San Mateo 25

Te' majca'ytya'mbʌ mu'ša-yomo

1Nu'cpa'cande' jama yʌ'šejpʌte' te' tzajpojmopʌ aŋgui'mʌtʌjcuy, jujcha' majca'pyʌ mu'ša-yomo, pyʌquiajupʌ's quiandil-tzica, y maŋu choŋyaju te' nʌ quio'tʌjcajupʌ pʌn. 2Y mosa'y ñe'co'mota'mbʌ nʌctʌ'yoyajpapʌ, y mosa'y jowita'mbʌ. 3Y te' jowita'mbʌ's ñʌmaŋyaju te' quiandil-tzica pero jañʌma'ŋa'ŋʌya aceite. 4Pero te' nʌctʌ'yoyajpawʌ's ñʌmaŋyaju te' quiandil-tzica y ñʌma'ŋa'ŋʌyaju aceite. 5Y como jene ya'yu wa'y minu te' nʌ quio'tʌjcajupʌ pʌn, pe'ŋyaju y ʌŋbaquiaju myuma'ŋgʌ'y. 6Y paŋguc-tzu'še'ŋoyj weju te' coque'nopyapʌ: Sa'tamʌ, yʌy nʌ minu te' nʌ quio'tʌjcajupʌ pʌn. Tzu'cumdamʌ, ma pʌjcʌchoŋdamʌ. 7Pijche'ca sa'yaju te' mu'šata'mbʌ yomo, y wyʌtzʌquiaju te' quiandil-tzica. 8Y te' jowita'mbʌ's ñʌjayaju te' nʌctʌ'yoyajpapʌ: Nʌwe'ndamʌtʌj mista'm aceite, porque maŋbapa'yʌ' tyu'yu tʌsyʌ' ŋgandilta'm. 9Pero te' nʌctʌ'yoyajpawʌ's 'yaŋdzoŋyaju: Uytyʌj maŋu'ʌŋcʌ ŋgoya'ʌyu tʌj, ma juytyamʌ mista'm aceite mya'ʌyajpamʌy. 10Y maŋu'cše'ŋoyj jyuyaju 'yaceite te' jowita'mbʌ's, minu te' nʌ quio'tʌjcajupʌ pʌn. Tʌjcʌyaju te' ñimejcʌyajupʌ's quiandil-tzica ñe'cʌji'ŋ te' co'tʌjcajcu'yojmo. Y 'yaŋgʌyaju te' tʌc. 11Jʌsa'ca miñajque'tu te' jowita'mbʌ mu'ša-yomo, y nʌmyaju: Señor, Señor, yajtʌjcʌtʌj. 12Pero ñe'cʌ aŋdzoŋu: Wiyuŋše'ʌsmij ndzamjaytyamba: Ja'ʌsmij ispʌctame. 13Pijche'ca Jesús nʌ'ma'ŋʌyu: Coquendamʌ cuenta porque ja'nmis mustame tiyʌ jama ni tiyʌ hora'ʌj maŋba minu, ʌj te' Pʌ'nis 'Yune.

