Lucas 3

Ko ja Juan Yajnëëpäjtpë ja Tios ja y'aaw y'ayuk tkajpxwa'kxë jam të'ëts'itjotm

1Mëmajkmokx jëmëjt ënäty y'ëne'emy ja yajkutujkpë Tiberio César ets ja Poncio Pilato yajkutuky jam Judea. Ja Herodes jam yajkutuky Galilea, ja myëkä'äx Felipe jam yajkutuky Iturea ets Traconite e ja Lisanias jam yajkutuky Abilene; 2ja Anás ets ja Caifás yë'ë ënäty teetywyintsën'ajtëp. Jää jëmëjt ja Juan, ja Zacarías ja myaank ojts myëkäjpxyë ja Tios jam të'ëts'itjotm. 3Tääts ja Juan t'aye'eytyääy ja itjot ma ja Jordán mëjnëëjën ets t'ënëmaay ja ja'ay ets jyotwinpitëty, t'ëxmatstëty ja y'ëxëëk winma'any ets nyëëpätëty, jëtu'unts yajkpokymyä'kxtëty. 4Ets y'atëwëty ijxtëm ja Tios ja kyäjpxynyajxpë Jeséas y'ënänyën:

Tam tu'uk mëti'ipë mëk kajpxpën të'ëts'itjotm:

Yaj'oyëtë ja Wintsën ja nyë'ë tyu'u,

yaj'ëwatsëtë ja nyajxtakn tëypyë.

5Yajkijpxyëtya'atë ja joyjyot ets ja

tun kopk,

ja në'ë tu'u mëti'ipë ney xëketyën tëëwta'ajantëp ets kijpxyëtya'ajaanp.

6Jëtu'unts ja ja'ay ni'ëmukë t'ixtëty ja yajnitsokpë.

7Tääts ja Juan ja mayjyä'äy nyinëjkxë ets tyajnëëpätëty. Jëtu'un t'ënëmaay:

Yë'ë miits mteety'ajt m'ap'ajtëp yë tsa'any. ¿Pën të m'ënë'ëmxëtë ko xykyukä'äktëty ja ëyo'on mëti'ipë miimp këtakpën? 8Yajxon mja'ay'atëty ets xyajnikëxë'ëkëty ko të mjootwinpitë, këtii kë'ëm mnäy'ëna'anëtëty: Abraham ëëtsajtëm xy'u'unk'ajt xy'ok'ajtëm. Ëjts, jëtu'un yam miits nëëmëtë ko Tios jyëkyejpy yë tsaa tyaj'awinpitëty Abraham y'u'unk y'ok. 9Jëjp'ixy yë pujxn y'owxijnë. Pën ka'ap oy jyä'äy'ätyën, jëtu'un yë'ë ijxtëm ja kepyën mëti'ipë ka'ap oy tyëëm'atyën; yajpuxaanp je'eyë ets yajnino'oka'any.

10Tääts ja ja'ay tyajtëëwtë:

¿Tiijës ntuunta'aktëp?

11Ets ja Juan y'ëtsoowëtë:

Pën mäjtsk myëët'ajtyp ja wyit xyox, wä'än tmo'oy tu'uk mëti'ipë jyä'ä ka'ijtpën; pën myëët'ajtyp ja jyi'kxy pyiky, wä'än tmo'oy mëti'ipë jyä'ä kaka'atpën.

12Tääts näjyëtu'un myiintë ja yajkukëpäjtpëtëjk nëëpäjtpë ets y'ënantë:

¿Wintsën, ¿tiijës ntuntëp?

13Tääts ja Juan y'ënëmaayëtë:

Ka'ap yë ja'ay tii tsowni'ik xytyukkukëpätëty.

14Ojts ja tsiptuunpë jënaakën tyajtëwtë:

E ëëtsëty, ¿tiijës ntuntëp?

Tääts ja Juan y'ëtsoowëtë:

Ka'ap tii pën xypyëjkëtëty atsip ets ka'ap pën tii xytyukniwaanpätëty. Yë'ë tukjotkujk'atë ja mëju'unyëty.

