GENESE 5
5
Adamu ena natuna bona ena tubuna
1Adamu ena bese taudia edia ladadia be inai: Dirava ese taunimanima ia karaia neganai, ia ese Dirava ena toana hegeregerena ia karaia. 2Tau ta bona hahine ta ia karaia neganai, Dirava ese ia hanamodia, bona edia ladana ia gwauraia, Taunimanima.
3Adamu ena mauri lagani be 130 neganai, iena natuna ta ia havaraia, iena toana bamona bona ia hegeregerena vadaeni, iena ladana ia atoa Seta. 4Seta ia vara murinai, Adamu be lagani 800 ma ia mauri noho, iena natuna tatau bona hahine ia havaraia. 5Adamu ena mauri lagani ibounai be 930, vadaeni ia mase.
6Seta ena mauri lagani be 105 neganai, ia ese Enosi ia havaraia. 7Vadaeni Enosi ia vara murinai, Seta be lagani 807 ma ia mauri noho, iena natuna tatau bona hahine ia havaraia. 8Seta ena mauri lagani ibounai be 912, vadaeni ia mase.
9Enosi ena mauri lagani be 90 neganai, ia ese Kenana ia havaraia. 10Vadaeni Kenana ia vara murinai, Enosi be lagani 815 ma ia mauri noho, iena natuna tatau bona hahine ia havaraia. 11Enosi ena mauri lagani ibounai be 905, vadaeni ia mase.
12Kenana ena mauri lagani be 70 neganai, ia ese Mahalalela ia havaraia. 13Vadaeni Mahalalela ia vara murinai, Kenana be lagani 840 ma ia mauri noho, iena natuna tatau bona hahine ia havaraia. 14Kenana ena mauri lagani ibounai be 910, vadaeni ia mase.
15Mahalalela ena mauri lagani be 65 neganai, ia ese Iareda ia havaraia. 16Vadaeni Iareda ia vara murinai, Mahalalela be lagani 830 ma ia mauri noho, iena natuna tatau bona hahine ia havaraia. 17Mahalalela ena mauri lagani ibounai be 895, vadaeni ia mase.
18Iareda ena mauri lagani be 162 neganai, ia ese Enoka ia havaraia. 19Vadaeni Enoka ia vara murinai, Iareda be lagani 800 ma ia mauri noho, iena natuna tatau bona hahine ia havaraia. 20Iareda ena mauri lagani ibounai be 962, vadaeni ia mase.
21Enoka ena mauri lagani be 65 neganai, ia ese Metusela ia havaraia. 22Metusela ia vara murinai, Enoka be Dirava danu idia turana karaia noho, ia lao bona lagani 300 ia ore. Iena natuna tatau bona hahine ia havaraia. 23Enoka ena mauri lagani be 365, 24ia be Dirava danu idia turana karaia noho, vadaeni inai murinai, tau ta ese ia itaia lou lasi, badina be Dirava ese ia abia.
25Metusela ena mauri lagani be 187 neganai, ia ese Lameka ia havaraia. 26Vadaeni Lameka ia vara murinai, Metusela be lagani 782 ma ia mauri noho, iena natuna tatau bona hahine ia havaraia. 27Metusela ena lagani ibounai be 969, vadaeni ia mase.
28Lameka ena mauri lagani be 182 neganai, ia ese iena natuna ta ia havaraia. 29Iena ladana ia atoa Noa, ena anina be “laga-ani”. Ia gwau, “Lohiabada ese tano ia hadikaia vadaeni kara dekena amo inai mero ese ita do ia hamauria, iseda imana edia gaukara, bona iseda hekwarahi dekena amo do ita laga-ani totona.” 30Noa ia vara murinai, Lameka be lagani 595 ma ia mauri noho, iena natuna tatau bona hahine ia havaraia. 31Lameka ena mauri lagani ibounai be 777, vadaeni ia mase.
32Noa ena mauri lagani be 500 neganai, ia ese Sema, bona Hamo, bona Iapeta ia havaraia.
Currently Selected:
GENESE 5: HMOTU93
Highlight
Share
Copy
Want to have your highlights saved across all your devices? Sign up or sign in
