Genesis 12
12
Hay nangayan da Abram ad Kanaan
(Apostoles 7:2-3; Hebrews 11:8)
1Handih uggeda ni-an tinaynan di Babilon ya kanan APU DIOS ke Abram di “Tayanam nan boblem ya nadan iibam ta ume kan nah boblen itudduk ke he-a. 2Idattan dakah dakol hi holag mu ta mundingngol kayu. Bendisyonan daka ta mundingngol di ngadan mu ya mabendisyonan di udum an tatagu gapun he-a. 3Ya bendisyonak nan tagun mumbendisyon ke he-a, mu dug-ahak nadan mundug-an he-a. Ya gapun he-a ya bendisyonak am-in di tatagu tuh luta.”#12:3 Tibon yuy Genesis 18:18 ya 22:18 ya 26:4 ya 28:14. Tibon yuy Acts 3:25 ya Galatia 3:8.
4,5Handih napitut limay toon Abram ya tinayananad Haran an inun-unud nay kinalin APU DIOS ke hiyan atona. Ingkuyug na nan inayana, nan imbabaleyonan hi Lot ya impakiala da nadan limmu dad Haran, nadan muttatyu da ya am-in di kinadangyan da ot ume dad Kanaan.
Kediyen dimmatong dad Kanaan 6ya nangenange da ot ingganay datngan da nan pundayawan di tataguh di nah kad-an nan kaiw ad Moreh ad Sekem. Hay numpumbobleh di kediyen tiempo ya nadan nahlag ke Kanaan. 7Numpatiboh APU DIOS ke Abram ot kananay “Hiyah tuwe nan boblen idat kuh holag mu.” Ot mangapyah Abram hi pun-appitan.#12:7 Acts 7:5, Galatia 3:16
8Indani ya nit-an da bon nah mabilid an boble ot mungkampu dah di an numbattanan di Bethel an wadah nangappit hi kalin-oban di algo ya nan bobled Ai an wadah nangappit hi timilan di algo. Ot mangapya boh dih pun-appitan ot dayawonah APU DIOS. 9Mu ugge nunnanong hidi te nun-ottaottan da an numpae dad Negeb ad Kanaan.
Hay niha-adan da Abram ad Egypt
10Indani bo ya waday nahalman an bitil ad Kanaan ot mumpae bo da Abram ad Egypt ot miha-ad da ni-an hidi. 11Handih manatong dad Egypt ya kanan Abram ke Sarai di “He-a ya maddikit ka. 12Ya deket tibon daka nadah tataguh tu ya deket inilaon dan inayan daka ya patayonak ta alan daka. 13Kinali hay kalyom ya tulang daka ta adiyak patayon, mu maphod di aton dan ha-on gapun he-a.”
14Handih dimmatong dad Egypt ya makulug tut-uwan maddikit di panibon nadan tatagu ke Sarai. 15Ya tinibon damdaman nadan mungngunuh balen nan patul ot eda kalyon nah patul an maddikit hi Sarai ot e ipaawit nan patul. 16Ya gapun Sarai ya maphod di pangat nan patul ke Abram an indatanah dakol an kalnero, gulding, baka, kamel, kabayu ya muttatyu.
17Mu gapuh nangalaan nan patul ke Sarai ya impundogon APU DIOS nan patul takon nadan tatagun wadah din nah balena. 18Ot ipaayag nan patul hi Abram ot kananan hiyay “Tipet athituy inat mun ha-on? Tipet uggem kinalin inayam hi Sarai? 19Tipet kanam di tulang mu ta deyan ek ot iine? Awitom tun inayam ta mange kayu!” 20Ot mandalon nan patul nadan tataguna ot patayanon dah Abram ya nan inayana kediyen boble da. Handih timmayan da ya impakial-ala dan am-in nadan ngunut da ya limmu da.
Currently Selected:
Genesis 12: ifkWB
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
