MARCOS 8

Jesus la yaꞌbe sweꞌel chanmil ta jtul winketik

1Jun kꞌaal yan buelta la stsob sbaik tal bayal gente y maꞌyuk tut yichꞌojik te ya sweꞌike. Te Jesuse la yikꞌ tal te jnopojeletik yuꞌune. Jich a yalbe:

2—Ya jnaꞌbe yoꞌolil sbaik i gente to, yuꞌun ayix yoxebal kꞌaal te sjoyinejonik liꞌto y maꞌyukix tut ya sweꞌik. 3Pero teme ya jtikon bael y maꞌyuk tut sweꞌojik ya xbajtik ta snaike, ya me xboya kꞌinal yaꞌiyik ta be, porke ay machꞌatik te jakal talemike —xchi.

4Te jnopojeletik la yalik:

—¿Ba ya xba jtabetik sweꞌelik ta jun luwar tutꞌil liꞌto? Maꞌyuk machꞌa ay sna ta tijile —xchiik.

5Jesus la sjojkꞌobe:

—¿Jayeb xan waj ay awuꞌunik? —xchi.

La yalik:

—Jukpejch nax —xchiik.

6Te Jesuse la yalbe mantal te genteetike te ya snakan sbaik ta lume. La stsak ta skꞌab te jukpejch waje, la yalbe kola yal Dios yuꞌun. La xetalan, la yaꞌbe te jnopojeletik yuꞌune, y stukelik a ba spukbeyik te genteetike. 7Sok ay yichꞌojik chaꞌoxkojt chꞌinik chay. Te Jesuse la yalbe kola yal Dios yuꞌun y la yakꞌ xan ta pukel. 8Spisil a weꞌik jaꞌ to chikan noj te xchꞌujtike. Patil a noj xan jukeb moch sok te sobraile. 9Te jaytul te weꞌike ay wan chanmil ta jtul. Te tsꞌin abi te Jesuse la stikon bael te genteetike. 10Te Jesuse och xan bael ta barko sok te jnopojeletik yuꞌune, bajtik ta slum Dalmanuta.

Te fariseoetik la skꞌanbeyik jun seña milagro te Jesuse.

11Talik te fariseoetik lijk sapu sbaik ta kꞌop sok te Jesuse. Lijk skꞌanbeyik junuk seña milagro ya yakꞌ ta ilel te talem ta chꞌulchane, yuꞌun ya yilbeyik yoꞌtan a. 12Te Jesuse la sjikꞌ yoꞌtan yuꞌun sok jich a yal:

—¿Tuꞌun te ya skꞌan yilik jun seña i genteetik to? Jamal ya kal te maꞌyuk ni junuk seña ya xꞌaꞌbot yilik —xchi te Jesuse.

13Jich la sjiles. Och xan bael ta barko y bajt ta jech mar.

Te tut lebadura yuꞌun te fariseoetike

14Te jnopojeletik ma snaꞌik a yichꞌik bael sweelik, jip ay yuꞌunik pejch waj te ba barkoe. 15Te Jesuse la spas ta mantal:

—Ila me awilik, ila me abaik sok te lebadura yuꞌun te fariseoetik sok te lebadura yuꞌun te Herodese —la yut.

16Te jnopojeletik lijk yalbe sbaik:

—Jaꞌ yuꞌun te maꞌyuk te kotike —xchiik.

17Te Jesuse la snaꞌ te tutꞌil te ya yalike. Jich a yal:

—¿Tuꞌun te ya awalbe abaik te maꞌyukix awotike? Ni ma xkꞌot ta awoꞌtanik, ni makꞌ ya anaꞌikix. Mel ma xkꞌot ta apensarike. 18Ay asit y ma xꞌawilik kꞌinal. Ay achikin y ma xꞌawaꞌiyik sluwaril kꞌop sok. ¿Yuꞌun ben xchꞌay ta awoꞌtanik 19jal te la jxatbey joꞌpejch waj yuꞌun te joꞌmil ta jtule? ¿Jayeb moch a noj xan a te sobrail la atsobike? —xchi.

La sjakꞌik:

—Lajchayeb —xchiik.

20Sok la yal te Jesuse:

—Jal te la jxatbey te jukpejch waj yuꞌun te chanmil ta tule, ¿jayeb moch a noj awuꞌunik te stsꞌubil te la atsobike? —xchi.

La sjakꞌik:

—Jukeb —xchiik.

21Jich a yalbey:

—¿Meꞌn ma to xanaꞌbeyik sluwaril? —xchi te Jesuse.

