Lucas 14

Ko Jesús tyajtso'oky tu'uk ja ja'ay ki'ix pa'am mëëtpë

1Po'kxënxëëwjoty ja Jesús ojts nyijkxy kääpyë ma tu'uk ja fariseë wintsën ja tyëjkën, tam wiinkpë ja fariseë ja'ayëty je'eyë y'ixtë tyuntë. 2Tam näjyëtu'un tu'uk ja ja'ay ënäty yajpaaty mëti'ipë ki'ix pa'am pëjkëpën. 3Ënät ja Jesús tyajtëëy ja tsajptëkotyëtë yaj'ijxpëjkpë ets ja fariseë ja'ayëty:

¿Mëpaat'ajtp jëtääjë ets ja pa'amja'ay tsyo'okëty po'kxënxëëwjoty ëkë ka'apë? 4Ni pën kya'ëtsooy, amonyë y'itë.

Tääts ja Jesús ojts tkë'ënixajy ja pa'amja'ay ets tyajtsoky ets t'ënëmaay ko nyëjkxëty. 5E ja fariseë ja'ayëty jëtu'un t'ënëmaay:

¿Pën jëtää ja y'u'unk ëkë tsyajpkaa ka'ap tjuutëty jutjoty ko po'kxënxëëwjoty jap kyënaxëty?

6Näy ka'ap y'ëtsoowtë.

Mëti'ipë të yajwowtën mëkääpyë

7Jam ja Jesús t'ijxy ko ja mëkääpyëtëjk aakyë'ë wyin'ijxtëp ja u'unyääypyäjn mëti'ipë wiinkonën ma ja kaaypyäjnën. Tääts ojts tmëtyä'äky ya'atë wijymyëtyä'äky:

8Ko pën mwowëtëty kääpyë ukpë ma ja'ay pyikyën, këtii yë'ë xytyimwinkuwä'tsëkyojtëty ja kaaypyäjn; jä'ä ko tsojk wiinkpë ja'ay myinëty mëti'ipë mëj'äämpyën ets mijts myajëkäxëty, 9ets ja kujëën kutëjk myinëty ets mnë'mxëtëty: Jëwääts jää wä'än ya'atë ja'ay yë'ë jää t'u'unyë. Tääts mijts tsëtyu'unmëët mpëtë'ëktëty ets jam muum jëxkë'ëm mjaaknaaxwäätsëty. 10Ko pën mwowëtëty nikë oy ko ix'am mnaaxwäätsëty, kë'ëmnëm ja kujëën kutëjk mnë'ëmxëtëty jëjp'am u'unyë: Ënät mijts mwintsë'ëkëtëty yë ja'ay mëti'ipëty ënäty jam mëët m'u'unyën ma ja kaaypyäjnën. 11Pën nämyëjpëjktakëp kë'ëm, yë Tios mutsk yajnaxa'anyë, pën yu'unk naxym näpyëjktakëp, mëj'äämpy yë Tios yajnaxa'anyë.

12Tääts ja Jesús t'ënëmaay näjyëtu'un ja ja'ay mëti'ipë ënäty kääpyë të wyoyën:

Ko pën xyajkaya'anëty, ka'ap yë'ë xywowëty mëti'ipë mëët mnämyäyën, ni ja mmëku'uktëjk, ni kumeenyjyä'äytyëjk mëti'ipë mmëjëën'ajtyp mmëtëjk'ajtypyën; jä'ä ko pën yë'ë mwoopy, nëjkxëp näjyëtu'un mwoyë kääpyë ets yë'ë xykyuma'ayën'atëty. 13Ko tii xëëw xytyuknipëjktaakëty, nikë yë'ë mwowëp ëyoopëja'ay, kë'ëma'at tekymya'atpë ets ja wiintspë jëtu'un jotkujk myajpaatëty. 14Jä'ä ko yë'ëjëty ka'ap myäyëtë tkujuytyëty mëti'ipë ënäty të xymyo'oyën; je'eyëp ko mijts nëjkxëp ja mkuma'ayën xy'ëxajë ko ënäty jyuukpyëktë ja wa'ats ja'ayëty.

Ja nyi''ijxpät ja mëj a'ux

Mt 22:1-10

15Ko ya'atë tmëtoowtë, tu'uk mëti'ipë ënäty jam yajpatpën t'ënëmaay ja Jesús:

Akujk jotkujk ja'ay yajpaaty mëti'ipë kääpy ukpën ma Tios ja kyutujktaknën.

