Marcos 4

Lajiya cha'añ xwejch'uya pac'

(Mt 13.1-23; Lc 8.4-15)

1Jesús tsa' cha' caji ti cʌntesa ti ti' mar, tsi' tempayob i bʌ ca'bʌl wiñicob x'ixicob ba'añ; jiñi cha'añ tsa' ochi Jesús ti buchtʌl ti barco am bʌ ti mar. Ya'añob ti lum wiñicob x'ixicob ti' t'ejl mar.

2Jiñi cha'añ tsa' caji i cʌntesañob ti lajiya tac. Tsi' su'beyob ti' cʌntesa:

3—U'binla: Jiñi xpac' tsa' majli i wejch'un pac'. 4Che' woli i wejch'un majlel tsa' yajli ts'ita' ti ti' bij, tsa' tili te'lemut, tsi' c'uxu. 5Yam bʌ tsa' yajli ti xajlelol ba' ma'añic ca'bʌl lum, ti orajach tsa' pasi come ma'añic i lumil. 6Che' bʌ tsa' chañ-a q'uiñ, ticʌw tsi' yu'bi, tsa' tiqui come ma'añic i wi'. 7Yam bʌ tsa' yajli ti ch'ixol, che' bʌ tsa' coli jiñi ch'ix, tsi' tsʌnsa, ma'añic tsi' yʌc'ʌ i wut. 8Yam bʌ tsa' yajli ti wen bʌ lum, tsa' pasi, tsa' coli, tsi' yʌc'ʌ i wut. Ti jujump'ejl pac' tsi' yʌc'ʌ i wut ti lujump'ejl i cha'c'al, ti uxc'al, ti jo'c'al, —che'en Jesús.

9Jiñi cha'añ Jesús tsi' su'beyob:

—Jiñi am bʌ i chiquin cha'añ mi' yu'bin, la' i yu'bin,#Mt 11.15; Mc 4.23; 7.16; Lc 8.8 —che'en.

Isujmlel tac jiñi lajiya

(Mt 13.10-17; Lc 8.9-10)

10Baqui ora añ ti' bajñelil, jiñi año' bʌ ti' joytʌlel yic'ot jiñi lajchʌntiquil tsi' c'ajtibeyob isujmlel jiñi lajiya. 11Jesús tsi' su'beyob:

—Tsa'ix aq'uentiyetla la' cʌn isujmlel i yumʌntel Dios mach bʌ tsictiyemic ti yam bʌ ora. Pero jiñi mach bʌ ochemobic mic su'beñob ti lajiya tac, 12cha'añ ma'añic mi' c'otel i wut jiñi woli bʌ i q'uelob, cha'añ ma'añic mi' ch'ʌmbeñob isujm jiñi woli bʌ i yu'biñob, cha'añ ma'añic mi sutq'uiñob i bʌ, ame ñusʌbenticob i mul,#Is 6.9-10; Jn 12.40; Hch 28.26-27 che'en.

Jesús tsi' yʌq'ue isujmlel lajiya cha'añ xwejch'uya pac'

(Mt 13.18-23; Lc 8.11-15)

13Jesús tsi' su'beyob:

—¿Mach ba añic mi la' ch'ʌmben isujm ili lajiya? ¿Bajche' mi mejlel la' ch'ʌmben isujm jiñi yan tac bʌ lajiya? —Che'en. 14Jiñi xwejch'uya pac', jiñʌch mu' bʌ i su'b jiñi t'añ. 15Jiñi año' bʌ ti ti' bij jiñobʌch jiñi otsʌbil bʌ jiñi t'añ ti' pusic'al, che' mi' yu'biñob jiñi t'añ, ti ora mi' tilel Satanás i chilbeñob loq'uel jiñi t'añ tsa' bʌ ochi ti' pusic'al. 16Che' ja'el, jiñi wejch'ubil bʌ ti xajlelol jiñobʌch mu' bʌ i yu'biñob jiñi wen t'añ, tijicñayob mi' bʌc' jac'ob, 17pero ma'añic i wi' ti' pusic'al; jiñi cha'añ mach wen xuc'ulic mi' yajñelob, come che' mi' tilel wocol yic'ot i tic'lʌntel cha'añ jiñi wen t'añ, ti ora mi' tejchel tilebixel bʌ i pusic'al. 18Jiñi wejch'ubil bʌ ti ch'ixol jiñobʌch mu' bʌ i yu'biñob jiñi wen t'añ, 19pero i ye'tel ti pañimil, yic'ot i mulʌntel chu'bʌañʌl, yic'ot i mulʌntel chuqui tac yomob, mi' yochel ti' pusic'al, mi' jisan jiñi t'añ cha'añ ma'añic mi' yʌc' i wut. 20Jiñi wejch'ubil bʌ ti wen bʌ lum jiñobʌch mu' bʌ i yu'biñob jiñi wen t'añ, mi' jac'ob, mi' yʌc'ob i wut ti jujuntiquil ti lujump'ejl i cha'c'al, ti uxc'al, ti jo'c'al.

Jiñi mucul tac bʌ mi' caj ti pʌstʌl

(Lc 8.16-18)

21Che' ja'el tsi' su'beyob:

—¿Mu' ba la' ch'ʌm tilel candil cha'añ mi la' ñup' ti chiquib mi ti' ye'bal wʌyibʌl? ¿Mach ba añic mi la' joc'chocon ti' chañ bʌ i joc'lib?#Mt 5.15; Lc 11.33 22Come ma'añic chuqui mucul mach bʌ añic mi' caj ti pʌstʌl. Pejtelel jiñi mach bʌ tsictiyemic mi caj i yʌjq'uel ti tsictiyel.#4.22 Q'uele Mt 10.26; Lc 8.17; 12.2-3. Woli i taj ti t'añ i cʌntesa Jesús tsa' bʌ i su'bu ti mucul jach ti' tojlel xcʌnt'añob i cha'añ (Mc 1.34) cha'añ ti wi'il mi caj i yʌc'ob ti tsictiyel ti jamʌl. 23Jiñi am bʌ i chiquin cha'añ mi' yu'bin, la' i yu'bin,#Mt 11.15; Mc 4.9; 7.16; Lc 8.8 che'en.