Chi'ne'ŋbʌ'u tyumin quioyosata'm te' comi's

14Porque yʌ'šejpʌte' te' tzajpojmopʌ aŋgui'mʌtʌjcuy, jujcha'nde' pʌn nʌ myaŋupʌ ya'aquiumguy. Wyejtu'mʌyu te' ñe'ta'm quioyosa y chi'ne'ŋbʌ'yaju ñe' tyumin wa'y ñʌyosjayaju. 15Y tuma'ŋbʌn chi'u mosa'y talento-tumin, y eyapʌ metza, y te' eyawʌ'que' tumʌ, 'yaŋjamu'cše'ŋoyj ñe'cʌ's jutipʌ's jujche'ŋ muspa ñʌyojsu. Y maŋu te' ya'aquiumguy. 16Y te' pyʌjcʌchoŋupʌ's mosa'y talento-tumin maŋu ñʌyoscʌ'yu, y chʌjcaŋwaju, y ta'nu majca'y talento. 17Y te' pyʌjcʌchoŋupʌ's metza talento, chʌjcaŋwajque'tu, y ta'nu macšcu'y talento. 18Pero te' pyʌjcʌchoŋupʌ's na' tumʌtij, maŋu ñipcʌwʌ'njayu te' quiomi's tyumin najsojmo. 19Y cʌtʌjcu'ca sone aŋsʌŋ, minu te' coyosa'sta'm quiomi wa'y minu pyiŋujmyayu jujche'ŋa yajpucšajwa'a te' tumin. 20Pijche'ca nu'cu te' pyʌjcʌchoŋupʌ's mosa'y talento. Ñʌmi'na'ŋʌyu otros mosa'y talento, y nʌmu: Señor, mosa'y talento misʌj ndzacjayu. Yʌy ijtu te'wʌ, y mosa'y talento'a'mʌs a'ŋʌyjayu. 21Y te' quiomi's ñʌjayu: Oye'aŋgʌtʌqui, nijamba'ʌsmij porque oyepʌ ŋguioyosamij. Nijambaše'ʌsmij uša'ŋbʌ tiyʌcʌsi, más wʌwʌpʌ tiyʌcʌsi maŋba'ʌsmij ŋgojtu. Tʌjcʌ, y mejtzji'ŋdʌ maŋba omdzocopyactamu. 22Y nu'que'tu te' pyʌjcʌchoŋupʌ's metza talento, y nʌmu: Señor, metza talento misʌj ndzacjayu. Yʌy ijtu te'wʌ, y metza talento'a'mʌs a'ŋʌyjayu. 23Y te' quiomi's ñʌjayu: Oye'aŋgʌtʌqui, nijamba'ʌsmij porque oyepʌ ŋguioyosamij. Nijambaše'ʌsmij uša'ŋbʌ tiyʌcʌsi, más wʌwʌpʌ tiyʌcʌsi maŋba'ʌsmij ŋgojtu. Tʌjcʌ, y mejtzji'ŋdʌ maŋba omdzocopyactamu. 24Y nu'que'tu te' pyʌjcʌchoŋupʌ's tumʌ talento, y nʌmu: Señor, nʌctʌ'yu'ʌs que jene paquitzocopyʌ mbyʌnmij. Nyajcosechatzʌcʌtʌjpamis ne'cʌ mis jañipʌmʌy, y ŋgotpamis ne' ŋgojtoquiu'yojmo jaŋguiosuyʌpʌ tiyʌmis. 25Te'cotoya na'tzu'ʌj, y maŋu'ʌs nipcʌwʌ'njayu mis ndumin najsacʌ'mʌ. Yʌtij yʌ'yʌs nʌminu ndzi'uše'ŋmisʌj. 26Y aŋdzoŋu te' quiomi, y ñʌjayu: Jene yatzitzocopyʌ y cʌway chʌcpapʌ ŋguioyosamij. Muspamis inʌc que nyajcosechatzʌcʌtʌjpa'ʌs ne'cʌ's jañipʌmʌy y ŋgotpa'ʌs ne' ŋgojtoquiu'yojmo ʌs jaŋguiosuyʌpʌ tiyʌ. 27Te'cotoya más inʌc oye wa'mis ŋgotjayu ʌs ndumin te' quioyojyajpamʌy tumin-une, y witu'u'camʌj wa'yʌs inʌc mbʌjcʌchoŋu ʌs ndumin 'yuneji'ŋba'a. 28'Yaŋgui'mu eyata'mbʌ quioyosa: Yajʌcʌ'jaytyamʌ te' talento-tumin, y tzi'tamʌ ñʌ'ijtupʌ's majca'y. 29Porque te' ijtupʌ'sñe' maŋba chi'a'ŋʌyaju, y maŋba ñʌ'ijtu jana yaye. Y iwʌ'sñe' uša'ŋ te'ša'ŋ ijtu, te' ijtuše'ŋbʌ maŋba yajʌcʌ'jayaju. 30Y tʌŋdʌjcʌytyamʌ pi'tza'ŋajcu'yojmo yʌ' cʌway chʌcpapʌ coyosa. Tey maŋba jyʌyu y toyapit maŋba quiʌ'tu tyʌtz.

