Mateo 10

Ko ja Jesús twin'ixy nimajkmäjtsk ja y'ijxpëjkpëtëjk

1Tä ja Jesús twoowtsooy ja nimajkmäjtskpë y'ijxpëjkpëtëjk ets tmooy ja kutujkën ets t'ixkäxtëty ja ku'oypyë ets tyajtso'oktëty oymyëti'ipë pa'amëty ets pëjkën ato'onën.

2Tyaa xyëëw myintë ja majkmäjtskpë Jesús y'ijxpëjkpëtëjk: Simón, mëti'ipë näjyëtu'un yajtijpën Pedro ets ja y'uty Andrés; näjyëtu'un ja Santiago ets ja y'uty Juan, mëti'ipë Zebedeo tyeety'ajtëpën; 3Felipe, Bartolomé, Tomás, Mateo yajkukëpäjtpë, Santiago, mëti'ipë Alfeo y'u'unk'ajtypyën ets ja Tadeo, 4Ja Simón mëti'ipë Celote ets Judas Iscariote, mëti'ipë ok ja Jesús kyë'ëyajkën.

Ma ja Jesús tkexyën ja y'ijxpëjkpëtëjk Tios y'aaw y'ayuk kajpxwa'kxpë

5Jëtu'un ja Jesús ojts t'ëne'emy ja y'ijxpëjkpëtëjk nimajkmäjtskpë ko ojts tkexy Tios y'aaw y'ayuk kajpxwa'kxpë:

Ka'ap mnëjkxtëty ma ja'ayëtyën mëti'ipë ka'ap jyutiiyësëty, ni mkanëjkxtëty ma ja Samaria y'itjotmën; 6jam mnëjkxtëty ma Israel ja'ay y'itjotmën. Yë'ë jëtu'un ijtëp ijxtëm ja kupixyny tyëkoy'ityën. 7Ko jam mnëjkxtëty nikajpx nimëtya'aktë ko tää ja tsajpjotmëpë kutujkën wyinkony. 8Yajtso'oktë ja pa'amja'ay ets mëti'ipë pu'uts mëëtën, yajjuukpyëktë ja o'kpë ets ixkäxtë ja ku'oypyë. Namëyajtën miitsëty të myajmo'otë ya'atë kutujkën, këtii xynyipëktëty ko pën xyajtso'oktëty.

9Ka'ap tii meeny xykyontëty, ijxtëm yë pu'ts pujxnën, poop pujxnën ets yëk pujxnën, 10yë'ëpaat yë jë'kxy pëky këtii nëkoo xymyënëjkxtëty mëti'ipë mëtu'uye'eytyëpën. Këtii ëpëky xymyënëjkxtëty yë mwitëty, mkë'ëkëty ets mtajkëty, jä'ä ko ja tuunpë patëp ets nitëjkëyëp oy kyäyëty y'uukëty.

11Ko jam mja'tëty ma tu'uk ja kajpnën, yë'ë m'ixta'atëp tu'uk ja ja'ay mëti'ipë mtëjkmo'ojëtëpën. Jam mja'ajta'aktëty koonëm mtsoontëty. 12Ko mtëkëtëty tëkoty, mkajpxpo'kxtëp ja ja'ay mëti'ipë jap tsënaaytyëpën. 13Pën m'ëtsoowëtëp ja ja'ay oy, amëtowtë ja Tios ets kyënu'kxëtëty. Pën ka'ap oy m'ëtsowëtë miitsëty ka'ap tiijotmay xyjyawëtëty. 14Pën ka'ap m'ëxajëtë ets ka'ap tmëtoow'ita'antë mëti'ipë mjanimëtyaktëpën, pëtsëmtë ma tëjkën ëkë ma kajpnën ets winxitë ja mtekyëty wä'än ja naaxway tjënäky. 15Tëy miits n'ënëëmëtë, ko nëjkx tpaaty ja paye'eyën, wäänë këjää tääpë kajpn ja ëyo'on yajmo'otëty këtiinëm ja Sodomë ets Gomorra itjot.

