Marcos 11
11
Che' bʌ tsa' ochi ti Jerusalén
(Mt 21.1-11; Lc 19.28-40; Jn 12.12-19)
1Che' bʌ lʌc'ʌlix añob ti Jerusalén, lʌc'ʌl ti Betfagé#11.1 Betfagé: Jump'ejl alʌ xchumtʌl lʌc'ʌl bʌ ti Jerusalén, ti' bijlel Betania, am bʌ i ñajtlel che' bajche' uxp'ejl km. ya' ti' tojel i pasibal q'uiñ ya' ti Jerusalén. Olivo wits: Jump'ejl bujtʌl am bʌ i ñajtlel che' bajche' jump'ejl km. ya' ti Jerusalén. yic'ot ti Betania ya' ti' tojel Olivo wits; Jesús tsi' choco majlel cha'tiquil xcʌnt'añob i cha'añ. 2Tsi' su'beyob:
—Cucula ti tejclum ya' ti' tojel la' wut, che' mi la' wochel, ya' cʌchʌl mi caj la' taj tsiji' burro, maxto bʌ añic majqui tsi' c'ʌchta, jitila, pʌyʌla tilel. 3Mi añ majqui mi' c'ajtibeñetla: ¿Chucoch woli la' mel bajche' jiñi? Su'benla: “Yom i c'ʌn lac Yum, ti wi'il mi caj i cha' sutq'uibeñet”, che'en Jesús.
4Tsa' majliyob jiñi xcʌnt'añob. Tsi' tajayob jiñi burro cʌchʌl ti ti' otot ya' ti calle, tsi' jitiyob. 5Jiñi ya' bʌ wa'alob tsi' su'beyob:
—¿Chucoch woli la' jit jiñi burro?
6Jiñi xcʌnt'añob tsi' su'beyob chuqui tsi' yʌlʌ Jesús. Jiñi wiñicob tsi' chocoyob majlel. 7Jiñi xcʌnt'añob tsi' pʌyʌyob tilel jiñi tsijib burro ba'añ Jesús. Tsi' tasibeyob i pat ti' pislelob, Jesús tsa' c'ʌchle. 8Añ ca'bʌl tsa' bʌ i tasiyob majlel jiñi bij ti' pislelob. Yaño' bʌ tsa' caji i tsepob i c'ʌb te' am bʌ i yopol tsa' caji i lijlij ac'ob majlel ti bij.#11.8 I yejtal cha'añ wen tijicña woli i ch'ʌmob ti' wenta Jesús (2 R 9.13). 9Jiñi woli bʌ i majlelob ti ñaxan yic'ot jiñi woli bʌ i tilelob ti wi'il pat c'am tsi' yʌlʌyob:
—Coltañon lojon.#11.9 Coltañon lojon: Q'uele isujmlel ti Mt 21.9. La' sujbic a ñuclel jatet mu' bʌ a tilel ti' c'aba' lac Yum. 10La' sujbic i ñuclel i yumʌntel lac tat David woli bʌ i tilel. Coltañon lojon añet bʌ ti chañ.
11Tsa' ochi Jesús ti Jerusalén, tsa' majli ti Templo. Che' bʌ tsa'ix i joy q'uele pejtelel chuqui tac añ, che' bʌ wolix i yic'an, tsa' majli ti Betania yic'ot jiñi lajchʌntiquil.
Jesús tsi' tiq'ui higuera te'
(Mt 21.18-19)
12Ti yijc'ʌlal che' loq'uemobix ti Betania, tsi' yu'bi wi'ñal. 13Ñajt tsi' q'uele higuera te' am bʌ i yopol; tsa' majli i q'uel mi añ chuqui mi' taj; pero che' bʌ tsa' c'oti ya' ba'añ te', i yopol jach tsi' taja come maxto i yorajlelic i wut.#11.13 Isujmlel ili t'añ maxto i yorajlelic i wut, jiñʌch yejtal ba' woli i yʌc' ti tsictiyel i ye'tel Jesús. 14Jiñi cha'añ Jesús tsi' su'be jiñi te':
—Mach i chʌn c'ux a wut wiñicob x'ixicob ti pejtelel ora. Jiñi xcʌnt'añob i cha'añ tsi' yu'biyob.
Jesús tsi' sʌc-esa Templo
(Mt 21.12-17; Lc 19.45-48; Jn 2.13-22)
15Che' bʌ tsa' c'otiyob ti Jerusalén, Jesús tsa' ochi ti Templo, tsa' caji i choc loq'uel jiñi woliyo' bʌ ti choñoñel yic'ot woliyo' bʌ ti mʌñoñel ti Templo. Jesús tsi' ch'a' chocbeyob i mesa tac xq'uex taq'uiñob, yic'ot i buchlib tac jiñi woli bʌ i choñob x'ujcuts.#11.15-17 Jiñi xchoñoñelob mach tojic che' bajche' tsi' cha'leñob choñoñel; q'uele nota am bʌ ti Mt 21.12. 16Tsi' tiq'uiyob cha'añ ma'añic chuqui mi' ch'ʌmob ñumel ti' mal Templo mi juntiquilic. 17Jesús tsi' cʌntesayob, tsi' su'beyob:
—¿Mach ba ts'ijbubil ti juñ: “Mi' caj ti ajlel cotot ti' yotlel oración cha'añ pejtelel wiñicob x'ixicob ti pañimil?”#Is 56.7 Pero jatetla tsa'ix la' wotsa ti' ch'eñal xujch',#Jer 7.11 —che'en.
