Kini Pieke 13

Eipola꞉ma꞉ Loda yaapo ka꞉ta꞉alu pipikieki

1Eipola꞉ma꞉ma꞉ ipika꞉ wanda꞉ make ipika꞉ wia hayeke ala꞉ta꞉ ala꞉ta꞉ paeyao make mea Idiepi mina꞉pa꞉lao Keinani kenkena꞉ ka꞉wa꞉ nanema꞉ tilao peekeme. Loda make mandakena꞉ pemekeme. 2Eipola꞉ma꞉ma꞉ta꞉ sipisipimanu make nanikosimanu make kaomanu make silipa make kolo make koto ale paeyaoma꞉ta꞉ hamoko hali tieke hayekeme. 3Kutupa koto pate mina꞉pa꞉laota꞉ kenke ma꞉nda꞉ ma꞉nda꞉ pa꞉ta꞉ pua mo Bedele nanema꞉ peekeme. Ipikita꞉ mo amba꞉ hande ipika꞉ palai da a꞉eyeke alena꞉ mo Bedele pita꞉ Ai yaapo tukikina꞉ 4mo hande oloda a꞉eyeke alena꞉ opolo peekeme. Koto pateta꞉ mo Tekehali pa꞉ta꞉ panda꞉puniao yeiya꞉ layekeme.

5Lodata꞉ ipika꞉ wekiwanda꞉ make sipisipimanu make nanikosimanu make pa hameke e pokaasa꞉ wanda꞉hali make hayekeme. 6Kutupa ipilikita꞉ ma꞉na꞉ hoteke wopu punupikieki yalo hata꞉ mo ipilika꞉ hoteke manuma꞉ napeke ambu opeeke kenketa꞉ wopu dia꞉ yekeme. 7Kutu piekeeki yalo hata꞉ mo Eipola꞉ma꞉na꞉ ma꞉na꞉ hotekemanu handeteke haemeke haliweki pita꞉ mo Lodana꞉ ma꞉na꞉ hotekemanu handeteke haemeke haliweki ika꞉ ika꞉ kone ape ape la꞉tiki pimikime. Koto nate nina꞉ta꞉ mo Keinani wanda꞉hali make Petese wanda꞉hali make pa haemekeme.

8Kutu pieke handaata꞉ Eipola꞉ma꞉ma꞉ Loda pa꞉ta꞉ alota꞉ Dikita꞉ homeke tapake ya꞉la꞉ ekina꞉ naka꞉ haliweki pita꞉ yaka haliweki yaapoma꞉ta꞉ ape ape na lapeke alee. 9Koto ekina꞉ta꞉ kota꞉ ka꞉ta꞉alu pupana꞉ma꞉ naka꞉ hone pa꞉la꞉ kenke ma̱leke lia neke mandanema꞉ pekena꞉ kota꞉ I̱ta꞉ mandanema꞉ poluekema꞉ loa꞉me leekeme.

10Koto leeke Lodama꞉ mo Diodani hawete handoma꞉ handoma꞉ putia pua mo Soa pua hando naeyekepate oni kenketa꞉ mo hande Tekehalina꞉ e o mo Idiepi kenkema꞉ handaa ikali wopu yapeekeeki handeekeme. Dota꞉ mo Tekehalima꞉ mo Sodomo pita꞉ Komoto daoni yaapo a̱i̱ na hoeyake haena꞉ piekeme. 11Koto ekina꞉ Lodama꞉ta꞉ mo Diodani hawete tieke ipika꞉ekie laa ma̱leke liaata꞉ mo nate opa꞉la꞉ nanema꞉ tilao peekeme. Kotota꞉ mo hande hali yaapona꞉ ka꞉ta꞉alu pipiki tupa꞉e. 12Eipola꞉ma꞉ta꞉ Keinani kenke pa꞉ta꞉ haena꞉ta꞉ Lodata꞉ mo hawetena꞉ hayeke daonimanu pa꞉ta꞉ pita꞉tia pominolota꞉ mo Sodomo nanema꞉ ipika꞉ palai da a꞉eya pitiekeme. 13Koto pa꞉ta꞉ haemeke wanda꞉halita꞉ hoke wanda꞉hali hata꞉ make mo Tekehali pa꞉ta꞉ hoke hau pu haemekeme.

Eipola꞉ma꞉ mo Hebotoni nane peekeeki

14Mo Loda pea꞉ hoki nane Tekehalima꞉ Eipola꞉ma꞉ pa꞉ta꞉ alota꞉ Koto neke hale alena꞉ hata꞉ta꞉ mo tea꞉ paeyao siki epeke tupa꞉ handa꞉e. 15Koto handeleeki paeyaota꞉ neke pa꞉ta꞉ make naka꞉ monduma꞉ monduma꞉ pilipi wanda꞉wekina꞉ wanda꞉weki pa꞉ta꞉ make I̱ma꞉ kulu polo kenkee. Kutupa koto kenketa꞉ hoto paeyao naka꞉eki utia pu halieke. 16I̱ma꞉ta꞉ ma꞉nda꞉ma꞉ na yata꞉pa꞉ ta꞉palo pa꞉la꞉ tupa꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke. Ma꞉nda꞉ma꞉ do kenkena꞉ ula꞉ dokolo yata꞉pa꞉ ta꞉paya꞉ka꞉na꞉ta꞉ kota꞉ naka꞉ monduma꞉ monduma꞉ pilipi wekiwandikina꞉ wekiwandiki make yata꞉pa꞉ ta꞉paena꞉e. 17Koto pa꞉la꞉ma꞉ I̱ma꞉ do kenke neke kulu polo ekina꞉ mo kenke paeyao pua hando wie leekeme. 18Koto leeke Eipola꞉ma꞉ma꞉ ipika꞉ palai da yoka꞉moneaota꞉ mo Hebotoni hali Ma꞉motena꞉ timanu tekepa꞉ta꞉ leke pua pita꞉ koto pateta꞉ Tekehali pa꞉ta꞉ oloda a꞉eyekeme.

Currently Selected:

Kini Pieke 13: SEMB

Highlight

Copy