MARCOS 10

Jesus ya snojpeswan yuꞌun skuenta chꞌojtombajel

1Te Jesuse lokꞌ bael te ta Capernaume y bajt ta estado yuꞌun Judea sok ta lum te ba ya xlokꞌ tal kꞌajkꞌal ta jechjaꞌ Jordan. Te stsob sba xan tal a te genteetike. Te Jesuse lijk nojpeswanuk xan jachik tutꞌil ya spasulan ae. 2Ay fariseoetik tijilajik tal ta stojol te Jesuse, yuꞌun ya yilbeyik yoꞌtan. La sjojkꞌobeyik:

—¿Te winikulile me spas te ya xchꞌoj sba sok te yiname? —xchiik.

3La sjakꞌ te Jesuse:

—¿Tut xchi te smantal te Moisese? —xchi.

4La yalik:

—Moises la yal te ya xjuꞌ xchꞌoj sba sok yinam teme ya yaꞌbey lejchuk sjunil yuꞌun chꞌojtombajel —xchiik.

5Yo la yal te Jesuse:

—Te Moises la nax stsꞌibabeyex jilel te mantale yuꞌun ta skaj te ben tulan te awoꞌtanike. 6Pero ta slijkibal, kꞌalal Dios la spas spꞌejel te tutik aye, la spas winik sok ants. 7Jaꞌ yuꞌun te winike ya sjiles te smeꞌstate, sok ya staj sba sok te yiname, 8y ta xchebal jun nax stiꞌbalulik ya xkꞌotik. Jaꞌ yuꞌun ma chebukix a, junik nax a kꞌot a. 9Jaꞌ yuꞌun te winike ma spas ta jimel te machꞌatik jun nax a akꞌot yuꞌun te Diose —xchi te Jesuse.

10Te kꞌalal ayikix ta na a, te jnopojeletik yuꞌune la sjojkꞌobeyik xan te kꞌop to. 11Te Jesuse la yalbe:

—Te machꞌa ya sjiles te yiname y ya yikꞌ sba sok yane, yantsinejix kꞌoem a. 12Y teme jaꞌ te ants ya sjiles te swinikule y ya yikꞌ sba sok yane, kremiwejix kꞌoem ekꞌa.

Jesus ya yaꞌbey bendision te untike

13Ay la yikꞌik tal untik ta stojol te Jesuse, yuꞌun ya skajanbe skꞌab ta sjolik. Pe tsꞌin te jnopojeletike kꞌan skomik te machꞌatik yikꞌojik tale. 14La yil tsꞌin te Jesuse, ma tsaꞌamuk la yaꞌi, y la yal:

—Taluk ta jkuenta te untike. Ma me komik, porke te machꞌa jachik yoꞌtanik tutꞌil untik to, ya xjuꞌ ya xꞌoch te ba ay te Diose. 15Jamal ya kalbeyex, te machꞌa ma jichuk yoꞌtan tutꞌil te untike ma xjuꞌ ya yajwalin te Diose —xchi te Jesuse.

16La skꞌechtalan te untike, y la skajanlanbe skꞌab ta sjolik, sok la yaꞌbe bendision ta stojolik.

Xkꞌopoj sok Jesus jtul jkꞌulej winik

17Te kꞌalal xlijkꞌ xan ta beel te Jesuse, tsꞌin xyaletal jtul winik. Jul skejan sba ta yok te Jesuse y la sjokꞌobe:

—Maestro te ben lekate, ¿tut lek ya jpas yuꞌun ya xkuxiyinon sbajtel kꞌinale? —xchi julel.

18Albot yuꞌun te Jesuse:

—¿Tuꞌun ya awal te lekil winikone? Jtul nax ay te machꞌa leke, jaꞌ te Diose. 19Anaꞌojix te mantaliletik: “Ma me milawanan, ma me antsiwejan, ma me elkꞌajan, ma me leawanan ta kꞌop, ma me loꞌlawanan, sok chꞌuunbeya smantal ameꞌatat” —xchi te Jesuse.

20La yal te winike:

—Maestro, me to jchꞌuunej spasel desde bikꞌiton to ae —xchi.

21Te Jesuse la yilbey sit sok xpich ta yoꞌtan, y la yalbe:

—Ay to jkaj xan te tut skꞌan ya apase. Baan, chona spꞌejel te tutik ay awuꞌune y akꞌtalanbeya te meꞌbaetike. Jich me ay akꞌulejal ta chꞌulchan ya xkꞌoat a. Yoꞌtik laꞌ me, tsꞌakliyaon tal —xchi.