Ma Jesús tnikäjpxyën ko ja y'ijxpëjkpëtëjk yajpajëtijta'aka'antë

16Ëk'ixtë. Jëtu'un yam miits nkäxtë ijxtëm ja kupixyny nyëjkxtën pa'uk'akujky. Wijy kejy mnäpyëjkta'akëtëty ijxtëm ja tsa'anyën. Yujy mnäpyëjkta'akëtëty ijxtëm ja pakën. 17Näkyëwent'atëtë, jä'ä ko nëjkxëp myajkë'ëyaktë ma kutuunkëtyën ets nëjkxëp myajwoptë tsajptëkoty. 18Ëjtskyëjxm nëjkx myajmënëjkxtë ma ja yajkutujkpën ets ma ja kutuunkëtyën. Jëtu'un nëjkx xyaj'ixëtë ja tëyajtën ëjtskyëjxm ma yë'ëjëtyën ets ma ja ka'apë jyutiiyësëty. 19Ko myajkë'ëyaktëty ma ja yajkutujkpëtëjkën ëkë ma ja kutuunkën, ka'ap xymyëmay xymyëtajtëty wi'ix m'ëna'antëty ëkë pën tii mkajpxtëp, ma ënäty miits mtimkyajpxa'antën jää nëjkx myajmo'otë ja aaw ayuk mëti'ipë mkajpxtëpën, 20jä'ä ko ka'ap yë'ëjëty xykyajpxa'antë mëti'ipë kë'ëm mmaay mtajtëpën, ja Tios Teety ja jya'awën miits myajkajpxanëtëp.

21Nëjkxëp ja ja'ay ja y'uty ëkë ja y'äjty tkë'ëyäky o'këntum, näjyëtu'un ja teety taak, nëjkxëp ja y'u'unk y'ëna'k tkë'ëyäky ets ja u'unk ëna'k myëtsiptsoonäämpy ja tyeety tyaak ets nëjkxëp tyaj'ooky. 22Aak mmëtsip'atanëtëp ja ja'ay mëët ëjtskyëjxm; pën myëtënääpy mapaat kyukëxën, jä'ä nëjkx tsyo'oky. 23Ko myajpajëtijta'aktëty ma tu'uk ja kajpnën, käknëjkxtë wiink kajpn. Tëy miits n'ënëëmëtë ko minëpës naamka'anëm ënäty miits ja Israel it xye'ey'apëtsëmtë; ëjts, naaxwiinyëtë ja'ay y'U'unk.

24Ka'ap pën ijxpëjkpë ni'ik mëj'äämpy yajpëjktä'äky ijxtëm ja yaj'ijxpëjkpën, ets ka'ap pën mëtuunpë ni'ik mëj'äämpy nyäxy ijxtëm ja wyintsënën. 25Yë ijxpëjkpë yë'ë tyukjotkujk'atëp ko jëtu'un jya'ta'any tä ja yaj'ijxpëjkpën ets ja mëtuunpë tä wyintsënën. Pën Beelzebú yajtijy ja u'unkteety, ¿tii ko näjyëtu'un kyayajtijtëty ja y'u'unk y'ëna'k?

