sēnt cān 6

1kā ponipayiki ohi cisas ki āsowaam kalali sākahikan ēwakwanima taipiriyas sākahikan. 2kihci mihcēt māka kā māmawēyatiyit ayisiyiniwa ki pimitisahok, cikēmā ē ki wāpahtamiyit o mamātāwi isihcikēwina kā ki ayitotamawāt kā ākosiyit. 3cisas māka ki āmaciwēw wacihk, ēkota ē ki witapimāt o kiskinohamawākana. 4o mayāskotāto wihkohtowiniwāw māka cowak, sāsay kēkāt ōticipayiyiw.

5cisas māka ē ayitāpit, ēkosi ē wāpāmāt ē pē kihci mihcētiyit ē nātikot, omisi itēw pilipa, tānitē kē ohci atāwiyahk pakwēsikan, kita micisocik oki? 6oma māka ki itwēw ē wi kociāt; cikēmā wiya ki kiskēyitam wā isihcikēt. 7pilip ki naskwēwasimēw, niswāw mitātahtomitanaw soniyāsak iyikohk pakwēsikan namawiya kita tēpipayiikwak, ata misawāc ahapisis piko otinācik. 8pēyak o kiskinohamawākana, āntarowa, sāiman pitar ociwāma, omisi itik, 9ayāw ota oskinikiw, ē ayāwāt niyānan iskwēsisikani pakwēsikana mina niso kinosēwa; kēkway māka wiya ēwako oki kā isi mihcēticik? 10cisas māka omisi ki itēw, nahapiikok ayisiyiniwak. ki maskosiskāw māka ēkota. ki nahapiwak māka ayisiyiniwak, nāntaw niyānanwāw kihci mitātahtomitanaw ē ki ihtasicik. 11cisas māka ki otinēw pakwēsikana; ispi māka kā nanāskomot, ki mātinamawēw anihi kā ki nahapiyit; mina kinosēwa iyikohk ē natawēyimācik. 12ispi māka kā kispocik, omisi ki itēw o kiskinohamawākana, māwasakonamok iskwacikana kā astēki, ēkā kēkway kita wanitāhk. 13ki māwasakonamwak māka, ēkosi mitātaht nisosāp wikopiwata ki sākaskinatāwak iyikohk ē ki iskwamācik niyānan iskwēsisikāni pakwēsikana kā ki iskomācik aniki kā ki micisocik. 14oki māka ayisiyiniwak, ispi kā wāpahtahkik mamātāwi isihcikēwin cisas kā ki totamiyi, ki itwēwak, ēwako awa tāpwē okiskiwēhikēw kā ki wi pē itohtēt ota askihk.

15cisas māka ē wāpahtahk kēcika ē wi pē otinikot kita kihci okimakātikot kāwi ki itohtēw mina wacihk ē pēyakot. 16ispi māka ēti otākosik, o kiskinohamawākana ki matāwisiyiwa sākahikanihk. 17ki posiwak māka cimānihk, ē ki ati isi asowaakik kēparnēamihk itēkē. sāsay māka ē wanitipiskāyik namēskwa māka otihtikwak cisasa. 18ki ati māmakāan māka sākahikan ē ispici mistahi yotihk 19ispi māka nānitaw nisitanaw niyānanosāp ahpo nistomitanaw tahto tipāpān kā ati pimiskācik, ki wapamēwak cisasa ē pimohtēyit sākahikanihk ē pē natamiyit cimāniyiw: ēkosi ki sēkisiwak. 20māka omisi itēw, niya oma; ēkāwiya sēkisik. 21sēmāk māka ki posiēwak; ēkosi kiyipa ciman ki takopayiw itē kā wi isicimēcik.

22ē ati wāpahk māka, ispi ayisiyiniwak akāmihk kā ayācik kā wāpahtahkik ēkā kotak cimāniyiw ēkota ē ayāyik, piko pēyak ita o kiskinohamawākana kā ki posiyit, ēkā mina cisas ē ki cimāt o kiskinohamawākana, piko o kiskinohamāwakāna nisikē ē ki sipwēcimēyit; 23(ātawiya māka kotaka cimana ki pē ohcipayiwa tāipiriyasihk, ciki ita kā ki mowācik pakwēsikana, kā nanaskomot kā tipēyihcikēt:) 24ispi māka ayisiyiniwak kā wāpahtahkik ēkā ēkota ē ayāyit cisasa, mina o kiskinohamawākaniyiwa, wistawāw ki posiwak cimānisihk, ē ki pē isicimēcik kēparnēamihk, ē pē natonawācik cisasa.