24Jesús tsi' su'beyob ja'el:

—Wen ñʌch'tanla chuqui mu' bʌ la' wu'bin, come che' bajche' mi la' p'isben wiñicob che'ʌch mi caj la' p'isbentel.#Mt 7.2; Lc 6.38 Ñumen ca'bʌl mi caj la' p'isbentel jatetla mu' bʌ la' wu'bin. 25Come jiñi am bʌ i cha'añ mi caj i yʌq'uentel yam bʌ; pero jiñi mach bʌ añic i cha'añ mi caj i laj chilbentel chuqui añ i cha'añ,#Mt 13.12; 25.29; Lc 8.18; 19.26 —che'en.

Lajiya cha'añ pac'

26Jesús tsi' yʌlʌ: “Lajalʌch i yumʌntel Dios bajche' wiñic mu' bʌ i wejch'un pac' ti lum. 27Mi' wʌyel, mi' ch'ojyel, che'ʌch mi' ñumel ac'ʌlel yic'ot q'uiñil, jiñi pac' mi' bots-añ, mi' colel, jiñi wiñic ma'añic mi' ña'tan bajche' mi' colel. 28Come jiñi lum mi' yʌc' ti colel jiñi pac' ti' bajñelil, ñaxan i yopol, wi'il i te'el, ti wi'il i wut. 29Che' c'ʌñix i wut, ti ora jiñi wiñic mi' tsep ti rocol bʌ machit che' i yorajlelix mi' lojtel i wut”,#Jl 3.13; Ap 14.15 che'en Jesús.

Lajiya cha'añ pac' mostaza

(Mt 13.31-32; Lc 13.18-19)

30Jesús tsi' yʌlʌ:

“¿Chuqui yic'ot mi mejlel lac lajin i yumʌntel Dios? ¿Chuqui ti lajiya yom mi laj c'ʌn? 31Lajalʌch bajche' i bʌc' mostaza.#4.31 Mostaza: Chañ tac bʌ pimel, anquese che' jach ya' wistʌl i bʌc' ba' mi pasel, Mt 13.31. Ma'añic yam bʌ pac' ti pañimil ñumen biq'uit bʌ bajche' jiñi mu' bʌ i wejch'untel ti lum. 32Che' wejch'ubilix, mi' colel jinto mi' ñusan i chañlel pejtelel yan tac bʌ pimel, mi' yʌc' colem tac bʌ i c'ʌb, jiñi te'lemut mi' t'uchtʌl ti' yʌxñʌlel”,#Ez 17.23; 31.6; Dn 4.12,20-21 che'en.

Jesús tsi' cha'le cʌntesa ti lajiya

(Mt 13.34-35)

33Tsi' su'beyob i t'añ Dios ti ca'bʌl lajiya tac che' bajche' jiñi. I p'isol jach tsi' su'beyob bajche' tsa' mejli i yu'biñob. 34Ti lajiya jach tsi' pejcayob. Che' añob ti' bajñelil yic'ot xcʌnt'añob i cha'añ tsi' laj su'beyob isujmlel.#Mc 1.34

Jesús tsi' tiq'ui p'ʌtʌl bʌ ic'

(Mt 8.23-27; Lc 8.22-25)

35Ti jiñi jach bʌ q'uiñ ti ic'ajel Jesús tsi' su'beyob:

—La' c'axiconla ti junwejl mar, —che'en.

36Che' bʌ tsa'ix i laj su'beyob sujtel wiñicob x'ixicob. Tsi' pʌyʌyob majlel Jesús che' ya' to añ ti barco. Ya'añ ja'el yam bʌ barco tac yic'ot. 37Tsa' tejchi wen p'ʌtʌl bʌ ic', tsa' caji i wec'ulan ochel ja' ti barco jinto wolix ti bujt'el. 38Wʌyʌlix Jesús ti c'ʌnjol ti wi'ipat ti' mal barco. Tsa' tili i ñijcañob. Tsi' su'beyob:

—Maestro, ¿mach ba wolic a p'is ti a wenta mi caj lac jilel?

39Tsa' ch'ojyi Jesús. Tsi' tiq'ui jiñi ic', tsi' su'be jiñi mar:

—Ñʌjch'en, lajmen.

Tsa' lajmi jiñi ic'. Ñʌch'ʌcña tsa' majli pañimil.

40Jesús tsi' su'beyob:

—¿Chucoch woliyetla ti bʌq'uen? ¿Chucoch ma'añic mi la' ñop? —Che'en.

41Wen ca'bʌl woliyob ti bʌq'uen, tsi' c'ajtibeyob i bʌ:

—¿Majqui jiñi? Come jiñi ic' yic'ot jiñi mar mi' jac'ben i t'añ.#Sal 107.28-29

I C'ABA' TAC SATANÁS

Xsu'b mulil
Laj contra
Oñiyix bʌ lucum
I yángel ch'eñ mach bʌ añix mi tajben i ye'bal
Beelzebú i yum xi'bajob
Xi'ba (Belial)
Colem ajin
Xi'ba
Xjontolil
I dios jiñi jontolo' bʌ ti pañimil
I tat xlotiya
I yum xi'bajob
I yum pañimil mu' bʌ i yumañob xi'bajob
I yum pañimil
Satanás
Xpʌy mulil