Juan 5
5
Jesús tyajtso'oky ja kë'ëxujxpë tekyxyujxpë
1Tëë ënäty ja tiempo wäänë nyäxy ets tam ënäty ja jutiis ja'ayëty xyëëwtuntë ko ja Jesús ojts jatëkok nyijkx jam Jerusalén. 2Jam ijty tu'uk ja tëjk'aaw mëti'ipë xyëëwajtypyën Kupixyny Tëjk Aaw ets jam tu'uk ja nëë apojtsë'ëky, Betesda yajtijy hebreo ayuk, mëkoxk ja nyitëjk'aaw. 3Jamts ja maypya'am ja'ay kyo'knëtë ets ja wiintspë, kë'ëma'atpë tekymya'atpë ets ja xujxpë. 4Yë'ë jam y'ëwxijtëp ko ja nëë yu'kxëty. Jä'ä ko këtakp tu'uk ja Wintsën ja y'anklës ma ja nëëjën ets ja nëë tyajyu'kxy. Pën jëwyiin tëjkëp ko ja nëë yu'kxyën jä'ä tsokp oy ënäty tipa'am pën tmëëtëty. 5Ma yë'ëjëtyën, tam ijty tu'uk ja ye'etyëjk mëti'ipë ënäty të pyikyën i'px majkmokx tëkëëk jëmëjt. 6Ko ja Jesús y'ijxë ets nija'awëy ko jeky të pyëjkënë tääts yajtëëwë:
¿Mtso'okaanpë?
7Ets ja pa'amja'ay y'ëtsooy:
Wintsën, ka'ap pën nmëëtëtyës pën xynyëëkuwitsëpës ko yë nëë jyayu'kxy, tëkok tëkokës njatëkëja'any wiinkpë jëyëjp timnatëjkëp.
8Ënät ja Jesús y'ënëmaayë:
Pëtë'ëk, pëjkmuk yë mmaapäjn ets nëjkx.
9Jää ojts ja ja'ay tsyo'oky. Tääts tpëjkmujky ja myaapäjn ets ojts ye'eytsyoony. Po'kxënxëëw ënäty, 10paaty ja jutiis ja'ayëty t'ënëmaaytyë ja ja'ay mëti'ipë ënäty të tsyo'okyën:
Po'kxënxëëw tyam, ka'ap kyutukyëty ets tyam xykyiiyjyëtitëty yë mmaapäjn.
11Ets ja ye'etyëjk y'ëtsoowëtë:
Mëti'ipës të xyajktso'okyën, yë'ëjës të xy'ënëëmë: Pëjkmuk yë mmaapäjn ets nëjkx.
12Tääts tyajtëëwtë:
¿Pën mnëmaayëp ets xypyëjkmukëty yë mmaapäjn ets mnëjkxëty?
13E ja ye'etyëjk ka'ap tnijawë pën ojts yajtso'okyë, jä'ä ko ja Jesús ojts ye'eytyëkoy mayjyä'äyjoty. 14Ok ja Jesús ojts pyäätyë ma ja mëjtsajptëjkën ets y'ënëmaayë:
Ix, tëë mtso'oky, ka'ap m'ëk pokytyuunëty këtiipë wäänë o'ktëy mjatëty.
15Tääts ja ye'etyëjk ojts tsyoony ets tuk'ëwa'anëy ja jutiis ja'ayëty ko jyä'äjëty ja Jesús mëti'ipë ënäty të yajtso'okyën. 16Paaty ja jutiis ja'ayëty tpajëtijtaktë ja Jesús ets tyaj'ooka'antë ko ja ja'ay tyajtso'oky po'kxënxëëwjoty. 17E jëtu'un ja Jesús ojts nyë'ëmxëtë: Yë nteetyës xëmë të tyuny, paatyës ëjts näjyëtu'un winë ntunyës.
18Paaty ja jutiis ja'ayëty tjantyyaj'ooka'antë, jä'ä ko ka'ap yi'iyëty po'kxënxëëw tka'ëmaay'äty, näjyëtu'un nyätyijyë ko Tiosëty, jä'ä ko y'ënä'äny ko Tios teety'äty.
Ja Tios U'unk ja kyutujkën
19Ets ja Jesús y'ënëmaayëtë: Tëy miits nëëmëtë ko yë Tios y'U'unk ka'ap tjëkyepy ets kyë'ëm winma'any tyajtunëty, yi'iyë mëpaat tuny mëti'ipë tyuunpyën ja Tyeety. Tu'kë'ëyë mëti'ipë tyuunpyën ja Tios Teety, tyuunpy näjyëtu'un ja y'U'unk. 20Tios Teety tsyojkpy ja y'U'unk ets tyuk'ijxtääpy mëti'ipë yë'ë tyuunpyën ets jyaak timtyuk'ixäämpy ni'ikpë mëti'ipë mëj'ixy y'ixtëpën. 21Jä'ä ko ijxtëm ja Tios Teety tyajjuukpyikyën ja o'kpë ets tmo'oy ja juukyajtën, näjyëtu'un ja y'U'unk ja juukyajtën tmo'oy pën myo'ojäämpyën. 22Ka'ap ja Tios Teety pyaye'ey; ja y'U'unk të tuknipëky ets të tmo'oy ja kutujkën ets pyaye'eyëty, 23e ja Tios U'unk näjyëtu'un yajwintsë'ëkëty ijxtëm ja Tios Teetyën. Pën ka'ap twintsë'ëkë ja Tios U'unk, nän ka'ap twintsë'ëkë ja Tios Teety mëti'ipë kyejxypyën ja Tios U'unk.