18Che' bʌ tsi' yu'biyob jiñi xts'ijbayajob yic'ot jiñi ñuc bʌ motomajob, tsi' sajcayob bajche' mi mejlel i tsʌnsañob come tsi' bʌc'ñayob Jesús. Come tsa' toj ñuc-ayob i pusic'al pejtelel wiñicob x'ixicob cha'añ i cʌntesʌbal. 19Che' wolix i yic'an tsa' loq'ui majlel ti tejclum Jesús yic'ot jiñi xcʌnt'añob.
Tsa' tiqui higuera te'
(Mt 21.19-22)
20Che' ti sʌc'ajel, che' bʌ woli ñumelob ti' t'ejl jiñi higuera te', tsi' q'ueleyob tiquiñix c'ʌlʌl ti' wi'. 21Jiñi cha'añ Pedro tsa' c'ajtiyi i cha'añ, tsi' su'be:
—Maestro, q'uele tsa'ix tiqui jiñi higuera te' tsa' bʌ a ch'ʌcʌ, —che'en.
22Jesús tsi' jac'ʌ:
—Ñopola Dios. 23Come isujm mic su'beñetla: Majqui jach mi' su'ben jiñi wits cha'añ mi' ch'ujyel letsel cha'añ mi' chojquel ochel ti mar, mi mach tilebixelic i pusic'al, mi wolix i ñop mi caj i yujtel bajche' mi' yʌl, jiñi mu' bʌ i yʌl mi caj i melbentel.#Mt 17.20; 1 Cor 13.2 24Jiñi cha'añ mic su'beñetla: Pejtelel chuqui mi la' c'ajtiben Dios ti oración, ñopola mi caj la' wʌq'uentel, che' jiñi mi caj la' taj.#Jn 14.13-14; 15.7 25Yic'ot che' woliyetla ti oración, mi añ chuqui lotol ti la' pusic'al ti' contra juntiquil, ñusʌbenla i mul cha'añ mi' ñusʌbeñetla la' mul la' Tat am bʌ ti panchan, 26[come mi ma'añic mi la' ñusʌben i mul la' pi'ʌlob, ma'añic mi caj i ñusʌbeñetla la' mul ja'el la' Tat am bʌ ti panchan,]#11.26 Ili v. 26 ma'añic mi lac taj ti yan tac bʌ Biblia. —che'en Jesús.
I p'ʌtʌlel i ye'tel Jesús
(Mt 21.23-27; Lc 20.1-8)
27Tsa' cha' tiliyob ti Jerusalén, che' bʌ tsi' cha'le xʌmbal Jesús ti mal Templo, tsa' tiliyob ñuc bʌ motomajob yic'ot xts'ijbayajob yic'ot xñoxob año' bʌ i ye'tel. 28Tsi' c'ajtibeyob:
—¿Baqui tsa' taja a we'tel cha'añ ma' mel iliyi? ¿Majqui tsi' yʌq'ueyet a we'tel cha'añ ma' mel chuqui tac ma' mel?
29Jesús tsi' su'beyob:
—Joñon ja'el mij c'ajtibeñetla, jac'beñonla, che' jiñi joñon mi caj c su'beñetla baqui tsa' c taja que'tel cha'añ jiñi mu' bʌ c mel. 30¿Baqui ch'oyol i ye'tel Juan cha'añ mi' yʌc' ch'ʌmja'? ¿Ch'oyol ba ti panchan o ch'oyol ti wiñicob?#Mc 1.4-8; Jn 1.6,19-28 Su'beñonla, —che'en Jesús.
31Tsa' caji i bajñel pejcañob i bʌ, tsi' yʌlʌyob:
—Mi tsa' lac su'be ch'oyol ti panchan, mi cho'onla, mi caj i yʌl: ¿Chucoch, che' jiñi, ma'añic tsa' la' ñopbe i t'añ? 32¿Mi tsa' la cʌlʌ ch'oyol ti wiñicob?
Pero tsi' bʌc'ñayob wiñicob x'ixicob come ti pejtelelob tsi' yʌlʌyob mero x'alt'añʌch jiñi Juan. 33Jiñi cha'añ tsi' jac'beyob:
—Mach cujilic lojon, —che'en.
Che' jiñi Jesús tsi' su'beyob:
—Joñon ja'el, ma'añic mic su'beñetla baqui tsa' c taja que'tel cha'añ jiñi mu' bʌ c mel.
Currently Selected:
Marcos 11: NTCH
Highlight
Share
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
