LUCAS 19

Te Jesus sok te Zaqueoe

1Kꞌalal och bael ta jtejklum Jerico te Jesuse, kꞌax ta yolil te jtejklume. 2Ay jtul winik teꞌa te Zaqueo sbiil te ben jkꞌuleje. Jaꞌ statal yuꞌun te jkꞌan-tojemaletik te teꞌeyik ae. 3Ya skꞌan ya snaꞌbe sba te Jesuse, pero ma spas tutꞌ ya yil, yuꞌun ben bayal genteetik teꞌa, sok yuꞌun ben kꞌox te Zaqueoe. 4Jich yuꞌun xyalet kꞌaxel ta ora, yuꞌun ya sta ta ilel a. Mo ta jwol sikomoro-teꞌ yuꞌun tijil nax ya xkꞌax a te Jesuse. 5Kꞌalal kꞌax teꞌa te Jesuse, la skꞌelu moel y jich a yalbe:

—Zaqueo, koan tal ta ora, yuꞌun ya xboon ta ana —xchi.

6Jich te Zaqueoe koj tal ta ora. Ben jun yoꞌtan la yikꞌ bael ta sna. 7Kꞌalal la yilik, spisil te genteetike lijk yikꞌtinik te Jesuse. Jich ya yalik:

—¿Tuꞌun te ba ochuk ta sna te jmulawile? —xchiik.

8Te Zaqueoe tejkꞌaj jajchel. Jich a yalbe te Kajwaltike:

—Ilawil, Kajwal, ya me jkꞌebenbey oliluk te stutik kuꞌun te meꞌbaꞌetike. Sok teme ay machꞌa kelkꞌanojbe stutik yuꞌune, ya me jsujtesbe chanmel ta mas sjelol te tut kelkꞌanojbeye —xchi.

9Te Jesuse la yal:

—Te ora to julix kolel liꞌ ba na to, porke te winik to jaꞌ stsꞌumbal euk te jꞌAbrahame. 10Yuꞌun te Nichꞌanile jaꞌ a tal sle y tal skoltay te machꞌatik chꞌayeme —xchi te Jesuse.

Seña-kꞌop te mina takꞌine

11Te genteetike yipalik ta yaꞌibeyel sluwar skꞌop te Jesuse. Jicha lijk yalbe jun seña-kꞌop yuꞌun tijilix ay bael a ba Jerusalene, y skuyojik te genteetike te ya xchiknaj ta ora te ya xlijkix ta mantal te Diose. 12Jich a yaltalanbe:

—Ay jtul lekil jkꞌulej winik te bajt ta yan jtejklum te lom jakal aye, yuꞌun ba yichꞌ tal yaꞌtel ta reyil. 13Te kꞌalal ya xbajtix aye, la yikꞌ tal ta stojol te lajuntul yaj-atꞌeletike. La yaꞌbe entregal lajuneb mina takꞌin te juju-tule, y la yaltalanbe: “Pasa chonbajelik sok te takꞌin to. Jolintesaik jaꞌ to teme sujton tale”, xyut.

14“Pero te genteetik yuꞌun te slumale lom pꞌajbil yuꞌun. Te kꞌalal baemix aye, ta spat nax a stikonik bael jmantaletik te ba yalike: “Ma jkꞌantik te ya yichꞌ yaꞌtel ta reyil ta jtojoltik te winik to”, xchiik.

15“Pero puersa la yichꞌ yaꞌtel ta reyil. Jicha sujt tal ta slumal. Te kꞌalal sujtix tal aye, la stikon tal ta ikꞌel te lajuntul jꞌaꞌteletik te la yaꞌbe jilel entregal te takꞌine, yuꞌun ya sjojkꞌobe te jayeb a jolin yuꞌun te takꞌin te juju-tule.

16Te primeroe ba yal: “Kajwal, te takꞌine jolin xan kuꞌun lajunmel ta mas”, xchi.

17“Te reye la sjakꞌbe: “Lek ay. Jlekil jꞌaꞌtelat. Te tutꞌil jun awoꞌtan la akanantaybon te tut chin nax a kaꞌbeyat jilele, jaꞌ yuꞌun ya kaꞌbeyat awaꞌtel ta sapuyel lajun pam jtejklum —xchi.

18“Tal te jtul xane y la yal: “Kajwal, te takꞌin la awaꞌbon jile, jolin xan kuꞌun joꞌmel ta mas”, xchi.

19“Jicha albot yuꞌun euk te yajwale: “Te jaꞌate ya kaꞌbeyat awaꞌtel ta sapuyel joꞌpam jtejklum —xchi.

20“Tal xan te jtule, jich a yal euk: “Kajwal, liꞌ ay te takꞌin te la awaꞌbon jile. La jkꞌejbeyat, y la jpots ta chujkilal. 21Yuꞌun la xiꞌat porke te jaꞌate tulan winikat. Yuꞌun ya atam te tut ma jaꞌukat awakꞌoje y ya akꞌaj euk te ma jaꞌukat atsꞌunoje”, xchi.

22“Jich te reye la yal: “Ma lekil jꞌaꞌtelukat. Ta akꞌop nax chikan te ya xbaat ta kastigoe. Teme anaꞌoj te tulan winikone, te ya jtam te ma joꞌukon kakꞌoje, sok te ya jkꞌaj te ma joꞌukon jtsꞌunoje, 23¿Tuꞌun ma ba awakꞌ ta banko te jtakꞌine yuꞌun jich tsꞌakal ya kichꞌbe sjol te kꞌalal ya sujton tal ta jnae?” xyut. 24Y la yalbe te machꞌatik teꞌeyik ae: “Pojbeyaik te takꞌin yichꞌoje. Aꞌbeyaik te machꞌa a jolin xan yuꞌun lajunmel ta mase”, xchi.