22Te winike kꞌal ta yoꞌtan te kꞌalal la yaꞌiy, y toj triste a bajt porke beno skꞌulejal.

23Te Jesuse la yiltalanbe sit te jnopojeletike sok jich a yalbe:

—Te kꞌulejetike wokol ya yajwalinik te Diose —xchi.

24Te jnopojeletike bayal aꞌabiyan yoꞌtanik yuꞌun te tut la yale. Altalanbot xan yuꞌun te Jesuse:

—Jnichꞌnab, ben wokol ya yajwalinik Dios te kꞌulejetike. 25Jachik tutꞌil te ma xkꞌax ta yit tsꞌisonajib te jkojt kameyoe, jachik te jtul kꞌulej ma xjuꞌ ya yajwalin te Diose —xchi te Jesuse.

26Te kꞌalal la yaꞌiyik, bayal aꞌabiyan yoꞌtanik yuꞌun. La sjojkꞌobey sbaik:

—¿Machꞌa wan xjuꞌ ya xkol tsꞌiin? —xchiik yuꞌun.

27Te Jesus la yiltalanbe xan te sitike sok la yalbe xan:

—Maꞌyuk tut xjuꞌ yuꞌun te genteetike. Yan te Diose ya xjuꞌ yuꞌun stukel, batsꞌi maꞌyuk tut ma xjuꞌ yuꞌun stukel te Diose —xchi.

28Lijk yalbe te Pedroe:

—Kajwal, te joꞌotike la jilestik te tutik ay kuꞌuntike, sok la jtsꞌaklitikat —xchi.

29La yal te Jesuse:

—Jamal ya kalbeyex, te machꞌa ya sjiles ta jkuenta sok ta skuenta te lek yachꞌil kꞌope jaꞌ teme sna, o sbankiltak, o xwixitak, o yitsꞌinab, o smeꞌstat, o yinam, o yuntikil, o jaꞌ te slume, 30sien ta jmel ya xꞌaꞌbot sjelol liꞌ ta balmilale, chikan teme sna, o sbankiltak, o xwixitak, o yijtsꞌinab, o smeꞌ, o yuntikil, o slum. Aunke ya yichꞌ ilbajinel, pero ta patil bael ya me xꞌaꞌbot xkuxlejalik ta sbajtel kꞌinal yuꞌun. 31Pero te machꞌatik nail a talike, jaꞌ me patil ya xlaj kꞌot. Y bayal te machꞌatik patil ya xlaj tale, jaꞌ me nail ya xlaj kꞌot —xchi te Jesuse.

Yoxmelalix ya yal te Jesuse te ya xlaje

32Yipalik ta beel bael ta sbelel Jerusalen. Nail bael te Jesuse, patil ay stukel te jnopojeletike. Bayal yipal ta aꞌabiyel te yoꞌtanike. Yan te yanetik tsꞌakliwanejetik yipalik ta xiꞌel stukelike. Te Jesuse la stsob xan ta stukel nax te lajchaytul jnopojeletik yuꞌune. Lijk yalbe xan te tut ya xkꞌot ta pasel ta skuentae. 33Jich a yal to:

—Aꞌiya awaꞌiyik sluwaril, yipalotikix ta moel bael ta Jerusalen. Pero te Nichꞌanile teꞌ me ya xꞌakꞌot ta skꞌab te statal-saserdoteetik sok te maestroetik yuꞌun te mantaliletike. Sok ya me xchapbot skꞌoplal ta milel, sok ya me xꞌakꞌot ta skꞌab te yanlumetike. 34Ya me yikꞌtinik, sok ya me stubutayik, sok ya me smajik, sok ya me smilik. Pero ta yoxebal kꞌaal, ya me xchaꞌkux tal —xchi te Jesuse.

Te Jacobo sok te Juan ay tut la skꞌanbeyik te Jesuse

35Te Jacobo sok te Juane te yuntikil te Zebedeoe tijilajik tal te ba ay te Jesuse, y la yalbeyik:

—Maestro, ya jkꞌantik pawor ta atojol te jichuk ya apasbotik te tut ya jkꞌantike —xchiik.

36Te Jesuse la sjokꞌobe:

—¿Tut a te ya akꞌanik te ya jpasbeyexe? —xchi.

