Hechos 10

Pedro ets Cornelio

1Jam ma Cesarea kajpnën, jam ijty tu'uk ja ja'ay tsyëënë; Cornelio xyëëwajtyp, tsiptuunpë wintsën ijty tyuunk'ajtyp ma ja soldadëtëjkëtën mëti'ipë yajtijtëpën Italiano. 2Xëmë ja Cornelio ijty twintsë'ëkë ja Tios, näjyëtu'un mëti'ipë tsënaaytyëpën jam ma tyëjkën, pyutëjkëp ijty ja ja'ay mëët ja wit meeny ko pën kyaka'ajtxëty ets xëmë tja'amyetsy ja Tios. 3Jënäkyxyëëw ënäty, ko ojts t'a'ijxnaxy tu'uk ja Tios ja y'anklës myëwinkonyë ets y'ënëmaayë:

Cornelio.

4Tääts ja Cornelio tsë'ëkë tsë'ëkë twin'ijxpejty ja tsajpjotmëtë kukäjpxy ets t'ëtsooy:

¿Tii?, Wintsën.

Tää ja tsajpjotmëtë kukäjpxy y'ënëmaayë:

Y'ijxyp nyija'ap yë Tios ko xyjyä'äymyetsy ets wi'ix xypyutëkën ja ëyoopëja'aytyëjkëty. 5Käx yë mkukäjpxy ets nyëjkxëty Jope, wä'än twoy ja Simón, mëti'ipë yajtijpën Pedro. 6Jam jya'ajtä'äky ma ja tyëjkën ja wiinkpë ja Simón, po'oko'tsk tyuunk'ajtyp, jam winkon tsyëënë mejypyë'am.

7Tääts ko ja tsajpjotmëtë kukäjpxy tsyo'ony, ënät ja Cornelio tmëjwooy nimäjtsk ja tyuunpë ets näjyëtu'un tu'uk twoowtsooy ja tsiptuunpë mëti'ipë myëku'ukja'apën ets wyintsë'këp ja Tios. 8Tääts tuk'ëwa'anëtyääy ijxtëm ënäty ja Tios ja y'anklës të y'ënë'ëmxëtyën ets tkejxy.

9Komjëpom, kujkyxyëëwëjaanpën, tam ënäty ja käjpxynyajxpë tyu'uye'eytyë winkon ma ja Jope kajpnën, ënät ja Pedro pyejty jap tëjkëjxy Tios ëwtajtpë. 10Yuu'o'këp ënäty mëk ets kayaanp. E tap ënäty ja kyääky tyojkx yaj'oytyunyëm, ko ja Tios tyuk'a'ijxnajxë 11jam tsajpkëjxm y'ëwa'atsy ets kyëtä'äky ijxtëm ja mëj witën ets wiinxë taxk täk. 12Jap witjoty kanaakjëjp ojts t'ixy ja jëyujk taxkpë tyekyën, nän tap ja tsa'any ets ja jëyujk mëti'ipë kääkëtijtpën. 13Ënät tmëtooy tu'uk ja ayuk mëti'ipë ënaanpën:

Pëtë'ëk, Pedro, yaj'ook ets xytsyu'utsëty.

14Tääts ja Pedro y'ëtsooy:

Ka'ap, Wintsën. Nijëna'ajës ëjts nkatsu'uty mëti'ipë ëxëëkën ets mëti'ipë ka'ap mëpaat yajktsu'utsyën. 15Ojts jatëkok tmëtoy ja ayuk ets y'ënëmaayë:

Mëti'ipë Tios të tyajwa'atsyën, ka'ap tjëkyepy xytyijëty ëxëëk.

16Tëkëëk ok jëtu'un tmëtooy, ënät ja wit pya'tëjkënë tsajpjotm. 17Tam ënäty ja Pedro je'eyë tmëmay tmëtajy wi'ix nyiwijyën mëti'ipë y'a'ijxnajxypyën ko ja Cornelio ja kyäjpxynyajxpë jyajtë jam tëjk'ëkë'ëm, jä'ä ënäty yajnitë'ëwëtëp ja Simón ja tyëjk. 18Ko jam jyajtë, ënät ojts mëk tyajtëwtë pën jap ja Simón mëti'ipë näjyëtu'un yajtijpën Pedro.

