Матфейица бицараб Рохалил хабар 24

24 бетӏер

Дуниялалда ккезе бугелъул хӏакъалъулъ

Мукъадасаб Рукъ щущазабизе буго

1Гӏиса Мукъадасаб Рокъоса къватӏиве лъугьун нахъе унаго, муридал гьесда аскӏоре рачӏана гьаб Мукъадасаб Рукъалъул кӏодолъи бихьуларищилан. 2Гӏисаца гьезда абуна:

– Гьаб кинабго бихьулищ? Хӏакълъун абулеб буго дица нужеда: ганчӏида лъураб цониги гамачӏ хутӏиларо гьаниб кӏалагъоркье чӏвачӏого.

Балагьал гӏемерлъизе руго

3Цинги Зайтуналъул магӏарда гӏодов чӏун Гӏиса вугеб мехалъ, батӏаго гьесда аскӏоре рачӏун, муридаз гьарана:

– Гьаб дуца абулеб бугебщинаб иш кида лъугьине бугебали ва мун вачӏиналъулги дуниял ахирлъиялъулги гӏаламатал кин загьирлъулелали бице нижеда.

4Гӏисаца абуна:

– Воре, цо лъицаниги къосинаризе гурин нуж! 5Чанги вукӏине вугелъулха жив Масихӏ вугилан вачӏунев чи. Чангиял гьез къосинаризеги руго. 6Рагъал ккун ругилан ва ккезехъинги ругилан рагӏизе буго нужеда. Воре, нуж хӏинкъуге гьелдаса. Гьеб цебеккунго лъугьине ккола, ва гьеб жеги ахирзаман гуро. 7Цо халкъ цоги халкъалде, цо ханлъи цоги ханлъиялде тӏаде кӏанцӏила. Бакӏ-бакӏалда ракъи баккила, ракь багъарила. 8Гьеб кинабго ккола лъимер гьабизе хӏара чӏваялъул гӏадинаб унтиялъул байбихьи.

9Гьебмехалъ нуж рачина гӏазаб-гӏакъуба кьезе ва чӏвазе. Дун сабаблъун тӏолабго гӏаламалда рихина нуж. 10Гьебмехалъ гӏемерисел гӏадамал къосина, цоцазе хилиплъила, цоцазда рихина. 11Гӏемерал гьересиаварагзаби рахъина, гьез гӏемерисел къосинарила. 12Пасалъи цӏикӏкӏиндал, гӏемерисезул рокьи ссун ина. 13Амма ахиралде щвезегӏан сабру гӏурав чи хвасарлъила. 14Ва Парччахӏлъиялъул хӏакъалъулъ гьаб Рохалил хабар тӏолабго дуниялалдаго лъазабила, киналго халкъазе нугӏлъун букӏине. Гьебмехалъин ахир букӏунеб.

15Даниял аварагасда Аллагьас бицараб чӏунтелалъул къабихӏлъи хирияб бакӏалда бихьила нужеда, – цӏалулесда лъалин гьелъул магӏна – 16гьебмехалъ мугӏрузде лъута абе Ягьудиялда ругелал. 17Гьеб къоялъ тӏохда вугев, рокъоса къваригӏараб-тараб босизе, гъоркье рещтӏунгеян абе. 18Хурив вугевги жиндирго ретӏел босизе нахъвуссунгеян абе. 19Вай, къинал руччабазе ва каранда хахулел лъимал ругел улбузе букӏинаха дол къояз кӏудияб къварилъи-гӏазаб! 20Хасало яги шамат къоялъ лъутизе ккогегиян гьари-дугӏа гьабулел рукӏа нуж. 21Щаян абуни, гьебмехалъ рещтӏине буго дуниял бижаралдаса гьанжелъагӏан букӏинчӏеб ва хадубккун букӏине къотӏиги гьечӏеб кӏудияб балагь. 22Гьел къоял къокълъизаризе Аллагьасул къадар букӏинчӏебани, цониги рижи хвасарлъизе букӏинчӏо. Амма жинцаго тӏаса рищарал гӏадамазе гӏоло гьел къоял къокъ гьаризе хӏукму буго.

23Гьебмехалъ нужеда лъицаниги абуни, Масихӏ гьале гьанив вугилан, яги дова вугилан, воре, нуж гьелда божуге. 24Щаян абуни, гӏемер рукӏине руго гьебмехалъ гьересимасихӏалги гьересиаварагзабиги. Чанги кӏуди-кӏудиял гӏаламатал ва мугӏжизатал рихьизарила гьез, бажарани, тӏаса рищарал муъминзабигицин къосинаризе бокьун. 25Гьеб кинабго цебеккунго лъазабун толеб буго дица нужеда!

26Доле Масихӏ гӏицӏаб авлахъалда вугин абуни, гьениреги унге нуж, гьале рокъов жанив вахчун вугин гьевилан рагӏани, гьелдаги божуге. 27Бакъбаккудаса бакътӏерхьуде щвезегӏан тӏолабго зоб гвангъизабулеб пири гӏадин вачӏина Гӏадамил Лъимер.

