Luku 22

Yesu luluekema꞉ hone amba꞉ pambao wimikieki

(Ma꞉tiu 26꞉1-5, Maka 14꞉1-2, Dioni 11꞉45-53)

1Mo hande Na Pombeiyaake Palaowa Nala꞉ Di ipika꞉ bikita꞉ Lombei Pupa Yapeeke Nateta꞉ teke pa꞉ta꞉ yolo epeekeme. 2Mo yeni peao haemeke teke haliwekima꞉ make mo Lo Pi wala꞉tiki pu haemeke haliwekima꞉ make Yesu a꞉mbao luekema꞉ yeke mandane pota꞉manu wopu weimikime. Pa ekipeke. Ikita꞉ mo wanda꞉hali paala꞉ma꞉ homolo hata꞉ pimikime.

Diudasima꞉ Yesu lina꞉ yeke a꞉nda꞉ lomba wiekeeki

(Ma꞉tiu 26꞉14-16, Maka 14꞉10-11)

3Isekatioti hali Diudasima꞉ mo hande 12 disaipolo hali ma꞉nda꞉ hayekepate kone Sadani honda꞉ pambeekeme. 4Koto ekina꞉ Diudasima꞉ mo yeni peao haemeke teke haliweki make mo tembolo da handeteke haemeke you haliweki ame̱le̱ ipikana꞉ma꞉ Yesuta꞉ ekipa iki pa꞉ta꞉ mea hala꞉ monealua꞉pe laa hotulu peekeme. 5Mo haliwekita꞉ ta꞉na꞉ tiekema꞉ homolo hata꞉ ipiki pa꞉ta꞉ mani haluekema꞉ pi la꞉ wimikime. 6Koto ekina꞉ Diudasima꞉ mo ekina꞉ a꞉pa꞉la꞉me laa ikana꞉ma꞉ mo wanda꞉halima꞉ na handolo pa꞉la꞉ tupa꞉ Yesu lina꞉ yeke ipikana꞉ma꞉ epeke pota꞉manu kini pea weiyekeme.

Yesuma꞉ mo Lombei Pupa Yapeeke ne noluekema꞉ tikitiki yaeyekeeki

(Ma꞉tiu 26꞉17-25, Maka 14꞉12-21, Dioni 13꞉21-30)

7Mo hande Na Pombeiyaake Palaowa Nala꞉ natena꞉ mo Lombei Pupa Yapeeke yawena꞉ sipisipi ma꞉na꞉ ikiki sunu lulu pimiki nate opolo epeekeme. 8Yesuma꞉ Pida pita꞉ Dioni yaapo pa꞉ta꞉ dupiki pi mea pena꞉ lo tapaaso alota꞉ Pua nika꞉ Lombei Pupa Yapeeke Natena꞉ ne nolo polome alena꞉ tikitiki yaalo pupa꞉e leekeme. 9Ipilikana꞉ma꞉ Yesu pa꞉ta꞉ lota꞉ pitolo hata꞉ alota꞉ Hando pa꞉ta꞉ pua wamo peoponope lepekeme. 10Yesuma꞉ alota꞉ Opua꞉pe. Ipiliki mo daoni nane pulu hapena꞉ta꞉ hali ma꞉nda꞉ma꞉ ikali kanake homeke tia ipuluta꞉ ipiliki manda꞉hande pilieke. Kutupa mo hali teli mea pua ipiki honda꞉ pambilia꞉ da pa꞉ta꞉ pua꞉pa꞉peke. 11Kutupa mo da teke hali pa꞉ta꞉ dupa lapa꞉peke. Mo Disama꞉ neke pa꞉ta꞉ alota꞉ Yaka disaipolo haliweki I̱ ame̱le̱ Lombei Pupa Yapeeke Natena꞉ ne nolo poloma꞉ da panda꞉ hando pa꞉ta꞉pe laa lapa꞉peke. 12Kutupa ipikana꞉ma꞉ manda nane ula꞉ ala꞉ta꞉ ala꞉ta꞉ ana꞉lao wiki da panda꞉ tieke walieke. Koto pa꞉ta꞉ ipilikana꞉ma꞉ ala꞉ta꞉ ala꞉ta꞉ tikitiki yaalipipikie leekeme. 13Mo hali yaapo puaata꞉ hande Yesuma꞉ leeke pita꞉ ota꞉ yaeyekeme. Kutupa mo hande Lombei Pupa Yapeeke Natena꞉ ne wamo pipikime.

