San Mateo 16

Iyo'tcajap Jesús tu'c seña

1Mit coygau mam Jesús fariseujat mit saduceujat, mit i-ucyo'tcau je' pa iguiproba̱tcawa'n. Je'jat iyo'tcajau Jesús ma ajque's̈ tu'c seña mʉjway tsajpni'c pa iguijawigawa'n te Dios igui-ajyu't.

2Jesús ipo'ngʉs̈:

—Icutsu'iwa'n inyʉmgap ni'c oymanac i-itwa'n jobom, ni'c tsajp pinta̱tp azul. 3Mit icus̈ʉwiwa'n, inyʉmgap ni'c jinap itáj s̈e'mtu̱ ni'c cu'tp wintuc mit tsajp que's̈p chi'ch. Mijchatu miniwe̱tcʉjʉp ni'c oyap is̈acotstujca ti i-anuncia̱tpay tsajp, po mijchat ingajawigap ti inʉmo'jcʉp ayé señajat tʉnwatpay ʉ̱ jinapay tiempu. 4Ayʉ̱́j jinapay jayajwat ma̱lo'jcat mit cacumplia̱tcap. Je'jat i-e'po'jcʉjʉp tu'c seña mʉjway, po nepʉn igajawatáj seña ni'c itway tu'c seña mʉjway itiempuni'c ayé profeta Jonás.

Mit Jesús jem iguiyajcʉs̈ ayé jayajwat, mit nʉcs̈.

Fariseujat ilevadura

5Icóygaj ipʉctampajyat tuganʉ-ájw, inijawigau ni'c igamumingawu ma̱s̈anʉ̱n. 6Jesús inʉmgʉs̈au:

—Nicuidá̱tcʉjʉ mit ilevadurajat fariseujat mit saduceujat.

7Mit je'jat pensa̱tcau, inʉmgau:

—Nas̈nʉmgajap we'n ni'c nagamumingawu ma̱s̈anʉ̱n.

8Iguijawij Jesús ni'c we'n ipensá̱tcaj, inʉmgʉs̈au:

—Jayajwat, migacupʉjcap may. ¿Tini'c impensá̱tca mijchatu ni'c inga-aguepcap ma̱s̈anʉ̱n? 9¿Ingani-entendia̱tcap ne inganijawigap ayé cinco ma̱s̈anʉ̱nwájat tʉnacpas̈anway pa cinco mil jayajwat? ¿Ingajanijawigap pʉjʉn ca'c ma̱s̈anʉ̱ncutucwájat is̈apiumújca? 10¿O ingajanijawigapey ayé siete ma̱s̈anʉ̱nwájat tʉnacpas̈anway pa cuatro mil jayajwat? ¿Ingajanijawigap pʉjʉn ca'c ma̱s̈anʉ̱ncutucwájat is̈apiumújca? 11¿Tini'c is̈ca-entendiá̱tca? Tʉganʉmgʉs̈awu ni'c ingamumingawu ma̱s̈anʉ̱n. Tʉnyʉm pi nicuida̱tcʉjʉ mit ilevadurajat fariseujat mit saduceujat.

12Mit cʉs̈ nimoygʉjʉu cuenta ni'c Jesús iganʉmu ma nicuida̱tcʉjʉ mit ma̱s̈anʉ̱n levadura, iguinʉmgajau ni'c ma nicuida̱tcʉjʉ mit ayé i-ajque's̈capay fariseujat mit saduceujat.

Lo que inʉmway Pedro

13Icojy Jesús en ayé na̱s̈ Cesarea de Filipo, i-ucyo'tcʉs̈ ipʉctampajyat:

—¿Nat iguinʉmga jayajwat ni'c tʉpʉn ʉ̱ jeme tʉjatway jayau?

14Je'jat iguinʉmgajau:

—Una̱c inʉmgap ni'c mi̱ miJuan nʉ'gutempayna', ja-una̱c inʉmgap ni'c mi̱ miprofeta Elías, mit japu̱jtat inʉmgap ni'c mi̱ miprofeta Jeremías o mi jatu'c profeta.

15Jesús inʉmgʉs̈au:

—Mit ¿mijchat te? ¿Ti inyʉmgap tʉpʉn ʉ̱?

16Simón Pedro iguipo'n:

—Mi̱j ayé miCristu is̈wáy ayé Dios jeme tsʉ̱napay pa siempre.

