm tơmam đơ̆ng yŏng tơ'ngla sư, jao ăn, na iung yak tơ char Mesôpôtami truh tơ pơlei Nahôr, 11truh boih sư ăn kơ aseh lăk-đa sư drum pơdơh tơ 'nguaih pơlei jê̆ sơlŭng đak, 'năr wă kơsơ̆, trŏ kơ lu adruh wă năm sŏ đak.

12Sư krao khan: “Ơ Kră Yang, Kră Yang 'Bok Kei-Dei yŏng tơ'ngla inh Abraham! Apinh ih ăn kơ inh tơ'bơ̆p tơdrong mă inh chơchă păng tơ'bôh ăn tơdrong 'lơ̆ng Ih kơ Abraham yŏng inh. 13Âu inh oei dơ̆ng cheng đak sơlŭng lu adruh đơ̆ng lăm pơlei gô năm tơ âu sŏ đak. 14Adruh ayơ, mưh inh pơma thoi âu: ‘Apinh ih pơgling ge, asong inh nhă tŏ sĕt,’ na sư tơl thoi âu: He nhă bĕ, na kư̆m lê̆ kơ inh pơnhă ăn kơ aseh lăk-đa ih hai adruh mă Kră Yang wă ăn pơm akăn Isăk, đĭch đam ih păng đơ̆ng noh inh đei băt kơ Kră Yang đei mơnat kơ yŏng tơ'ngla inh boih.”

15Bơngai đam noh pơma tam mă đĭ nơ̆r, na blư hloi kơ Rê'bêka, tôi ge sư tơ hơngiĕng truh. Adruh âu kon Bêthuel, Bêthuel kon drŏ-nglo Milka, akăn Nahôr, oh drŏ-nglo Abraham. 16Bơngai adruh âu 'lơ̆ng hơbŏ tơpă, oei adruh hơlai, tam đei pơma hăm bu. Sư jur sŏ đak 'bĕnh kơ ge, sư tŏk tơ kông. 17Đam âu kơdâu tơkan găn anăp sư păng apinh: “Apinh ih asong inh nhă hơya tŏ sĕt đak đơ̆ng ge ih.” 18Sư tơl: “Ơ 'Bok, âu nhă wăi;” đơ̆ng noh adruh noh hăt hot tơjur ge đơ̆ng sư tôi, jrơng tơpang ăn kơ sư nhă. 19Jrơng kơ sư nhă đang boih, na Rê'bêka sư khan dơ̆ng: “Inh kư̆m wă ăn kơ aseh lăk-đa ih nhă hai, dĭng sư nhă hrăp 'mơ̆i lê̆.” 20Adruh noh sư hăt hot sŏ đak tuh tơ bơng pơnhă dĭng tôm kơ aseh lăk-đa nhă. 21Gah bơngai đam sư ngôi đĕch păng lăng pơnhen adruh noh, wă kơ băt Kră Yang pơm keh tơdrong mă sư năm tơ âu dah ưh.

22Đang kơ lu aseh lăk-đa sư nhă boih, bơngai đam noh sư iŏk gŏp muh maih trăp dang minh puăt jên hu păng 'bar tŏ kong maihb trăp dang mơjĭt hlak jên hu. 23Păng jet: “Ih kon bu? Roi ăn kơ inh băt, lăm hnam 'bă ih hăm đei anih asong inh 'bĭch pơdơh minh măng đĕch?” 24Sư tơl: “Inh kon adruh Bêthuel sâu yă Milka păng 'bok Nahôr.” 25Păng khan dơ̆ng: “Tơ hnam nhôn đei 'nhĕt hăm hơnong 'ba lơ păng kư̆m đei ăn anih kơ ih pơdơh hai.”

26Đang kơ noh bơngai đam sư drap kơkuh 'bơ̆t anăp Kră Yang, 27Păng khan: “Trŏ kơkuh bơnê tơpă kơ Kră Yang, Kră Yang 'Bok Kei-Dei yŏng tơ'ngla inh Abraham! Sư ưh kơ lê̆ tơdrong mơnat păng pơkă tơpăt hăm yŏng tơ'ngla inh! Kơplah inh oei yak, Kră Yang chông ba inh truh tơ hnam 'nhŏng oh yŏng tơ'ngla inh.”

La'ban păng Bêthuel sơng iŏk Êliesê

28Bơngai adruh ei brŏk, roi tơdrong noh kơ hnam dơnŏ sư. 29Rê'bêka đei minh 'nu 'nhŏng anăn La'ban. Lăp La'ban 'bôh gŏp muh hăm 'bar tŏ kong tơ kơkŏng ti oh sư păng kơtơ̆ng đơ̆ng nơ̆r oh sư roi hei. 30Na sư kơdâu tơkan tơ đam ei 'bôh sư oei hơdai hăm aseh lăk-đa sư cheng đak sơlŭng ei. 31Sư khan thoi âu: “Bơngai mă Kră Yang đei ăn pŭn hiôk! Apinh ih mơ̆t bĕ liơ mă oei ngôi tơ 'nguaih thoi noh? Inh đei hơmet anih kơ lu iĕm tep hăm lăk-đa ih boih.”

