Mateo 12

Ma Jesús ja y'ijxpëjkpëtëjk twijxmuktën ja triikë Säpëtë xëëw

Mr 2:23-28; Lc 6:1-5

1Tëkok yë Jesús nyäjxy säpëtë xëëw ma tu'uk yë tsajpmok kamën. Yuu'o'këtëp ënäty ja y'ijxpëjkpëtëjk, paaty ojts tniwa'aktë ja tsajpmok yon ets tnëtujktë ja tyëëm ets ojts tkääptë ja tsajpmokpajk. 2Ko ja fariseë ja'ayëty jëtu'un t'ijxtë, ënät t'ënëmaaytyë ja Jesús:

Ix yë m'ijxpëjkpëtëjk y'ëtë'ëtstë, yë'ë tyuuntëp ka'apë mëpaat säpëtë xëëw yajtunyën.

3Ets ja Jesús y'ëtsooy:

¿Ka'anëm miits xykyajpxtë mëti'ipë ja David tyuunën ko ja yuu pyatëtë mëët ja myëku'uktëjkë? 4Tios tyëkoty ojts tyëkë ets tkaaytyë ja tsajpkääky mëti'ipë ënäty ja Tios të yajtuknipëjktaakën, ka'apë kyutukyëtyën David tkayëty ets ni myëku'uktëjk; yi'iyë ja teetytyëjkëty patëtëp tkaytyëty. 5Ëkë ¿këtiinëm xykyajpxtë ja Moisés ja y'ënä'ämën tyiy'ajtënë? ma y'ënä'änyën: ko yë teetytyëjkëty ka'ap pyokyëty tuntë, oy kyapo'kxtë säpëtë xëëw jap tsajptëkoty. 6Tëy miits n'ënëëmëtë ko tää yaa wäänë mëjpë tu'uk, këtiinëm ja mëjtsajptëjk. 7Jëtu'un ja Tios ja y'aaw y'ayuk y'ënä'äny: Yë'ëjës ntsojkpy ets xymyëët'atëty ja pa'ëyo'owën, ka'ap yë'ëjëty koos xytyukwintsë'ëkëtëty ja jëyujk tsajpkaa. Ko jeexyë xy'ëkwinmëtowtë pën wi'ix jëtu'un tijy, ka'ap jeexyë xypoky'ixtë mëti'ipë ka'ap tii poky tuntën. 8E jëtu'un, yë Naaxwiinyëtë ja'ay y'u'unk myëët'ajtyp ja kutujkën ma säpëtë xëëwën.

Ma ja Jesús tyajtso'okyën tu'uk ja pa'amja'ay säpëtë xëëw

9Ënät ja Jesús jam tsyo'ony ets ojts tyëkë ma tu'uk ijxpëjktaknën. 10Tap ënäty tu'uk ja ye'etyëjk mëti'ipë ja kyë'ë të'ëtsën tu'k'atu'um; ja ja'ayëty mëti'ipë myëtsip'ajtëpën ja Jesús ënätyë ojts wyinma'any'ixta'atë wi'ix t'ëkyajka'atëty ja Jesús, paaty t'ënëmaaytyë:

¿Mëpaat'ajtp tu'uk yë pa'amja'ay tsyo'oky säpëtë xëëwë?

11Tääts ja Jesús y'ëtsooy:

¿M'ëxmatstëp jëtää miits ja mkupixynyë ko ënäty të kyënaxy jutjoty po'kxënxëëwjotyë? ¿ka'ap jëtää xynyinëjkxtëty ets xyjyuutëtyë? 12Wäänëni'ik ja ja'ay tsyowpaaty këtiinëm ja kupixyny. Jëtu'unts kyutuky ko mëpaat yë oypyë ntu'unmëty säpëtë xëëw.

13Ënät ja Jesús ja ye'etyëjk t'ënëmaay:

Xajtëw.

