Lucas 6

Xcʌnt'añob tsi' tuc'uyob i wut jam ti' q'uiñilel c'aj-o

(Mt 12.1-8; Mc 2.23-28)

1Ti' q'uiñilel c'aj-o Jesús tsa' ñumi ti jamil, jiñi xcʌnt'añob i cha'añ Jesús tsi' tuc'uyob majlel jiñi c'uxbil bʌ i wut jam, tsi' bilt'uyob ti' c'ʌb, tsi' c'uxuyob.#Dt 23.24-25 2Cha'tiquil uxtiquil fariseojob tsi' c'ajtibeyob:

—¿Chucoch mi la' mel chuqui tic'bil che' ti' q'uiñilel c'aj-o?#6.2 Jiñi xcʌntesa mandarob tsi' ch'ʌmbeyob isujm i mandar Moisés cha'añ jiñi xcʌnt'añob woli i ñusañob jiñi mandar am bʌ ti Ex 20.8-11. Q'uele Mt 12.1-2.

3Jesús tsi' su'beyob:

—¿Mach ba añic tsa' la' q'uele ti juñ chuqui tsi' mele David che' bʌ tsi' yu'bi wi'ñal yic'ot i pi'ʌlob?#1 Sm 21.1-6 4Tsa' ochi ti' yotot Dios, tsi' ch'ʌmʌ jiñi waj tsa' bʌ ajq'ui ti mesa, tsi' c'uxu, tsi' yʌq'ue i pi'ʌlob ja'el, tic'bil ti mandar cha'añ ma'añic mi' c'uxob, cojach motomajob mi mejlel i c'ux jiñi waj,#6.4 Jiñi waj mu' bʌ yʌjq'uel ti yajñib ya' ti mal jiñi tabernáculo, añ che' bajche' lajchʌnq'uejl waj mu' bʌ i yʌjq'uel ya' ti' pam jiñi mesa pixbil bʌ ti oro che' ti' q'uiñilel c'aj-o tac, cojach ili motomajob mi' mejlel i c'uxob jiñi waj mu' bʌ yʌjq'uel ti mesa, Lv 24.5-9. —che'en Jesús.

5Jesús tsi' su'beyob:

—I Yalobil Wiñic i Yumʌch jiñi q'uiñ che' mi laj c'aj la co, —che'en.

Wiñic tiquin bʌ i c'ʌb

(Mt 12.9-14; Mc 3.1-6)

6Ti yam bʌ i q'uiñilel c'aj-o tsa' ochi Jesús ti sinagoga, tsa' caji ti cʌntesa, ya'añ juntiquil wiñic tiquin bʌ ñoj bʌ i c'ʌb. 7Jiñi xts'ijbayajob yic'ot fariseojob tsa' caji i wen q'uelob Jesús cha'añ mi' jop'beñob i mul mi tsi' c'oq'uesa jiñi wiñic che' ti' yorajlel c'aj-o.#6.7 Jiñi fariseojob mi ña'tañob cha'añ tic'bil mi' yujtel c'oq'uesaya che' ti Q'uiñilel c'aj-o. 8Pero yujil Jesús chuqui woli' yʌlob ti' pusic'al, tsi' su'be jiñi wiñic tiquin bʌ i c'ʌb:

—Ch'ojyen. Wa'i' ti ojlil.

Tsa' ch'ojyi jiñi wiñic, tsa' wa'le.

9Jiñi cha'añ Jesús tsi' su'beyob:

—Añ chuqui com j c'ajtibeñetla: ¿Baqui bʌ tic'bil ti melol ti jiñi q'uiñ che' mi laj c'aj la co? ¿Tic'bil ba chuqui uts'at o jim ba chuqui jontol? ¿Tic'bil ba coltaya o tic'bil ba tsʌnsa? —Che'en.

10Jesús tsi' joy q'ueleyob ti pejtelel. Tsi' su'be jiñi wiñic:

—Sʌts'ʌ a c'ʌb.

Che'ʌch tsi' mele, jiñi i c'ʌb tsa' cha' weñ-a. 11Pero jiñi xts'ijbayajob yic'ot fariseojob tsa' mich'ayob, tsa' caji i pejcañob i bʌ cha'añ mi' ña'tañob chuqui mi caj i tumbeñob Jesús.