32Bơngai đam noh mơ̆t tơ lăm hnam; đĭch đam La'ban yaih lê̆ an đơ̆ng aseh lăk-đa, iŏk hơnong 'ba păng 'nhĕt hiĕm lu aseh lăk-đa noh sa; đơ̆ng noh iŏk đak wă ôp jơ̆ng đam noh păng lu bơngai năm hơdai sư. 33Đang kơ noh, hnam dơnŏ sư hơmet por 'nhot sŏng sa; mă-lei bơngai đam noh khan: “Ưh, inh ưh kơ sŏng sa ôh, dah inh tam mă pơma dôm nơ̆r inh wă pơma.” La'ban tơl, “pơma bĕ!”

34Đam sư pơma hloi thoi âu: “Inh âu đĭch đam Abraham. 35Kră Yang đei ăn kơ yŏng tơ'ngla inh pŭn hiôk dêh, jing keh 'lơ̆ng; Kră Yang ăn kơ sư đei triu, Rơmo, hu hăm jên maih, đĭch đam drŏ-nglo drŏ-kăn, aseh lăk-đa hăm aseh iĕ. 36Sara akăn yŏng tơ'ngla inh, rai kră, đei tơpŭ kơ sư minh 'nu kon drŏ-nglo; đei jao boih dôm mŭk tơmam sư đei noh kơ kon drŏ-nglo sư. 37Yŏng tơ'ngla inh krao inh păng pơkă khan: ‘Ih 'nĕ kơ chă ăn kơ kon drŏ-nglo inh akăn tơ lăm lu adruh Kanaan âu hŏ, mă dêh bơ̆n dang ei. 38Mă-lei ih athei brŏk tơ hnam dơnŏ 'bă inh, lăm lu adrĕch adrung inh păng chă ăn kơ kon inh akăn tơ noh.’ 39Inh khan hăm yŏng tơ'ngla inh thoi âu: Băt bơngai adruh ei ưh kơ wă brŏk kiơ̆ inh.’

40Yŏng tơ'ngla inh tơl inh: ‘Kră Yang mă Tơ'ngla inh oei pơm kiơ̆ gô ăn linh jang Sư jur pơm pơkeh tơdrong jang ih; păng ih gô chă ăn kơ kon drŏ-nglo inh akăn đơ̆ng lăm adrĕch adrung inh, tơ hnam 'bă inh. 41Thoi noh, dah ih truh tơ hnam adrĕch adrung inh, na mă lu sư ưh kơ chu ăn oei, lei ih huay pă pŭ nơ̆r mă ih đei pơkă hăm inh trăp tơpă noh.’

42Năr âu kơplah inh truh tơ đak sơlŭng noh, inh đei apinh thoi âu: ‘Kră Yang 'Bok Kei-Dei yŏng tơ'ngla inh Abraham! Apinh ih lăng păng tơgŭm kơ tơdrong inh năm âu gô jing! 43'Nâu inh oei ngôi 'bơ̆t cheng đak sơlŭng âu; na inh apinh khan dah adruh ayơ mă năm tơ âu wă sŏ đak, dah inh pơma hăm sư thoi âu: ‘Apinh ih asong ăn kơ inh đak nhă hơya tŏ sĕt đơ̆ng ge ih.’ 44Na mưh sư tơl: ‘Âu nhă wăi, na inh kư̆m gô sŏ ăn kơ lu aseh lăk-đa inh nhă mơ̆n,’ apinh ăn adruh noh jing akăn mă Kră Yang pơgơ̆p ăn kơ kon drŏ-nglo yŏng tơ'ngla inh!

45Tam mă đĭ nơ̆r krao apinh,c blư 'bôh hloi Rê'bêka tôi ge tơ hơngiĕng năm sŏ đak, inh pơma dơnuh hăm sư thoi âu: ‘Apinh ih asong inh nhă đak?’

46Na sư hăt hot tơjur ge đơ̆ng hơngiĕng sư păng khan: ‘Nhă wăi; na inh kư̆m gô ăn kơ aseh lăk-đa ih nhă mơ̆n.’ Thoi noh inh đei nhă păng sư kư̆m pơnhă ăn kơ aseh lăk-đa inh hai.

47Inh apinh sư thoi âu: ‘Ih kon bu?’

Sư tơl: ‘Inh kon Bêthuel, sâu 'bok Nahôr păng yă Milka.’

