San Mateo 6

Jesujsis chamu te' oyeta'mbʌ tzʌqui

1Ndzʌctamba'cmis oyeta'mbʌ tzʌqui pʌ'nista'm wyi'naŋdʌjqui, uy tzʌctame wa'y quieñaju pʌ'nista'm. Juca te'šej mis ndzʌctamba, uy njo'ctame que maŋbamij ñchi'tamu tiyʌ'iwʌ te' tzajpojmo ijtupʌ mista'm Ndata's.

2Y ŋgotpa'c mis limosna, uy tzamgopuwi tiyʌ mis ndzʌcpa, chʌquiajpašej wʌ'aŋjamba chʌcpa'sta'm te' judio'sta'm wyindʌjcojmo y te' jojtu'ŋojmota'm. Te'šej chʌquiajpa wa'ytyij wyʌcotzamyatʌju pʌ'nista'm. Wiyuŋše'ʌsmij ndzamjaytyamba, que te'wa'nde' te' quioyowa. 3Pero ŋgotpa'c mis limosna Diojsistij yajmusʌ y mis ndzoco'yis tiyʌ mis nʌ saju. 4Te'šej jeque, nu'mdij sa'oya. Y mis Ndata Dios, te' quienbapʌ's ja'nmis ŋguenepʌ tiyʌ, te'wʌ'smij maŋba ŋguioyoju pʌ'nista'm wyi'naŋdʌjqui.

Jesujsis chamu jutztʌ wa'y oto'ŋʌyu Dios

(Lc. 11.2-4)

5Y oto'ŋʌpya'cmis Dios uy tzʌqui chʌquiajpašej wʌ'aŋjamba chʌcpa'sta'm. Te'ta'mbʌ tenayajpa judio'sta'm wyindʌjcojmo y jojtuŋ-aŋguinʌcʌsi, y tey tenayu'c ñʌ'omyajpa wa'y quionucsoyaju. Te'šej chʌquiajpa wa'ytyij quieñaju pʌ'nista'm. Wiyuŋše'ʌsmij ndzamjaytyamba: Te'ta'mbʌ's ijtyajwa'a quioyowa. 6Pero mij, oto'ŋʌpya'cmis Dios, tʌjcʌ ŋguarto'ojmo, aŋgʌšo'mʌ nwin y oto'ŋʌ mis Ndata Dios ñaytyumʌ ijtupʌ miji'ŋ. Y mis Ndata Dios, te' quienbapʌ's ja'nmis ŋguenepʌ tiyʌ, te'wʌ'smij maŋba ŋguioyoju pʌ'nista'm wyi'naŋdʌjqui.

7Y nʌ'cmis oto'ŋʌyu Dios uy comeque mone naca'c tzame tumʌpʌ tiyʌ chʌquiajpašej te' ja'n ispʌquiapyʌ's Dios. Yʌ'ta'mbʌ's quiomʌ'yajpa juca wʌwʌta'mbʌ chamepit Diojsis maŋba quiʌmato'ŋʌyaju. 8Uy tu'mbajcajtame jeque ñe'cʌji'ŋda'm, porque tʌ Ndata Diojsis myuspa ndiyʌta'm mis ja'ndiyʌ antes que mis nwa'cjaytyamba.

9Oto'ŋʌytyamba'cmis Dios yʌ'šej nʌmdamʌ:

Tatay, tzajpojmomij ijtupʌ,

Yajcʌna'tzʌyjaya mis nʌy.

10Minʌ aŋgui'moya.

Yajtucʌ mis sunbašej,

Jujcha' tzajpojmo, te'šejtijque' yʌy najsacopajcʌsi.

11Tzi'ʌtʌj tumdumʌ jamapʌ tʌs njamacʌtʌjcuy.

12Yajcotocoyja tʌs nyatzita'mbʌ ndzʌqui,

Jujcha' tʌs nyajcotocoquie'tpa tzʌcjayajpapʌ'stʌj yacha'cuy.

13Uytyʌj yajtʌjcʌy oc'išajpamʌytyʌj,

Sino que yajcotzocatʌj yacha'cu'yojmoc.

Porque mijte' 'yaŋgui'mopyapʌ y te' mʌja'ŋbʌ y te' pyʌcpapʌ's wa'ytyʌ nwʌcotzamu mumu jamacotoya. Amén.

14Juca nyajcotocoyajpamis pʌnda'm ñchʌcjayajpa'cmij yacha'cuy, te'šejmij maŋba nyajcotocoytyaŋgue'tu te' tzajpojmo ijtupʌ mis Ndata's. 15Pero juca ja'nmis nyajcotocoytyame pʌnda'm ñchʌcjayajpa'cmij yacha'cuy, te'šejtijque' mis Ndata Diojsis ja'n maŋu nyajcotocoyjayu mista'm nyacha'cuy.

Jesujsis chamu jutzte' te' ayuno

16Y 'yayunatzʌctamba'cmij, uy yajtriste'ajtame nwinnaca chʌquiajpašej te' wʌ'aŋjamba chʌcpa'sta'm, porque ñe'cʌ'sta'm yajquejyajpa wyinnacapit pʌ'nista'm wyi'naŋdʌjqui que nʌte' 'yayunatzʌquiaju. Wiyuŋše'ʌsmij ndzamjaytyamba que te'ta'mbʌ's ijtyajwa'a quioyowa. 17Pero 'yayunatzʌcpa'cmij jasʌ mis ŋgopac y tze'a mis nwinnaca. 18Te'šej umij ŋguie'nʌyaju pʌ'nis que nʌmij 'yayunatzʌjcu, pero maŋbamij ŋguie'nʌyu mis Ndata Diojsis porque ñe'cʌ's quienba mumutiyʌ. Ñe'cʌ'smij maŋba ŋguioyoju pʌ'nista'm wyi'naŋdʌjqui.

