cēnisis 23

1sērah māka ki pimātisiw mitāhtomitanaw nisitanaw tēpakop ayiwāk tahto pipon; ēwako oma kā tahtopiponwēt ē pimātisit sērah; 2ki poni pimātisiw māka sērah anita kiriaht ārpa (ēwakwānima hēparan) kēnan askihk; ēprēām māka ki pē kisinātēyitam mina ki pē natawi mawikātēw sērahwa.

3ēprēām māka ki pasiko ē ki apistawāt onipoma, ē ki kitotāt anihi ot awāsimisa hēt ē itwēt, 4#hiparowa 11:9,13; isihcikēwiniwāwa 7:16ni mānitēwin mina ki wikikēmototātināwāw; miyik kita tipēyihtamān nahinitowi aski, kita nahinak nonipom kita ponāpamak. 5ot awāsimisa hēt māka ki naskwēwasimēwak ēprēāma, omisi ē itācik, 6natohtawinān, nit okimām mistahi kokimāwin ota kā ayāyāhk; ē nawasowakēyitākwahk ni nahinitowikamikonān ēkota ki ka naināw konipom; namawiya awiyak niyanān ki ka sākitamāk o nahinitowikamik, piko kita nainacik aniki konipomak. 7ēprēām māka ki nipawiw ēkosi ē ki nawakistawat ayisiyiniaw ēkota kotaskiyit, hēt ot awāsimisa oti. 8ki wicipikiskwēmēw māka ē itāt, kispin ētēyitamowēkwē kita nahinak nonipom kita ponāpamak; natohtawit mina kākisimototāhk niya ohci ēpran okosisa sāhār, 9kita miyit mākpila wāti kā ayāt, anima kisipanohk o kistikānihk kā ayāyik; cikēmā mitoni ē itakitēk ni ka isi miyik mēkwāc ita ē ayāyēk kita tipiyawēwisiyān nahinitowi aski. 10ēpran māka ēkota mēkwāc ot awāsimisiyiwa hēt ki apiw; ēkosi ēpran ana hitait ki naskwēwasimēw ēprēāma ē pēhtākot anihi hēt ot awāsimisa, kahkiyaw oti kā pihtokēcik ē iskwātēmiwahk otēnaw, ē itwēt, 11namawiya nit okimām, natohtawin, kistikān ki miyitin mina wāti ēkota kā ayāk ki miyitin; ē kanawāpamiyit okosisiwāwa nit iyinimak ki miyitin; nahin konipom. 12ēprēām māka ki nawakistawēw ayisiyiniwa ēkota kotaskiyit. 13ki kitotēw māka ēprana ē natohtākot ayisiyiniwa ēkota kotaskiyit, ē itwēt, māka kispin itēyitamani ki pakosēyimitin natohtawin; ki ka miyitin ētakitēk kistikān, otinamawin, ēkosi ni ka nahināwak nonipomak ēkota. 14ēpran māka ki naskwēwasimēw ēprēāma ē itāt, 15nit okimām natohtawin, anima aski nēwāw mitāhtomitanaw wāpiski soniyāwak itakitēw kēkway, māka wiya ēwako kiyānaw ē atāhtoyahk? nahin māka konipom. 16ēprēām māka ki natohtawēw ēprana; ēprēām māka ki tipapēskotamawēw ēprana anihi soniyāwa kā ki wiyat ē natohtākot anihi hēt ot awāsimisa, nēwāw mitāhtomitanaw wāpiski soniyāwak kā itakicikēcik otatāwēwak.

17o kistikān māka ēpran kā ki ayak anita mākpila, ciki māmri, kistikān mina wāti ēkota kā ki ayāk, mina kahkiyaw mistikwak kistikānihk kā ki ayācik, misiwē wāskā kakēsipanohk kā ki ayācik ki kēhcināyēyitākotamawāw. 18wiyā ēprēām kita tipiyawēwisit ēkota ē ayācik hēt ot awāsimisa, ē wāpahtamiyit kahkiyaw kā pihtokēyit iskwātēmihk otēnāhk. 19mwēstas iyikohk māka ēprēām ki nahinēw sērahwa wiwa ēkota wātihk mākpila kistikānihk ciki māmri ē ayāk; ēwako anima hēparan kēnan askihk. 20anima māka kistikān, mina wāti ēkota kā ayāk, ki kēhcināyēyitākotwāk ēprēām anihi hēt ot awāsimisa kita tipiyawēwisit nahinitowi aski.

Currently Selected:

cēnisis 23: KKMR

Highlight

Copy