Na inh pơđoh ăn gŏp maih tơ muh sư păng tơ'bot ăn kong tơ kơkŏng sư. 48Đơ̆ng noh inh drap bon tơ teh 'bơ̆t anăp Kră Yang, kơkuh bơnê kơ Kră Yang 'Bok Kei-Dei yŏng tơ'ngla inh Abraham, đei chông ba inh boih lăm trong trŏ tơpăt tơ hnam dơnŏ oh drŏ-nglo yŏng tơ'ngla inh wă chă ăn akăn kơ kon drŏ-nglo sư. 49Thoi noh dang ei, dah lu iĕm wă đei jơhngơ̆m 'lơ̆ng păng tơpăt hăm yŏng tơ'ngla inh, apinh pơdah ăn kơ inh tơdrong noh, mă khan ưh kư̆m apinh roi tơbăt, wă kơ inh wih brŏk roi thoi yơ.”

50La'ban păng Bêthuel tơl thoi âu: “Tơdrong noh lĕch đơ̆ng Kră Yang lu nhôn tam gơh pơma kơ ih, trŏ dah glăi ôh. 51To Rê'bêka oei dơ̆ng 'bơ̆t anăp ih, chông sư wăi, wă kơ sư pơm akăn kon drŏ-nglo yŏng tơ'ngla ih, kiơ̆ thoi nơ̆r Kră Yang đei tơtă.”

52Đam Abraham 'nao mơ̆ng bre 'bar 'nu pơma, sư drap bon hloi 'bơ̆t anăp Kră Yang. 53Sư iŏk dôm tơmam pơhrôp păng hu, maih păng ao tai chro ăn kơ Rê'bêka; păng kư̆m đei lu tơmam gĭt kăp pơyơ̆r ăn kơ 'nhŏng sư hăm Mĕ sư. 54Đang kơ noh đam ei păng lu bơngai kiơ̆ sư sŏng sa păng tep hloi tơ noh.

Năr đơ̆ng rŏng lu sư iung đơ̆ng tep boih, bơngai đam noh sư khan: “Apinh iĕm asong inh brŏk wih tơ yŏng tơ'ngla inh.”

55Mă-lei 'nhŏng Rê'bêka păng Mĕ sư khan: “Lê̆ kơ mŏ adruh âu oei ngôi păng nhôn hơya minh 'bar măng 'biơ̆, đunh dang mơjĭt năr, na sư năm.”

56Đam sư tơl: “Apinh iĕm 'nĕ kơ pơhiơ̆ inh yua kơ Kră Yang ba trong inh keh đang boih, apinh iĕm ăn kơ inh brŏk tơ yŏng tơ'ngla inh.”

57Lu sư tơl: “Gô nhôn krao apinh lăng adruh 'lơ̆p noh sư wă thoi yơ?” 58Na lu sư krao Rê'bêka păng khan: “Kon hăm wă yak kiơ̆ lu đe âu ưh?” Sư tơl: “Inh 'maih năm kiơ̆.”

59Đơ̆ng noh lu sư ăn Rê'bêka păng đam mă đêl tơmŏm sư năm kiơ̆ đam Abraham păng lu đe kiơ̆ noh. 60Lu sư sơkat pŭn hiôk kơ Rê'bêkad thoi âu:

“Oh drŏ-kăn inh, hơpơi kơ oh jing Mĕ kơ rơbâu hơngan 'nu bơngai

păng ăn kơ lu adrĕch adrung oh

gô jing pran blah iŏk

lu pơlei tih đơ̆ng lu ayăt.”

61Rê'bêka păng lu bơngai awih awăn kơ sư iung, tŏk aseh lăk-đa, kiơ̆ hloi đam noh, thoi noh đam noh chông Rê'bêka năm.

Rê'bêka jing akăn Isăk

62Kơplah noh Isăk oei tơ Nêgeo char gah gơal sư 'nao brŏk đơ̆ng đak sơlŭng Lahairoi. 63Til kơsơ̆ sư lĕch năm tơ jih, wă kơ tơchĕng lăm đon; tơmang đei 'bôh lu aseh lăk-đa truh ưh kơ băt đơ̆ng yơ. 64Adruh Rê'bêka kư̆m tơmang, na 'bôh Isăk na sư kơtah jur hloi đơ̆ng aseh lăk-đa, 65Păng apinh đam noh thoi âu: “Bơngai bu 'bơ̆t anăp inh to, đơ̆ng bri to wă năm tơ âu?” Đam noh tơl: “Noh boih yŏng tơ'ngla inh,” na sư iŏk che hơdrao klơ̆p lê̆ muh măt sư.

66Đơ̆ng noh, đam noh roi kơ Isăk mơ̆ng dôm tơdrong mă sư đei pơm. 67Isăk chông hloi Rê'bêka mơ̆t tơ lăm bơsŭn Sara, mĕ sư. Iŏk pơm akăn păng 'mêm kơeng kơ sư. Thoi noh Isăk klaih kơ sơ'ngon đơ̆ng rŏng kơ mĕ sư lôch.

Currently Selected:

Bl 24: bdq

Highlight

Copy