cēnisis 19

1ki takosinwak māka niso okisikowak sātamihk ē ati otakosiniyik; lāt māka ki ayapiw satam iskwātēmihk; lāt māka ē wāpamāt ki pasikō kita nakiskawāt; ēkosi mostoskamik ē ki isi nāmiskwēyit; 2omisi māka ki itēw, mātika ēkwa nit okimāmitik, pihtokēk, ki pakosēyimitināwāw, kit atoskēyākaniwāw wikihk, mina kapētipisk ēkota ayāk, mina kisipēkinamok kisitiwāwa, wipac kēkisēp ki ka waniskānāwāw kita sipwētēyēk. ki itēwak māka, nama wiya; kiyām kāpētipisk ni ka ayānān pimohtēskanāhk. 3nāspic māka ki wisāmēw; ki pihtokāk māka mina ē ki pihtokēyit wikihk; ki wikokēēw māka ēkosi ki māmākonēw ayahkonāwa, ē ki micisoyit māka.

4māka mwayēs kawisimocik aniki ayisiyiniwak otēnāhk, aniki oti sātamiwiyiniwak, ki wāskāskamwak wāskahikaniyiw, māmaw aniki kā kayatēyātisocik mina ē oskinikicik, kahkiyaw ayisiyiniwak nanātohk itē ē pē ohtotēcik; 5#oyasowēwak 19:22-24ki natomēwak māka lāt omisi ē itācik, tāniwēkā ayisiyiniwak kā ki pihtokāskik anohc kā tipiskāk? pē wayawitatamawinān kita kiskēyimāyākik. 6lāt māka wayawitimiskwāt ki nātēw, ēkosi ē ki ati kipaahk ēskwātēm, 7omisi ē ki itāt, ki pakosēyimitināwāw, niciwāmitik, ēkāwiya ēkosi isi maci totamok. 8mātika ēkwa nisiwak nitānisak, aniki ēkā kā ki kiskēyimācik nāpēwa; kiyām ēwakonik, ki pakosēyimitināwāw, ki ka pē wayawitatamātināwāw, ē isi miwāpisinēk māka kita totawēkok; piko oki ayisiyiniwak ēkāwiya kēkway totāhkok; cikēmā ēwakwēyiw kā pē ohci itohticik nikihk. 9ki itwēwak, māka, asēkāpawi, mina māka ki itwēwak, awa ayisiyiniw ki pē takwaskānēsiw, ēkosi māka wi oyasowēw; ēkwa māka kiya nawac ki ka macitotātinān ispic wiyawāw. nāspic māka kisasitiskawēwak anihi nāpēwa, lāt oti, kisiwāk māka ē ki pē itohtēcik ē wi pikonakik iskwātēm. 10aniki māka ayisiyiniwak ki wayawiniskēyiwak, ēkosi ē ki pihtokē ocipitācik lāta, ē ki kipaakik māka iskwātēm. 11#2 kihci okimāwak 6:18ēkā kita wāpahtamiyit māka ki totawēwak anihi ayisiyiniwa kā ayāyit iskwātēmihk wāskāhikanihk, māmaw ē ayāpisisisiyit mina ē māmisikitiyit; ēkosi māka ē ki notēwiikocik kata miskahkik iskwāhtēm.

12aniki ayisiyiniwak māka ki itēwak lāt, kit āyāwāw ci kotak awiyak ōta? ki nahāhkisim, ahpo kikosisak, mina kitānisak, ahpo awiyak ē ayāwat ota otēnāhk, wayawitahik ota ohci: 13cikēmā ni ka nisiwanācihtānān oma, cikēmā ākwaskam ati misāyiw o pēhtākosiwiniwāw ē ohtiskawiskākot kā tipēyihcikēt; mina kā tipēyihcikēt ni ki pē isitisahokonān kita nisiwanācihtāyahk. 14lāt māka ki wayawiw ē ki pikiskwātāt otihkwatima, anihi kā ki wikimāyit otānisa, omisi ē ki itāt, pasikōk, wayawik ota ohci; cikēmā kā tipēyihcikēt kita nisiwanācihtāw oma otēnāw. māka tāpiskōc awiyak ē pahpisimiwēt ki ayititāk otihkwatima.

15ispi māka ēti kēkisēpāyāk, aniki okisikowak ki ninihkitisawēwak lāt, omisi ē itācik, pasiko, otin kiwa, mina niso kitānisak, ota kā ayācik; ēkā kita nisiwanātisiyan ota ē macayiwahk otēnaw. 16#2 pitar 2:7mēkwāc māka ē tasi papēkikātisit, aniki ayisiyiniwak ki sakiniskēpitēwak, mina ki sakiniskēpitēwak wiwiyiwa, mina niso otānisiyiwa; kā tipēyihcikēt ē ki kitimākinākot; wayawitaēwak māka, ē kipakitinācik wayawitimihk otēnāhk.