Tsa' yajcʌnti lajchʌntiquil apóstolob

(Mt 10.1-4; Mc 3.13-19)

12Ti ili q'uiñ tac tsa' letsi majlel Jesús ti wits cha'añ mi' mel oración. Ti' jump'ejlel ac'ʌlel tsi' pejca Dios. 13Che' bʌ tsa' sʌc'a, Jesús tsi' pʌyʌ tilel xcʌnt'añob i cha'añ, tsi' yajca lajchʌntiquil, tsi' yotsʌbeyob i c'aba' ti apóstolob.#Mt 10.1-2 14Tsi' yajca Simón jiñi am bʌ i cha'chajplel i c'aba' Pedro, yic'ot Andrés i yijts'in Pedro, Jacobo yic'ot Juan, Felipe yic'ot Bartolomé, 15Mateo yic'ot Tomás, Jacobo i yalobil Alfeo, yic'ot Simón jiñi Zelote,#6.15 Zelote: Jiñʌch jump'ejl t'añ tilem bʌ ti griego: “Cananita” (q'uele nota am bʌ ti Mc 3.18); añ isujmlel ili t'añ: “Mu' bʌ i wen cʌntan”. Che' ja'el añ junmojt judíojob tsa' bʌ su'bentiyob ti Zelote, tsa' bʌ i contrajiyob Roma. 16Judas i yijts'in Jacobo, yic'ot Judas Iscariote tsa' bʌ i yʌc'ʌ Jesús ti' c'ʌb i contra.

Jesús tsi' cʌntesa ca'bʌl wiñicob x'ixicob

(Mt 4.23-25)

17Jesús tsa' ju'bi majlel yic'ot jiñi xcʌnt'añob. Tsa' wa'le ya' ti joctʌl temel yic'ot xcʌnt'añob i cha'añ yic'ot bajc'ʌl wiñicob x'ixicob ch'oyolo' bʌ ti pejtelel Judea, ti Jerusalén, yic'ot ti ti' mar am bʌ ti Tiro yic'ot ti Sidón#Lc 2.31-32; 3.6; 4.25-27; 24.47; Hch 1.8 tsa' tiliyob cha'añ mi' yu'bibeñob i t'añ Jesús yic'ot cha'añ mi' lajmesʌbentelob i chʌmel. 18Che' ja'el jiñi tic'lʌbilo' bʌ cha'añ xi'bajob tsa' c'oq'uesʌntiyob. 19Ti pejtelel wiñicob x'ixicob yomob i tʌl Jesús come tsa' tsictiyi i p'ʌtʌlel cha'añ mi' c'oq'uesañob ti pejtelel.

Jiñi tijicñʌyel yic'ot wocol

(Mt 5.1-12)

20Jesús tsa' caji i q'uel xcʌnt'añob i cha'añ,#6.20 Xcʌnt'añob i cha'añ: Mach jiñic jach woli i taj ti t'añ Jesús jiñi lajchʌntiquilob, pero woli i taj ti t'añ ti' pejtelel jiñi woli bʌ i tsajcañob. tsi' yʌlʌ:

Tijicñayetla mach bʌ añic la' chu'bʌañ,

come la' cha'añʌch i yumʌntel Dios.

21Tijicñayetla am bʌ la' wi'ñal wʌle,

come mi caj la' ñaj-añ.#6.21 Ti ili versículo, Jesús woli i ña'tʌben i wenlel jiñi p'ump'uño' bʌ yic'ot jiñi año' bʌ i wi'ñal ti' bʌc'tal (v. 20-21). Mach lajalic isujmlel yic'ot jiñi am bʌ ti Mt 5.3-10. Q'uele ja'el Lc 4.17; Jer 31.25.

Tijicñayetla mu' bʌ la' cha'len uq'uel wʌle,#Sal 126.5-6; Is 57.18; 61.2-3; Ap 7.16-17

come mi caj la' cha'len tse'ñal.

