LUCAS 15

Seña-kꞌop te jkanan te la sta te skarnera chꞌayeme

1Spisil a stsob sbaik tal te jkꞌan tojemaletike sok te yan gente jmulawiletike, tijilajik tal te ba ay te Jesuse, yuꞌun tal yaꞌiybeyik sluwar te skꞌope. 2Pero te fariseoetike sok te maestroetik yuꞌun te mantaliletike lijk yaꞌbiyanik ta mukul. Jich a yalik:

—Te winik to jun yoꞌtan sjoyinej sba sok ta weꞌel te jmulawiletike —xchiik ta yaꞌbiyanel ta mukul te Jesuse.

3Jich te Jesuse lijk yalbe yaꞌi te seña-kꞌop to:

4—Teme ay jtuluk te jaꞌexe teme ay sien ta jkojt skarnerae, ¿tut ya spas teme chꞌay yuꞌun jkojtuke? ¿Me ma wan yauk sjiles ta stenle te nobenta y noebe ta jkojte, yuꞌun ya xba slej tal te jkojt chꞌayeme? Jaꞌ to ya xlaj yoꞌtan a teme la stae. 5Te kꞌalal la staix ae, ben kontento ya xkꞌech moel ta snejkel. 6Kꞌalal kꞌot ta snae, ya stsob tal te yamigotake sok te sbersinatake. Y jich ya yaltalanbe: “Ben kontentoukotik me, porke la jtaix tal te jkarnera te chꞌayem kuꞌune”, xchi ta yalel. 7Ya kalbeyex: Jich me ay ben jun yoꞌtan yuꞌun te machꞌatik ay ta chꞌulchane yuꞌun teme ya sujtes yoꞌtan yuꞌun smul jtul jmulawile. Mas ben jun yoꞌtan yuꞌun te tutꞌil te nobenta y noebe ta jtul te toj yoꞌtanik ta stojol Dios te ma puersauk ya sujtes yoꞌtanik yuꞌun te smulike —xchi te Jesuse.

Seña-kꞌop te ants te la staix te stakꞌin xchꞌayoje

8La yal xan te Jesuse:

—Jaꞌ jich euk teme ay jtul ants te ay lajuneꞌ pesu stakꞌine, teme la xchꞌay junuk pesue, ¿tut xchi yuꞌun? ¿Me ma wan yauk stsun slampara sok me ma wan yauk smes lek te snae yuꞌun ya sle te stakꞌin chꞌayeme? Jaꞌ to xlaj yoꞌtan teme la stae. 9Te kꞌalal la staix aye, ya stsob tal te yamigatake sok te sbersinatake, jich ya yaltalanbe: “Ben junuk me koꞌtantik ta jpisiltik, yuꞌun la jtaix te jun pesu jchꞌayoje”, xꞌutalanot. 10Ya kalbeyex, jich me ben jun yoꞌtan yuꞌun te chꞌul angeletik yuꞌun Dios ta chꞌulchane teme ya sujtes yoꞌtan yuꞌun smul te jtul jmulawile —xchi te Jesuse.

Seña-kꞌop te tatil te la yaꞌbe perdon te xnichꞌane

11Te Jesuse jich a yal xan to:

—Ay jtul winik te ay cheb te xnichꞌnabe. 12Te ijtsꞌinale la yalbe te state: “Jtat, ya me awaꞌbon te jkuentail te ya kichꞌe”, xchi ta stojol te state. Jich te state la xatꞌbe te stutik yuꞌun te xnichꞌnabe.

13“Cheꞌoxeꞌ kꞌaal ta patil te ijtsꞌinale la xchon spisil te smajtan a aꞌbote, y te stojole jakal a bajt sok ta yan luwar. Teꞌ kꞌo slajin spisil a, chikan te tuti skꞌan yoꞌtan a slajin ae. 14Pero te kꞌalal laj yuꞌun spisil te stakꞌine, tal bayal wiꞌnal te ba luwar ba aye. Lijk chamuk ta wiꞌnal yuꞌun maꞌyukix tut xtuunix yuꞌun a. 15Ba skꞌan yaꞌtel te ba ay jtul winik te ba luwar ba aye, jich a stikon bael ta slum ta skanantayel chitam. 16Yoꞌtanuk ya skꞌan snojes xchꞌujt ekꞌa te sit teꞌ te ya sweꞌ te chitametike, pero maꞌyuk machꞌa aꞌbot yuꞌun.

