Ma꞉tiu 9
9
Yesuma꞉ dola꞉pake piki hali homeke epeaeyekeeki
(Maka 2꞉1-12, Luku 5꞉17-26)
1Yesuma꞉ mo kawaso pa꞉ta꞉ pitulu pua mo ikali leke tunkula paa la꞉ka꞉la mone tea꞉na꞉ ipika꞉ teke da pa꞉ta꞉ opolo peekeme. 2Kutu pieketa꞉ mandane wanda꞉halima꞉ dola꞉pake piki hali homeke ipiki pa꞉ta꞉ tilina꞉ mea tia epemekeme. Yesuma꞉ ika꞉ hone tulaemekeeki handaa mo dola꞉pake piki hali handolo alota꞉ Apa꞉ma꞉ta꞉ epolo pila꞉taa. Naka꞉ hoke hauta꞉ pa paeyaasome leekeme.
3Mandane wape pea walo haemeke haliwekima꞉ koto leekeeki opua ika꞉ honema꞉ alota꞉ Do somema꞉ Koda꞉na꞉ biki hoeyake pi ala꞉me hone wimikime.
4-5Mo haliwekima꞉ hone wimikieki handaa Yesuma꞉ amba꞉ kokele pea hata꞉ iki pa꞉ta꞉ alota꞉ Ekipeke handa ika꞉ puki manuma꞉ koto hoke honemanu miniki halemepe laa lota꞉ pitolo alota꞉ Ikana꞉ma꞉ eki hone witemepe. I̱ma꞉ Naka꞉ hoke hauta꞉ paeyaasome alo pi yapa꞉ pa꞉la꞉pe o Neke tiao pue alo pi yapa꞉ pa꞉la꞉pe laa 6iki pa꞉ta꞉ alota꞉ Wanda꞉halina꞉ Eiyekema꞉ do kenkena꞉ hata꞉ hoke haumanu paeyaapeke wele wia halo ekita꞉ ame pene yanoma꞉ handa꞉pa꞉peke. Koto laata꞉ mo hande dola꞉pake some pa꞉ta꞉ alota꞉ Tiao. Naka꞉ yapa꞉ta꞉ yoka꞉ mea mina da pue leekeme. 7Mo halima꞉ koto pi opuaata꞉ tiao ipika꞉ da peekeme. 8Wanda꞉halima꞉ koto hau handolota꞉ paala꞉ma꞉ homemekeme. Do epeaasa꞉ weleta꞉ Koda꞉ma꞉ haliweki pa꞉ta꞉ halaa pia꞉ka꞉ta꞉me laa ipika꞉ biki yeiya꞉ laemekeme.
Ma꞉tiu pa꞉ta꞉ I̱ telimea epoe leekeeki
(Maka 2꞉13-17, Luku 5꞉27-32)
9Yesuma꞉ koto pa꞉ta꞉ mina꞉pa꞉lao pulu hata꞉ta꞉ dakisi mu hayeke hali bikita꞉ Ma꞉tiu ipika꞉ mani yata꞉po hayeke da pa꞉ta꞉ pitiekeeki handeekeme. Yesuma꞉ ipiki pa꞉ta꞉ alota꞉ I̱ teli mea epoe leekeme. Koto leeke Ma꞉tiu tiao ipiki telimea peekeme.
10Kutupa Yesuma꞉ Ma꞉tiuna꞉ da pa꞉ta꞉ ne nalo pitina꞉ dakisi mani mu haemeke haliweki wopu make hoke haliweki wopu make Yesu ipika꞉ hoki nane telimiki haliweki ame̱le̱ mandake pa꞉ta꞉ pitimikime. 11Kutu pimikieki mandane Pa꞉tisi haliwekima꞉ handolo hata꞉ ipika꞉ disaipolo haliweki pa꞉ta꞉ alota꞉ Ekipeke mo ika꞉ disama꞉ mo dakisi mani mu haleme haliweki mo hoke haliweki ame̱le̱ ne no pilimipe lemekeme.
