Génesis 9

Ja käjpxytyu'unën mëti'ipë tyuunën ja Tios mëët yë Noé

1Tios ojts tkënu'kxy yë Noé mëët yë y'u'unk y'ëna'k ets y'ënäny: Mëët'atë yë m'u'unk m'ëna'këty nimay ets xyajwintuktëty yë naaxwiinyëtë. 2Tu'kë'ëyë jëyujk naaxwiinypë jyuuky'atën nëjkxëp mtsë'ëkëtë. Tu'kë'ëyë jëyujkëty mëti'ipë pojotm kääkjëtijtëpën, naaxkëjxypyë ets nëëjotypë y'itën, jam yajpata'atë ma kyutujkënën. 3Jyëkyejpy mijts xytsyu'utstëty xyjyë'kxtëty oymyëti'ipë jëyujkëty ets oymyëti'ipë aay myëti'ipë ujtsëty, mëti'ipë ënäty mtsojkën'ajtëpën. Ëjts nyäjkpyës yam. 4Yë'ë tëy ka'ap xyjyë'kxtëty yë ne'pny, tsu'utsy mëti'ipë ne'pnytyuk'ookën këtii yë xyjyë'kxtëty. Jä'ä ko yë ne'pny, yë'ë juukyajtën'ajtp. 5Ëjts nyajtëwäämpyës yë jyot nye'pyny yë ja'ayëty ets jëyujkëty nitu'ukjaty. Ko ënäty pën yë myëku'uk täämë tjä'tsë yë jyot nye'pyny nipaye'eyäämpyës yë'ë.

6Pën yë myëku'uk yaj'o'kpy,

nän ja'ay nëjkx yaj'ookyë.

Jä'ä ko yë naaxwiinyëtë ja'ay jëtu'un yë të kyojy

ijxtëm yë Tios kë'ëm y'ixëtyën.

7E miitsëty may yë u'unk maay xymyëët'atëty,

ets yë'ë tyajwintuktëty yë naaxwiinyëtë.

8Tios näjyëtu'un t'ënëmaay yë Noé ets y'u'unk y'ëna'k: 9Ëk'ixtë yajxon; ëjts käjpxytyu'unën ntunäämpyës mëët miitsëty ets mëët yë m'u'unk m'okëty, 10ets jëyujkëty mëti'ipë të mpapëtsëmëtën jap kepy nëëwinye'epyëjoty: joon, jëyujkëty mëti'ipë yujyëtyën ets mëti'ipë ëwa'anëtyën ets jëyujkëty jënu'un naaxwiiny naaxkëjxy y'itën. 11Yë nkäjpxytyu'unënës mëti'ipës yam ntuunpyën mëët miitsëty, kajëna'a kyatëkatsëty. Ka'apës n'ëkyajkutëkoyanë yë naaxwiinyëtë ja'ayëty ets jëyujkëty mëët yë komtuu. Ka'ap jëtu'un y'ëkomtuunëty ets naaxwiinyëtë jatëkok nyikoompätëty. 12Ya'atë jëtu'un wa'anëp ijxpäjtën xëmëkyëjxm, ko yë käjpxytyu'unën të ntu'unëm mëët miitsëty ets mëët yë jëyujkëty. 13Tyamës të npëjktä'äky yë n'i'tsyës mëti'ipë yajtuk'ixëp koos yaa naaxkëjxy yë nkäjpxy tyu'unën nyajwë'ëmy. 14Koos yë poj yoots nyajminëty, yë n'ityës yë'ë jam ënätyë nänyikëxë'ëkëtëp. 15Ënätës yë'ë ntukja'amyätsëty koos ënäty ëjts ja käjpxytyu'unën të ntuny mëët miitsëty ets mëët ja jëyujkëty ets ka'ap y'ëkjää'ajtnëty ja nëë tuu mëti'ipë yajkutëkoyëpën ja naaxwiinyëtë. 16Ko yë i'ty nyänyikëxë'ëkëtëty yootsjoty etsës n'ixëty, yë'ëjës ntukja'amyätsëp koos ënäty ja nkäjpxy tyu'unën të ntuny mëët ja ja'ay ets ja jëyujk mëti'ipë naaxwiiny ijtëpën. 17Ya'atë jëtu'un ijxpäjtën'ajtp, mëti'ipës nyajwë'ëmpyën ma naaxwiinyëtë ja'ayën ets ma jëyujkën naaxwiinypë y'itën tsyëënëtën. Jëtu'un ojts yë Tios myëtyä'äky mëët yë Noé.

Yë Noé ets ja y'u'unk y'ëna'k

18Yë y'u'unk y'ëna'k yë Noé mëti'ipë ojts pyëtsëmtën jap ma ja kepytyëjkën nëëwinye'epyë, jä'ä ojts txëëwatë Sem, Cam, yë tyeety yë Canaán ets Jafed. 19Ya'atë jëtu'un y'u'unk'ajt y'ëna'k'ajt yë Noé ets yë'ë ojts jatëkok tyajwintuktë yë naaxwiinyëtë.

20Yë Noé naaxtuunpë ja'ay ijty, yë'ë ojts ëka'any tpeny tkojy ja ujtstëëm mëti'ipë yajtijpën tsatsymtsya'am. 21Tëkok yë Noé ojts t'uuky yë tsatym nyëë mëti'ipë të nyimaanaxyën ets ojts myukpëjkënë ets ojts jäpyë myaanaxy tyëjk'itkujky niwa'ats ëxwa'ats. 22Ko jëtu'un ja Cam t'ijxy ja Canaán ja tyeety, ko ja Noé niwa'ats ëxwa'ats jap kyo'knë tëjk'itkujky, ënät ojts ja myëkä'äx tukmëmëtyä'äky ja nimäjtskpë. 23Ënät ja Sem ets ja Jafed t'ijxtë tu'uk ja wit ets nyätyukejkyjyëpijpëtë ets ja tyeety ojts jä'ä tuknipä'äntë. Ënät ojts jatëkok wyimpitë ets wiinktsow nyajts'ixëtë, këtiipë ja tyeety t'ixtëty niwa'ats ëxwa'ats.

24Ko ja Noé ojts wyijy, ënät tnija'awëy ko ënäty jëtu'un ja myaank ja mutskpë të y'ëti'itsy, 25ets y'ënäny:

Poky y'itëty yë Canaán

Tuumpë je'eyë wya'anëty ma ja nimäjtskpë y'äjtyën.

26Ënät ojts ok tjaaknikäjpxy ets jyaak'ënany:

Yë nWintsënës Tios yë'ë kyënu'kxëp yë Sem,

ets je'eyë tuunpë twa'anëty yë Canaán.

27Tios yajkutukëp yë Jafed ets myëjëty kyëjääjëty;

ets jam näjyëtu'un jyuuky'atëty ma ja Sem ja tsyënaaytyaknën,

ets yë'ë näjyëtu'un wya'anëp tuunpë yë Canaán.

28Ko ojts jëtu'un ja komtuu y'ëknaxy, jä'ä ojts yë Noé jyaakjuuky'äty tëkëëk mëko'px ja wëxtyikxy majk jëmëjt. 29Paaty ko ojts y'o'knë jä'ä ënäty yë jyëmëjnë taxtujk mëko'px ja wëxtyikxy majk.

Currently Selected:

Génesis 9: QUETZMIXE

Highlight

Copy