16Ënät ja Jesús y'ënëmaayë:

Ojts tu'uk yë ja'ay nipëjktaakë mëj a'ux, may ja ja'ay twoowmujky. 17Ko ja a'ux tpaty, tääts tu'uk ja tyuunpë tkejxy ets nëëmëty ja ja'ay: Mintë mkaytyë, tëë ja a'ux jam y'apaatë. 18E tu'kë'ëyë ja ja'ayëty je'eyë ja mä'kxën tpëjktsoowtë. Tam mëti'ipë ënanën: Naaxës të njuy, yë'ëjës nëjkx n'ixa'any, mëpaat xynyamä'kxëty. 19Tääts ja wiinkpë y'ënäny: Tsajp kaas të njuy nimëkoxk yuutakn, yë'ëjës nëjkx nyajyuumatsa'any, mëpaat xynyamä'kxëty. 20Ets wiinkpë y'ënäny: Tim naanpëjkpës jam, ka'apës nmëta'akëty nëjkxëty. 21Tääts ja tuunpë wyimpijty ets tuk'ëwa'anëy ja wyintsën wi'ixëty ënäty të y'ëtsowtën ja ja'ayëty. Ënät ja wintsën jyoot'anpëjky ets ja tyuunpë ojts t'ëne'emy: Nëjkx në'ëjoty tu'ujoty, m'aye'eytya'ajëp yë kajpn ets xywyoowminëty yë ëyoopëja'ay, yë kë'ëma'atpë tekymya'atpë ets wiintsëtypë. 22Ko ja tuunpë wyimpijty ets ja wyintsën t'ënëmaay: Wintsën, tëëjës ntuny ijxtëmës mijts të xytyuk'ëne'emyën, je'eyëp ko tapnëm ja u'unyääypyäjn ëwaatsëpë. 23Tääts ja wintsën ja tyuunpë t'ënëmaay: Nëjkx mjëtity kajpnpa'a kajpn nux ets xywyoowminëty yë ja'ay atsip koonëmës yë ntëjk y'utsëty. 24Tëy miits nëëmëtë, ko ja mëjëyëjpës të njawoyën nijëna'a nëjkx tkakaytyë ja a'ux mëti'ipës të ntuknipëjktaakën.

Wi'ix tsyipëtyën ko Jesús npanëjkxa'anmëty

Mt 10:37-38

25May ja ja'ay ja Jesús ënäty pyajëtityë oymyaajëty. Tääts niwa'akwinpijty ets t'ënëmaay:

26Pën jää ja'ay mëti'ipë ja ënaanpën koos xypyamina'any ets yë'ë ni'ik tsyojkyp ja tyaak tyeety, y'u'unk tyo'oxytyëjk, myëkä'äx, myëku'uktëjk, ëkë kyë'ëm juukyajtën ets këtiinëm ëjts; jëtu'unpë ja'ay ka'ap tjëkyepy n'ijxpëjkpë'atëtyës. 27Pën ka'ap ja kyëruuts tsëëmë'ëky ets ka'apës xypyaminy; jëtu'unpë ja'ay ka'ap tjëkyepy n'ijxpëjkpë'atëtyës. 28Pën jam pën tkoja'any tu'uk yë mëjpotsy, ¿ka'ap jëtää jëwyiin tmëmay tmëtajy pën mëta'akëp ets tkoj'apätëtyë? 29Jä'ä ko pën je'eyë tpojts tsoony ets ka'ap tyaj'apety, mëti'ipë ënäty jëtu'un y'ijxtëpën je'eyë nëjkx tyukxi'ikyë, 30ets y'ëna'antëty: Ya'atë ja'ay tëë nëkoo jyapojtstsoony ets ka'ap të tyaj'apety. 31Näyjyëtu'un tu'uk ja yajkutujkpë, pën tsiptunaanp mëët wiinkpë yajkutujkpë, ¿Ka'ap jëtää jëwyiin tmëmay tmëtajëty pën mëpaat twinkuwa'akë ja myëtsip mëti'ipë myëët'ajtypyën i'px mil ja tsyiptuunpë, ets yë'ë je'eyë tmëët'aty nimajk mil? 32Pën ka'ap nyäy'a'ixëty, pojën tkäxëty ja tyuunpë naamka'anëm ënäty tyukja'atyënëm ja myëtsip ets nëëmëty ko ka'ap y'oyëty yë tsip. 33Näyjyëtu'un miitsëty pën ka'ap xy'ëxmatstë tu'kë'ëyë winë, ka'ap tjëkyëpy n'ijxpëjkpë'atëty.

Ko ja kaan ja tya'amtsajtën tyëkoy

Mt 5:13; Mr 9:50

34Yë kaan oy yë'ë. Ko ja tya'amts'ajtën tyëkoy ¿wi'ix tii t'ëkyajta'amtsëty? 35Nitii kyawa'anëty, këtii tyaj'u'unkta'akëty. Je'eyë tëy tyimyaj'ixko'ownëty. Pën ja tyatsk tyukmëtoopyën, wä'än tmëtoowkukë.

Currently Selected:

Lucas 14: QUETZMIXE

Highlight

Copy