12Yesuma꞉ koto lemeke pi opua iki pa꞉ta꞉ alota꞉ Yeni na hasa꞉ wanda꞉halima꞉ dokeda hali pa꞉ta꞉ na polo pelemepate pa yeni hasa꞉ wanda꞉halita꞉ dokeda pa꞉ta꞉ pelimikie. 13Hande Baiboloma꞉ alota꞉ Mo hoteke lia hala꞉la꞉ ekita꞉ I̱ma꞉ hone na pa꞉la꞉pate a꞉ta꞉ma꞉ homo hasa꞉ hau homeke hone pa꞉la꞉me la꞉la꞉ pina꞉ tekemanu amba꞉la hone uemena꞉ ikana꞉ma꞉ pua weiya꞉pe. I̱ma꞉ta꞉ epeke hau pu hala꞉ wanda꞉hali hone ma꞉nda꞉ la꞉ka꞉la wina꞉yeke wi loluekema꞉ na epoa꞉pate pa hoke hau pu hala꞉ wanda꞉halima꞉ hone ma꞉nda꞉ la꞉ka꞉la wina꞉yeke wi loluekema꞉ epoa꞉me leekeme.
Nee pi wita꞉la꞉ ekina꞉ lota꞉ pita꞉la꞉eki
(Maka 2꞉18-22, Luku 5꞉33-39)
14Kutupa nate ma꞉nda꞉na꞉ mo hande bapitaisi peao hayeke hali Dionina꞉ hoki nane telimiki haliweki ikana꞉ma꞉ Yesu pa꞉ta꞉ a꞉pa alota꞉ Pa ekipeke nikana꞉ma꞉ make mo Pa꞉tisi haliwekima꞉ make tana꞉ eleke elekena꞉ nee pi u moneao haloma꞉pate naka꞉ disaipolo haliwekima꞉ta꞉ nee pi ota꞉ na wilimime leekeme.
15Koto lemeke Yesuma꞉ iki pa꞉ta꞉ alota꞉ Wanda꞉ panake ta꞉ma꞉ni pita꞉la꞉ natena꞉ wanda꞉ tekehalima꞉ mo ipika꞉ wi leeke epemeke wanda꞉hali ame̱le̱ mandake hao haya꞉ka꞉na꞉ta꞉ ikana꞉ma꞉ ka꞉nda꞉ma꞉ homo halimikie hone witemepe. Dia꞉me. Koto pea꞉peke na ya꞉la꞉me. Pate ipiki mea polo pa꞉la꞉ nate ipilia꞉ natena꞉ta꞉ mo wanda꞉ teke halita꞉ iki ame̱le̱ na halieke. Koto natena꞉ta꞉ ikana꞉ma꞉ nee pi wilimikie.
16Ma꞉nda꞉ma꞉ amba꞉ dau tombulu epeaaluekema꞉ mo panake dau sinkipikieki mea talao na tombulu hala꞉me. Kutu pia꞉ka꞉na꞉ta꞉ panake dau sinkipiki talaasa꞉ ekima꞉ amba꞉ dau paa sinkipa ka꞉ka꞉na꞉ tieke wilieke. 17Koto tupa꞉ kone ma꞉nda꞉ma꞉ panake waini ikalita꞉ amba꞉ ma꞉na꞉ yonkelekema꞉ wa꞉pa꞉la꞉ ipi kanake manuna꞉ na holo pambo hala꞉me. Kutu pia꞉ka꞉na꞉ta꞉ mo waini ikali hoelolu baalieke. Kutu pilia꞉ ekima꞉ta꞉ mo ma꞉na꞉ yonkeleke make ota꞉ hoeya pa wilieke. Kutu piliepate panake ma꞉na꞉ yonkelekema꞉ wa꞉pa꞉la꞉ kanakemanu mea panake waini ikali holo pambea꞉ka꞉na꞉ta꞉ kota꞉ mo ikali kanake yaapota꞉ ota꞉ epeke tupa꞉ endialipipikie laa leekeme.