Teke Halina꞉ ne ikali telipeayekeeki

(Ma꞉tiu 26꞉26-30, Maka 14꞉22-26, 1 Kotindi 11꞉23-25)

14Mo hande nate opolo epeeketa꞉ Yesu ipika꞉ pita꞉peke da panda꞉ mea mo ipika꞉ disaipolo haliweki ame̱le̱ teipolona꞉ pitimikime. 15Kutupa ipikana꞉ma꞉ iki pa꞉ta꞉ alota꞉ I̱ yaka hone tiekema꞉ta꞉ I̱ tanda noluekema꞉ hata꞉ta꞉ do Lombei Pupa Yapeeke Natena꞉ neta꞉ iki ame̱le̱ noluekema꞉ hone wotu pa꞉la꞉me leekeme. 16I̱ma꞉ iki pa꞉ta꞉ ota꞉ pi alome. Ame doeki pea hoki naneta꞉ mo Koda꞉na꞉ Kilu Tombuao hala꞉eki pa꞉ta꞉ homeke do hauna꞉ teke peneme yaena꞉ yeke paa na nolueke laa leekeme.

17Kutupa Yesuma꞉ mo kapo mea Koda꞉ pa꞉ta꞉ keiyae alo hata꞉ iki pa꞉ta꞉ alota꞉ Ika꞉ ika꞉ kone telipa nape laata꞉ 18I̱ma꞉ do waini ikalita꞉ ame do kini pea pua na neke hao mo Koda꞉na꞉ Kilu Tombuao hala꞉eki ipilia꞉ dina꞉ paa nolueke leekeme. 19Kutupa ipikana꞉ma꞉ mo betedi mea Koda꞉ pa꞉ta꞉ keiyae laa pindi pindi pea iki pa꞉ta꞉ halolo hata꞉ alota꞉ Dota꞉ yaka lokee laata꞉ iki pa꞉ta꞉ ka꞉la꞉ ekie. Dupiki hauta꞉ I̱ hone niminaaso hata꞉ pea꞉tiki pu hapa꞉peke leekeme. 20Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Ikina꞉ holao pa꞉la꞉me leekeme.

21Koto pa꞉la꞉pate handa꞉e. Mo hande I̱ minina꞉yeke a꞉nda꞉ lombolo pa꞉la꞉ halina꞉ kikita꞉ yakaeki ame̱le̱ mandakena꞉ do teipolona꞉ wia piluma꞉ handa꞉e. 22Wanda꞉halina꞉ Eiyeketa꞉ mo hande Koda꞉ma꞉ la꞉ ula꞉ tupa꞉ kone homena꞉yeke pa꞉la꞉pate pa mo a꞉nda꞉ lomba꞉la꞉ halita꞉ ota꞉ paala꞉e leekeme. 23Koto leekeeki opitolo hata꞉ ika꞉ ika꞉ kone lota꞉ pu alualu pitolo alota꞉ Niki ma꞉nda꞉ hondo epima꞉ dupiki hau pulu polome ekina꞉ ala꞉pe lemekeme.

