Лукаца бицараб Рохалил хабар 6:27-49
Лукаца бицараб Рохалил хабар 6:27-49 AVRNT
Дихъ гӏенеккун ругел нужеда абулеб буго дица: нужерго тушбаби рокьа, нуж рокьуларезе лъикӏлъи гьабе. Нужее нагӏана кьолездаги баркат лъегиян абе, нуж къабихӏ гьаруралги дугӏадулъ рехсе, Дур кӏаркьен чӏварасда цебе цояб кӏаркьенги ккве, дудаса чухъа-гужгат бахъарасе гурде бахъизеги квалквал гьабуге. Гьараравщинасе гьарарабги кье, кьурабги нахъе тӏалаб гьабуге. Цогидаз дуего гьабизе бокьулеб жо дуца гьезиеги гьабе. Нужго рокьулелал нужее рокьиялъул кири кинаб букӏинеб? Мунагь-хӏакъалъул агьлуялъеги рокьулелъул жалго рокьулелал. Нужее лъикӏлъи гьабулесе бецӏун гьабулеб лъикӏлъиялъулги кири кинаб букӏинеб? Мунагь-хӏакъалъул агьлуялъгицин гьабулелъул гьебго жо. Нахъе кьеялде хьул лъун чияхъе къарзалъе кьураб боцӏул кири кинаб букӏинеб? Мунагь-хӏакъалъул агьлуялъги кьолелъул цоцахъе къарзалъе боцӏи, тӏаса бекичӏого, камичӏого тӏадбуссине букӏиналда ракӏги чӏун. Нужеейин абуни нужерго тушбаби рокьа, садакъаби гьаре, нахъе щвеялъул пикру гьабичӏого къарзалъе боцӏиги кье. Гьебмехалъ кири гӏемерлъила нужее, ва Тӏадегӏанав Аллагьасул васаллъун лъугьина нуж. Жидее гьабураб лъикӏлъи лъаларезеги квешазеги лъикӏлъи гьабулевлъун вугелъул гьев. Нужер Эменго гӏадин гурхӏел-рахӏму бугеллъун рукӏа нужги. Нужеца чияда гӏайиб чӏваге, – Аллагьас нужедаги гӏайиб чӏваларо; нужеца тамихӏалде цӏаге, – нужги тамихӏалде цӏаларо. Нуж тӏасалъугьа, – нужедаги тӏасалъугьина. Нужеца кье, – нужееги кьела. Дагьабги цӏикӏкӏун жанибе инелъун хьвагӏезабун, цинги бугӏун ва бетӏер гьабун цӏезабураб хӏалалаб сахӏалъ борцун бала нужер квенчӏелтӏе. Кинаб сахӏалъ нужеца борцаниги, гьединабго сахӏалъ борцине буго нужееги. Гьадинаб мисалги бачана Гӏисаца гьезие: – Цо бецав чиясухъа бажариладай цоги бецав чи квер ккун вачине? Кӏиялго цадахъ гвандинире рортилародай гьел? Жиндирго мугӏалимасдаса тӏадегӏанав вукӏунаро мутагӏил. Амма, цӏалун вахъараб мехалъ, бокьарав чи ващалъула мугӏалимасда. Дурго бадиб бугеб чӏалу бихьичӏого, дур вацасул бадиб бугеб сум щай дуда бихьулеб? Яги дуда кин кӏолеб: «Ворея, вац, дур бадиса сум бахъизе биччай!» – ян гьесда абизе, дурго бадиб бугеб чӏалуги бихьичӏого? Ле, ххвелал гьарун ругьунав чи, цин дуца дурго бадиса чӏалу бахъе, цинги бичӏчӏила дуда вацасул бадиса сум кин бахъилебали. Лъикӏаб гъотӏода тӏад турараб пихъ букӏунаро, турараб гъотӏода тӏад лъикӏаб пихъги букӏунаро. Пихъихъ балагьун лъала гъветӏ батӏа гьабизе. Зазида тӏад инжир барщуларо, гӏинтӏидул хъархъидаса цӏибил бетӏуларо. Лъикӏав чияс жиндирго рекӏелъ бугеб лъикӏаб хазинаялъул гъансиниса къватӏибе лъикӏлъи босула, квешав чиясин абуни квешаб хазинаялъул гъансиниса къватӏибе квешлъи босула. Ракӏ цӏун тӏасан араб гурони гьесул кӏалалъ бицунарелъул. «Я, Бетӏерчӏахъад! Я, Бетӏерчӏахъад!» абун щай нужеца диде ахӏулеб, дица абураб жо нужеца гьабулеб гьечӏеб мехалъ? Дида аскӏове вачӏун, дир рагӏабазухъ гӏенеккарав ва гьел тӏуразарурав чи лъида релълъуневали мисал бачина дица нужее: гьев релълъуна тӏалде щвезегӏан гъваридго кьучӏги бухъун, мина барав чиясда. Щун бачӏараб гӏурул лъим речӏчӏаниги, щущан инчӏо гьеб, щулаго бан букӏиндал. Амма дихъ гӏенекканиги, дица абухъе гьабуларев чи релълъуна, кьучӏго бухъичӏого, ракьалда тӏад мина барав чиясда. Щун бачӏараб гӏурул лъим речӏчӏарабго, доб мина биххана, щущан ун, чӏудби хутӏана.