19Tam ënäty ja Pedro tmëmay tmëtajynyëm mëti'ipë të yajktuk'ixyën, ko ja Kënu'kxymyëkajtën y'ënëmaayë:

Simón, tää ja'ay nitëkëëk m'ixta'ayë. 20Pëtë'ëk, jënak ets panëjkx tääpë ja'ayëty, këtii xymyëmay xymyëtajëty jä'ä koos yë nkejxyp.

21Tääts ja Pedro jyënäjky ets t'ënëmaay ja Cornelio ja kyäjpxynyajxpëtëjkëty:

Ëjts jëtu'un mëti'ipë miitsëty m'ixtaaytyëpën. ¿Tii mnimiintëp?

22Tää ja kukäjpxy y'ëtsoowtë:

Ja tsiptuunpë wintsën Cornelio, yë'ëjës xykyäjxtëp. Oy ets mëtëy jyuuky'äty ets wyintsë'këp ja Tios, oyjya'awëyëp ets tsojkëtëp ja jutiis ja'ayëty. Tu'uk ja Tios ja y'anklës të nyë'ëmxëty ets mijts myajwowëty ets nja'amëty ma ja Cornelio ja tyëjkën ets xytyuk'ëwaanëty mëti'ipë mkajpxäämpyën.

23Tääts ja Pedro tyajja'ajtäky ma jam y'ityën ets jam ja tsuu tyajnajxtë. Komjëpom tsyo'ontë ets ja Pedro jënaakën jyämyëët'ajtëtë ja mëpëjkpëtëjkëty mëti'ipë jam tsënaaytyëpën Jope.

24Komjëpom jyajtë ma ja Cesarea kajpnën, ma ja Cornelio ënäty jam y'ëwxityën mëët ja myëku'uktëjk ets ja wyin'ixytyëjk mëti'ipë ënäty të twoomukyën. 25Ko ja Pedro jyä'äjty ma ja tëjkën, tääts ja Cornelio ojts pyëtsimy tyëjk ëkë'p ets nyäkyoxtënaaytyakë Pedro wyintum ets t'ëwtata'any. 26Ja Pedro ënätyë twijtsë'ky ets t'ënëmaay:

Tänë. Ja'ayës ëjts näjyëtu'un ijxtëm mijtsën.

27Tam ënäty myëtyä'äkynyëm mëët ko tyëjkëy tëkoty ma jap nimay ja ja'ay të ye'eymyuktën. 28Ënät ja Pedro y'ënäny:

Ejxtëm xynyijawëtën, ka'apës ëjts yë n'ënä'ämën kyutuky ets jutiis ja'ay mëët ye'eymyuk nyajxmuktëty ja ja'ay mëti'ipë ka'ap jyutiisëty, nän ka'ap tjëkyepy tyëkëty ma tyëjkën. E tëëjës ja Tios xytyuknijawë ko ka'ap y'oyëty koos pën ntijëty ëxëëk. 29Paatyës të nminy ënätyë yaa ets nitii ayukës të nkapaaty, yë'ëjës njanijawëjäämpy tiis ko të xywoowtsowtë.

30Tääts ja Cornelio y'ëtsooy:

Tyam mëmajktaxk xëëw ma ya'atpë horë yaa n'ayuu'atyës maas ntëjkën. Tiosës nja'amyejtsyp jënäkyxyëëw, ko ojts ajotkumonë n'ijxpaatyës tu'uk ja ye'etyëjk xywyintänës. Atë'kxp ajajp ja wyit kyëxë'ëky. 31Ënätës xynyëmaay: Cornelio, tëë ja Tios ja m'aaw m'ayuk tmëtoy, y'ijxyp nyija'ap ko të xyjyä'äymyetsy ets wi'ix ja mëyajtën xytyunyën ma ja ja'ayëtyën xypyutëkën. 32Käx yë mkukäjpxy ets nyëjkxëty jam Jope. Wä'än nëjkx twoy ja Simón, mëti'ipë yajtijpën Pedro. Tam jya'ajtä'äky ma ja yajpo'otëtspë ja tyëjkën, mëti'ipë näjyëtu'un xyëëwajtypyën Simón. Mejypyë'aay tsyëënë. 33Paatyës yë nkukäjpxy ënätyë të nkexy ets mwowëtëty. Oy ko yë mëyajtën të xytyuny ko të mminy. E tyamts ëëts tu'ukmukyë nyajpaatë Tios wyintum ets yaj'amëtoow'ita'any ja aaw ayuk mëti'ipë ja Wintsën të mtuk'ëne'emyën etsës xytyuk'ëwaanëtëty.