Tääts ja ye'etyëjk xyajtëëy ets ja kyë'ë oy mëk ojts wyi'imy ijxtëm ja oypyën. 14Ënät ja fariseë ja'ayëty tsyo'ontë ets tkäjpxy'ajtë wi'ix ja Jesús tyaj'ooka'antën.

Ma y'atëyën ja aaw ayuk mëti'ipë ja käjpxynyajxpëtëjk nyikajpxtëpën

15Ko ja Jesús tnija'awëy, tääts jam tsyo'ony. Nimay ja ja'ay pyatso'onë. Jesús yajtsoktaay ja pa'amja'ay, 16ets ojts tni'ënä'ämë ets ka'ap yajnikajpx yajnimëtya'akëty. 17Jëtu'un tyuunë jyajtë ets y'atëwëty ja aaw ayuk mëti'ipë ja käjpxynyajxpë Jeséas ojts tnikäjpxyën, ko y'ënäny:

18Tyaajës ja ntuunpë mëti'ipës të nwin'ixyën,

mëti'ipës oy ntsojkpy ets jotkujkës mëët yë'ë,

jamës ja nJa'awën mpëjkta'aka'any ma yë'ëjën,

yë'ë kyajpxwa'kxëp pën wi'ixës ja naaxwiinyëtë ja'ay npaye'eyä'äny ijxtëm pyaat'atyë.

19Ka'ap tsyiptuna'any, ni kyaya'axa'any kyajjoka'any,

ka'ap pën tmëtowëty në'ëjoty tu'ujoty.

20Jëtu'un yë'ë ijxtëm tu'uk ja ja'ayën mëti'ipë ka'ap tëjyën ja tsajpkäpyny mëti'ipë tëjjanëpën,

ets ijxtëm tu'uk ja ja'ayën mëti'ipë kyayajpi'tsypyën ja jëën mëti'ipë pi'itsanëpën,

koonëm tyajmëta'akëty ja oypyë ja nipaye'eyën,

21ets oymyaajëty ja ja'ay myëpëkëtëty.

Ko ja Jesús yaj'ënëëmë ko ja mëjku'u myëk'ajtën tmëët'ajtë

22Ojts ja Jesús tukninëjkxtë tu'uk ja ja'ay wiintspë ets uumpë, mëti'ipë myëët'ajtyp yë ku'oypyë. Ënät ja Jesús tyaj'ijxë'ky, tyajkajpxë'ky ets jëtu'un tjëpëjky ja ku'oypyë. 23Janty mëk ja ja'ay tja'awëtyë ets jaxim jayam tyajtëëwtë:

¿Jä'ä jëtää ya'atë David tyëëm y'aatsë?

24Ko ja fariseë ja'ayëty jëtu'un tmëtoowtë, ënät y'ënantë:

Yë ku'oypyë wintsën ya'atë ja'ay mooyëp yë myëk'ajtën, paaty yë ku'oypyë t'ixkexy.

25Nyija'awëy ja Jesús wi'ix ja ja'ay myäytyën tyajtën, paaty t'ënëmaay:

Tu'kë'ëyë naax kajpn mëti'ipë kanaakpëky të nyäwyä'kxyën aak mëtsip nye'ixëtë, tääts kë'ëm nyäyajkutëkoyë; näjyëtu'un ja kajpn ëkë ja'ay tu'kjëën tu'ktëjkpë të nyäwya'kxëtën ¿wi'ix ja myëk'ajtën kyutujkën t'ëkmëët'atëty? 26Näyjyëtu'un ja ku'oypyë, pën y'ixkejxyp ja myëku'oypyë, tëë ënäty kë'ëm nyäyajwä'kxyë; ¿wi'ixtsën ja myëk'ajtën kyutujkën tmëët'ata'any?

27Miitsëty, jëtu'un m'ëna'antë koos paatyës yë ku'oypyë n'ixkexy jä'ä ko yë'ëjës yë ku'oypyë wintsën xymyoopy yë mëk'ajtën; e pën jëtu'un, ¿pën miits ja mja'ay mooyëtëp ja myëk'ajtën ko ja ku'oypyë t'ixkäxtë? Paatykyëjxm, yë'ë kë'ëm yajwinkëxë'ktëp ko miitsëty ma'at ja mwinma'anyëty.