Tieke haasa꞉ ekina꞉ ape ape lemekeeki

24Yesuna꞉ disaipolo haliwekima꞉ iki ma꞉nda꞉ epita꞉ ota꞉ tiekee hone wina꞉ta꞉ epi ka꞉ta꞉pe laa ape lemekeme. 25Yesuma꞉ iki pa꞉ta꞉ alota꞉ Mo Diendaili wanda꞉halina꞉ kini manuma꞉ ika꞉ wanda꞉halita꞉ ika꞉ honkopu oto pa꞉ta꞉ haena꞉ lo halememe. Kutupa mo you haliwekima꞉ta꞉ ika꞉ kone wanda꞉halina꞉ ta꞉ma꞉nie lo halememe. 26Koto pa꞉la꞉pate iki ame̱le̱ta꞉ koto tupa꞉ dia꞉me. Koto ekina꞉ iki tukiki pa꞉ta꞉ta꞉ tumiki hali ma꞉nda꞉ haya꞉ka꞉na꞉ta꞉ kota꞉ koto someta꞉ pao wetepena꞉ weki au lena꞉ lapa꞉peke. Kutupa mo you halita꞉ pao e pokaasa꞉ hali au lena꞉ lapa꞉peke. 27Epita꞉ tiekepe. Mo ne noluekema꞉ a꞉pa pila꞉ halipe o mo ne pana꞉ peaasa꞉ halipe. Ota꞉ mo pila꞉ hali lataa. Koto pa꞉la꞉pate I̱ta꞉ iki ame̱le̱ta꞉ ne pana꞉ peaaso somema꞉ handolome.

28Ikita꞉ yaka ka꞉nda꞉ pikieki tapu ame̱le̱ mandakena꞉ hatia epememe. 29Kutupa yaka Apa꞉ma꞉ I̱ pa꞉ta꞉ I̱ma꞉ handeteke hano ma̱leke lila꞉ tupa꞉ kone I̱ma꞉ make iki ame̱le̱ homeke hau kone pulueke. 30Ikita꞉ yaka Kilu Tombuao Hala꞉ alena꞉ yaka teipolona꞉ pita꞉ ne ikali nolumeke. Kutupa make ikita꞉ oli you halina꞉ sea manuna꞉ pita꞉ mo Isulaina꞉ 12 tapake teli pilimikie leekeme.

Pidama꞉ Yesu na handolome lolo piekeeki

(Ma꞉tiu 26꞉31-35, Maka 14꞉27-31, Dioni 13꞉36-38)

31Saimono Saimonoo. Opie. Sadanima꞉ iki la handena꞉ yeke waleke hala꞉la꞉me. Kutupa mo hande e poko hala꞉ halima꞉ widi napeke yata꞉pa ambuku wina꞉ ala꞉ tupa꞉ ika꞉ pilimi hau manuma꞉ kone hokeeki o epekeeki make teli pealieke. 32Koto pa꞉la꞉pate I̱ma꞉ Saimono neke pa꞉ta꞉ yeni pealo ekita꞉ naka꞉ hone tulale ekita꞉ na lopena꞉yeke polome. Kutupa nakana꞉ma꞉ I̱ pa꞉ta꞉ paa la꞉ka꞉la epeka꞉na꞉ta꞉ kota꞉ naka꞉ kametonu wele pu tiaapeke leekeme.

33Pidama꞉ Yesuna꞉ pi hombo peaaso alota꞉ Tekehalio. I̱ta꞉ neke yaapo mandakena꞉ dipula pulueke make homeka꞉na꞉ homuluekema꞉ make tikitiki yao halome leekeme. 34Yesuma꞉ alota꞉ Pidao. I̱ma꞉ neke pa꞉ta꞉ ota꞉ pi alome. Ame timba kone koka꞉la꞉ e̱ a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaaso hata꞉ I̱ na handolome lelipikie leekeme.

