San Lucas 15

Tu'c borregu togoyicway

1Nigutomigʉjʉu mam Jesús nu'pʉjʉn que'chumpajyat mit maljayajwat pa iguimaraugawa'n. 2Mit fariseujat mit jeme i-ajque's̈capay ley itucotscau anu'mu, inʉmgau:

—Ayʉ̱́j jayau ipʉctsougʉs̈p maljayajwat mit imucaygʉs̈p.

3Po Jesús itumuquips̈cʉs̈ tu'c cuentu, inʉm:

4—Te tu'c jayau mam mijchat ijtʉp cien borregu mit i-actogoyp tu'c, ¿is̈jawiga igayagáj noventa y nueve mam igatsʉ̱na nepʉn, mit nʉs̈p iguiche'n hasta mam iguipa'twa'n jeme togoyway? 5Mit iguipa'twa'n ayé borregu, imunʉs̈p iquejcopacni'c pa itʉcm mit ji'cp ijo̱jt. 6Icojawa'n itʉcm, i-imvita̱tcʉs̈p i-amigujat mit ivecinujat, mit inʉmgʉs̈ap: “Ma ji'jca injo̱jtat jinap mit ʉ̱ ni'c tʉmpa̱tway tʉmborregu jeme togoyicway.” 7Tʉnʉmgʉs̈ap ni'c wename itáj más gozo mit Dios tsajpni'c cuandu tu'c jayau iguicuyagui ima̱lway to̱u que por ayé noventa y nueve jeme yo'ygapay yacs̈ic jeme icuyaguigaway ima̱lway to̱jwat.

Tu'c tumi̱n togoyicway

8’Mit te tu'c to's̈ay ijtʉp diez tumi̱nwájat mit te i-actogoyp tu'c, ¿is̈jawiga igano'ctsowáj ta'cs̈an mit ipe'táj itʉjc mit iche'náj oymanac hasta iguipa'twa'n? 9Mit iguipa'twa'n ayé tumi̱n, i-imvita̱tcʉs̈p i-amigajat mit ivecinajat, mit inʉmgʉs̈ap: “Ma ji'jca injo̱jtat mit ʉ̱, ni'c tʉmpa̱tway tʉntumi̱n tʉnactogoyway.” 10Tʉnʉmgʉs̈ap ni'c wename itáj más gozo mam Dios i-ángejlat te tu'c maljayau icuyaguip ima̱lway to̱u.

Tu'c jayau togoyicway

11Inʉmwey Jesús:

—Tu'c jayau ijtʉu mechc iwayna'jat. 12Mit jeme más majtsʉcway inʉjmau ite̱t: “Papá, mo'ac tʉmparte jeme tʉs̈toca̱tpay de ayé inaguepay.” Mit ayé jayau imoygʉs̈ ipartejat. 13Mit ca-ijtʉwu may tiempu, ayé ya̱wayna' i-apʉcmuc nu'pʉjʉn ayé tumi̱n mit nʉcs̈ pa tu'c na̱s̈ más yagatsway. Mit icojy jem, tigapa'tu ituwatcada̱c ayé imoygaway. 14Mit iguigasta̱jt nu'pʉjʉn, min tu'c yu' mʉgʉcway en ayé na̱s̈ mam itsʉ̱naj, mit iguitogoy mayo'c cosajat. 15Cʉs̈ je' nʉcs̈ mit icutomiu tu'c jayau jeme tsʉ̱naway en ayé na̱s̈ pa iguiyo'jtawa'n yos̈. Mit igui-acnʉcs̈ mam i-ijtʉ i-aníma̱jtat pa igui-ajcaygʉs̈wa'n í̱chijmat. 16Mit iwan iguicaywa'n ayé ta'tsʉjcat jeme í̱chijmat icaygapay, po nepʉn iguiga-ayo̱wis̈u. 17Mit cʉs̈ je' chu̱chiu pensa̱tpay: “Ayé yos̈watpajyat tsʉ̱ngapay tʉnte̱t itʉcm itcʉjʉp may cayan mit yam ʉ̱ tʉntunas̈p sin cay. 18Mejor tʉca's̈ʉ'gáj mit tʉpitugáj mam tʉnte̱t mit tʉnyʉjmáj: Papá, tʉnwatway mal mam Dios tʉs̈-e'p, mit mi̱ tʉwajtawey mal. 19Tʉs̈cajamerecia̱tp is̈wayjatáj, po aguépaguey as̈am tu'c inyos̈watpajyat.” 20Mit cʉs̈ ca's̈ʉ'c mit pituc mam itsʉ̱na ite̱t.

Mit cʉs̈ yagatso'cnajate imi'n, ite̱t igui-is̈, i-ayo̱wis̈. Mit cʉs̈ nʉs̈ pujʉ'c iguipa̱jtso̱p, mit imoy tu'c ame'tamuc mit imoy tu'c s̈u'c. 21Po cʉs̈ inʉjmau ite̱t: “Papá, tʉnwatway mal mam Dios tʉs̈-e'p, mit mi̱ tʉwajtawey mal. Tʉs̈cajamerecia̱tp ʉ̱ is̈wayjatáj.” 22Po cʉs̈ ite̱t inʉmgʉs̈au iyos̈watpayna'jat: “Mumínga jaran tu'c jamuc más oyway mit cutígatsca. Moyga-éy icʉ'cum mit ita'ncʉ'ac. 23Mit mumínga ayé becerru jeme tʉnacye'cpʉcway, mit ago'jca. Nacaygáj mit nawatcáj ma̱s̈ʉjw, 24ni'c ayʉ̱́j tʉnwáy o'guigate itsʉ̱na po jutucta̱c, mit togoyigate itsʉ̱na mit que's̈ta̱c.” Mit chu̱chiu iguitsouga ayé ma̱s̈ʉjw.

25’Mit cʉs̈ iway ajchcópacway camni'gate itsʉ̱na, mit cuandu minupate tom itʉcm, imarau ni'c itp itʉcm tu'c s̈u's̈na̱s̈, mit i-is̈ ni'c echcap. 26Cʉs̈ iya̱s̈ tu'c imozojat mit i-ucyo't ti ma̱s̈ʉjw itsougap. 27Mit je' iguinʉjmau: “Minway inmajtsʉc mit como neti iguigajatu, inte̱t inʉm ni'c tʉ-ago'jca ayé becerru i-acye'cpʉcway.” 28Mit cʉs̈ je' awa'niu mit igawanu tʉgʉy. Cʉs̈ ite̱t ipichijn, inajau ma tʉgʉy. 29Mit ipo'n ite̱t: “Ʉ̱ mayo'gap tiempu tʉmuyos̈wat mit tʉnjayaumayp nu'pʉjʉn inyʉmpay, mit nunca is̈canimoyp tu'c chibu pa tʉs̈tsowa'n tu'c ma̱s̈ʉjw mit tʉn-amigujat. 30Po cuandu imijn ayʉ̱́j inway, inago'jcau jaran ayé becerru inacye'cpʉcway, mit je' cʉs̈ iguimalgasta̱t intumi̱n mit malto's̈ajyat.” 31Po cʉs̈ ite̱t iguinʉjmau: Mi̱ siempre mitsʉ̱nap mit ʉ̱ mit nu'pʉjʉn tʉnaguepay mi̱ inje'. 32Po jinap oy natsóuga ayʉ̱́j ma̱s̈ʉjw ni'c ayʉ̱́j inmajtsʉc o'guigate itsʉ̱na mit jutucta̱c, togoyigate itsʉ̱na mit que's̈ta̱c.

Currently Selected:

San Lucas 15: PSNT

Highlight

Copy