34Ënät ja Pedro kyajpxtso'ony:

Tyamës n'ixy nijawë ko ja Tios tsyojktääpy ja ja'ay ni'ëmukë, 35kyupëjkpy pën wintsë'këyëp ets pën tyuunpy mëti'ipë paat'ajtëpën. 36Tios ojts tmëkäjpxy ja Israel ja'ay ja y'u'unk y'okëty, tuk'ëwaanë ja jotkujk'ajtën mëët ja Jesukristë, ko yë'ë nyiwintsën'ajtääpy winë. 37Mnija'awëtëp miits mëti'ipë tuunën jajtën jutiis ja'ay nyaaxjotyëty; tsyo'ontäky jëyëjp Galilea, ko ja Juan Yajnëëpäjtpë tkajpxwä'kxy ets ja ja'ay t'ëxmatstëty ja y'ëxëëk winma'anyëty ets nyëëpätëty. 38Mnija'awëtëp näjyëtu'un ko ja Tios tmooy ja Jesús ja Kënu'kxymyëkajtën mëët ja mëk'ajtën, ets ko ja Jesús tuuny ja oypyë ko jyëtijty naaxwiiny ets tyajtsoky ja ja'ay ni'ëmukë mëti'ipë ënäty ja mëjku'u yaj'ëyoowëtëpën. Jëtu'un ojts ya'atë tuny jä'äkyëjxm ko ja Tios mëët yajpaaty. 39Ets ëëtsëty ojtsës n'ixtë nnijawëtë tu'kë'ëyë mëti'ipë ja Jesús tyuun kyajpxën jam Jerusalén ets ma ja wiink naax wiink kajpnën, Judea nyaaxjotm ets ojts ëëts n'ixtë nijawëtë ko yaj'o'këtë ja ja'ay ets ko yajmëjwojpejty kruutskëjxm. 40Ënät ja Tios ojts yajjuukpyikyë jatëkok kom tëkëëk xëëw ets nyänyikëxë'kë ma ëëtsëtyën. 41Ka'ap ja ja'ay ni'ëmukë t'ijxtë, ëëts je'eyë n'ijxtë, mëti'ipë ja Tios të twin'ixyën. Ojts ëëts mëët nkaytyë n'uuktë ko jyuukpyijky. 42Tääts ojts xytyuk'ënä'ämtës ets yajkajpxwa'kxëty ja Tios ja y'aaw y'ayuk, ets ja ja'ay ntuk'ëwaanëtëtyës ko Tios të tpëjktä'äky yë Jesús ets tpaye'eyëty ja juukpyë ookpyë. 43Ni'ëmukë ja Tios ja kyäjpxynyajxpëtëjk tëë ënäty tnikäjpxy tnimëtya'aktë ja Jesús ets tëë ënäty y'ëna'antë ko pën ja Jesús myëpëjktëp, jä'ä pyoky yajnimä'kxantëp.

Ko ja Kënu'kxymyëkajtën t'ëxajëtë ja ja'ay mëti'ipë ka'ap jyutiis'atën

44Tam ënäty ja Pedro kyäjpxynyëm ko ja Kënu'kxymyëkajtën tyukëtakëtë ni'ëmukë ja ja'ayëty mëti'ipë jam myëtoow'ijtëpën ja Pedro ja y'aaw y'ayuk. 45Ja mëpëjkpëtëjkëty mëti'ipë ja Judá ijxpëjkën mëpëjkën tyuk'ijtëtyëpën, mëti'ipë ënäty ja Pedro mëët të jya'tën, jä'ä ojts mëj'ixy t'ixtë ko ja'ayëty yajmo'otë ja Kënu'kxymyëkajtën mëti'ipë ka'ap jyutiis'atën, 46ojts tmëtowtë ko tkajpxtë ja wiink ayuk ets ja Tios tmëjja'awëtë tjaantyja'awëtë. 47Tääts ja Pedro y'ënäny:

¿Mëpaat jëtää pën t'ëtukëty ets ya'atë ja'ay ka'ap nyëëpätëtyë? Tëë ja Kënu'kxymyëkajtën t'ëxajëtë näjyëtu'un ijxtëm ëëtsajtëmën.

48Tääts ja Pedro ojts tni'ënä'ämë ets nyëëpätëty Jesús xyëëwkyëjxm. Ja mëpëjkpëtëjkëty ojts nëëmëtë ja Pedro ets tjaakwë'ëmëty ti'k xëëw mäjtsk xëëw jam mëëtëty.

Currently Selected:

Hechos 10: QUETZMIXE

Highlight

Copy