Pausa nu kepete dolo mina꞉la꞉eki

35Kutupa Yesuma꞉ ipika꞉ disaipolo haliweki pa꞉ta꞉ alota꞉ Hande I̱ma꞉ iki tapawa꞉ dina꞉ta꞉ pausa o nu o anke dake na kiki pa tapawa꞉ma꞉ ikita꞉ ala꞉ta꞉ ma꞉nda꞉ weimipe laa lota꞉ piekeme. Ikana꞉ma꞉ hombo peaaso alota꞉ Ota꞉ ala꞉ta꞉ homekesiki ma꞉nda꞉ kone dia꞉me lemekeme. 36Kota꞉ Yesuma꞉ alota꞉ Kutu pimipate ameta꞉ ma꞉nda꞉ epima꞉ pausa o nu wia haemeka꞉na꞉ta꞉ ota꞉ mea pua꞉pa꞉peke. Kutupa ma꞉nda꞉ epi a꞉nda꞉ kepete dolo dia꞉ ya꞉ka꞉na꞉ta꞉ kota꞉ ika꞉ sedi tapao mani mea kepete dolo ma꞉nda꞉ a̱i̱ hamba꞉pa꞉peke. 37Pa ekipeke. I̱ma꞉ iki pa꞉ta꞉ ota꞉ alome. Mo hande Baiboloma꞉ lao witolota꞉ Ikana꞉ma꞉ ipikita꞉ mo pi ula꞉eki yambeleme haliweki ame̱le̱ mandakena꞉ apa꞉tao yata꞉pilimikie la꞉la꞉ ekita꞉ I̱na꞉ ota꞉ peneme yaena꞉e. Pa ekipeke. Mo hande I̱na꞉ lao wiekeeki paeyaota꞉ ameta꞉ ota꞉ peneme yao ipula꞉me leekeme. 38Mo disaipolo haliwekima꞉ alota꞉ Tekehalio. Handa꞉e. Kepete dolo yaapo do handa꞉e lemekeme. Yesuma꞉ alota꞉ Kotota꞉ ana꞉e leekeme.

Yesuma꞉ Olipi Potena꞉ pita꞉ yeni piekeeki

(Ma꞉tiu 26꞉36-46, Maka 14꞉32-42)

39Yesuta꞉ ipika꞉ pea꞉tiki pu hayeke tupa꞉ mo da teke mina꞉pa꞉lao mo Olipi Potena꞉ ipika꞉ disaipolo haliweki ame̱le̱ peekeme. 40Koto alena꞉ opolo a꞉pa ipikana꞉ma꞉ mo disaipolo haliweki pa꞉ta꞉ alota꞉ La handa꞉la꞉ ekima꞉ iki mea lopaama꞉na꞉ yeni wopu pia꞉pa꞉peke. 41Koto laa Yesuta꞉ iki mina꞉pa꞉lao mo toopi baasa꞉ tupa꞉ leke mopate pua tumiki yotuao pita꞉ yeni piekeme. 42Ipikana꞉ma꞉ alota꞉ Apa꞉o. Ana꞉ pia꞉ka꞉na꞉ta꞉ do I̱ pa꞉ta꞉ ipula꞉ kapo I̱ pa꞉ta꞉ na epena꞉ lapeke. Kutu pea꞉peke ya꞉la꞉pate yaka hone pa꞉la꞉eki dia꞉me. Naka꞉ hone pa꞉la꞉ ekina꞉ homeke pina꞉e leekeme.

43Oli ya nanema꞉ hayeke enisolo homeke opolo a꞉pa Yesu honkopu haleekeme. 44Kutupa pukima꞉ ka꞉nda꞉ tieke pieketa꞉ Yesuma꞉ ota꞉ anekema꞉ yeni piekeme. Kutu pieke ekima꞉ a꞉ka꞉li tieketa꞉ wema꞉ handekeeki oni kenkena꞉ lopeekeme.

45Oni yeni pu pitieke alena꞉ tialiaota꞉ mo ipika꞉ disaipolo haliweki puki tandama꞉ kone soka꞉la꞉ pitolo hata꞉ u pa꞉liake wimikieki pua handa꞉ wiekeme. 46Kutupa mo haliweki pa꞉ta꞉ alota꞉ Ekipeke u pa꞉liake wilimipe. Tiao. La handa꞉la꞉ ekima꞉ iki mea lopaama꞉na꞉ yeni wopu pu hapa꞉peke leekeme.