28Jä'ä koos pën yë'ëjës mëët yë Tios yë myëk'ajtën n'ixkejx yë ku'oypyë, tääpë jä'ä yajja'akyukë ko tëëjën jyä'ty ja tsajpjotmëpë kutujkën ma miitsëtyën.

29¿Wi'ix jap pën tyëkëty tëkoty ja mä'tspë ma ja'ay tsyëënën mëti'ipë mëkën? ënät tëy ko jëyëjp ja mëkja'ay yajkë'ëtsum yajtekytsyumëty, jyëkyejpy jap jyänty myäätsëty.

30Mëti'ipës ja'ay ka'ap xypyukajpxën xymyëtsip'ajtpës yë'ë; mëti'ipë ka'ap tii tpëjkmukyën mëët ëjts, jëtu'unyë winë tko'owtë.

31Paaty miits n'ënëëmëtë ko yë Tios pyokynyimä'kxäämpy yë ja'ay ma winë t'ëëwtëkoy tkajpxtëkoyën; yë'ë tëy ka'ap tnimä'kxa'any mëti'ipë ja Kënu'kxymyëkajtën myëkajpxtëkoopyën. 32Nyimä'kxäämpy yë Tios ja ja'ay mëti'ipë myëkajpxtëkoopyën ja Naaxwiinyëtë ja'ay y'U'unk; yë'ë tëy pën myëkajpxtëkoopy ja Tios ja kyënu'kxymyëk'ajtën ka'ap yajnimä'kxa'any tyam ma naaxwiiny jyuuky'ätyën ets ni jää ma ënäty y'ookyën.

Yë kepy, tyëëm yajtuk'ijxp ets yajnijawë tii kepy yë'ë.

33Pën oy ja kepy, oy tyëëm'aty; e pën ka'ap y'oyëty, ka'ap oy tyëëm'aty. Tyëëm ja kepy yajtuk'ijxkajp. 34Tsa'any miits mteety'ajt m'ap'ajtëp, ¿wi'ix tii oy xy'ëkkajpxtëty pën ëxëëk ja mjot mwinma'anyëty?, jä'ä ko aawjoty jootjoty ja ayuk pyëtsimy mëti'ipë yajkajpxpën. 35Ja oyjyä'äy, oy ja kyäjpxy myëtyä'äky, jä'äkyëjxm ko oy ja jyot wyinma'any; e ja ëxëëk ja'ay, ëxëëk ja kyäjpxy myëtyä'äky, jä'äkyëjxm ko ëxëëk ja jyot wyinma'any. 36E ëjts, jëtu'un yam miits n'ënëëmëtë, ko ja paye'eyën tyunëtëty, nëjkxëp xynyikajpxta'atë ja ëxëëk aaw ëxëëk ayuk mëti'ipë ënäty të xykyajpxtën. 37Jä'ä ko mkë'ëm'aaw mkë'ëm ayuk nëjkx myajtukpaye'eytyë; oytyuuy mwë'ëma'antë pën oy ënäty winë të xytyuntë; ëxëëktum pën ëxëëk ënäty winë të xytyuntë.

Ko Jesús yaj'amëtoy ets mëj'ajtën tyaj'ixëtëty

38Tam ja fariseë ja'ayëty ets ja tsajptëkotyëtë yaj'ijxpëjkpëtëjk mëti'ipë ja Jesús y'ënëmaaytyën:

Wintsën, yë'ëjës yë mëj'ajtën ntsojktëp ets xyaj'ixëtëty.

