Génesis 10

Ja Noé ja y'u'unk y'ëna'k ets ja y'ok'u'unk y'ok'ëna'k

1 Cr 1:5-23

1Yaa yë xyëëw myintë mëti'ipë y'u'unk'ajt y'ëna'k'ajtëp Sem, Cam ets Jafed. Ja y'u'unk y'ëna'k ja Noé mëti'ipë ojts pyëktë y'uuktën ets tmëët'ajtë ja y'u'unk y'ëna'këty ma ënäty ja mëk komtuu të nyajxnën.

2Ya'atë ojts t'u'unk'aty t'ëna'k'aty yë Jafed mëti'ipë xyëëwajtën Gómer, Magog, Madai, Javán, Tubal, Mésec ets Tiras. 3Yë y'u'unk y'ëna'k yë Gómer jä'ä ojts txëëwatë Asquenaz, Rifat ets Togarmá. 4Yë y'u'unk y'ëna'k yë Javán jä'ä ojts txëëwatë Elisá, Tarsis, Quitim ets Rodanim. 5Ya'atë ojts t'u'unk'aty t'ok'aty yë Jafed mëti'ipë tyajwintuktën ja nëëpa'a, nitu'ukjaty ja naax kajpnëty myëët'ajtëp ja nyaaxëty kyamëty ets kyë'ëm ayuk kyajpxtëp.

6Ja y'u'unk y'ëna'k ja Cam jä'ä ojts txëëwatë Cus, Misraim, Fut ets Canaán. 7Ja y'u'unk y'ëna'k ja Cus jä'ä xyëëwajtë Sebá, Havilá, Sabtá, Raamá ets Sabtecá. Ets ja y'u'unk y'ëna'këty ja Raamá je'eyë ojts nimäjtsk y'itë, mëti'ipë xyëëwajtën Sebá ets Dedán. 8Cus ojts txëëwaty ja Nimrod ja tyeety mëti'ipë ojts më''ëka'any y'ityën jotmëk yaa naaxwiiny. 9Nimrod jëyujk majtsp ijty. Tios ojts jëtu'un tyajkutuky jyëyujkmatsëty. Jää ja ayuk tsyoony mëti'ipë ënaanpën: jä'ä ko yë Wintsën jëtu'un tyajkutujky Nimrod jëyujk majtsp ijty. 10Ya'atë kyajpn'ajt yë Nimrod ma ojts y'ëne'emyën: Babel, Erec, Acad ets Calné, mëti'ipë jam yajpatpën Sinar nyaaxjoty. 11Ma ya'atë it naaxwiinyëtën ojts tsyoony ets ojts nyijkxy Asur, jam ojts tyajkojy yë Nínive kajpn, Rehobot ets Quélah, 12ets tu'uk ja kajpn mëjpë yajxëëpäjtën Résen jam yajpaaty itkujky ma Nínive kajpn ets Quélah.

13Yë Misraim jä'ä y'u'unk y'ëna'k ojts txëëwatë Lud ja'ayëty, Anam ja'ayëty, Lehab ja'ayëty ets Naftu ja'ayëty. 14Näy jam tsyoontë mëti'ipë xyëëwajtëpën patrusejë ja'ayëty, Caslu ja'ayëty, Cafto ja'ayëty ets ojts ok txëëwajnëtë filistejë ja'ayëty.

15Canaán, yë Sidón yë tyeety mëti'ipë ojts mëtu'uk t'u'unk'atyën ets Het. 16Yë ja'ayëty mëti'ipë xyëëwajtëpën Jebús ja'ayëty, Amor ja'ayëty ets gergeseos ja'ayëty yë'ë yë Canaán tyeety'ajt y'ap'ajtëp, 17ets näjyëtu'un mëti'ipë xyëëwajtëpën Heve ja'ayëty, aracejë ja'ayëty ets sinejë ja'ayëty, 18näjyëtu'un yë Arvad ja'ayëty, zemarejë ja'ayëty ets Hamá ja'ayëty. Oknëm ojts nyäwya'kxtaayënëtë yë Canaán ja'ayëty. 19Yë nyaaxjotëty yë Canaán ja'ayëty jampaat ojts t'ëkniwa'knëtë ma ja nyaaxjotmën yë Guerar ets jampaat nyäxy ma ja Sidón kajpnën ets ma ja mutsk kajpn txëëwatyën Gaza ets tyimja'ty jam Sodomë ets Gomorra, Admá ets Seboím, ma ja kyajpnën ja Lesa. 20Ya'atë ojts t'u'unk'aty t'ok'aty yë Cam mëti'ipë yam të yajnimëtyä'äkyën, nitu'ukjaty aakmëët yë jyä'äyëty ets it nyaaxwiinyëtëty ets kyë'ëm y'ayuk kyajpxtëp.

21Sem, yë y'äjty yë Jafed nän tam ijty yë y'u'unk. Tu'kë'ëyë y'u'unkëty yë Éber yë'ë y'u'unk y'ok yë Sem. 22Ya'atë ojts t'u'unk'aty yë Sem, Elám, Asur, Arfaxad, Lud ets Aram. 23Ya'atë y'u'unk'ajt yë Aram mëti'ipë xyëëwajtën Uz, Hul, Guéter ets Mas. 24Yë Sélah yë'ë ojts teety'äty yë Arfaxad, e yë Éber yë'ë ojts teety'äty yë Sélah. 25Yë Éber mäjtsk ojts yë y'u'unk jyaak mëxu'unk'aty, tu'uk jä'ä ijty xyëëwajtyp Péleg, paaty ojts jëtu'un txëëwaty, jä'ä ko ojts jyuuky'äty jää ojts yë naax kajpn nyäwyä'kxyë. E ja myëkä'äx ja Péleg jä'ä ijty xyëëwajtyp Joctán. 26Joctán ojts txëëwaty ja tyeety yë Almodad, yë Selef ets Azar-mavet, näjyëtu'un yë Jérah, 27yë Adoram, Uzul ets Diclá. 28Yë'ë y'u'unk txëëwajt Obal, Abimael ets Sebá, 29ets Ofir, Havilá ets Jobab. Aakyë'ë ya'atë ojts t'u'unk'aty yë Joctán. 30Jam ojts tsyëënëtë ma ja mëj'it xëëw'atyën Mesá. Jampaat ja itjot nyäxy ma ja naaxjot txëëwatyën Sefar, ya'atë itjot kopkjoty ijty, mëti'ipë jam wë'ëmpën matsow ja xëëw pyëtsimyën. 31Ya'atë jëtu'un ojts t'u'unk'aty t'ok'aty yë Sem ets nitu'ukjaty tam yë nyaax kyamëty ets mëët yë kyë'ëm'aaw kyë'ëm'ayukëty.

32Ya'atë jyä'äy'ajtë yë y'u'unkëty y'ëna'këty yë Noé, wi'ixëty ojts nitu'ukjaty jyä'äy'atë ets aakmëët yë nyaax kyamëty. Yë'ë ya'atë mëti'ipë ojts wyë'ëmtën ko ojts ja komtuu y'ity, nitu'ukjaty xim yam ojts ye'eywya'kxtaaynyëtë naaxwiinyëtë apëtsëmy.

Currently Selected:

Génesis 10: QUETZMIXE

Highlight

Copy