28Балкан бугеб бакӏалде чудкал ракӏарула.

Гӏадамил Лъимер кӏиабизеги вачӏине вуго

29Дол къоязул гӏакъуба-къварилъиялдаса хадуб гьебсагӏатго бакъул нур тӏагӏун ина, ва моцӏрол канлъиги ссун ина. Цӏваби зодиса гӏодоре гъенон рачӏина, ва къвакӏарал зобалги гьаргьадила. 30Ва гьебмехалда зодиб лъугьина Гӏадамил Лъимадул гӏаламат. Ва дуниялалъул киналго халкъал гӏодила, гьезда вихьила накӏкӏазда гьоркьосан бергьараб къудраталда ва кӏодолъиялда Гӏадамил Лъимер вачӏунев. 31Гьебмехалъ ссур пулеб гьаракь бахъина. Жинца тӏаса бищараб агьлу зобалазул гьаб рагӏалдаса бахъараб добцояб рагӏалде щвезегӏан – ункъабго рахъалдаса бакӏаризе жиндирго малаикзабиги ритӏила гьес.

Инжиралъул гъотӏол мисал

32Нужеца мисалалъе босе инжиралъул гъветӏ. Гьелъул гӏаркьалабазда гӏекӏ базе ва тӏамах бижизе байбихьараб мехалъ, нужеда лъала рии тӏаде щолеб бугеблъи. 33Гьелдаго релълъун, гьел гӏаламатал рихьараб мехалъ, нужеда лъала гьеб нуцӏикӏалтӏе щун бугеблъи. 34Хӏакълъун абулеб буго дица нужеда: дуниялалда гьаб наслу букӏаго лъугьине буго гьеб кинабго. 35Зобалги ракьалги тӏагӏаниги, дир рагӏаби нахъе хутӏизе руго.

36Амма цониги инсанасда лъаларо гьеб къо, гьеб сагӏат кида тӏаде щвезе бугебали. Я зобалазул малаикзабазда лъаларо, я Васасда лъаларо, гьеб лъала гӏицӏго Инсуда.

«Нуж рорчӏуда чӏа!»

37Нухӏ аварагасул заманаялда букӏараб гӏадин букӏине буго Гӏадамил Лъимер вачӏараб мехалъги. 38Тӏупан тӏелалде, кваналел-гьекъолел, лъудби рачунел, россабазе унел рукӏана дол къоязда гӏадамал, Нухӏ гамида жаниве лъугьинегӏан. 39Тӏупан тӏун, гьелъ росун инегӏан, щибниги лъалеб жо букӏинчӏо гьезда. Гьедин букӏина Гӏадамил Лъимер вачӏиндалги. 40Гьебмехалъ хурив векьарилев вугев кӏигоясул цояв вачина, цогидав хутӏила. 41Гьабихъ гӏатӏ ххенолей йигей кӏиго чӏужугӏаданалъул цояй ячина, цогидай хутӏила.

42Гьединлъидал нуж рорчӏуда чӏа, нужеда лъаларелъул нужер Тӏадегӏанав кида вачӏиневали. 43Рукъалъул бетӏергьанасда лъалеб бугони цӏогьор вачӏунеб заман, рорчӏи ккун, гьес цӏогьор жаниве лъугьине виччаларевлъи лъала нужеда. 44Гьединлъидал нужги хӏадурго рукӏа, ракӏалдаго гьечӏеб заманаялъ вачӏине вугелъул нужехъе Гӏадамил Лъимер.

45Жиндир рагьтӏателазе бетӏерлъи гьабеян ва гьезие ригь-ригьалда квен-тӏехги чӏезабеян тарав рагьтӏател, 46гьесул бетӏергьан тӏадвуссун вачӏараб мехалда ритӏухъго ва цӏодорго хӏалтӏулев вукӏин гьесда лъани, – гьардарав гурищ гьединав рагьтӏател. 47Хӏакълъун абулеб буго дица нужеда: бетӏергьанас гьединав рагьтӏателасда божун тела жиндир тӏолабго магӏишат.

48Амма гьедин тарав квешав рагьтӏател, жиндирго бетӏергьан тӏадвуссун вачӏине гӏезегӏан заман бугин ракӏалдеги ккун, 49живго гӏадал рагьтӏателал рухизе-кьабизе лъугьани ва гьекъолдухъабигун кваналев-гьекъолев чӏани, щиб ккелеб? 50Гьесда ракӏалдаго гьечӏеб къоялъ ва вачӏиниланго ккечӏеб сагӏаталъ тӏаде рехун вачӏина гьесул бетӏергьан. 51Кӏихӏи хъвалхьина гьес гьев рагьтӏател. Ххвелал гьарулесул можоро бахъараб гӏадин ккела гьесул иш. Гӏодилел ва цаби къерщезарулел хутӏила гьединал гӏадамал.

Currently Selected:

Матфейица бицараб Рохалил хабар 24: AvrNT

Highlight

Copy