Zacarías 3
3
Ma yajwinkëma'ayën Josué wyit tjääntëkatsy
1Ojtsës yë Wintsën wiinkpë kuma'ay xytyuk'ixy, yë'ëjës nwin'ijxyp yë Josué, mëti'ipë nyikopk'ajtypyën yë teetytyëjkëty, mëët tyänë Wintsën tsyajpjotmëtë kukäjpxy. Jam ma Josué pya'ajën, a'oytsyow, tam tyänë tu'uk tsajpjotmëtë kukäjpxy mëti'ipë je'eyë ni'ë'ënëpën. 2Ënät ja Tios ja kyukäjpxy të n'ënëëmë ja wiinkpë ja tsajpjotmëpë kukäjpxy mëti'ipë ni'ë'ënëpën: Ka'ap yë Wintsën mkupëkëtëty, wä'än m'ojyë jä'ä ko yë'ë tsyojkpy jya'ap yë Jerusalén kajpn. Tyaapë ja'ay jëtu'un yë'ë tä tu'uk yë jëënpajkën mëti'ipë të nyaamyajjuutyën jëënjoty. 3Josué janty ëxëëk ja wyit yaj'ixy, yë'ë jam myëtënääpy ma ja Wintsën ja kyukajpxpën. 4Ënät ja Tsajpjotmëtë kukäjpxy ojts tni'ënä'ämëy ets ja Josué yajtuknijääntu'utëty ja y'ëxëëkwit. Ets të t'ënëëmë ja Josué, ëk ix tyaapë jëtu'un xyjyä'äkyukëty ko mijts tëë yë mpoky myajtuknipëjktu'uty. Tyam yë'ë myajtukxoxaanp yë wit mëti'ipë mëxëëw'ixëpën. 5Ojts ja tsajpjotmëtë kukäjpxy tni'ënä'ämë ets ja Josué yajtukupitëty tu'uk yë wa'ats wit. Ets jyänty yajtukupijty. Näyjyëtu'un ojts yajtukxoxy ja wya'atswit. E ja tsajpjotmëtë kukäjpxy tënääpy jam. 6Tääts ja tsajpjotmëtë kukäjpxy t'ënëmaay ja Josué: 7Jëtu'un yë Wintsën y'ënä'äny mëti'ipë maaytyääyëpën winë: Jam mye'eyëty mnaxëty maas yë nnë'ë ntu'ujën ets patun mëti'ipë të ntuk'ëne'emyën. Ko jëtu'un xytyunëty mijts nëjkx xymyëwë'ëmy yë tuunk maas yë ntsajptëjkën. Ets mijts nëjkx xynyikopk'aty yë ntuunpëtëjkës, anklëstëjkëty. 8Mëtoow'it yajxon mijts Josué, mijts mniwintsën'ajtyp yë teetytyëjkëty ets wä'än tmëtowtë näjyëtu'un yë mmëku'uktëjkëty mëti'ipë näjyëtu'un teety'ajtëpën, jä'ä ko miitsëty jëtu'un mnaxtë tä tu'uk ijxpätën mëti'ipë yajktëpën yë käjpxynyajxpëtëjkëty: Ëjts nyajminäämpyës yë ntuunpë, mëti'ipë jëtu'un tä Kepyji'tskën. 9Ëjts tëëjës yë Josué ntukwinkukonë tu'uk yë mëjtsaa mëti'ipë wëxtujk yë pya'ajën, jamtsës nkëxja'aja'any tu'uk yë winma'any. Ets tu'kxëëyë nëjkx yë naax kajpn njo'tsta'ayës yë nyëë pyoky. 10Ko ënäty jëtu'un ja xëëw po'o tukja'ty, jotkujk nëjkx mjuuky'atë nixim niyam, ka'ap tiitsip y'ita'any ets nëjkx xytyukxoonta'aktë ja mtsatymkyamëty ets m'higuerë kamëty. Ëjts Wintsën, mëti'ipë maaytyääyëpën winë, ëjts ënaanp.
Currently Selected:
Zacarías 3: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