Yesu minimikieki

(Ma꞉tiu 26꞉47-56, Maka 14꞉43-50, Dioni 18꞉3-11)

47Koto kone Yesuma꞉ koto pi alo haena꞉ hande disaipolo hali ma꞉nda꞉ Diudasima꞉ mo haliweki wopu hatuku Yesu hayeke alena꞉ opolo epemekeme. Diudasima꞉ta꞉ Yesu nunu puluekema꞉ teke pa꞉ta꞉ leke peekeme. 48Kutu piekepate Yesuma꞉ alota꞉ Diudasio. Mo Wanda꞉halina꞉ Eiyeke lina꞉ hala꞉ monealuekema꞉ta꞉ nunu pitele ekima꞉ walelepe leekeme.

49Yesu ame̱le̱ haemeke disaipolo haliwekima꞉ mo pulu piekeeki hando hao alota꞉ Tekehalio. Nika꞉ kepete doloma꞉ liomonope lemekeme. 50Koto kone mo hande disaipolo hali ma꞉nda꞉ma꞉ mo kepete doloma꞉ mo yeni peao hayeke teke halina꞉ e pokao hayeke halina꞉ popeke nane katake tunkulu poka lopaeyekeme. 51Kutu piekepate Yesuma꞉ alota꞉ Do hauta꞉ ana꞉ma laata꞉ mo halina꞉ katake watao paa epeaeyekeme.

52Kutupa Yesuma꞉ mo yeni peao hayeke teke haliweki make mo tembolo handeteke haemeke you haliweki make tondiki haliweki ipiki minuluekema꞉ epemeke haliweki pa꞉ta꞉ alota꞉ Ika꞉ honema꞉ta꞉ I̱ta꞉ a꞉nda꞉ kini pitolo hali patema꞉ a꞉nda꞉ pita꞉la꞉ kepete make ba̱i̱ make miniki a꞉pa pimipe. 53I̱ta꞉ nate wopu oni tembolo da tukiki pa꞉ta꞉ iki ame̱le̱ haowa꞉pate ikana꞉ma꞉ I̱ da꞉ka꞉pa꞉ minuluekema꞉ na taapememe. Koto pa꞉la꞉pate do timbata꞉ naka꞉ natee. Mo hande timba꞉ leke ekina꞉ honkopuma꞉ handeteke halo pa꞉la꞉ natee leekeme.

Pidama꞉ Yesuta꞉ I̱ na handolome leekeeki

(Ma꞉tiu 26꞉57-58,69-75, Maka 14꞉53-54,66-72, Dioni 18꞉12-18,25-27)

54Mo haliwekima꞉ Yesu mina mo yeni peao hayeke teke halina꞉ da nane hatuku mea pemekeme. Kutupa Pidata꞉ mopate leke hata꞉ telia꞉ mea peekeme. 55Mo da hama tukikina꞉ta꞉ ti yankemekeme. Kutupa Pidata꞉ mo tina꞉ pitu dupaemeke wanda꞉hali ame̱le̱ apa꞉taeyekeme. 56Koto pitina꞉ta꞉ mo e pokao hayeke wandiki ma꞉nda꞉ma꞉ Pida mo tina꞉ pitiekeeki handaata꞉ Pida handake witolo hata꞉ alota꞉ Do hali make Yesu yaapo haya꞉me leekeme.