25“La yalik: “Kajwal, pero yichꞌojix lajunmel ta mas stukel” xchiik.

26“Te reye la sjakꞌ: “Yuꞌun ya kalbeyex: Spisil te machꞌa ay yichꞌojixe, ya me xꞌaꞌbot xan sjoy. Yan te machꞌa maꞌyuk yuꞌune, ya me xpojbot te tut yichꞌoj chꞌinuke. 27Yan te machꞌatik skontrainejone te ma skꞌanik te ya xꞌochon ta reyil ta stojolike, ikꞌbikon tal liꞌ to, y milaik ya kil ta jsit”, xchi te reye —xchi ta yalel te Jesuse.

Te Jesuse och bael ta Jerusalen

28Patil te kꞌalal laj yoꞌtan ta kꞌop te Jesuse, lijk xan ta beel ta Jerusalen. 29Te kꞌalal la sta te wits Olivailtik sbiile te nopol ay sok te Betfage sok Betaniae, la stikon bael chaꞌtul te jnopojeletik yuꞌune. 30Jich a yaltalanbe:

—Baanik lum ba chꞌin kolonya chikan ta ilele. Teꞌ me chukul ya xkꞌo ataik a jkojt chꞌin buru te mato ayuk machꞌa moem ae. Polaik y ikꞌaik tal. 31Teme ay machꞌa sjojkꞌobeyex: “Tuꞌun la apolik”, teme xchie, jich me xꞌawalbeyik: “Jaꞌ ya xtuun yuꞌun te Kajwaltike”, ya me awutik —xchi.

32Te jnopojeletike laj bajt y jicha kꞌo staik spisil te tuti albot bael yuꞌun te Jesuse. 33Te kꞌalal ya to nax spolik a te chꞌin burue, te yajwale jojkꞌolambot yuꞌun:

—¿Tuꞌun ya apolik bael te chꞌin burue? —xchi.

34La sjakꞌbeyik:

—Yuꞌun ya xtuun yuꞌun te Kajwaltike —xchiik.

35Jich a xchechik tal te ba ay te Jesuse. La yaꞌbeyik stesulin skꞌuꞌ-spakꞌik y la smoesik a te Jesuse. 36Te tutꞌil yipal kꞌal ta beel ae, te genteetike ya slimik kꞌael skꞌuꞌ-spakꞌik te ba bee. 37Te kꞌalal nopol ya staix bael a te koel yuꞌun wits Olivailtike, spisil te machꞌa tsꞌaklibil yuꞌune lijkik ta aw yuꞌun sbujts yoꞌtanik. Ya yalbeyik kola yal Dios yuꞌun te milagroetik te ya yilike, 38y ya yalik:

—Ben me tsaꞌam slekil te rey te talemix ta stojol te Kajwaltike. Butsꞌanix kꞌinal ta chꞌulchan, y ben me tsaꞌam slekil te Chꞌul Dios te ay ta chꞌulchane —xchiik ta kꞌop.

39Ay jtul cheb fariseoetik te ay ta yolil te genteetike jich a yalik:

—Maestro, koma ta kꞌop te jnopojeletik awuꞌune —xchiik.

40Pero te Jesuse la sjakꞌtalanbe:

—Ya kalbeyex: Teme ya skom sbaik ta kꞌop to, jaꞌ ya xlijk ta aw te tonetike —xchi.

41Te kꞌalal nopol ayikix bael ta Jerusalen ae, te Jesuse la yil te jtejklume. La yokꞌetay. 42Jich a yal:

—Te kꞌoemuk ta awoꞌtanik te ora to te tut ya xjuꞌ ya sbujtsꞌanej kꞌinal ya awaꞌiyik yuꞌune, pero te ora to nakꞌal ta atojolik, ma spas ya awilik. 43Yuꞌun ya me sta skꞌaalel te ma tsaꞌamuke, kꞌalal ya me xtal te akontraike, y ya me xtal sjoyat, ya me xtal smakelex ta jejch ta jejch, 44ya me slajinelex ta apisilik. Ya me xmiltalanot spisil te alumale. Ma me ayuk xjil jpꞌejuk ton te kajal ya xjil ta sba te jpꞌej xan tone. Porke ma la anaꞌbe sba te tut ora xtaluk te Dios te tal skoltayate —xchi te Jesuse.

Te Jesuse la yakꞌ ta akꞌel ta jkuenta te temploe

45Ta patil te Jesuse och bael te ba temploe y lijk stentalan lokꞌel te machꞌatik yipalik ta chonbajel teꞌ ae. 46Y la yaltalanbe:

—Jich tsꞌibabil jilel ta Sjun te Diose: “Te jnae jaꞌ snaul skꞌoponel Dios sbiil”, xchi me. Yan te jaꞌexe la akꞌajtatesikix ta xchꞌen jꞌelekꞌetik —xyut.

47Jujun kꞌaal te Jesuse nojpeswan ta templo. Te statal saserdoteetike sok te maestroetik yuꞌun te mantaliletike sok euk te stataletik yuꞌun te jtejklume yipalik ta sleel tutꞌil ya smilik te Jesuse. 48Pero ma staik tut ya yutik, yuꞌun spisil te genteetike ben tsaꞌam ya yaꞌiyik te tut yipal ta yalel te Jesuse.

Currently Selected:

LUCAS 19: AMANNT

Highlight

Copy