17ki ayihkin māka, ispi kā pē wayawitahikot, ki itik, tapasi kita pimātisiyan; ēkāwiya āpasāpi, mina ēkāwiya kipihci nānitaw maskotēhk; nātamosta waci, ēkā kita nisiwanātisiyan. 18lāt māka omisi ki itēw, namawiya ēkosi nit okimām: 19mātika ēkwa, kit atoskēyākan ki miskam ki miyo kitāpakēwin mina ki ki ayiwākēyitākotān ki kisēwātisiwin, anima kā ki wāpahtahiyan ē pimācitayan ni pimātisiwin; namawiya māka wācihk ni ka ki itāmon, nānitaw ētokē mācāyiwin ni ka ati otihtikon ēkosi kita nipiyān: 20mātika ēkwa, oma otēnaw pēsonākwan kita nātāmostamihk, mina apisāsin; kiyām ēkota ni ka itāmon (nama ci apisāsin?) ēkosi nit ahcāhk kita pimātisiw. 21omisi māka ki itik, mātika, ki ki natohtātin oma ohci ēkā kita nisiwanācihtāyān oma otēnaw, kā ki pikiskwēstamawātaman. 22kakwēyāo māka, itāmo ēkota, cikēmā nama kēkway ni ka ki totēn patimā piko otitamani. ēwako māka ohci soār ki isiyihkātēw anima otēnaw.

23sāsay ki sākāstēw askihk ispi lāt kā pihtokēt soārihk. 24#mātyo 10:15; 11:23,24; lok 10:12; 17:29; 2 pitar 2:6; cot 1:7ēkwa kā tipēyihcikēt ki kimiwanihtāw sātam mina kamāra otēnāhk iskotēsikan mina iskotēw, kā tipēyihcikēt ohci, kisikohk ē ohcipayit. 25ki nisiwanācihtāw māka anihi otēnawa mina misiwē maskotēw, mina kahkiyaw kā ot ihtāwiniyit otēnāhk mina anima kā nihtāwikihk askihk. 26#lok 17:32māka wiwa ki āpasāpiyiwa ē askwākot, ēkosi ki cimaso ē siwitākaniwit. 27ēprēām māka wipac kēkisēpā ki itohtēw anita kā ki isi otiskawikāpawistawāt kā tipēyihcikēyit; 28ki itāpiw māka sātam mina kamāra itēhkē mina misiwē maskotēwaskihk itēhkē, poti māka ē kaskāpatēk aski ki ispākēpayiw tāpiskoc ē kaskāpatēk tihkāpiskisikan.

29ki ihkin māka ispi kisēmanito nisiwanācihtāt maskotēwi otēnawa kisēmanito ki kiskisitotawēw ēprēāma ēkosi ē ki wayawitahāt lāta mēkwā nisiwanātisiwinihk ohci, ispi ē nisiwanācihtāt otēnawa ita lāt kā ki wikit.

30lāt māka ki sipwētēw soār ohci ē ki ayayāt wacihk asici ē nisiyit otānisa; cikēmā ki astāsiw kita ayāt anita soār; ki ayāw māka wacihk wiya mina niso otānisa. 31omisimāw māka ki itēw osima, kotāwinaw kisēyiniwiw, namatēw māka nāpēw askihk kita pitokākoyahk kā isihcikēhk misiwēskamik; 32māhti kiyām minahātāk kotāwinaw somināpo, kita wipēmāyahk māka kita ohci ot awāsimisiyahk kotāwinaw. 33ki minahēwak māka somināpo otāwiwāwa ēkospi ē tipiskāyik; ana māka omisimāw ki pihtokēw ē wipēmāt otāwiya; namawiya māka ki kiskēyimik ispi ē naisihk mina ispi ē waniskāt. 34ki ayikin māka wiyāpaniyik ana omisimāw ki itēw osima, mātika, ni ki wipēmāw tipiskohk notāwi, kiyām mina minahātāk somināpo anohc kē tipiskāk; pitokawākan māka kita wipēmat, kita ohci ot awāsimisiyan kotāwinaw. 35ki minahēwak māka mina somināpo otāwiwāwa ēwako ē tipiskāyik; ana māka osimimāw ki pasiko ē natawi wipēmāt; namawiya māka ki kiskēyimik ispi ē naisihk mina ispi ē waniskāt. 36ēkosi oma tāpiskoc ē nisiyit otānisa lāt kā isi ot awāsimisiikocik otāwiwāwa. 37omisimāw māka ki nihtāwikihēw okosisa, moāp māka ē ki isiyihkātāt; ēwako ana moapaitak otāwiwāwa piyis anohc kā kisikāk. 38osimimāw māka wista ki okosisiw, pēnāmāy māka ki isiyihkātēw, ēwako ana otāwiwāwa āman ot awāsimisa piyis anohc kā kisikāk.

Currently Selected:

cēnisis 19: KKMR

Highlight

Copy