Zacarías 14
14
Ma ja Jerusalén kajpn myëta'aka'anyën
1Miimp wiinkoonp ja xëëw mëti'ipë ja Wintsën xyëëwajtypyën, ma yajpëjkwa'kxa'anyën tëkokyë mëti'ipë të yajmeetsyën ma mijtsën Jerusalén. 2Jä'ä xëëw yë Wintsën tyajmuka'any may yë naax kajpn ets tnipëtë'ëktëty yë Jerusalén kajpn. Ets nëjkx ja Jerusalén kajpn tyajtëkoytyë ets tpëjkëtya'atëty tiijaty myëët'ajtypyën, nëjkxëp ëxëëk tuntë ja to'oxytyëjkëtëjk ets kujkwä'kxynyäxy nëjkx tyajnëjkxtë tsumy matsy ja ja'ay. Niwäänë nëjkx jyaak wë'ëmtë ja'ayëty kajpnjoty. 3Ok yë Wintsën tsyiptuna'any mëët tääpë ja naax kajpnëty mëti'ipë ënäty ëxëëk të y'ëtë'ëtstën, jëtu'un ijxtëm pën tsyiptunyën ko tsip y'ity. 4Jä'ä xëëw jam yë Wintsën wya'kta'atsa'any ma Olivë kopkën, mëti'ipë yajpatpën winkon ma Jerusalén kajpnën, maatsow yë xëëw pyëtsimyën. Tu'uk yë mëj joyjyot nëjkx tyajwä'kxy mäjtskpëky yë Olivë kopk. Tu'kpëky nëjkx nyasjäxë anëkëjxytsyow ets tu'kpëky nëjkx nyasjäxë ëpa'tkë'ëytsyow, 5e miitsëty jamtsow nëjkx mkä'äktë ma ja olivë kopk mäjtskpëky të nyäwyä'kxyën mëti'ipë jampaat ja'ajtpën Asal, awinmtsow. Jëtu'un nëjkx mkä'äktë tä tëëyëp kyäktën yë m'ap m'okëty ko ja naaxwiinyëtë ojts mëk yu'kxy ma ënäty yajkutukyën yë Ozías, mëti'ipë jam ënä'ämpën Judá. Ets nëjkx myiny yë Wintsën mëët yë tyuunpëtëjk mëti'ipë ënäty oy të myëtunyën. 6Jä'ä xëëw ka'ap nëjkx tyityky'äty ets ka'ap nëjkx tip kyä'äy. 7Tu'kxëëw je'eyë y'ita'any, yi'iyë nëjkx yë Tios tnijawë. Ka'ap yaj'ixa'any jëna'a ënäty kyoots'aty jä'ä ko tu'ukyë nëjkx ja xëëw nyäxy ma ënäty të tjapaatyën jeexyë kyootsë. 8Ënät nëjkx jam Jerusalén myuuty yë nëë pa'akpë, mëti'ipë itaanpën ko xyëkopk'atëty ets ko pyotm'atëty, tu'kpëky nëjkx nyajtspëyë'ëkë jam ma ja Mejyën mëti'ipë yajtijpën Ooky myejy ets wiinkpë nëjkx nyajtspëyë'ëkë jam ma ja Mejyën Naax'akujkpyë. 9Jä'ä xëëw nëjkx yë Wintsën yë'ë yajkutuky, naaxwiinyëtë apëtsëmy. Tu'kpajk nëjkx yë'ë y'ëne'emy ets tu'kpajk yë xyëëw nëjkx mëj'äämpy nyäxy. 10Joyjyot nëjkx yë naax kajpn y'awinpity. Tsyo'onta'akëty jam Gueba ets tyimja'tëty jam rimón ëpa'tkë'ëytsyow ma Jerusalén kajpn wyi'imyën. Këjxm nëjkx yë Jerusalén kajpn yajpaaty. Jam yë ja'ay nëjkx tsyëënëtë. Jam ma ja potsyën mëti'ipë kajpn nyapots'ajtypyën jam tsyo'onta'akëty ja tëjk'aaw mëti'ipë xyëëwajtypyën Benjamín ets tyimja'tëty jam ma Tëjk'aawën ma jam Y'ëwtityën, jam nyajxë'ëkëty ma ja potsyën mëti'ipë kujkyë tënääpyën ma txëëwatyën Hananel ets jya'tëty ma ja olivë on yajwinma'atsyën mëti'ipë ja yajkutujkpë jyä'ä'ajtypyën. 