GENESE 7

Abata

1Lohiabada ese Noa dekenai ia hereva, ia gwau, “Lagatoi lalonai oi guia, oi bona oiemu ruma taudia ibounai, badina be lau itaia, oi sibona be kara maoromaoro tauna inai taunimanima edia huanai. 2Mauri gaudia goevagoeva ibounai 7-7 dekenai oi abia lao, tau 7, hahine 7, to goevagoeva lasi gaudia rua rua dekenai oi abia lao, tau ta, hahine ta. 3Ataiai manudia idauidau danu do oi abia lao, 7-7 dekenai, hahine 7, tau 7. Inai bamona oi karaia, boroma gaudia idauidau bona manu idauidau do idia mauri noho, bona tanobada dekenai do idia vara lou totona. 4Badina be dina 7 do idia ore murinai lau be medu do lau siaia tanobada dekenai. Dina 40 bona hanuaboi 40 medu do ia diho tanobada dekenai, lau karaia mauri gaudia ibounai do lau haorea totona.”

5Bona Noa ese Lohiabada ena hereva gauna ibounai ia karaia.

6Tanobada dekenai abata ia daekau neganai, Noa ena mauri lagani be 600. 7Noa bona iena adavana bona ena natuna memero bona edia adavadia be lagatoi lalonai idia guia, abata ena ranu dainai. 8-9Mauri gaudia idauidau ibounai, goevagoeva bona goevagoeva lasi, rua rua, tau bona hahine, be lagatoi lalonai idia guia Noa danu, Dirava ena oda hegeregere. Manu bona tano dekenai idia rau gaudia danu, rua rua dekenai, tau bona hahine, idia guia. 10Dina 7 ia ore murinai, abata ia daekau tanobada ena latanai.

11Noa ena mauri lagani be 600 neganai, hua iharuana ena dina 17, tanobada henunai ena ranu ia makohia bona ia daekau mai, bona guba ena matuna ibounai be idia kehoa.

12Bona medu be tanobada ena latanai ia diho, dina 40 bona hanuaboi 40. 13Unai dina dekenai Noa mai ena adavana danu, bona edia natudia memero Sema bona Hamo bona Iapeta mai edia adavadia danu, be lagatoi dekenai idia guia. 14Boroma gaudia idauidau edia orea edia orea hegeregerena, bona boromakau edia orea edia orea hegeregerena, bona tanobada dekenai idia rau gaudia edia orea edia orea hegeregerena, bona manu idauidau edia orea edia orea hegeregerena, idia danu idia guia lao. 15Mauri gaudia ibounai rua rua dekenai, tau bona hahine, Noa danu lagatoi dekenai idia guia, 16Dirava ena oda hegeregere. Vadaeni Lohiabada ese lagatoi ena iduara ia koua.

17Abata ia daekau noho dina 40, ela bona ranu ena dobu be hegeregere lagatoi do ia abia isi. 18Abata ena dobu ia bada daekau noho, bona lagatoi ia hure noho ranu ena kopina dekenai. 19Abata ia bada daekau noho ela bona ororo badadia ibounai ia koua. 20Ma ia daekau ela bona ororo edia atai dekenai ranu ena dobu be 7 mita. 21Mauri gaudia ibounai tanobada dekenai idia mase, manu bona boromakau, bona boroma idauidau, bona tano dekenai idia rau gaudia, bona taunimanima. 22Tanobada dekenai noho mauri gaudia ibounai idia mase ore. 23Lohiabada ese tanobada dekenai noho mauri gaudia ibounai ia haorea, taunimanima bona boromakau, bona tano dekenai rau gaudia, bona ataiai manu danu. Noa sibona, bona ia danu lagatoi dekenai noho taudia bona gaudia sibona idia mauri noho.

24Ranu ena dobu ia bada daekau noho dina 150 lalonai.

Currently Selected:

GENESE 7: HMOTU93

Highlight

Copy