Mateo 7

Mach a q'uelben i mul a pi'ʌl

(Lc 6.37-38,41-42)

1Mach mi la' wʌlben i mul la' pi'ʌlob, cha'añ ma'añic mi yʌlob la' mul ja'el, 2come che' mi la' wʌlben i mul la' pi'ʌlob, mi caj i yʌlob la' mul ja'el. Che' bajche' mi la' p'isben wiñicob, che'ʌch mi caj la' p'isbentel ja'el. 3¿Chucoch ma' q'uel sajl te' am bʌ ti' wut a wermañu, che' ma'añic ma' q'uel cucujl am bʌ ti a wut? 4¿Bajche' mi mejlel a su'ben a wermañu: “La' c loc'san jiñi sajl te' am bʌ ti a wut”, che' añ cucujl ti a wut ja'el? 5Cha'chajp jax bʌ a pusic'al, ñaxan loc'san jiñi cucujl am bʌ ti a wut, ti wi'il mi mejlel a wen q'uel cha'añ ma' loc'san jiñi sajl te' am bʌ ti' wut a wermañu.

6Mach mi la' wʌq'uen ts'i' chuqui tac ch'ujul, mach mi la' wejtuben chitam#7.6 Jiñi judíojob mach sʌquic tsi' q'ueleyob jiñi ts'i' yic'ot chitam, jiñi cha'añ tsi' q'ueleyob ti bi'bi'. jiñi la' perla#7.6 Jiñʌch ujʌl wen i t'ojol bʌ yic'ot letsem bʌ i tojol. Che' ja'el jiñʌch jiñi wen t'añ, yom mi' q'uejlel ti ñuc, mach yomic mi' wajlentel. ame mi' laj t'uchtan, che' jiñi mi' sujtel i lowetla.

C'ajtinla, sajcanla, pejcanla

(Lc 11.9-13; 6.31)

7C'ajtinla, mi caj la' wʌq'uentel. Sajcanla, mi caj la' taj. Pejcanla, mi caj la' jambentel. 8Come majqui jach mi' c'ajtin mi caj i yʌq'uentel; jiñi mu' bʌ i sajcan mi' taj; jiñi mu' bʌ i pejcan mi caj i jambentel. 9¿Am ba juntiquil wiñic ti la' tojlel mu' bʌ caj i yʌq'ueñ xajlel i yalobil mi tsi' c'ajtibe waj? 10Mi tsi' c'ajtibe chʌy, ¿mu' ba i yʌq'ueñ lucum? 11Anquese jatetla jontoletla, la' wujil i yʌq'uentel la' walobilob chuqui uts'at. ¿Mach ba ñumen yujilic ac'ol chuqui uts'at la' Tat am bʌ ti panchan che' mi la' c'ajtiben?#Jn 14.13-14; 15.7,16; 16.23-24; 1 Jn 3.21-22; 5.14-15 12Jiñi cha'añ, melela chuqui uts'at ti' tojlel la' pi'ʌlob mi la' wom mi' melob chuqui uts'at ti la' tojlel. Come jiñʌch jiñi mandar yic'ot i su'bal x'alt'añob.

Ch'och'oc bʌ i ti' otot

(Lc 13.24)

13Ochenla ti ch'och'oc bʌ i ti', come colem i ti', ñuc i bijlel mu' bʌ i pʌyonla majlel ti wocol. Ca'bʌl mi' yochelob ya'i. 14Come ch'och'oc i ti', ch'och'oc i bijlel ba' mi la' taj la' cuxtʌlel. Ts'ita' jax jiñi mu' bʌ i yochelob i taj i cuxtʌlel.#Sal 1.6; Pr 4.18-19; Jer 21.8; Jn 10.1-2,7; 14.6

Mi' laj cʌn ti' melbal

(Lc 6.43-44)