11Jëtu'un, tsëënëjantëp yë ja'ay jam ma Jerusalén kajpnën ets ka'ap nëjkx nijëna'a y'ëkkutëkooynyë. Jotkujk ja ja'ay nëjkx jam jyuuky'ajnëtë. 12E ja naax kajpn mëti'ipë ënäty ja Jerusalén kajpn të tnipëtë'ëktën, nëjkxëp tyiytyunëtë mëk ja Wintsën: Juuky nëjkx ja ja'ay pyutsnëtë tsyojknëtë ets nëjkx pyutspëtsëëmnëtë ja wyiinëty ets nëjkx jëtu'unyë ja yä'änëty myëjtëtspäjnëtë. 13Jä'ä xëëw mëktsë'ëkë nëjkx jää nyäxy. Nëjkxëp ja ja'ay ja myëku'uk ja kyë'ë tmajtsë ets nëjkx nyänyipëtë'ëkëtë nixim niyam. 14Ënät nëjkx ja Judá ja'ayëty ets ja Jerusalén ja'ayëty pyëtë'ëktë ets tpëjkëtya'atëty ja naax kajpn ja wyit myeeny, ja poop pujxn ets pu'ts pujxn ets wit tujkxy. 15Ja ëyo'on mëti'ipë ënäty këtakpën ma ja ja'ayëtyën nän yë'ë jëtu'unpë këta'akaanp ma jëyujk tsajpkaajën, ma jëyujk jëku'uxën, ma kruktsën ets maajaty ja jëyujkëtyën mëti'ipë ja mëtsip myëët'ajtëpën. 16Ko ënäty jëtu'un kyixy nyäxy, ja mëti'ipë juukyën të jyaakwë'ëmtën ma ja naax kajpnën, mëti'ipë ja Jerusalén kajpn nyipëtë'ktën, nän yë'ë nëjkx jatëkok myintë ets min t'ëwtatë ja yajkutujkpë, ja Wintsën mëti'ipë maaytyääyëpën winë ets tnixëëwtuntëty ja Tëjkxo'omy. 17E pën jääts tu'uk ja naax kajpn mëti'ipë ka'ap jam nyijkxyën Jerusalén, ma yaj'ëwtatyën ja yajkutujkpë, yë Wintsën mëti'ipë maaytyääyëpën winë, ka'ap nëjkx ja nëë tuu tyajjam'aty ma ja nyaax kyamën. 18E pën yë Egiptë ja'ayëty ka'ap nyëjkxtë, tëytyunanëtëp yë Wintsën, jëtu'un tä ënäty yajtëytyuntën yë naax kajpn mëti'ipë ka'ap nyëjkxtën jam xëëw'ijx xëëwpatpë ma yajnixëëwtunyën ja Tëjkxo'omy. 19Jëtu'un nëjkx yajtëytyuntë ja Egiptë ja'ayëty ets tëkokyë ja naax kajpn mëti'ipë ënäty ka'ap nyëjkxtën jam Jerusalén ma yajnixëëwtunyën ja Tëjkxo'omy. 20Jä'ä xëëw jampaat nëjkx yajkëxja'ay ja ayuk ma kwaay yë y'ajäänë'ëkën mëti'ipë ëna'anëpën: Wintsën të yajtuknikënu'kxë. Ets ja jëënpajk jä'pn yë'ëpaat nëjkx kënu'kxy nyäxy tä ja a'ukën mëti'ipë jam yajpatpën ma ja wintsë'këntyaknën. 21Tu'kë'ëyë yë jëënpajk jä'pn, mëti'ipë jam Jerusalén ets Judá yajpatpën, nëjkxëp yajtuknikënu'kxëtyä'äy ja Wintsën, mëti'ipë maaytyääyëpën winë. Mëti'ipë ënäty yakantëpën ja wyintsë'kën, yë'ë nëjkx tyajtuntë ets yë'ë nëjkx mëët tsa'atë tno'oktë ja jëyujk ooky. Jä'ä xëëw ka'ap nëjkx jam y'ëk'ijnëtë ja'ayëty mëti'ipë ajuuy ato'ktëpën.
Currently Selected:
Zacarías 14: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