Tzajpojmopʌ itʌpa'tcuy

(Lc. 12.33-34)

19Uy jene tzʌctame itʌpa'tcuy ne'cʌcotoya yʌy najsacopajcʌsi, porque yʌy mo'tpʌ'pa y tinbo'pʌ'pa, y yʌy wijtyajpa te' nu'myajpapʌ wa'y ñu'myaju. 20Pero tzʌctamʌ tzajpojmopʌ itʌpa'tcuy, te' ja'n myo'temʌy ni ja'n tyinbo'emʌy, ni ja'n wyijtyamyʌy nu'mbawʌ wa'y ñu'myaju. 21Porque jutimʌy ijtu mista'm itʌpa'tcuy, teymʌ maŋba ijtu mista'm ndzocoy.

Tʌte' ŋgüerpo's šʌ'ŋgʌ'

(Lc. 11.34-36)

22Tʌta'm nwitʌm tʌte' ŋgüerpo's šʌ'ŋgʌ'. Juca mis nwitʌm sʌ'ŋba oye, ŋguenda'nbamis ñempetiyʌ. 23Pero juca ja'n šʌ'ŋi oye mis nwitʌm, pi'tza'ŋajcu'yojmošejmij itpa. Pero juca te' mi'ojmo ijtupʌ sʌ'ŋgʌ' aŋbondu'pya, tu'yo'ctujcu'ca maya'aŋbʌ pi'tza'ŋajcʌte'.

Dios y te' itʌpa'tcuy

(Lc. 16.13)

24Ni'iwʌ's ja'n musi yosjayu tumnacacʌsi metzapʌ comi, porque maŋba qui'nisu tumʌ y maŋba šunu te' eyapʌ, o maŋba myʌja'ŋgomʌ'yu tumʌ y te' eyapʌ ja'n myʌja'ŋgomʌ'i. Ja'nmis musi nyosjaytyamu Dios y nyosjaytyaŋgue'tu te' itʌpa'tcuy.

Diojsis quioquenba 'yuneta'm

(Lc. 12.22-31)

25Te'cotoya'ʌsmij ndzamjaytyamba: Uy jene quipstame yʌpyʌ jamacʌtʌjcuy, tiyʌ mis maŋba ŋgu'ttamu o tiyʌ mis maŋba uctamu, ni mista'm ŋgüerpo, jutzmis maŋba mbama'ʌytyamu. ¿Ja'nsʌ'ŋde' maspʌ tʌ ŋguenguy que ja'n tʌ ŋgu'tcuy? y ¿Ja'nsʌ'ŋde' maspʌ tʌ ŋgüerpo que ja'nde' tʌ mbama? 26Quendamʌ sitityajpapʌ palomata'm, ja'n yajtiyʌ ñipyay, ni ja'n chiquiay, ni ja'n yajtu'mʌyay troja'ojmo. Y pyʌ'nʌyajpa tzajpojmo ijtupʌ mis Ndata's. ¿Ja'nsʌ'ŋmij más ŋguioyowa'ʌytyamu mij que ja'nde' palomata'm? 27¿Ijtusʌ'ŋ iwʌjutiwʌ mi'ojmota'm muspapʌ's 'ya'ŋʌyu tumʌ tzumi te' ye'ŋa'cʌ' ñempe jene quipsoya? 28¿Tiyʌcotoya jeque jene ŋguipstamba mbama? Quendamʌ te' lirio-jʌyʌ tza'mo'mo ijtyajpapʌ jutz tzoquiajpa. Ja'n yojšay ni ja'n jyu'tyay. 29Y, ʌsmij nʌjaytyamba que te' lirio-jʌyʌ jene suñita'm, más suñi que ja'nde' rey Salomón tzi'nmequia'pa'c. 30Juca te'šej suñi yajtzocpa Diojsis te' tza'mo'mota'mbʌ ta'nʌ que išo'oyj ijtu tey y jo'pit quiojtyatʌjpa jucʌtʌjcojmo, ¿ja'nsʌ'ŋmij más wyʌcomʌ'ytyame mijta'm wa'mij ñchi'tamu, ñempemij uša'ŋ nwyʌ'aŋja'moytyamba? 31Te'cotoya jeque, uy jene quipstame ni uy nʌmenetame: ¿Tiya'ndʌ maŋba ŋgu'ttamu, o tiya'ndʌ maŋba uctamu, o tiyʌpi'tandʌ maŋba mbama'ʌyu nwin? 32Porque yʌ'šejta'mbʌ tiyʌ mye'chajpa te' najsacopajcʌsita'mbʌ's. Pero myuspa tzajpojmopʌ tʌta'm Ndata's mumutiyʌta'm mis ja'ndiyʌ. 33Mejor me'tztamʌ winac wa'y 'yaŋgui'moyu Dios, y wa'y ijtu ñe' jyusticia mista'm ndzoco'yojmo, y te'šej Diojsismij maŋba ñchi'a'ŋʌtʌjtamu mumu yʌ'šejta'mbʌ tiyʌ. 34Te'cotoya jeque, uy jene quipstame jo'pitpʌ jama, porque te' jo'pitpʌ jama ŋguendaŋgue'tpamis tiyʌ mis ndzʌctamba. Tumdumʌ jamapʌ toya mba'ttambatijmis jutzmis wa'y ŋgʌtʌctamu.

Currently Selected:

San Mateo 6: ZCNT

Highlight

Copy