22Tijicñayetla che' mi' ts'a'leñetla wiñicob,

che' mi' choquetla, che' mi p'ajetla yic'ot che' mi ts'a'leñob la' c'aba'

cha'añ ti' caj tsa' la' ñopo i Yalobil Wiñic.#1 P 4.14

23Ti jim bʌ ora la' ñuc-ac la' pusic'al. Yom tijicñayetla come ñuc la' chobejtʌbal ya' ti panchan, come la' ñojte'elob lajal tsi' tic'layob x'alt'añob.#2 Cr 36.16; Hch 7.52; Heb 11.32-38

24Mi caj la' taj wocol wen chumulet bʌ la, come tsa'ix la' taja la' tijicñʌyel.#Lc 1.51-53; 4.18-19; 11.41; 12.13-21; 14.21; 16.19-31; 18.18-27; 19.8; Stg 5.1-5

25Mi caj la' taj wocol ñajetix bʌ la, come mi caj la' wu'bin wi'ñal.

Mi caj la' taj wocol mu' bʌ la' cha'len tse'ñal wʌle, come mi caj la' tsic la' pusic'al yic'ot mi caj la' cha'len uq'uel.

26Mi caj la' taj wocol che' uts'at mi' tajetla ti t'añ pejtelel wiñicob x'ixicob, come che'ʌch i tatob tsi' tajayob ti t'añ jiñi lot bʌ x'alt'añob.

I c'uxbintel laj contrajob

(Mt 5.38-48; 7.12)

27Pero mic su'beñetla mu' bʌ la' wu'bin c t'añ: C'uxbin la' contrajob, melbenla chuqui uts'at jiñi mu' bʌ i ts'a'leñetla. 28Aq'uenla i yutslel la' t'añ jiñi mu' bʌ i p'ajetla. Tajala ti oración jiñi mu' bʌ i jop' la' mul.#Rm 12.14 29Jiñi mu' bʌ i jats'et ti junwejl a choj, pʌsben yam bʌ a choj; jiñi mu' bʌ i chilbeñet a tsuts bujc aq'uen a bujc ja'el. 30Majqui jach mi' c'ajtibeñet, aq'uen chuqui yom. Jiñi mu' bʌ i ch'ʌm chuqui añ a cha'añ mach a chʌn c'ajtiben cha'añ mi' sutq'uibeñet.#Pr 25.21; Rm 12.17,20; 13.8-10 31Che' bajche' la' wom mi' melbeñetla chuqui uts'at wiñicob x'ixicob, che'ʌch yom mi la' melbeñob ja'el.#Mt 7.12

32Mi jiñi jach mi la' c'uxbin jiñi c'ux bʌ mi' yu'biñetla, ¿uts'at ba mi la' q'uejlel che' jiñi? Come xmulilob ja'el mi' c'uxbiñob majqui c'ux mi' yu'biñob. 33Mi jiñi jach mi la' coltañ jiñi mu' bʌ i coltañetla, ¿uts'at ba mi la' q'uejlel, che' jiñi? Come che'ʌch mi' melob xmulilob ja'el. 34Mi jiñi jach mi la' wʌq'ueñob ti majan jiñi mu' bʌ caj i cha' sutq'uibeñetla i q'uexol, ¿uts'at ba mi la' q'uejlel che' jiñi? Jiñi xmulilob mi yʌq'ueñob ti majan yam bʌ xmulilob cha'añ mi' sutq'uibentelob yic'ot i ñumel. 35Pero c'uxbinla la' contrajob, melela chuqui wen yic'ot aq'uenla ti majan; mach mi la' cha'len ña'tʌbal cha'añ mi la' cha' sutq'uibentel, che' jiñi mi caj la' ch'ʌm la' chobejtʌbal yic'ot tsiquil i yalobiletla jiñi C'ax Ñuc Bʌ, come mi' c'uxbin jiñi mach bʌ añobic i yutslel i pusic'al yic'ot jiñi jontolo' bʌ. 36P'untan la' pi'ʌlob che' bajche' mi' p'untañetla la' Tat ja'el.