Ko amëk jotmëk nkajpxmëty nmëtyakmëty

Lc 12:2-7

26Ka'ap ja'ay xytsyë'ëkëtëty. Ka'ap tii niwitsy nijuuxy y'ity ka'apë nijëna'a yajniwijtstu'utëtyën, ets ka'ap tii yu'utsy kë'ëy y'ity mëti'ipë ka'ap yajnijawëtyën. 27Mëti'ipë akootstuuy ntukmëmëtyaktëpën, nikajpx nimëtya'aktë xëëny ma jyäjy tyi'kxyën; mëti'ipë ame'tsyë ntukmëmëtyaktëpën, tukyaax tukjokëtë jam tëjkëjxm. 28Këtii xytsyë'ëkëtëty mëti'ipë nini'kx yaj'o'kpyën, ka'ap myäyëtëty tyaj'ookëty yë anëmë; yë'ë Tios mtsë'ëkëtëp, jä'ä ko yë'ë myëët'ajtyp yë mëk'ajtën ets tyaj'atëkoyëty yë ja'ay ja y'anëmë mëët ja jyot nyini'kx jap ëyoowtaknjoty. 29¿Ka'ap jëtää tu'ukpë ja meeny wyäkx yajtukujuy mäjtsk ja joonë? ets nitu'uk tääpë joon kyaka'ay naaxwiiny pën ka'ap ja Tios tyajkutuky. 30E miitsëty ënät, yë'ëpaat yë mwaayëty mkëpajkëjxypyë, mëtyoy tyaj'ity tu'uktu'uk. 31Jëtu'unts miitsëty ka'ap mtsë'ëkëtëty. Wäänëni'ik miits mtsoowpaatë këtiinëm ja may joon.

Pën ja Jesús ka'ap tkuyu'utstën ja'ay wiinkujk

32Pën xynyikajpxpës ma ja'ayën, näjyëtu'unës nikajpxa'any maas ja nTeetyën tsajpjotmëpë. 33Pën xykyuyu'tspës ma ja'ayën, näjyëtu'unës nkuyu'utsëty maas yë nTeetyën tsajpjotmëpë.

Yë Jesús yajwä'kxyp yë ja'ay

34Ka'ap miits mmaytyëty mtajtëty ko yë'ëjës ja jotkujk'ajtën të nmëminy yaa naaxwiiny, ja tsipës të nyajminy. 35Yë'ëjës të niminy ets ja ye'etyëjk tmëtsiptsoonëty ja tyeety, ja nëëx tmëtsiptsoonëty ja tyaak ets ja xäkxy tmëtsiptsoonëty ja tyaak më't, 36ja ja'ay kyë'ëm jëëky kyë'ëm mëku'uk nëjkx myëtsiptsoonyë.

37Pën ja tyaak tyeety wäänëni'ik tsyojkpy këtiinëm ëjts, ka'ap pyaat'atyë etsës nja'ay'atëty; ets pën ja nyëëx ets ja myaank ni'ik tsyojkpy këtiinëm ëjts, ka'ap pyaat'atyë etsës nja'ay'atëty. 38Ka'apës xypyaat'aty n'ijxpëjkpë'atëty yë ja'ay mëti'ipë ka'ap ja wyinma'any mëk tpëjktä'äkyën ets y'ëyowëty ijxtëm tu'uk ja ja'ay jeexyë ja kyëruuts tpatsëmyën. 39Jä'ä ko pën ka'ap wi'ix jyata'any, tëkoyaanp ja jyuukyajtën; e pën y'ëxmatsyp ja nyaaxwiinyëtë juukyajtën mëët ëjtskyëjxm, jä'ä pyaatäämpy ja juukyajtën xëmëkyëjxmëpë.

Ja kuma'ayën

40Pën miits mkupëjkëtëp, nän xykyupëjkpës ënäty ëjts; ets pën xykyupëjkpës, nän kyupëjkpy ënäty mëti'ipës xykyäjxpën. 41Pën ja Tios ja kyäjpxynyajxpë kyupëjkpy jä'ä ko kyäjpxynyajxpëty, nän yajmo'ojëp ja kuma'ayën mëti'ipë ja Tios kyäjpxynyajxpë ënäty yajmoopyën; ets pën ja oyjyä'äy kyupëjkpy jä'äkyëjxm ko y'oyjyä'äyëty, nän yajmo'ojëp ja kuma'ayën mëti'ipë ënäty ja oyjyä'äy yajmoopyën. 42Pën myoopy ja nëë tu'ktsim ja pi'k ëna'k mëti'ipës xymyëpëjkpën, tëyës n'ëna'any ko y'ëxajëjäämpy ja kyuma'ayën.

Currently Selected:

Mateo 10: QUETZMIXE

Highlight

Copy