GENESE 14

Aberamo ese Lota ia hamauria

1Amarapela, Sinara tano ena king, Arioka, Elasara tano ena king, Kedoralaomere, Elama tano ena king, bona Tidala, Goimi tano ena king, 2be idia lao tuari king 5 danu, Bera, Sodoma ena, Birisa, Gomora ena, Sinaba, Adima ena, Semebere, Seboimi ena, bona Bela ena king. Bela ena ladana ta be Soara. 3Inai king 5 be idia haboua tamona Sidima Koura dekenai. Inai gabu, hari ena ladana be Mase Davara. 4Lagani 12 lalonai idia be king Kedoralaomere dekenai hesiai gaukara idia karaia, to lagani namba 13 dekenai idia toreisi, idia tuari henia.

5Lagani namba 14 dekenai Kedoralaomere, mai ena durua taudia danu, ese ia toreisi, Repaima taudia, Asataroto Karanaimi dekenai ia halusidia, bona Susima taudia, Hamo dekenai ia halusidia, bona Emima taudia, Save Kiriataimi dekenai ia halusidia. 6Hori taudia danu, edia ororo, ladana Seiri dekenai ia halusidia, bona ia luludia ia lao bona El Parana, taunimanima noho lasi tano ena hetoa badinai. 7Vadaeni Kedoralaomere ia giroa mai Kadesi dekenai, (ena ladana ta be “Kota Hereva ena Ranu Gabuna”), bona ia ese Amaleka taudia ibounai idia halusidia. Ma ia ese Amoro taudia, Hasasono Tamara dekenai idia noho, danu ia halusidia.

8Vadaeni Sodoma ena king bona Gomora ena king bona Adima ena king bona Seboimi ena king bona Bela (ladana ta be Soara) ena king, be edia tuari taudia idia haboua Sidima Koura dekenai, tuari totona. 9Inai king 5 ese king 4, Kedoralaomere, Elama ena king, bona Tidala, Goimi ena king, bona Amarapela, Sinara ena king, bona Arioka, Elasara ena king dekenai idia tuari henia. 10Unai Sidima Koura be mai ena pisi guri momo herea. Vadaeni Sodoma ena king bona Gomora ena king be tuari dekena amo idia ura heau neganai, pisi guri lalonai idia moru. To taunimanima oredia be ororo dekenai idia heau mauri. 11Unai king 4 ese kohu ibounai bona aniani ibounai Sodoma bona Gomora dekenai idia dadia, bona hanua idia rakatania lao. 12Lota, Aberamo ena vavana, Sodoma dekenai ia noho. Vadaeni idia ese ia danu idia dogoatao, idia abia lao, mai ena kohu ibounai.

13To heau mauri tauna ta ia lao, Aberamo, Heberu tauna dekenai ia hamaoroa. Aberamo be Mamare, Amoro tauna, Esakolo bona Anere edia kakana ena au helagadia kahirakahira ia noho. Inai tau toi be Aberamo danu idia turana karaia vadaeni. 14Aberamo ia kamonai iena varavara be idia abia mauri. Vadaeni, ia ese iena palai ruma noho tuari taudia ia haboua. Idia ibounai be tatau 318. Bona idia ese unai king taudia murinai idia raka, ia lao bona Dano hanua. 15Unuseni Aberamo bona ena tatau idia parara, orea rua idia lao, hanuaboi lalonai unai king taudia idia tuari henidia, idia halusidia. Bona Aberamo ia luludia, ia lao bona Hoba, Damaseko ena mirigini kahana dekenai. 16Kohu ibounai idia abia lou. Aberamo ena varavara Lota mai ena kohu danu, bona hahine bona taudia momo danu ia abia lou.

Melekisedeka ese Aberamo ia hanamoa

17Aberamo ese Kedoralaomere bona king haida ia halusidia murinai, ia giroa mai, bona Sodoma ena king ese ia danu ia hedavari Save Koura dekenai, ena ladana ta be, King ena Koura.

18Vadaeni Melekisedeka, Salema ena king, ia be Ataiai Momokani Dirava ena helaga tauna, ese paraoa bona uaina ia mailaia Aberamo dekenai. 19Ia ese Aberamo ia hanamoa, ia gwau,

“Ataiai Momokani Dirava,

guba bona tanobada karaia Dirava ese,

Aberamo ia hanamoa be namo,

20Ataiai Momokani Dirava lau hanamoa inai.

Ia ese kwalimu oi dekenai ia henia,

oi dekenai idia tuari taudia dekena amo.”

Bona Aberamo ese ia abia kohu ibounai ia haria kahana 10, bona kahana ta Melekisedeka dekenai ia henia.

21Bona Sodoma ena king ese Aberamo dekenai ia hereva, ia gwau, “Oi abia kohu ibounai oi dogoatao noho, to lauegu taunimanima sibona lau dekenai oi henia. 22To Aberamo ese ia haere, ia gwau, “Lau ese Lohiabada, Ataiai Momokani Dirava, guba bona tanobada ia karaia Diravana ena vairanai hari lau gwauhamata metau henia, 23lau gwau, oiemu kohu ta do lau abia lasi, tamaka varo danu do lau abia lasi. Gabeai do oi gwau, ‘Aberamo ena kohu momo be lau dekena amo ia abia’ garina. 24Lau sibona be gau ta do lau abia lasi. Lauegu taudia idia ania vadaeni aniani sibona lau dekenai oi henia. Bona lauegu turana Anere bona Esakolo bona Mamare edia kohu kahana do idia abia, inai sibona.”

Currently Selected:

GENESE 14: HMOTU93

Highlight

Copy