cēnisis 29

1cēkap māka ki ati sipwētēw ēkosi ē ki takosihk anita ot askiyihk wāpanowi ayisiyiniwa. 2ki itāpiw māka, poti ohtaipān ki ayāw maskotēhk ēkota māka ki pimisinwak nistwayak māyatihkwak; cikēmā ēkota ohtaipānihk ki ohci minaēwak māyatihkwa; ēkosi asini ē kipapit ita ē ohci otinikātēk nipi, nāspic ki mihcāpiskisiw. 3ēkota māka ki māwaciitowak kahkiyaw māyatihkwak; ēkosi ki ikatētihtipinēwak māka asiniya ē yohtēyāk monahipān ohci, ē minaācik māka māyatihkwa, ēkosi kāwi mina ē kipayācik asiniya ita ē yotēyāk monahipān. 4cēkap māka ki itēw, niciwāmitik tānitē wēciyēk? ki itik māka, harān nohcinān. 5omisi māka ki itēw, ki kiskēyimāwāw ci lēpān okosisa nēhor? ki itik māka, ni kiskēyimānān. 6omisi māka ki itēw, miyo ayāw ci? ki itik, miyo ayāw, cist māka rēcil otānisa pē wicēwēyiwa māyatihkwa. 7ki itēw māka, cist, kēyāpic ispi kisikāw, namēskwa otihcipayiw awakānak kita māwacihihcik, minahihkok māyatihkwak mina natawi asamēhkok. 8omisi māka ki itik, namawiya ni ka ki totēnān pātimā piko kahkiyaw māyatihkwak ki māwacihihtwāwi, mina pātimā ki ikatēnātwāwi asiniya monaipānihk ohci; ēkwēyāk kē ki minaāyākik māyatihkwak.

9mēkwāc oma ē wicipikiskwēmāt, rēcil ki pē itohtahimēw otāwiya o māyatihkomiyiwa; cikēmā wiya ki kanawēyimēw. 10ki ispayiw māka ispi cēkap wiyāpamāt rēcila, otānisiyiwa lēpāna okāwiya otawēmāyiwa, mina o māyatihkomiyiwa lēpāna okāwiya otawēmāyiwa, cēkap kisiwāk ki itohtēw, ē ki ikatētihtipināt asiniya ita ē yotēyāk monahipān ohci, ēkosi ē ki minahimāt o māyatihkomiyiwa lēpāna okāwiya otawēmāyiwa. 11cēkap māka ki ocēmēw rēcila ēkosi ē moskwēyitahk ki māto. 12cēkap māka ki wihtamawēw rēcila otāwiyiwa ē osisit mina ripēkawa ē okāwit; ki ispatāw māka ē natawi wihtamawāt otāwiya.

13ki ayikin māka ispi lēpān piyēhtahk ē ācimimiht cēkapa otawēmāwa okosisiyiwa, ki ispatāw kita nakiskawāt, ēkosi ē ki atamiskawāt, mina ē ki ocēmāt, mina ē ki pitokaāt wikihk, ki wihtamawēw māka lēpāna kahkiyaw. 14lēpāna māka ki itik, kiya māka tāpwē niskan mina ni wiyās. pēyak pisim māka ki wiciayāmēw. 15ēkosi lēpān ki itēw cēkapa, oma ē otikwatimimitān ēwako ci ohci pikonato kita atoskawiyan? wihtamawin kēkway kē tipahamātān? 16lēpān māka ki nisiyiwa otānisa, liā ki isiyihkāsoyiwa omisimāwa, rēcil māka ki isiyihkāsoyiwa osimimāwa. 17liā māka ki nēsowaniyiwa oskisikwa, māka rēcil ki katawasisiw mina ki miyonākosiw. 18cēkap māka ki sākihēw rēcila; omisi māka ki itēw, tēpakop tahto aski ki ka atoskēstātin rēcil osimimāw kitānis ohci. 19lēpān māka ki itwēw, nawac miywāsin kiya kita miyitān, iyikohk kita miyak kotak ayisiyiniw; kiyām wiciayāmin. 20cēkap māka ki atoskēw tēpakop tahto aski rēcila ohci, mitoni māka cakawāsis kisikāwa ki itēyitam ē ispihci sākihāt.

21cēkap māka ki itēw lēpāna, miyin ēkwa niwa cikēmā sāsay tipipayiwa ni kisikāma, kita pitokawak. 22lēpān māka ki māmawi māwacihēw ayisiyiniwa ēkota kā ayāyit, ēkosi ē ki wikokēt. 23ki ayikin māka ispi wētākosiniyik, ki otinēw liāwa otānisa ē ki itohtahimāt māka, ēkosi ki pitokawēyiwa. 24lēpān māka ki miyēw liā otānisa, silpā ot atoskēyākaniskwēma kita ot atoskēyākaniskwēmiyit. 25ki ayikin māka ispi ē kēkisēpāyāyit poti ohi liāwa; ēkosi ki itēw lēpāna, kēkway oma kā ki totawiyan? nama ci ki ki atoskēstātin rēcil ohci? kēkway māka ohci kā ki kayēsiiyan? 26lēpān māka ki itwēw, namawiya ēkosi itocikātēw nit askināhk, kita mēkihk osimimāw mwayēs omisimāw. 27tipipayito pēyakwāw ē ispayik, ēkosi ki ka miyitinān mina awa atoskēwin ohci kē isi atoskawiyan kēyāpic tēpakop tahto aski. 28cēkap māka ēkosi ki totam, ē ki tipipayitowāt pēyak ē ispayik, mina māka ki miyik rēcila otānisa kita wiwit. 29lēpān māka ki miyēw rēcila otānisa, pilhā ot atoskēyākaniskwēma kita ot atoskēyākaniskwēmiyit. 30ki pitokawēw māka rēcila mina ki sākihēw rēcila awasimē iyikohk liāwa, kēyāpic māka tēpakop tahto aski ki atoskawēw.

31ispi māka kā tipēyihcikēt wiyāpahtahk liāwa ē pakwātimiht ki miyēw kita ot awāsimisiyit, māka rēcil namawiya ki ot awāsimisiw. 32liā māka ki ayāwēw awāsisa mina ki nihtāwikihēw okosisa, ropin māka ki isiyihkātēw, cikēmā ki itwēw, kēhcinā kā tipēyihcikēt ki kanawāpahtam ni kotakitāwin; ēkwa māka kē sākihit ni nāpēm. 33mina māka ki ayāwēw awāsisa ē ki nihtāwikihāt māka okosisa, omisi māka ē ki itwēt, wiya kā tipēyihcikēt ki pēhtam ē pakwātikawiwak ēwako māka ohci ni ki miyik kita okosisiwak, simiyan māka ki isiyihkātēw. 34mina māka ki ayāwēw awāsisa ki nihtāwikihēw māka okosisa, omisi māka ki itwēw, ēkwa tāpwē kē wicēwit ni nāpēm, cikēmā sāsay nisto ni ki nihtāwikitamawāw okosisa, ēwako ohci māka lipay ki isiyihkātēw. 35mina māka ki ayāwēw awāsisa ēkosi ē ki nihtāwikihāt okosisa, omisi māka ki itwēw, ēkwa ni ka mamihcimāw kā tipēyihcikēt; ēwako ohci cota ki isiyihkātēw. ēkosi māka ki poni ot awāsimisiw.

Currently Selected:

cēnisis 29: KKMR

Highlight

Copy