Che' mi laj q'uelben i mul yaño' bʌ

(Mt 7.1-5)

37Mach mi la' wʌl ti la' pusic'al añ i mul la' pi'ʌlob, che' jiñi, ma'añic mi caj i yʌlob ti' pusic'al añ la' mul ja'el. Mach mi la' su'b ti xmulil la' pi'ʌlob, che' jiñi, ma'añic mi caj la' sujbel ti xmulil. Ñusʌbenla i mul la' pi'ʌlob, che' jiñi, mi caj i ñusʌntel la' mul. 38Aq'uenla, che' jiñi, mi caj la' wʌq'uentel wen bʌ i p'isol, tsʌts tejñʌbil, chejpʌbil, che' wolix ti wejtuyel, come che' bajche' mi la' p'isben wiñicob che'ʌch mi caj la' p'isbentel ja'el.

39Jesús tsi' su'beyob jump'ejl lajiya: ¿mu' ba i mejlel i toj-esan majlel jiñi xpots' yam bʌ xpots'? ¿Mach ba muq'uic i yajlelob ti ch'eñ ti cha'ticlel? 40Mach ñuquic xcʌnt'añ che' bajche' i maestro; pero che' tsa'ix i laj ñopo, lajalix mi yajñel che' bajche' i maestro.#Mt 10.24-25; Jn 13.16; 15.20

41¿Chucoch ma' q'uel che' bʌ ya' wistʌl sajl te' am bʌ ti' wut a wermañu che' ma'añic ma' q'uel cucujl am bʌ ti a wut?#6.41 Jiñʌch jump'ejl lajiya (Mt 7.3). 42¿Bajche' mi mejlel a su'ben a wermañu: “Quermañu, la' to c loc'san sajl te' ti a wut”, che' ma'añic ma' q'uel jiñi cucujl am bʌ ti a wut? Jatet, cha'chajp jax bʌ a pusic'al, ñaxan loc'san jiñi cucujl am bʌ ti a wut, che' jiñi ti wi'il mi mejlel a wen q'uel cha'añ ma' loc'san jiñi sajl te' am bʌ ti' wut a wermañu.

Ti wut mi' cʌjñel te'

(Mt 7.15-20; 12.34-35)

43Mach weñic jiñi te' mu' bʌ i yʌc' leco bʌ i wut, mi lecojic jiñi te' mu' bʌ i yʌc' uts'at bʌ i wut. 44Come ti jujuntejc te' mi' cʌjñel ti' wut. Ma'añic mi lac tuc' higo ti ts'ʌ'b ac'ol, che' ja'el, ma'añic mi lac tuc' ts'usub ti ch'ixol.#Mt 12.33; 7.20 45Jiñi wen bʌ wiñic mi' loc'san uts'at tac bʌ ti pusic'al, jiñi jontol bʌ wiñic mi' loc'san jontol tac bʌ ti pusic'al. Come chuqui jach but'ul ti la' pusic'al mi' tsictiyel che' mi la' cha'len t'añ.

Cha'p'ejl i c'ʌclib otot

(Mt 7.24-27)

46¿Chucoch mi la' pejcañon ti la' Yum che' ma'añic mi la' mel chuqui mic su'beñetla? 47Mi caj j cʌntesañetla bajche' yilal jujuntiquil mu' bʌ i tilel ba'añon, mu' bʌ i yu'bibeñon c t'añ yic'ot mu' bʌ i jac'beñon c t'añ. 48Lajalʌch bajche' wiñic tsa' bʌ i mele jump'ejl otot, tam tsi' top'o lum, tsi' wa'choco i c'ʌclib otot ti' pam xajlel, che' bʌ tsa' tili but'ja', tsʌts tsi' jats'ʌ jiñi otot pero ma'añic tsa' mejli i ñijcan, come wen wa'chocobil jiñi otot ti' pam xajlel. 49Pero jiñi mu' bʌ i yu'bibeñon c t'añ che' ma'añic mi' jac'beñon lajalʌch bajche' wiñic tsa' bʌ i wa'choco i yotot ti' pam lum. Ma'añic tsi' mele i c'ʌclib. Tsʌts tsa' tili but'ja' i jats' jiñi otot, ti ora tsa' bujchi, tsa' laj jejmi jiñi otot.

Currently Selected:

Lucas 6: NTCH

Highlight

Copy