Homa꞉pa wieke wandiki pita꞉ yeni hao hayeke wanda꞉ yaapo
(Maka 5꞉21-43, Luku 8꞉40-56)
18Yesuma꞉ mo hande haliweki pa꞉ta꞉ do koto pimanu alo haena꞉ Diu wanda꞉halina꞉ yeni dana꞉ you hali Yesu pa꞉ta꞉ opolo a꞉pa tumiki yotuao pita꞉ alota꞉ Ya wandikita꞉ homa꞉la꞉pate pa ipika꞉ lokena꞉ naka꞉ kiki a꞉pa wika꞉na꞉ta꞉ tiaalieke leekeme. 19Koto leeke Yesu tiao ipiki telimea peeke ipika꞉ disaipolo haliweki make mandake pemekeme.
20Ikana꞉ma꞉ koto pulu haena꞉ta꞉ wanda꞉ homeke Yesuna꞉ hoki nanema꞉ a꞉pa ipika꞉ dopieke dau nepoko wataeyekeme. Mo wanda꞉ta꞉ bapi 12 tukiki pa꞉ta꞉ hayeke andusa꞉ we wopu yopu lombei peao hayekeme. 21Koto wanda꞉na꞉ honema꞉ta꞉ I̱ma꞉ ipika꞉ dau watawa꞉ka꞉na꞉ta꞉ ya yeni paelieke hone wiekeme. 22Yesuma꞉ la꞉ka꞉la꞉moneao ipiki handolo alota꞉ Naka꞉ hone tulaale ekima꞉ neke epeleme leekeme. Koto leeke pa꞉ta꞉ koto kone mo wanda꞉na꞉ yeni paeyao epea hayekeme.
23Koto hoki naneta꞉ Yesu mo hande you halina꞉ da pa꞉ta꞉ honda꞉ pambeekeme. Koto homa꞉ da tukiki pa꞉ta꞉ mombelemeke pe kanake lita꞉la꞉ tapake make homa꞉ witolo e̱ ala꞉ tapake wopu make pitimikieki handaata꞉ Yesuma꞉ iki pa꞉ta꞉ alota꞉ 24Koto wandiki sikita꞉ ota꞉ na homa꞉la꞉pate pa u pa꞉ela꞉me. Koto pa꞉la꞉ma꞉ iki paeyao hama pupe leekeme. Koto leeketa꞉ iki paeyaoma꞉ ipiki kitaemekemepate 25Yesuma꞉ koto wanda꞉hali tolu lia hama nane haena꞉ laata꞉ mo wandikina꞉ da panda꞉ pa꞉ta꞉ pua ipika꞉ kiki mieketa꞉ mo wandiki koto kone tiaeyekeme. 26Koto wandiki mea tiaeyeke ekina꞉ pita꞉ koto kenke paeyao pa꞉ta꞉ kende tupa꞉ wiekeme.
Yesuma꞉ leke holupiki hali yaapo epeaeyekeeki
27Yesuma꞉ koto pa꞉ta꞉ mina꞉pa꞉lao pulu haena꞉ leke holu piki hali yaapoma꞉ ipika꞉ hoki nane wi tieke la꞉ paleke teli mea pulu alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉peke la꞉tia pepekeme. 28Yesu da pa꞉ta꞉ honda꞉ pambolo haena꞉ koto leke holu piki hali yaapota꞉ ipiki pa꞉ta꞉ epepekeme. Kutu pipiki Yesuma꞉ ipiliki pa꞉ta꞉ lota꞉ pitolo alota꞉ Ipilika꞉ honema꞉ta꞉ I̱ pa꞉ta꞉ ipiliki epeapeke wele ula꞉me hone witolo hone ti lalepepe leekeme. Ipilikana꞉ma꞉ koto pi hombo peaaso alota꞉ Aowe lepekeme. 29Koto lepeke pi Yesuma꞉ opua ipilika꞉ leke wataaso alota꞉ Koto ipilika꞉ hone ti lalepe tupa꞉ kone pina꞉e leekeme. 30Koto pi alo haena꞉ kone ipilika꞉ leke ki leekeme. Kutu pieke Yesuma꞉ ipiliki hando alo hata꞉ alota꞉ Ma꞉nda꞉ pa꞉ta꞉ na pua lapa꞉peke leekeme. 31Koto leekepate ipilikana꞉ma꞉ mo da mina꞉pa꞉lao pulu hata꞉ mo Yesuma꞉ pieke hauta꞉ koto haepeke kenke pa꞉ta꞉ kende tupa꞉ wina꞉ lepekeme.