25ispi māka kā miskawācik akamihk sākahikanihk, omisi ki itēwak, rapay, tanispi kā pē itotēyan ota? 26cisas ki naskwēwasimēw omisi ē ki itāt, tāpwē, tāpwē, kit itināwāw, namawiya ki nanātonawināwāw ē ki wāpahtamēk mamahtāwi isihcikēwina, māka piko ē ki mowāyēk pakwēsikan, mina ē ki kispoyēk. 27ēkāwiya atoskatamok miciwin kā nisiwanātahk, māka anima miciwin kē ihtakwahk kākikē pimātisiwinihk, kē miyikoyēk iyiniwikosisān, ēwakoni kisēmanito wēyotāwihk kā ki kiskinawaciāt. 28omisi māka ki itēwak, kēkway kē totamāhk kita atoskātamāhk kisēmanito ot atoskēwina? 29cisas māka ki naskwēwasimēw omisi ē ki itāt, ēwako oma ot atoskēwin kisēmanito, kita tāpwētawāyēk anihi kā ki pē isitisawāt.

30ēwako māka ohci ki itēwak, kēkway ētotaman ē kiskinawatēyitākwahk, kita wāpahtamāhk, kita tāpwētātāhk makā? tānisi ēsi atoskēyan? 31#ēksatas 16:4,15; nikamona 78:24nohtawinānak ki mowēwak mānawa pikwataskamikāhk; kā itasinahikātēk, ki miyēw pakwēsikana kihci kisikohk ohci kita mowayit. 32omisi māka cisas ki itēw, tāpwē, tāpwē, kit itināwāw, namawiya mosis kā ki miyikoyēk kihci kisikohk ohci pakwēsikana; notāwi māka kā miyikoyēk tāpwē pakwēsikana kihci kisikohk ohci. 33ēwako kisēmanitowi pakwēsikan kihci kisikohk kā pē ohci yāsit, mina kā mēkit pimātisiwin askihk. 34omisi māka ki itēwak, tēpēyihcikēyan, tahki mamiyinān awa pakwēsikan. 35cisas māka omisi ki itēw, niya ni pimātisiwi pakwēsikaniwin: ana māka kā pē nasit namawikāc kita notēkatēw; mina kā tāpwēyēyimit namawikāc kita notēyāpakwēw. 36māka ki ki ititināwāw, ata ē ki wāpamiyēk ēyiwēhk ēkā māka ē tāpwētamēk. 37kahkiyaw anihi kā miyit wēyotāwihk ni kā nātikwak; ana māka kā pē nāsit namawiya ni kā wayawiwēpināw. 38kihci kisikohk ni ki pē ohci yasin, namawiya niya ē itēyitamān kita isihcikēyān, māka ot itēyitamowin kā pē isitisahot. 39ēwako oma ot itēyitamowin wēyotāwihk kā pē isitisahot, kahkiyaw tahto kā miyit ēkā kēkway kita wanitāyān, māka kawi kita waniskānamān iskwayāc kisikāki. 40ēwako oma ot itēyitamowin ana kā pē isitisahot, tahto awiyak wiyapamāt okosisimāwa, kā tāpwēyēyimāt māka, kita ayāt kakikē pimātisiwin; ni kā waniskānāw māka iskwayāc kisikāki.

41cowak māka ki ānwēyimēwak, cikēmā ē ki itwēyit, niya pakwēsikan kā ohcit kihci kisikohk. 42omisi māka ki itwēwak, nama ci ēwako awa cisas, okosisa cosip, otāwiya mina okāwiya kā kiskiyimimāyahk? tānēki māka kā ohci itwēt, kihci kisikohk ni ki pē ohci yāsin? 43cisas māka ki naskwēwasimēw omisi ē ki itāt, ēkāwiya tasi nayētāwi itwēk. 44nama awiyak ni ka ki pē nātik, kispin ēkā wēyotāwihk kā pē isitisahot otināci; ni kā waniskānāw māka iskwāyāc kisikāki. 45#aysāya 54:13omisi itasinaikatēw kiskiwēhikēwinihk kahkiyaw kisēmanitowa kita kiskinohamākwak. tahto māka kā pētawacik, mina kā kiskinohamākocik wēyotāwihk, ni pē natikwak. 46namawiya wiya awiyak ē ki wāpamāt wēyotāwihk, ana piko kisēmanitohk kā ohcit, ēwako ki wāpamēw wēyotāwihk.