15Yom tsajiletla cha'añ jiñi lot bʌ x'alt'añob mu' bʌ i tilelob ba'añetla lʌpbil bʌ i cha'añob i tsutsel tʌñʌme' yilal, pero i pusic'al lajalob bajche' jontol bʌ bʌte'el ts'i'. 16Ti' melbalob jach mi laj cʌn lot bʌ x'alt'añob ¿mu' ba i tujq'uel ts'usub ti ch'ixol, o wut te' i c'aba' higo ti ts'ʌ'b ac'ol? 17Ixcu ja'el, pejtelel wen bʌ te' mi' yʌc' uts'at bʌ i wut, pero jiñi mach bʌ weñic bʌ te' mi' yʌc' leco bʌ i wut. 18Mach mejlic i yʌc' leco bʌ i wut jiñi wen bʌ te'. Mi jiñic ja'el, mi' yʌc' uts'at bʌ i wut jiñi te' mach bʌ weñic. 19Pejtelel te' mach bʌ añic mi' yʌc' uts'at bʌ i wut mi' sejq'uel. Mi' chojquel ti c'ajc.#Mt 3.10; Lc 3.9; Jn 15.6 20Jiñi cha'añ, ti' melbal jach mi la' cʌñob.

Mach cʌñʌyeticla

(Lc 13.25-27)

21Mach ti pejtelelobic jiñi mu' bʌ i pejcañoñob: C Yum c Yum, mi caj i yochelob ti' yumʌntel jiñi am bʌ ti panchan. Jiñi jach mu' bʌ i melob bajche' yom c Tat am bʌ ti panchan. 22Ti jiñi q'uiñ ca'bʌl mi caj i su'beñoñob: “C Yum, c Yum, ¿mach ba tsa'ic cha'le lojon subt'añ yic'ot tsa' c choco lojon loq'uel xi'bajob ti a c'aba', ti a c'aba' tsa' c pʌsʌ lojon ca'bʌl ñuc tac bʌ i yejtal a p'ʌtʌlel?” 23Che' jiñi mi caj c su'beñob: “Mach j cʌñʌyeticla.#7.23 Mach j cʌñʌyeticla: Isujmlel ili t'añ, jiñʌch: Mach c cha'añeticla, Q'uele 1 Cor 8.3; 2 Tm 2.19. Tʌts'ʌ la' bʌ tic tojlel mu' bʌ la' cha'len jontolil”.

Cha'p'ejl i c'ʌclib otot

(Lc 6.46-49)

24Majqui jach mi yu'bibeñon c t'añ, yic'ot mu' bʌ i jac'beñon, lajalʌch bajche' wiñic p'ip' bʌ i ña'tʌbal, tsa' bʌ i mele i yotot ti' pam xajlel. 25Tsa' yajli ja'al, tsa' tili but'ja', tsa' ñumi ca'bʌl ic', tsi' jats'ʌ jiñi otot; pero ma'añic tsa' bujchi come wen wa'chocobil ti' pam xajlel. 26Pero majqui jach mi i yu'bibeñon c t'añ pero ma'añic mi' jac'beñon, lajalʌch bajche' wiñic mach bʌ añic i ña'tʌbal tsi' mele i yotot ti' pam ji'. 27Tsa' yajli ja'al, tsa' tili but'ja', tsa' ñumi ca'bʌl ic', tsi' jats'ʌ jiñi otot, tsa' bujchi, tsa' laj jejmi.

28Che' bʌ tsa' ujti i su'b Jesús ili t'añ, tsa' toj sajtiyob i pusic'al wiñicob x'ixicob cha'añ i cʌntesʌbal, 29come tsi' cʌntesayob yic'ot i p'ʌtʌlel i ye'tel,#7.29 Q'uele Lc 4.32. I p'ʌtʌlel i ye'tel Jesús ch'oyol ti Dios (Mt 28.18; Mc 1.22). mach lajalic bajche' xts'ijbayajob.

Currently Selected:

Mateo 7: NTCH

Highlight

Copy