Матфейица бицараб Рохалил хабар 11

11 бетӏер

Яхӏя аварагас Гӏисахъе муридзаби ритӏун рачӏуна

1Анцӏила кӏиявго муридасе насихӏат гьабун лъугӏараб мехалъ, Гӏиса гьеб рахъалъул шагьаразде ана халкъалда дарс малъизеги вагӏза гьабизеги. 2Туснахъалда вукӏарав Яхӏяда рагӏана Масихӏил ишазул хӏакъалъулъ.

3– Мунищ дов нижехъе вачӏине кколев чи, яги цогидав вачӏинегӏанищ ниж ралагьун чӏезе кколел? – абун гьикъизе жиндирго муридзаби ритӏана гьес Гӏисахъе.

4Гӏисаца гьезие жаваб кьуна:

– Инеги ун, нужеца Яхӏяда бице нужеда рагӏулеб бугебги бихьулеб бугебги: 5бецазда канлъи бихьулеб бугин, бохдулъа ракъварал рилълъанхъулел ругин, барасалъ унтарал рацӏцӏалъулел ругин, гӏинкъазда рагӏи рагӏулеб бугин, хварал чӏаголъулел ругин, мискинзабазда Рохалил хабар бицунеб бугин. 6Дир рахъалъ щакдаричӏев чи талихӏав вугиланги абе.

7Гьел нахъе араб мехалъ Гӏисаца гӏадамазда бицана Яхӏял хӏакъалъулъ:

– Щиб бихьизе нуж добмехалъ гӏицӏаб авлахъалде ун рукӏарал? Гьороца хьвагӏезабулеб муцӏи бихьизейищ? 8Щив вихьизе ун рукӏарал? Беричаб ратӏлилъ вугев чи вихьизейищ? Чӏухӏараб ретӏел ретӏарал гӏадамал дора парччахӏзабазул кӏалгӏабазухъ руго. 9Щив вихьизеха ун рукӏарал? Авараг вихьизейищ? Аварагасдасагицин кӏудияв чи вихьизе ун рукӏанилан абулеб буго дица нужеда! 10Гьесул хӏакъалъулъин Тӏухьдузда хъван бугеб: «Гьале, мун вачӏиналде дуе нух къачӏазе дирго илчи вуго дица цеве витӏулев». 11Хӏакълъун абулеб буго дица нужеда: эбелалъ чехь къинлъун гьаруразда гьоркьов Яхӏя авараг бищунго кӏудияв вуго. Амма Зобалазул Парччахӏлъиялда ругезул бищунго гьитӏинавгицин гьесдаса кӏудияв вуго. 12Жидерго мурадалде щвезе хӏалица нух бахъулезе Яхӏя аварагасул заманаялдаса бахъараб жакъа къоялде щвезегӏанги бокьун буго Зобалазул Парччахӏлъи кверде босизе. 13Яхӏя авараг вахъинегӏан халкъалъе нухлъун рукӏана Мусал Къанунги аварагзабазул вагӏзабиги. 14Гьез бицунелда нуж божулел ругони, Яхӏя вуго кӏиабизе тӏадвуссун вачӏине кколев вукӏарав Иляс авараг. 15Гӏундул ругезда рагӏизе биччанте гьеб! 16Лъида релълъарал ругилан абилеб дица гьаб заманаялъул гӏадамал?

17Нижеца зурма пуна –

Нуж кьурдизе рахъинчӏо,

Магӏил бакънал рачана –

Нуж гӏодизе лъугьинчӏо,

– ян къотӏноре рахъун жидерго гьалмагъзабазде ахӏдолел лъималазда релълъуна гьел. 18Витӏун вачӏана я кваналарев, я гьекъоларев Яхӏя авараг. Шайтӏабаз ккурав чи вугилан абуна гьез гьесде. 19Вачӏана кваназеги кваналев, гьекъезеги гьекъолев Гӏадамил Лъимер. Гьез абулеб буго: «Гьале чехьквеш, гьекъолдухъан, магъало бакӏарулел чагӏазулги мунагь-хӏакъалъул агьлуялъулги гьудул», – абун. Амма Аллагьасул Гӏакъиллъи жиндирго ишаздалъун ритӏухълъана.

Балагьги гӏазабги Аллагьасде руссинчӏел шагьаразе

20Кигӏан гӏемерал мугӏжизатал жиндица рихьизаруниги, кантӏун Аллагьасде руссинчӏел шагьаразул гӏадамазда гӏайиб чӏвазе лъугьана Гӏиса:

21– Балагьги гӏазабги дуе, Хоразин шагьар! Балагьги гӏазабги дуе, Байтсаида шагьар! Тиралъулгун Сидоналъул#11:21 Тирги Сидонги – Средиземнияб ралъдал рагӏалда рукӏарал Аллагь лъаларел халкъаз яшав гьабулел шагьарал. гӏадамазда рихьун рукӏаралани нужеда рихьарал гӏадинал мугӏжизатал, тӏутӏу-хъухъураб парталги ретӏун, ботӏроде рахъуги бан, церего руссинаан гьел Аллагьасде#11:21 Гьедин загьир гьабула жугьутӏаз ракӏ бухӏун бугеблъи. . 22Дица нужеда абулеб буго: Тиралъулги Сидоналъулги халкъалъе къиямасеб къоялъ нужееялдаса бигьа букӏине бугебха! 23Дудаги, Капернаум, зобалазде бахине гьабилинищ ракӏалде кколеб бугеб? Жужахӏалъул кӏкӏалахъе рехила мун! Дуда рихьарал гӏадинал мугӏжизатал Содомалда рихьун рукӏаралани, жакъаги букӏинаан гьеб шагьар. 24Амма, дица абулеб буго, Содомалъул халкъалъе къиямасеб къоялъ дур халкъалъеялдаса бигьа букӏине бугебха!

«Дуе рецц буго, дир Эмен!»

25Гьебмехалъ Гӏисаца абуна:

– Дуе рецц буго, дир Эмен, зоб-ракьалъул Бетӏергьан, дуца, цӏодораздаса ва гӏакъилаздаса балъгоги гьабун, лъимер гӏадиназе гьаб кинабго загьир гьабуралъухъ. 26Уха, дир Эмен, гьелъулълъидалха бугеб дур цӏобалъул гӏатӏилъи!

27Кинабго дие дир Инсуца кьураб буго. Инсуда гурони, лъиданиги лъаларо жиндирго Вас. Васасда ва Эмен жидее загьир гьавизе Васасе бокьарал гӏадамазда гурони, лъиданиги лъаларо Эмен.

28Хӏалтӏул захӏмалъи баччаралги гьир бакӏлъаралги, дихъе рачӏа нуж, дица хӏалхьи кьела нужее. 29Дие гӏоло горбода рукь лъезе рачӏа, дидаса мисал босе: дун вуго хӏеренаб ва хӏалимаб ракӏалъул чи. Гьебмехалъ нужер рекӏееги хӏалхьи бачӏина. 30Нужер горбода дица лъолеб рукьги бигьаяб бугелъул, нужер мугъзада дица лъолеб гьирги тӏадагьаб бугелъул!

Currently Selected:

Матфейица бицараб Рохалил хабар 11: AvrNT

Highlight

Copy