17“Ta patil lijk spas pensar yuꞌun te swokole, y jul ta yoꞌtan: “Ay bayal yaj-aꞌtel ta sna te jtate sok bayal tut ya sweꞌik. Yan te joꞌone ya xchamon ta wiꞌnal liye. 18Ya me sujton bael ta sna te jtate. Jich me ya xkꞌo kalbe: ‘Jtat, jtaoj jmul ta stojol Dios sok ta atojol euk. 19Ma spasix te ya akuyon ta anichꞌane. Jich aꞌ kꞌoukon ta awoꞌtan te tutꞌil awaj-aꞌtele,’ ya me kut”, xchi ta snopel. 20Jicha lijk bael ta beel, sujt bael ta sna te state.

Te kꞌalal jakal to ay kꞌal ae, ilot yuꞌun te state. Lom xpichꞌ yoꞌtan a yil. Animal a ba sta tal ta be, la spet y la yujtsꞌi.

21“Te xnichꞌan la yalbe: “Jtat jtaoj jmul ta stojol Dios sok ta atojol euk. Ma spasix te ya apꞌison ta anichꞌane”, xchi ta stojol te state.

22“Pero te state la yalbe mantal ta ora te yaj-aꞌtele: “Lokꞌesaik tal ta ora te lekil kꞌuꞌul-pakꞌale, aꞌbikon slap. Aꞌbikon junuk xchꞌokob ta yal skꞌab sok aꞌbikon slap xanab. 23Sok ikꞌaik tal te wakax te ben jujpꞌene, y milaik. Yuꞌun ya me jweꞌtik sok ya me jpastik kꞌin. 24Porke te jnichꞌan to chamenix a jkuy a, pero chaꞌkuxix tal. Chꞌayemix bael, pero la to jtajtik”, xchi te state. Jich a lijk spasik te kꞌine.

25“Yan te bankilale baem ta kꞌaltik a. Te kꞌalal sujt tale, xnopet xkꞌot ta sna a te la yaꞌi te kꞌine sok te ajkꞌote. 26Jich a yikꞌ tal jtul te aj-aꞌteliletike. La sjojkꞌobey tut yuꞌun te ay kꞌine. 27Te aj-aꞌtelile la yal: “Yuꞌun jaꞌ a sujtix tal te awijtsꞌine. Jich te atate ben jun yoꞌtan a yakꞌ ta milel ben jujpꞌen wakax yuꞌun lek a sujt tal te awijtsꞌine”, xchi te aj-aꞌtelile.

28“Pero te bankilale ilin yuꞌun. Ma skꞌan te ya xꞌoch bael ta snae. Jich te state puersa lokꞌ tal ta slekil-kꞌopon te xnichꞌane te yauk xꞌoch bael ta snae. 29Te bankilale la yalbe te state: “Anaꞌoj te ayix bayal jaꞌbil te ya jpasbat awaꞌtele, ni maꞌyuk ba ma jchꞌuun amantal. Pero ni maꞌyuk awakꞌojbon jkojtuk chibo yuꞌun ya jpas kꞌin sok a te joꞌtake. 30Yan te kꞌalal sujt tal te alekil-nichꞌan te la nax yixlan ta lajinel te atakꞌin yuꞌun te antsiwejele, y jaꞌ la amilbeyix jujpꞌen wakax stukel”, xchi te bankilale.

31“Te state la sjakꞌbe: “Jnichꞌan, te jaꞌate sil tiempo joyinejat. Spisil te tut ay kuꞌune awuꞌun euk. 32Pero ora to yipalotik nax ta spasel kꞌin yuꞌun ben jun koꞌtantik, porke te awijtsꞌine chamenix a kaꞌiy, pero chaꞌkuxix kꞌoem. Kunta jmel chꞌayemix a kaꞌi, pero la jtajtikix”, xchi te state —xchi ta yalel te Jesuse.

Currently Selected:

LUCAS 15: AMANNT

Highlight

Copy