37La yalik:

—Jaꞌ ya jkꞌantik te ya awaꞌbotik te tut ora ya xꞌochat ta mukꞌul ajwalile ya xnaklotik jtul ta sbatsꞌil akꞌab y tul ta akꞌexom —xchiik.

38La sjakꞌ te Jesuse:

—Te jaꞌexe ma xꞌanaꞌik te tut ya akꞌanike. ¿Me xjuꞌ wan awuꞌunik te wokolajel te ya yaꞌbelone? Sok, ¿ya wan xjuꞌ awuꞌunik te ikꞌtinel te ya kichꞌ te joꞌone? —xchi.

39La yalik:

—Yak. Ya xjuꞌ kuꞌuntik —xchiik.

Jesus la yalbe:

—Jich a nix a te ya yaꞌbeyex te wokole, sok te ya awichꞌik ikꞌtinel jachik te tutꞌil ya kichꞌ te joꞌone. 40Pero te tutꞌil ya akꞌanik te ya xnajkꞌajex ta sbatsꞌil jkꞌab sok ta skꞌexome, ma joꞌukon ay ta jkuenta. Jaꞌ chikan stukel te Jtate te machꞌatik chapalix skꞌoplalike te ya yakꞌ najkꞌajuk teꞌae —xchi te Jesuse.

41Te kꞌalal la yaꞌiyik te lajuntul jnopojeletike, la yilintayik te Jacoboe sok te Juane. 42Te Jesuse la yikꞌtalan tal sok la yalbe:

—Te jaꞌexe anaꞌojik te ya yakꞌ sbaik ta ajwalil yuꞌun slumal te machꞌatik aꞌbilik ta kuenta yuꞌunike. Sok te machꞌatik toyol ayike tulan ya xmantalajik ta skuenta te jtejklume. 43Pero te jaꞌexe ma me apasik jich. Yan teme ya akꞌan te ayat ta kuenta, akꞌa me aba ta abatinel yuꞌun te yanetike. 44Sok teme ya akꞌan te mukꞌ akꞌoplal ya xkꞌoate, jaꞌ me moso ya awakꞌ aba ta stojol te yanetike. 45Jich te Nichꞌanile ma jaꞌuk talem yuꞌun ay machꞌa ya smantaltes. Jaꞌ talem yuꞌun te ya yakꞌ sba ta mantaltesel sok te ya yakꞌ sba ta lajel skuenta yuꞌun jich ya xwejtꞌ skolelik a ipal genteetike —xchi te Jesuse.

Jesus la slekutesbe sit te Bartimeoe

46Kꞌotik ta jtejklum Jerico. Te kalal lokꞌ bael ta jtejklum te Jesuse, sjoyinej te jnopojeletik yuꞌune sok te bayal genteetike. Ay jtul chok winik, Bartimeo sbiil xnichꞌan Timeo, nakal ta tiꞌ be. 47La yaꞌi te jaꞌ Jesus Nazaret te yipal ta kꞌaxel teꞌae. Lijk yawutay:

—¡Jesus, te stsꞌumbal Davide, kꞌuxtayaon! —xchi ta aw.

48Ay bayal machꞌa xkomot yuꞌun te yauk komuk ta awe, pero mas tulan xan yipal ta aw a.

—¡Stsꞌumbal David, kꞌuxtayaon! —xchi ta aw.

49Yo tejkꞌaj tsꞌiin te Jesuse, sok la yal:

—Ikꞌaik tal —xchi. Jich a yikꞌik tal te chok winike. Albot yuꞌunik:

—Junuk awoꞌtan. Jajchan. Ya yikꞌatix —xchiik.

50Te chok winik la skꞌojtsan jilel te skꞌotone, y wil jajchel. Ba sta te Jesuse. 51Te Jesuse la sjojkꞌobey:

—¿Tut ya akꞌan te ya jpasbeyate? —xchi.

La yal te chok winike:

—Maestro, ya jkꞌan te ya ajambon te jsite —xchi.

52Albot yuꞌun te Jesuse:

—Baanix. Lekix ay te asite yuꞌun la xchꞌuun awoꞌtan te ya jkoltayate —xchi te Jesuse. Ta ora nax lekub te sit te chok winike, sok la stsꞌakliy bael ta be te Jesuse.

Currently Selected:

MARCOS 10: AMANNT

Highlight

Copy