47tāpwē, tāpwē, kit itināwāw, ana kā tāpwēyēyimit ayāw kakikē pimātisiwin. 48niya ana pimātisiwi pakwēsikan. 49kotawiwāwak o ki mowatawāw mānawa pikwataskihk, ki nipiwak māka. 50ēwako awa pakwēsikan kihci kisikohk kā pē ohci yāsit, ana māka ayisiyiniw kē mowāt, ēkā kita nipit. 51niya ēwako pimātisiwi pahkwēsikan, kihci kisikohk kā pē ohcipayit; kispin awiyak ayisiyiniw mowāci ohi pakwēsikana, kakikē kita pimātisiw; pakwēsikan kē mēkiyān ēwakwanima ni wiyās, kē mēkiyān kita pimaciakik askihk kā ayācik.

52cowak māka ki kihci ayasitētowak, omisi ē itwēcik, tānisi awa ayisiyiniw kē isi kaskitāt kita miyikoyahk o wiyās kita miciwāyahk? 53cisas māka omisi ki itēw, tāpwē, tāpwē, kit itināwāw, kispin ēkā miciyēko o wiyās iyiniwikosisān, mina minikwēyēko o mihko, namawiya ki kikiskākonāwāw pimātisiwin. 54ana kā micit ni wiyās, mina kā minikwēt ni mihko, ayāw kakikē pimātisiwin; ni kā waniskānāw māka iskwāyāc kisikāki. 55cikēmā ni wiyās, ēwako tāpwē miciwin, mina ni mihko ēwako tāpwē minikwēwin. 56ana kā micit ni wiyās, mina kā minikwēt ni mihko, ni kikiskāk, nista māka ni kikiskawāw. 57kā isi pimātisit wēyotāwihk kā pē isitisahot, mina ē ohci pimātisiyān wēyotāwihk; ēkosi mwēhci ana kā mowit, niya kita ohci pimātisiw. 58ēwako awa pakwēsikan kihci kisikohk kā pē ohci yāsit; namawiya tāpiskoc kotāwiwāwak kā ki isi mowācik mānawa, ē ki nipicik māka; ana kā mowāt ohi pakwēsikana kakikē kita pimātisiw. 59ēwakwani ohi kā ki ayitwēt ayamihēwikamikohk, mēkwāc ē kiskinohamākēt kēparnēamihk.

60mihcēt māka o kiskinohamawākana, ispi kā pētamiyit oma, omisi ki itwēyiwa, āyiman oma itwēwin; awēna kē ki natotahk? 61māka cisas wiya ē kiskēyitahk o kiskinohamawākana ē nayētāwi pikiskwātamiyit oma ki itēw, ki nayētāwēyitamiikonāwāw ci oma? 62tānisi māka kispin wāpamāyēk iyiniwikosisān ē isi opiskāt itē kayatē kā ki ayāt? 63ahcāhk kā pimātisiskākēt; wiyās namawiya nānitaw itāpaciiwēw; itwēwina kā ki ayititakok, ahcāhkoanwa, mina pimātisiwinawanwa. 64māka atiht kiyawāw namawiya ki tāpwētēnāwāw. cikēmā cisas micimac ohci ki kiskēyimēw anihi ēkā kā tāpwētamiyit, mina anihi kē misimikot. 65omisi māka ki itēw, ēwako oma kā ohci ititakok, nama awiyak ni kā ki pē nātik, kispin ēkā miyikoci notāwiya.

66ēkospi māka ohci mihcēt o kiskinohamawākana ki kiwēyiwa, namawikāc māka mina ki wicēwik. 67cisas māka omisi ki itēw mitātat nisosāp kā ihtasiyit, kistawāw ci ki kā sipwēhtānāwāw? 68#mātyo 16:16; mārk 8:29; lok 9:20saiman pitar māka ki naskwēwasimēw, tēpēyihcikēyan, awēna ni ka nātātān? kiya kit ayan kakikē pimātisiwini itwēwina. 69ēkosi ni ki tāpwētēnān mina ni kiskēyitēnān kiya ēwako o kanātisima kisēmanito. 70cisas ki naskwēwasimēw, nama ci ki ki wawēyēyimitināwāw kiyawāw mitātaht nisosāp, pēyak māka kā itasiyēk macāyiwiw? 71ēwakoni cotas iskariyata kā ki itāt, okosisa saiman; cikēmā ēwakoni kē misimikot, ēwako pēyak mitātaht nisosāp kā ihtasicik.

Currently Selected:

sēnt cān 6: KKMR

Highlight

Copy