JUAN 18
18
La xchukik bael te Jesuse
1Kꞌalal laj yoꞌtan ta yalel to, te Jesuse lokꞌ bael sok te jnopojeletik yuꞌune. Bajtik ta jejch ukꞌum Cedron te ba ay jun chꞌin huertae. Teꞌ och bael a te Jesuse sok te jnopojeletik yuꞌune. 2Jich euk te Judas, te akꞌawan-entregale, yiloj ba ay te chꞌin luware, porke te Jesuse beno stsobilan sbaik teꞌa sok te jnopojeletik yuꞌune. 3Jich te Judase tal sok jtijk soltaroetik sok euk te polisiaetik yuꞌun te temploe te tikonlanbil tal yuꞌun te stataletik yuꞌun te saserdoteetike sok te fariseoetike. Chapalik tal sok stujkꞌik sok slampara y xtuchojlan tal skꞌajkꞌik. 4Pero te Jesuse snaꞌoj te spisil ya xkꞌot ta pasel ta stojole. Jich lokꞌ bael y ba sjojkꞌolanbe:
—¿Machꞌa a te ya aleike? —xyut.
5La sjakꞌtalanik:
—Jaꞌ ya jlejtik te Jesus te Nazarete —xchiik. Te Judas te akꞌawan-entregale sjoyinej tal euk. 6Te kꞌalal la yaltalanbe te “joꞌon”, xchi te Jesuse, najkalit a laj balchꞌoj koel ta lum. 7Te Jesuse la xchaꞌ jojkꞌobe xan:
—¿Machꞌa a te ya aleike? —xchi.
Y la yalik xan:
—Jaꞌ te Jesus talem ta Nazarete —xchiik.
8Te Jesuse la yaltalanbe xan:
—La kalbeyexix te joꞌone. Teme joꞌon ya aleikone, a me bajtikuk te machꞌatik joyineje —xchi.
9Jich a kꞌot ta pasel te tut yaloj te Jesuse: “Te machꞌatik la yaꞌbon ta jkuenta te jTate ni jtul a chꞌay kuꞌun”, xchi me.
10Jich te Simon Pedroe, te ay yichꞌoj jun spuñale, la stas lokꞌel y la sbojbe lokꞌel te xchikin te ay ta sbatsꞌil te jMalco sbiile te jaꞌ yaj-mantal te statal saserdotee. 11Te Jesuse la yalbe te jPedroe:
—Sujtesa ochel ta sna te a puñale. ¿Me yuꞌun wan ma puersauk ya xkꞌax jwokol jich te tutꞌil ya skꞌan te jTate te ya yakꞌ kꞌotuk ta jkuenta? —xyut.
Te Jesuse tejkꞌanot ta sit te statal saserdotee
12Te soltaroetike sok te statal yuꞌunike sok te polisiaetik yuꞌun te statal juriyoetik la skomon-chukonik bael te Jesuse. 13Nail a yikꞌik bael ta sna te jꞌAnas te jaꞌ sniꞌal te jCaifase. Jaꞌ ay ta statal saserdoteil a te jCaifas te jaꞌbil abi. 14Te jCaifas to jaꞌ mismo te la yalbe yaꞌi te statal juriyoetik te jaꞌ lek te jtul nax winik ya xlaj bael ta skuenta te jtejklume.
Te jPedroe la smuk ta yoꞌtan te Jesuse
15Te Simon Pedroe sok te yan jnopojele la stsꞌakliyik bael te Jesuse. Te jtul xan jnopojele ya xnaꞌbot sba yuꞌun te statal saserdotee, y och bael sok te Jesus te ba yamakꞌul sna te statal saserdotee. 16Pero te jPedroe tekꞌel jilel ta jwera te ba tiꞌ puertae. Jich te jnopojel te naꞌbil sba yuꞌun te statal saserdotee lokꞌ tal skꞌopon te ants te skanantayej te tiꞌ puertae. Jich te jnopojele la yikꞌ ochel te jPedroe. 17Te ants te skanantayej te tiꞌ puertae la sjojkꞌobe te jPedroe:
—¿Meꞌn jnopojelat yuꞌun euk te winik to? —xchi.
Te jPedroe la sjakꞌ:
—Ma joꞌukon —xchi.
18Kom beno sik te jmantaletike sok te polisiaetike stsunoj skꞌajkꞌik y yipalik ta kꞌatimal. Te jPedroe te tekꞌel ekꞌa, sjoyinlanej ta kꞌatimal.
Te statal saserdotee la yichꞌbe yoꞌtan te Jesuse
19Te statal saserdotee lijk sjojkꞌobe te Jesus te tutꞌil ay te jnopojeletik yuꞌune sok tut a te ya yakꞌ ta nopele. 20Te Jesuse la yalbe:
—Jamal a kal ta sitil komon ta stojol spisil te genteetike, bayal buelta a nojpeswanon te ta sinagogaetik sok ta templo te ba ya stsobilan sbaik spisil te juriyoetike. Ma mukuluk a nojpeswanon. 21¿Tuꞌun te joꞌon ya ajojkꞌobone? Jaꞌ jojkꞌobeyaik te machꞌatik la yaꞌibonix sluwar te jkꞌope. Stukel a wakꞌ yalik tut a te kalojlanbeye, yuꞌun stukel snaꞌojik te tut kaloje —xchi.