17Mit cʉs̈ Jesús inʉjmau:

—Mitsʉ̱nap oy mi̱ Simón, Jonás iway, ni'c is̈ca-actujawiwu jayajwat ayé inyʉmpay, po is̈actujawiu tʉnte̱t Dios jeme tsʉ̱napay tsajpni'c. 18Mit tʉnʉjmapey ni'c mi̱ inyʉ'jy Pedro mit ayé inʉmo'jcʉp tu'c tsa', ni'c lo que Dios is̈actunʉmway tanáj as̈am tu'c tsa'. Mit como is̈cupʉcp mʉgʉc, mi̱ inacchu̱chiyáj ma tʉs̈cupʉjcac jayajwat, mit ma̱lwayna' ca-oyáj iguivencia̱t tʉnjayajwat. 19Mit tʉmo'áj tu'c autoridad pa is̈manda̱tcʉs̈wa'n jayajwat ma jayaumayga Dios, mit ayé autoridad as̈am tu'c ya̱pi intu-awa'tsámpay ayé lugar pa itʉgʉygawa'n mam imanda̱t Dios. Mit inyʉmgʉs̈áj tʉnjayajwat ti iwatcámpay. Mit yam na̱s̈ni'c lo que inyʉmámpay ni'c ca-oy iguiwatca, Dios tsajpni'cway inʉmámpey ni'c ca-oy iguiwatca. Mit yam na̱s̈ni'c lo que inyʉmámpay ni'c oy ma watca, Dios tsajpni'cway inʉmámpey ni'c oy ma watca.

20Mit cʉs̈ Jesús imanda̱tcʉs̈ ipʉctampajyat maganʉmgaja nepʉn ni'c je' ayé Cristu i-ajyu'tway Dios.

Jesús inʉmp ni'c o'gáj

21Mit wejpu'n Jesús chu̱chiu igui-actujawigʉs̈ ipʉctampajyat ni'c je' itp ti inʉs̈wa'n Jerusalén, mit inʉm ni'c je' igui-actunas̈cáj ayé na'waywájat, judíujat imʉjpa̱nijat mit i-ajque's̈capay ley, mit igui-ac-ago'jcʉjʉ̱́j, po imutu̱gupay s̈ʉjw jutucta'gájatu. 22Mit cʉs̈ Pedro iya̱s̈pichin Jesús jatu'c laj mit chu̱chiu iguiche'c, inʉjmau:

—Señor, ¡Dios pi is̈ayo̱wis̈ac pi is̈cajatac we'n!

23Po Jesús i-e'jpitujc, inʉjmau Pedro:

—¡Niju'jpʉ de ʉ̱, ni'c inmuyo'yp Awayagatsna'! Inwamp is̈atugáj ni'c ingajawip ti iwampay Dios. Más inwatp cuenta iwangapay jayajwat.

24Mit cʉs̈ Jesús inʉmgʉs̈au ipʉctampajyat:

—Te tu'c jayau iwamp tʉs̈natspoguiyáj ma nijawiyo't lo que je'yu iwampay, mit ma tsʉ̱na dispuestu iguitunas̈wa'n, mit we'n oyáj tʉs̈natspoguip. 25Ni'c pʉmba'tu iwampay iguisalva̱twa'n ivida, i-actogoyáj. Mit pʉmba'tu i-actsʉ̱námpay ivida por togoyic ni'c tʉs̈wamp, je' iguarda̱táj pa tu'c vida cacʉs̈ámpay. 26Ni'c ¿pa ti oy te tu'c jayau i-aguep nu'pʉjʉn itpay en ayʉ̱́j mundu mit i-actogoyp ivida? o ¿nat iguijuybichinwa'natu ivida? 27Ni'c ʉ̱ jeme tʉjatway jayau tʉmi'náj mit tʉn-ángejlat. Tʉmi'náj oymanac as̈am tʉnte̱t Dios, mit wejpu'n tʉnactutso'gáj cada jayau as̈amu iguiwajt. 28Iyacs̈ta'cway tʉnʉmgʉs̈ap ni'c una̱c jeme tsʉ̱ngapay yam, ca-o'jcáj hasta tega-e'pcap tʉmi'nwa'n ʉ̱ jeme tʉjatway jayau, mit wejpu'n tʉmanda̱táj.

Currently Selected:

San Mateo 16: PSNT

Highlight

Copy