39Ënät ja Jesús y'ëtsoowëtë:

Ya'atë ëxëëkja'aytyëjkëty ka'apë tmëët'atën yë'ë y'amëtoowtëp ets ja mëj'ajtën nyaj'ixëtëtyës; je'eyëp ko ka'ap tii mëj'ajtën y'ëkyajtuk'ixanëtë yi'iyë yajtuk'ixantëp mëti'ipë käjpxynyajxpë Jonás ojts tjuuky'ätyën. 40Jëtu'un ijxtëm ja Jonás ojts tëkëëk xëëw tëkëëk tsuu y'ijtyën jap ajkx jootjoty, näjyëtu'unës tëkëëk xëëw tëkëëk tsuujës n'itëtä'any naaxjoty. Ëjts, naaxwiinyëtë ja'ay y'U'unk. 41Ko nëjkx ja naaxwiinyëtë ja'ay yajpaye'eytyë ja nyëë pyokyëty, tso'onkantëp ja Nínive ja'ayëty, jä'ä ko yë'ëjëty ojts yë Tios tmëpëktë ko ja Jonás ojts tyukmëmëtya'akëtë ja Tios ja y'aaw y'ayuk, ets mëti'ipë tyam yaa yajpatpën mëj'äämpy ni'ik këtiinëm ja Jonás. 42Näyjyëtu'un ko nëjkx ja naaxwiinyëtë ja'ay yajpaye'ey, tso'okaanp ja To'oxytyëjk yajkutujkpë jampë y'ëne'emyën ëpa'tkë'ëmtsow; jä'äkyëjxm ko jëkäm tsyo'ony ets ja Salomón tnimiiny ets tmëtoow'ita'any ja ëëwij kajpxwijën mëti'ipë wijy Salomón nyimëtyäkpyën ets mëti'ipë tyam yaa yajpatpën mëj'äämpy ni'ik këtiinëm jyëtu'unëty ja Salomón.

Ja Ku'oypyë mëti'ipë jatëkok winpijtpën

43Ko tu'uk ja ku'oypyë t'ëxmatsy ja ja'ay ets nëjkx jyëtity të'ëts'itjotm, t'ixta'ay ja po'kxtakn, ets ko tkapaaty tä myäy tyäjy: 44Wimpitëpës ënät jatëkok maas të ntsoonyën. Ko wyimpity jëtu'un ja ja'ay tpaaty tä tu'uk yë tëjkën tukwa'atspë, päätë'ëky ja'axë'ëky. 45Ënät tsyoony ets nëjkx tjaakwoy niwëxtujk ja myëku'oypyë ets jap tyëkëtë ma ja ja'ayën tsënääpyë; ja ja'ay ni'ik o'ktëy y'awinpity këtiinëm ënäty jëtu'un të y'ity. Näyjyëtu'un jyata'antë ja ëxëëkja'aytyëjkëty mëti'ipë tyam juuky'ajtëpën.

Jesús ja tyaak ets ja myëkä'äxtëjk

46Tamnëm ënäty ja Jesús ja mayjyä'äy tmëëtmëtyä'äky ko myiintë ja tyaak ets ja myëkä'äxtëjk. Jäpyë tëjk ëkë'p ojts wyë'ëmtë, Jesús myëkajpxantëp. 47Jap tëkoty ja Jesús ojts pën tyuk'ëwaanëty:

Tap tëjk ëkë'p yë mtaak ets mmëkä'äxtëjk tyänëtë, mijtsëk mmëkajpxanëtëp.

48Tääts ja Jesús y'ëtsooy:

¿Pës ntaak'ajtypës ets pën nmëkä'äx'ajtypës?

49Ënät ja y'ijxpëjkpëtëjk tni''ijxëy ets y'ënäny:

Ya'atës ntaak'ajtyp ets ya'atës nmëkä'äx'ajtyp. 50Jä'ä ko pën tyuunpy mëti'ipës yë nTeety tsajpjotmëpë tsyojkpyën, yë'ëjës nmëkä'äx'ajtyp ets yë'ëjës ntaak'ajtyp.

Currently Selected:

Mateo 12: QUETZMIXE

Highlight

Copy