Pi na leke hali epeaeyekeeki
32Mo hande leke holu piki hali yaapo mo da mina꞉pa꞉lao pulu haena꞉ta꞉ pa mandane wanda꞉halima꞉ pi na leke hali homeke Yesu pa꞉ta꞉ hatuku epemekeme. Mo halina꞉ pi na leeke ekita꞉ hoke temoko pita꞉ piekeme. 33Yesuma꞉ mo hande hoke temoko tolu lieketa꞉ koto kone mo hande pi na leke halima꞉ pi paa leekeme. Koto piekeeki wanda꞉hali paeyaoma꞉ handolo tola꞉tia pominolo alota꞉ Dupiki hau homeke ma꞉nda꞉ Isulai kenke pa꞉ta꞉ ota꞉ na handoma꞉me lemekeme. 34Koto lemekepate mo hande Pa꞉tisi haliwekima꞉ alota꞉ Do somema꞉ta꞉ mo hande hoke you temokona꞉ wele mea koto hande hoke temokomanu tolu lia pia꞉ka꞉ta꞉me.
Yesuma꞉ wanda꞉hali pa꞉ta꞉ a꞉ta꞉ma꞉ homeekeeki
35Yesuma꞉ta꞉ koto pa꞉ta꞉ haemeke da paeyao pa꞉ta꞉manu pomu lopeekeme. Ika꞉ teke da tieke pa꞉ta꞉ make ika꞉ da teke pa꞉ta꞉manu make pomu lopo piekeme. Kutaata꞉ ika꞉ yeni pu haemeke damanu pa꞉ta꞉ make pi walo hayekeme. Ipikana꞉ma꞉ mo Koda꞉na꞉ Kilu Tombuao Hala꞉ ekina꞉ Pi Seliapomanu walolo hata꞉ make mo ta꞉ta꞉ ta꞉ta꞉ piki yeni haemeke wanda꞉halina꞉ yeni tekemanu tonka꞉na꞉ wamo peatiki pomu hayekeme. 36Koto pomieke ale pa꞉ta꞉manu mombelemeke wanda꞉hali tieke handaata꞉ iki pa꞉ta꞉ ipika꞉ pukima꞉ a꞉ta꞉ tieke ota꞉ wopu homeekeme. Pa ekiepina꞉ ikita꞉ mo handeteke hala꞉ hali na hake sipisipimanu hata꞉ pita꞉la꞉ tupa꞉ ika꞉ kone tamba꞉ mia꞉peke na yo make hone mataalo hone ti yoko haemeke haumanu handolo kutu piekeme. 37Koto ekina꞉ ipika꞉ hoki nane telimiki haliweki handolo alota꞉ Ne napeke tieke wopu pota꞉la꞉pate mo mea momba꞉laapeke wanda꞉halita꞉ aneke dia꞉me. 38Koto ekina꞉ta꞉ mo e teke halima꞉ ipika꞉ ena꞉ ne napeke mea momba꞉laalo peleme haliweki ana꞉na꞉ tapaena꞉ ikana꞉ma꞉ ipiki pa꞉ta꞉ yeni pu hapa꞉peke leekeme.
Currently Selected:
Ma꞉tiu 9: SEMB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in