Jesus la sjambe sit tul chok winik te ay ta Betsaida

22Patil kꞌoik ta Betsaida. Ay machꞌatik la yikꞌik tal tul chok te ba Jesus. La yalbe wokol te yakuk spikbe ta skꞌab. 23Te Jesuse la stsakbe skꞌab te choke y la slokꞌes bael ta tiꞌ jtejklum. La yajtsesbey sit ta yaꞌlel stiꞌ y la spik ta skꞌab. La sjojkꞌobe:

—¿Me ya awilix chꞌinuk? —xchi.

24Te choke lijk yil kꞌinal, y la yal:

—Ya kil te winketike, jich yilel te teꞌetik te ya xbeene —xchi.

25Te Jesuse la spikbe xan ta skꞌab te site. Te winike lijk yil xan te kꞌinale, y mel nax a lekub jilel. Spisil klaroix ta ilel ya yil a. 26Te Jesuse la stikon bael ta sna y la yalbe:

—Ma me sujtan te ba jtejklum, sok ma me machꞌa xꞌawalbe teꞌa —xchi.

Te Pedroe la yal ta jamal te jaꞌ Cristo te Jesuse

27Ta patil to te Jesuse lokꞌ bael sok te jnopojeletik yuꞌune, bajtik ta chꞌin kolonyaetik te ba ay te jtejklum Cesarea Filipo sbiile. Kꞌalal yipalik bael ta beele, te Jesuse la sjojkꞌobe te jnopojeletike:

—¿Machꞌa a te ya yalik te genteetike te machꞌaon ae? —xchi.

28La sjakꞌik te jnopojeletike:

—Ay ya yalik te jaꞌat Juanat te Akꞌichꞌjaꞌe. Te yanetik ya yalik te jaꞌat Eliasat, sok ay yanetik ya yalik te jaꞌat tulukat te alwanejetik yuꞌun Dios —xchiik.

29Jesus la sjojkꞌobe:

—Jal tsꞌin te jaꞌexte, ¿Tut ya awalik? ¿Machꞌa ya akuyonik a? —xchi.

Pedro la yal:

—Jaꞌat te Cristoate —xchi.

30Te Jesus la skom ta spisilik te ma me machꞌa yalbeyik ni tuluk.

Jesus la yal te ya xchame

31Te Jesuse lijk snojpeslan te jnopojeletike te ya xkꞌax bayal swokole. Jich a yalbe:

—Te Nichꞌanile ya me xkꞌax bayal swokol. Ya me spꞌajik te mamaletike sok te statal-saserdoteetike sok te maestroetik yuꞌun te mantaliletike. Ya me yakꞌik ta milel, pero ya me xchaꞌkux ta yoxebal kꞌaal —xchi te Jesuse.

32Jaꞌ la yaltalanbey ta jamal. Te Pedro la yikꞌ bael ta parte y lijk skom ta kꞌop. 33Pero te Jesuse la sutes sba ta yilel te jnopojeletike, sok la skom te Pedroe. Jich a yalbe:

—¡Kꞌeja aba ta jkuenta, Satanas! Maꞌyuk ta awoꞌtan te tut ya skꞌan yoꞌtan te Diose. Jaꞌ ay ta awoꞌtan te tut ya skꞌan yoꞌtanik te genteetike —la yut.

34Te tsꞌin abi te Jesuse la yikꞌ tal te gentee y sok euk te jnopojeletike. Jich a yalbe:

—Teme ay jtuluk machꞌa ya skꞌan xꞌoch ta jnopojel kuꞌune, a me skoltay sba ta yoꞌtan, a me skuch skrus, y a me stsakliyon. 35Spisil te machꞌa ya skꞌuxutay sba sok te skuxlejale, ya me xchꞌay sok te skuxlejal. Yan te machꞌa ya xchꞌay skuxlejal teme joꞌon ta jkaje y sok ta skuenta te lek yachꞌil kꞌope, jaꞌ me xkuxuyin stukel. 36¿Tut yax lokꞌ awuꞌun a teme ya awuꞌunin spisil te balmilale teme ya xchꞌay te akuxlejale? 37¿Jayeb ya xjuꞌ ya atoj a yuꞌun te akuxlejale? 38Teme ya xkꞌexawex kuꞌun sok teme ya xkꞌexawex yuꞌun te jkꞌope ta sit te genteetik te machꞌatik ma junuk yoꞌtanik ta skuenta Dios sok te kꞌayemik ta mulile, jichek te Nichꞌanile ya me xkꞌexaw awuꞌunik euk te tut ora ya xtal sok stsaꞌamul te Jtate y sok stsaꞌamul te chꞌul angeletike —xchi te Jesuse.

Currently Selected:

MARCOS 8: AMANNT

Highlight

Copy