Te' Pʌ'nis 'Yune's maŋba quiʌme'tzu mumu nación

31Minba'camʌj, ʌj te' Pʌ'nis 'Yune, ʌs ndzi'muŋgʌ'ojmo, maŋba miñaju mumu te' masanda'mbʌ ángeles ʌji'ŋ. Pijche'c ʌs mʌja'ŋajcupyit maŋba'ʌj mbocsu ʌs aŋgui'mʌtʌjcuy-pyocscu'yojmo. 32Y maŋba'ʌs nyajtu'mʌyatʌju ʌs nwi'naŋdʌjqui mumu naswindumʌ ijtyajupʌ pʌn. Y maŋba'ʌs mbiŋwe'ñaju oyeta'mbʌ, jujcha' coque'noye's pyiŋwe'nba quiopʌnda'm. 33Y quiotpa te' ñchowambeta'm chʌ'na'ŋojmoc y te' chiwuta'm 'yaŋña'ojmoc. 34Como ʌjte' te' Rey, mbiŋwe'ñaju'camʌs te'šej, maŋba'ʌs nʌjayaju te' ʌs ndzʌ'na'ŋojmoc ijtyajupʌ: Mindamʌ mijta'm, ʌs Ndata Diojsismij nyajdichoso'ajtamupʌ. Tʌjcʌytyamʌ, minʌ aŋgui'mdamʌ, porque te'šej ñimejcʌyu ʌs Ndata's chʌjcu'c yʌ' najsacopac. 35Porque nʌ'cʌj nyu'u, mbʌ'nʌytyamumisʌj. Y nʌ'cʌj nyoctʌjtzu, ndzi'tamumisʌj nʌ'. Tiju'ʌj ŋgojeju y mbʌjcʌchoŋdamumisʌj. 36Pamdyucutyucu'cʌj misʌj nyajmequia'tamu. Ca'epa'tu'cʌj tijumisʌj ndu'nistamu. Somyaju'cʌj preso'mo tijumisʌj ndu'nistamu. 37Pijche'ca te' justota'mbʌ's maŋba 'yaŋdzoŋyaju: Señor, ¿jujche'candʌsmij ŋguenu nʌ'cmij nyu'u y mbʌ'nʌyutʌsmij? ¿O nʌ'cmij nyoctʌjtzu y ndzi'utʌsmij nʌ'? 38¿Y jujche'ca tiju ŋguiojeju y mbʌjcʌchoŋutʌsmij? ¿O pamdyucutyucu'c y nyajmequia'utʌsmij? 39¿O jujche'ca ŋguia'epa'tu o ñdyiju preso'mo y tijutʌsmij ndu'nisu? 40Y maŋba 'yaŋdzoŋyaju te' Re'yis: Wiyuŋše'ʌsmij ndzamjaytyamba te' ndo'ya'ŋʌyjaytyamu'cmis iwʌjutiwʌ ʌs cʌmaŋda'mbʌ atzita'm, misʌjte' ndo'ya'ŋʌytyamu. 41Pijche'ca ñe'cʌ's maŋba ñʌjayaju te' aŋña'ojmoc ijtyajupʌ: Jʌcʌ'tamʌ ʌs nwi'naŋdʌjqui tocoyupʌ mbyʌnda'm mijyʌ'. Maŋdamʌ ja'n yayepʌ jucʌtʌjcojmo, nimejcʌyupʌ diablocotoya y ñe' 'yangelescotoyata'm. 42Porque nʌ'cʌj nyu'u, jambyʌ'nʌytyamʌmisʌj. Y nʌ'cʌj nyoctʌjtzu, jañchi'tamʌmisʌj nʌ'. 43Tiju'ʌj ŋgojejtʌ'ʌ y jambyʌjcʌchoŋdamʌmisʌj. Pamdyucutyucu'cʌj janyajmequia'tamʌmisʌj. Ca'epa'tu'cʌj y somyaju'cʌj preso'mo, jatyiyʌmisʌj ndu'nistamʌ. 44Pijche'ca ñe'cʌ'sta'm maŋba 'yaŋdzoŋyaju: Señor, ¿jujche'candʌsmij ŋguenu nʌ'cmij nyu'u y nyoctʌjtzu, jujche'ca me'tzu cojejcuy, y jujche'candʌsmij ŋguenu pamdyucutyucu o ŋguia'e'cmij o preso'mo y jañdyo'ya'ŋʌtʌsmij? 45Pijche'ca maŋba 'yaŋdzoŋyaju te' Re'yis: Wiyuŋše'ʌsmij ndzamjaytyamba te' jañdyo'ya'ŋʌytyamʌ'cmis iwʌjutiwʌ ʌs cʌmaŋda'mbʌ atzita'm, ʌj misʌjte' jañdyo'ya'ŋʌytyamʌ. 46Yʌ'ta'mbʌ maŋba tyʌjcʌyaju ja'n yayepʌ toya'ojmo. Pero te' justota'mbʌ maŋba tyʌjcʌyaju ja'n yayepʌ quengu'yojmo.

Currently Selected:

San Mateo 25: ZCNT

Highlight

Copy