22Kꞌalal jich a yal te Jesuse, te jtul polisia te teꞌ tekꞌel ae la yaꞌbe mam jpajkꞌ ta sit te Jesuse, y la yalbe:
—¿Meꞌn jich ya ajakꞌbe skꞌop te statal saserdotee? —xyut.
23Te Jesuse la sjakꞌbe:
—Teme ma tsaꞌamuk te tuti kale, albon me teme ma lekuke. Yan teme lek te tuti kale, ¿tut yuꞌun te la amajone? —xchi.
24Jich te jꞌAnase chukul a stikon bael te Jesus ta stojol te statal saserdote jCaifase.
Te jPedroe la smuk xan ta yoꞌtan te Jesuse
25Te jPedroe sigue te tekꞌel ta kꞌatimal a. Jicha jojkꞌobot yuꞌun te yane:
—¿Meꞌn jnopojelat yuꞌun euk te winik to? —xchiik.
Te jPedroe la smuk xan ta yoꞌtan:
—Ma joꞌukon —xchi.
26Te nax a jojkꞌobot yuꞌun te jtul yaj-mantal te statal saserdotee, te jaꞌ sjakal yermano te winik te bojbot xchikin yuꞌun te jPedroe:
—¿Me ma jaꞌukat te la kilat te la ajoyinej aba sok te ba huertae? —xchi.
27Te jPedroe la smuk xan ta yoꞌtan. Mismo tiempo a okꞌ te tat kꞌoꞌe.
Te Jesuse tejkꞌanot ta sit te jPilatoe
28La yikꞌik lokꞌel te ba sna jCaifas te Jesuse, sok teꞌ ikꞌot bael te ba spalasio te gobierno romanoe. Ya sakubix tal a te kꞌinale. Te juriyoetike ma ochik bael te ba palasioe, yuꞌun la snaꞌik te ya xꞌixtaꞌa skꞌoplalik teme ya xꞌochike, y jich ma spas ya sweꞌik te weꞌelil yuꞌun te kꞌin Pascuae. 29Jaꞌ yuꞌun te jPilatoe lokꞌ tal ta skꞌoponel, y la yaltalanbe:
—¿Tut smul awuꞌunik te winik to? —xchi.
30La yalik;
—Te jich tsaꞌamuk yaꞌtele maꞌ kikꞌtik tal ta atojol te jichuke —xchiik.
31Te jPilatoe la yaltalanbe:
—Ikꞌaik bael te jaꞌexe y ban chapaik, chikan te tut ay te mantaliletik awuꞌunike —xyut.
La yalik te juriyoetike:
—Pero te joꞌotike maꞌyuk orden kuꞌuntik te ay machꞌa ya kakꞌtik ta milele —xchiik.
32Jich a kꞌot ta pasel te tut yaloj te Jesuse te tut lajelil ya xkꞌot ta skuentae. 33Te jPilatoe sujt ochel te ba spalasio. La yik te Jesuse y la sjojkꞌobe:
—¿Me jaꞌat te Reyat yuꞌun te juriyoetike? —xchi.
34Te Jesuse la yalbe:
—¿Me jaꞌat la anop te jich ya ajojkꞌoye, o ay yan machꞌa yalojbeyat te jkꞌoplale? —xchi.
35La sjakꞌ te jPilatoe:
—¿Me yuꞌun juriyoon? Jaꞌ mismo te alumale sok te stataletik yuꞌun te saserdoteetike te tal yakꞌat entregal ta jtojole. ¿Tut a te ma tsaꞌamuk apasoje? —xchi.
36Te Jesuse la sjakꞌbe:
—Te tutꞌil ajwalilone, ma jaꞌuk ta skuenta te balmilal to. Te yuꞌunuk jaꞌuke la me spasik pleto te abatetik kuꞌun te jichuke, yuꞌun jich ma yakꞌelon entregal ta skꞌab te juriyoetike. Pero ma jaꞌuk ta skuenta te balmilal to te tutꞌil ajwalilone —xchi.
37Jich a sjojkꞌo xan te jPilatoe:
—¿Me jich tsꞌiin te jaꞌat reyate? —xchi.
Te Jesuse la sjakꞌbe:
—Jaꞌat ya awal te Reyone. Jaꞌ sluwar te ayinone y talon ta balmilal yuꞌun tal kal te tut batsꞌi jiche. Ya me yaꞌibikon te jkꞌope spisil te machꞌatik ayix ta skuenta te tut batsꞌi jiche.
38Te jPilato la yalbe:
—¿Y tut a te batsꞌi jiche? —xchi.
Te Jesuse chapbot skꞌoplal ta milel
Kꞌalal laj yoꞌtan ta sjojkꞌoyel to, te jPilatoe lokꞌ xan bael ba skꞌopon te juriyoetike. Y la yaltalanbe:
—Te joꞌone ni maꞌyuk smul a jtabe te winik to. 39Pero jaꞌexe ay kostumbre awuꞌunik te ya jkoles lokꞌel jtul jchukel ta skꞌaalel te kꞌin Pascuae. ¿Me ya akꞌanik te jaꞌ ya jkoles bael te machꞌa Rey yuꞌun te juriyoetike? —xchi.
40Spisilik a lijkik xan ta aw:
—¡Ma jaꞌuk xꞌakoles me to! ¡Jaꞌ xꞌakoles te jBarrabase! —xchiik. Y te Barrabase mero jꞌelekꞌ.
Currently Selected:
JUAN 18: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