24Tëy miits nëëmëtë, pën xy'amëtoow'ijtpës ets tmëpëky mëti'ipës xykyäjxpën, pyaatëp y'ixëp ja juukyajtën xëmëkyëjxmëpë ets ka'ap yajpoky'ixëty, tëë ënäty tu'knax ja o'kën ets tëë ënäty tpaaty ja juukyajtën. 25Tëy miits nëëmëtë ko tää wyinkony ja xëëw jëmëjt ets tyamën jä'ä, ko ja o'kpë tmëtowtëty ja Tios U'unk ja y'aaw y'ayuk, ets mëti'ipë y'amëtoow'ijtëp, pyaatëp y'ixtëp ja juukyajtën. 26Jëtu'un ijxtëm ja Tios Teety tmëëtëty ja juukyajtën, näjyëtu'un ja y'U'unk tëë tmo'oy ja juukyajtën kë'ëm, 27ets nän tëë tmo'oy ja kutujkën ets tpaye'eyëty ja poky, jä'ä ko yë'ë naaxwiinyëtë ja'ay yë y'U'unk. 28Këtii nëkoo mjotmaypyaatëty, jä'ä ko pyaatäämpy ja xëëw jëmëjt ma tu'kë'ëyë ja o'kpë tmëtowa'antën ja aaw ayuk, 29ets pyëtsëmtëty jap jutjoty. Pën të tuntën mëti'ipë oyën, nëjkxëp jyuukpyëktë ets tmëët'atëty ja juukyajtën; ets pën të tuntën mëti'ipë ëxëëkën, juukpyëkantëp ets yajmo'otëty ja ëyo'on.
Mëti'ipë yajnikëxë'kpyën ko Jesús tmëët'aty ja kutujkën
30Ka'ap tjëkyepy etsës tii kë'ëmwinma'any ntunëty. Jëtu'unës winë npaye'ey ijxtëm ja Tios Teety të xy'ëne'emyënës; ets npaye'eyënës, mëtëy yë'ë; jä'ä ko ka'apës tii npaye'ey mëëtës yë nkë'ëmjot nkë'ëmwinma'any, yë'ëjës nTeety yë jyä'ä nyajtuunëp, mëti'ipës të xykexyën. 31Ko jeexyë ëjts kë'ëm ja n'aaw n'ayukës nnikajpxpety, ka'ap jeexyë tyuny. 32E tää wiinkpë mëti'ipë nyikajpxpejtypyën etsës xy'aputëkë ets nija'apës ko tnikajpxpety wi'ix y'ënä'änyën ëjtskyëjxm. 33Miitsëty ojts xykyäxtë ja mkukäjpxy ets xyajtëëwtë ja Juan ja tëyajtën. Mëti'ipë nyikajpxën, ja tëypyë. 34Je'eyëp ko ka'apës yë'ëty nyajtuny mëti'ipë ja ja'ay nyikäjpxypën mëët ëjts. Paatyës jëtu'un n'ëna'any ets miits mnitso'oktëty. 35Jëtu'un ja Juan ijty ijxtëm tu'uk ja jëën tyoyën ets kyutë'kxy, ets miitsëty ojts wäänë ja kyutë'kxn xytyukxontë. 36Nmëët'ajtypës ja tëyajtën ni'ik këtiinëm ja Juan. Mëti'ipës ëjts ntuunpyën yë'ë mëti'ipë ja Tios Teety ëjts xymooyën ets ntunëtyës, yë'ë yajtëytyëjkëp koos ja Tios Teety të xykyexy. 37E tëë näjyëtu'un ja Tios Teety, mëti'ipës të xykexyën nikäjpxy ja tëyajtën ëjtskyëjxm. Oy miits nijëna'a të xykyamëtowtë ets të xykya'ixtë, 38ets ka'ap të xytsyoktë ja y'aaw y'ayuk y'itëty ma miitsëtyën, jä'ä ko ka'ap xymyëpëktë mëti'ipë ja Tios Teety të tkexyën. 39M'ijxpëjktëp oy'ixyë ja Tios ja y'aaw y'ayuk këxja'aypyë, jä'ä ko jëtu'un mmaytyë mtajtë ko jap xypyaata'antë ja juukyajtën xëmëkyëjxmëpë. 40Miitsëty ka'ap mina'antë ma ëjtsën ets jeexyë xymyëët'atë ja juukyajtën xëmëkyëjxmëpë.
41Ëjts, ka'apës nyajtuny ja mëj'ajt oyajtën mëti'ipë ja'ay yajktëpën. 42Ets näjyëtu'un nija'apës wi'ix miits mja'ay'atën ets ko ka'ap xymyëët'atë ja Tios ja tsyojkën jya'awën. 43Nteetyës të xyajminy ets ka'ap miitsëty të xykyupëktës; e ko jeexyë pën y'ëkminy tsojkënkyëjxm, mkupëjktëp jeexyë. 44¿Wi'ixës miits xymyëpëktëty pën mëj këjxm mnäyajnaxëtë nixim niyam ets ka'ap xy'ixta'atë ja mëj'ajt jaanty'ajtën mëti'ipë Tios yäjkpyën? 45Këtii miits mmaytyë mtajtëty ko nni'ëënëja'antë ma Tiosën, yë Moisés yë'ë mni'ëënëjanëtëp, mëti'ipë mtukjotkujk'ajtëpën. 46Ko jeexyë mëpëktë ijxtëm ja Moisés y'ënänyën, näjyëtu'un jeexyë ëjts xymyëpëktës, jä'ä koos ja Moisés xynyimëtyakp ma këxja'ay ojts tyajwë'ëmyën ja y'ayuk. 47Pën ka'ap xymyëpëktë mëti'ipë ja Moisés jyääyën, wi'ix xymyëpëka'antë mëti'ipës ëjts njakäjpxypën.
Currently Selected:
Juan 5: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process