Génesis 13

Abram mëët yë tsyojkmaank Lot nyäy'ixmajtsënë

1Ko ojts ja Abram jap tsyo'onë Egiptë mëët yë tyo'oxytyëjk ets mëët tu'kë'ëyë mëti'ipë ënäty myëët'ajtypyën, jam ojts jyä'ty ma ja naaxwiinyëtë txëëwatyën Négueb, mëët ja tsyojkmaank Lot. 2Yë Abram mëkja'ay ijty, may tmëët'ajty yë pu'ts pujxn, poop pujxn ets jëyujk tsajpkaa. 3Ko ojts Négueb tsyoony, ëtyä'äkyë'äämpy ojts nyijkxy ets jyä'äjty ma ja Betel kajpnën. Jam Betel tsyo'ony ets ojts jyä'ty ma ënäty wäänë të y'ëk'ijtpën më''ëka'any, mëti'ipë itkujky wë'ëmpën ma Betel mëët yë Aí nyäpyäätyë. 4Yaa ja naax kam wyi'imy ma ojts tyaj'oyën tu'uk ja wintsë'këntyakn ets jam ja Wintsën tmënu'kxtäky.

5Lot kumeeny ijty näjyëtu'un ijxtëm ja jyämyën Abram. Lot may ënäty näjyëtu'un tmëëtëty yë jëyujk tsajpkaa, tsajppaxë kupixyny ets tuumpë mëti'ipë mëët tsyëënëtën. 6E yë'ë ënäty jotmay'ajtp ja it naaxwiinyëtën ma jam y'itën. Ka'ap nyipaatë ja jë'kxy pëky mëti'ipë ja jëyujk tsajpkaa nyi''ijtëpën, paaty ojts ka'ap t'ëkjëkyäjpnë y'ijtmuktëty. 7Jä'ä ko mëti'ipë ënäty jëyujkëwent'ajtpën tsajpkääky kyëwent'ajtëpën ma ja Abramën, xëmë nyäy'ojtëtë mëët ja mëti'ipë jëyujkëwent'ajtp tsajpkääky kyëwent'ajtëpën ma ja Lotën. E yë Canaán ja'ayëty ets Ferez ja'ayëty tam ënäty näjyëtu'unëty. 8Paaty ojts tu'kxëëw tu'kjëmëjt Abram yë tsyojkmaank Lot t'ënëëmë: Mijts ets ëjts tu'kmëku'uk'ajtëm ëtsajtëm. Paaty ka'ap y'oyëty ko nämyëjëën'ajt nämyëtsip'ajtëmëty. Yë ntuunpë'ajtëm ka'ap mëpaat nyämyëjëën'at nyamyëtsip'atëtë. 9Ijxtëm xy'ixyën tää naaxwiinyëtë jyätyë, win'ix mëti'ipë mtsojkën'ajtyp. Tyam npëjktsoy ets xytyunëty yë mëyajtën, xy'ixta'ajëty yë mnaax mkam ets ëpëkyäty n'ijtmëty. Pën mijts mnëjkxp anëkëjxytsyow, ëjts kunak'äämpyës nëjkxëty. E pën mijts mnëjkxp kunak'äämpy, ëjts anëkëjxytsyowës nëjkxëty.

10Ënät ja Lot nyajts'ijxëy jam joyjotm ma ja Jordán mëjnëëjën ets t'ijxy ko ka'ap jam tyëkoy'äty yë nëë, tsuj jyänty kyëxë'ëky, tä tu'uk yë jë'kxykyamën mëti'ipë japën Egiptë, jampaat jyä'ty ma ja Zoar kajpnën. Jëtu'un ënäty ya'atë naax kajpn yajpaaty ma ka'anëm ja Tios ja Sodomë kajpn ets Gomorra kajpn tyajkutëkoynyëmën. 11Yë'ë ojts ja Lot twin'ixy ja joyjotm, mëti'ipë jam yajpatpën ma ja Jordán mëjnëëjën. Jamtsow ojts awinm nyijkxy tsënääpyë ma ënäty jam të y'itën, jëtu'un ojts ja Abram mëët ja tsyojkmaank Lot nyäyajwa'kxënëtë. 12Yë Abram jam ojts wyi'imy Canaán tsënääpyë, e yë tsyojkmaank Lot jam ojts nyijkxy tsënääpyë joyjyotm ma ja Jordán mëjnëëjën, winkon mëët ja Sodomë kajpn. 13Ja ja'ayëty ja jampë tsyëënëtën Sodomë ëxëëk ënäty jyä'äy'atë. Ets aakjä'ä ënäty ja pokytyuuntëp, mëti'ipë Tios ka'ap ninu'un tsokyën.

14Ma ënäty ja Lot të nyäjyëkäjpxyën mëët ja jyämy Abram, ënät ja Abram ojts ja Tios myëkäjpxyë ets y'ënëmaayë: Ma jam mtänën ëk'ix ëktun mwiintuuytsyow ets mjëxkë'ptsow, anajnytsyow ets a'oytsyow. 15Ëjts mijts nmo'ojäämpy tu'kë'ëyë ya'atë naaxwiinyëtë mëti'ipë m'ijxypyën ets xëmëkyëjxm mijts mjä'ä'atëp ets näjyëtu'un yë m'u'unk m'ok. 16Ëjts nyajnimayëjäämpy ijxtëm naaxwayën yaa naaxwiiny, jëtu'un tä ka'ap tjëkyäpëtyën yajmëtyowëty tä naaxwayën. 17Ëkpëtë'ëk ets tukye'eyëtya'a ya'atë it naaxwiinyëtë, jënu'un y'ayenyëty ets jënu'un myëjwiinëtyën. Jä'ä ko ya'atë it naaxwiinyëtë mijts yam ntukë'ëtëkëjäämpy.

18Paaty ja Abram ojts tyajpëtë'kta'ay yë jyëën tyëjk ma ënäty jam y'ity tsyëënën ets ojts nyijkxy tsënääpyë ma ënäty jam tu'uk ja it naaxwiinyëtën janty xojjotpë. Yë'ë ënäty tu'uk yë ja'ay nyiwäämpy tääpë naax mëti'ipë xyëëwajtypyën Mamré, myëwinkon'ajtyp ja Hebrón kajpn, jam ma tääpë naax kamën jam ojts yë Abram tu'uk yë wintsë'këntyakn tyaj'oyë ets ja Tios tmooy.

Currently Selected:

Génesis 13: QUETZMIXE

Highlight

Copy