15Ja mayjyä'äy jyëjp'ijxtëp ja Kristë, paaty wyinmaaytyë ko wä'änxyëp ja Juan yë'ëjëty Kristë. 16Tääts ja Juan y'ënëmaayëtë ni'ëmukë:

Nëë mëët miits nyajnëëpätë, je'eyëp ko xypyamiinpës tu'uk ja ja'ay mëti'ipë myajnëëpätanëtëp mëët ja Kënu'kxymyëkajtën. Ka'apës ëjts xypyääty etsës ja kyë'ëk n'akäjëty. 17Jëtu'un ja naaxwiinyëtë ja'ay tyajpokwya'atsa'any ijxtëm ja tsajpmokpajk yajwinpojyën ets nyijkx ëpëky ja wa'atspë ets ja y'ak yajnino'oky ma ja jëënën nijëna'apë kyapi'itsyën.

18Jëtu'un ja Juan ja ja'ay tjakajpxwijy ets tkajpxwä'kxy ja oy aaw oy ayuk. 19Ojts näjyëtu'un t'ojy ja yajkutujkpë Herodes, jä'ä ko ënäty tmëëttsëënë Herodías, ja y'uty ja tyo'oxytyëjk ets näjyëtu'un ko ënäty ëxëëkjaty winë tuny. 20Tääts ja Herodes ojts ja poky wiinkpë tjaaktimtyuny ko ja Juan tsuumy.

Ko ja Jesús nyëëpety

21Jëtu'un ojts tyunyë jyätyë, ko ja Juan ënäty jam ja mayjyä'äy tyajnëëpety, ënät ja Jesús näjyëtu'un nyëëpejty; ko ja Tios tja'amyejtsy ënät ja tsajp y'ëwatsy, 22ets ja Kënu'kxymyëkajtën nyikëtakë ijxtëm tu'uk ja pakën ets yajmëtooy ja ayuk jam tsajpjotm:

Ëjts mijts n'u'unk'ajtyp, ntsojkpy nja'ap mijts ni'ik ets ntukjotkujk'ajtyp.

Jesukristë y'aptëjk

23I'px majk ënäty ja Jesús ja jyëmëjt ko ja tyuunk tyajtso'ontäky. Jëtu'un ja ja'ay y'ëna'antë ko Jesús yë'ë José y'u'unk ets José Elí y'u'unk, 24yë Matat y'u'unk; yë Leví y'u'unk; yë Melqui y'u'unk, yë Janai y'u'unk, yë José y'u'unk, 25yë Matatías y'u'unk, yë Amós y'u'unk, yë Nahúm y'u'unk, yë Eslí y'u'unk, yë Nagai y'u'unk, 26yë Máhat y'u'unk, yë Matatías y'u'unk, yë Semei y'u'unk, yë Josec y'u'unk, yë Joiadá y'u'unk, 27yë Johanán y'u'unk, yë Resá y'u'unk, yë Zorobabel y'u'unk, yë Salatiel y'u'unk, yë Nerí y'u'unk, 28yë Melqui y'u'unk, yë Adi y'u'unk, yë Cosam y'u'unk, yë Elmadam y'u'unk, yë Er y'u'unk, 29yë Jesús y'u'unk, yë Eliézer y'u'unk, yë Jorim y'u'unk, yë Matat y'u'unk, 30yë Leví y'u'unk, yë Simeón y'u'unk, yë Judá y'u'unk, yë José y'u'unk, yë Jonam y'u'unk, yë Eliaquim y'u'unk, 31yë Meleá y'u'unk, yë Mená y'u'unk, yë Matatá y'u'unk, yë Natán y'u'unk, 32yë David y'u'unk, yë Jesé y'u'unk, yë Obed y'u'unk, yë Booz y'u'unk, yë Sélah y'u'unk, yë Nahasón y'u'unk, 33yë Aminadab y'u'unk, yë Admín y'u'unk, yë Arní y'u'unk, yë Esrom y'u'unk, yë Fares y'u'unk, yë Judá y'u'unk, 34yë Jacob y'u'unk, yë Isaac y'u'unk, yë Abraham y'u'unk, yë Térah y'u'unk, yë Nahor y'u'unk, 35yë Serug y'u'unk, yë Ragau y'u'unk, yë Péleg y'u'unk, yë Éber y'u'unk, yë Sélah y'u'unk, 36yë Cainán y'u'unk, yë Arfaxad y'u'unk, yë Sem yë y'u'unk, yë Noé y'u'unk, yë Lámec y'u'unk, 37yë Matusalén y'u'unk, yë Henoc y'u'unk, yë Jéred y'u'unk, yë Mahalaleel y'u'unk, yë Cainán y'u'unk, 38yë Enós y'u'unk, yë Set y'u'unk, yë Adán y'u'unk ets Tios y'u'unk.

Currently Selected:

Lucas 3: QUETZMIXE

Highlight

Copy