57Koto leekepate Pidama꞉ Dia꞉me laa honi mea baaso alota꞉ Wanda꞉o. Ipikita꞉ I̱ na handolome leekeme. 58Pa hosiki siki hao hao pea hali ma꞉nda꞉ma꞉ Pida handa꞉ u haota꞉. Neke make ipika꞉ tapake lataa leekeme. Koto leekepate Pidama꞉ hombo peaaso alota꞉ Someo I̱ dia꞉me leekeme. 59Kutupa nate leke homeke a꞉nda꞉ paeyeketa꞉ hali ma꞉nda꞉ma꞉ ombu honkopu hao ma̱leke litolo alota꞉ Ala꞉ta꞉ ma꞉nda꞉ma꞉ na a꞉mbala꞉me. Do halita꞉ Yesu ame̱le̱ haya꞉me. Pa ekipeke ipiki make Ka꞉lili hali yekeme. 60Koto leeke handaa Pidama꞉ hombo peaaso alota꞉ Someo. Nakana꞉ma꞉ koto ale ekita꞉ I̱ mata꞉la꞉me leekeme. Kutupa koto tomona꞉ kone pi pa alo haena꞉ mo koka꞉la꞉ma꞉ tiao e̱ leekeme. 61Koto kone mo Tekehalima꞉ la꞉ka꞉la꞉ moneao Pida handake wiekeme. Kutu pieke Pidama꞉ta꞉ hande Tekehalina꞉ pimanu dupa lea꞉me laa niminaeyekeme. Mo koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ titina꞉ amba꞉la hoto tepo ya biki a꞉mbao lo hoeyaasota꞉ I̱ na handolome laa lelipikie leekeeki hone wiekeme. 62Koto ekina꞉ Pida hama opolu bao ota꞉ puki teto tiekema꞉ homolo hata꞉ ka꞉pa꞉puki yoka e̱ tieke leekeme.

Yesuta꞉ kitata pea yombua baemekeeki

(Ma꞉tiu 26꞉67-68, Maka 14꞉65)

63Mo hande Yesu handeteke haemeke haliwekima꞉ta꞉ Yesu kitata pea yombua baemekeme. 64Kutupa make mo haliwekima꞉ Yesuna꞉ leke popeleke a꞉mbao lota꞉ pitolo alota꞉ Neke lia꞉ halina꞉ biki lakie lemekeme. 65Kutupa make Yesu yaala꞉meake pimanu wotu lemekeme.

Yesuta꞉ mo Ka̱le̱sete pa꞉ta꞉ hatuku pemekeeki

(Ma꞉tiu 26꞉59-66, Maka 14꞉55-64, Dioni 18꞉19-24)

66Da kelepeeketa꞉ mo Diu haliwekina꞉ ka̱le̱sete mombuluekema꞉ mo tondiki haliweki make yeni peao haemeke teke haliweki make Lo Pi walo haemeke haliweki paeyao mombololo hata꞉ Yesu hatuku epemekeme. 67Ikana꞉ma꞉ alota꞉ Niki lakie. Neketa꞉ hande Ketiso ya꞉ka꞉ta꞉pe lemekeme. Kutupa Yesuma꞉ hombo peaaso alota꞉ I̱ma꞉ iki pa꞉ta꞉ la kua꞉ka꞉na꞉ta꞉ ikana꞉ma꞉ I̱ hone na tulalimikie. 68Kutupa I̱ma꞉ iki lota꞉ pita꞉la꞉eki ma꞉nda꞉ pua꞉ka꞉na꞉ta꞉ ikana꞉ma꞉ na yoka la kilimikie. 69Koto pa꞉la꞉pate ame do kini pea puaata꞉ hande Wanda꞉halina꞉ Eiyeketa꞉ oli wele wotu piki Koda꞉na꞉ popeke nane kikina꞉ pua pitu halieke leekeme.

70Mo hali paeyaoma꞉ alota꞉ Kota꞉ neketa꞉ Koda꞉na꞉ Eiyeke ya꞉ka꞉ta꞉pe laa lota꞉ pimikime. Yesuma꞉ hombo peaaso alota꞉ Ika꞉ kone I̱e laata꞉ koto alemetaa leekeme.

71Kutupa ikana꞉ma꞉ alota꞉ Wekitisimanu weiya꞉peke na ya꞉la꞉me. Nika꞉ kone ipika꞉ pi koto opuma꞉taa lemekeme.

Currently Selected:

Luku 22: SEMB

Highlight

Copy