cēnisis 18

1kā tipēyihcikēyit māka ki nokohisostāt ciki anita māmri maskawātikohk, ē apit iskwātēmihk wikihk mēkwāc ē kisāstēyik. 2#hiparowa 13:2ki itāpiw māka ēkosi poti nisto nāpēwa tipiskoc ki nipawiyiwa; ispi māka wiyāpamāt ki ispatāw ē natawi nakiskawāt iskwātēmihk mikiwāpihk ohci ēkosi ē ki nāmiskwēyit mocihk isi. 3ēkosi ki itwēw, nokimām kispin ēsi ayāwānē kita miyo kanawāpamiyan ēkāwiya sāpo miyāskaw ki pakosēyimitin kit atoskēyākan. 4kiyām apisis nipi kita nācikātēw ēkosi kita kisipēkinamēk kisitiwāwa mina kita aywēpiyēk sipāyātik. 5ni ka nātāw māka apisis pahkwēsikan kita mamiyotēhēyēk ēkwa māka mwēstas kē sipwētēyēk, wiya misawāc ē otitāyēk kit atoskēyākaniwāw. ki itwēwak māka, ēkosi itota mwēhci kā ki itwēyan. 6ēprēām māka kiyipa ki nātēw sērahwa mikiwāpihk, omisi ē ki itāt, kiyipa kwayācih nisto kwāpaikan ē miyosit pakēsikan, māmākonikē, mina ayakonākē iskotēkānihk. 7ēprēām māka ki ispatāw ita ē ayāyit awakāna ē ki nātāt mostososisa ē pikiskisisiyit mina ē miyosiyit ēkosi ē ki miyāt atoskēyākana, ki kakwēyāo māka ē osihāt. 8ēkosi ki otinam totosāpowipimi mina totosāpo asici anihi mostososisa kā ki kisiswāt, ēkosi ki oyastowēw; ki wicikāpawistawēw māka sipāyātikohk ēkosi ki micisoyiwa.

9omisi māka ki itik, tāniwā sērah kiwa? ki itēw māka, cist, mikiwāpihk ayāw. 10#romana 9:9ēkosi ki itik, kēcinā kāwi ki ka pē otihtitin ispisipayiki iyikohk, ēkosi mātika sērah kiwa kita okosisiw. sērah māka ki pēhtam pitawiskwāht mikiwāpihk ospiskwaniyihk ē ayāyik. 11ēprēām māka mina sērah sāsay ki kisēyiniwiwak mina sāsay ki ponipayiw kita isi ayāt sērah kā isi ayācik iskwēwak. 12#1 pitar 3:6sērah māka ki kimocipapiw ē itwēt, nānapawi ci ē kisēyiniwēyān ni ka ayān miywēyitamowin, nokimām mina ē kisēyiniwit? 13kā tipēyihcikēt māka ki itēw ēprēāma, tānēhki sērah kā pahpit? ē itwēt, kēhcinā ci ni ka ki ayāwāw awāsis sāsay ē kisēyiniwiyān? 14#lok 1:37kēkway ci kita ki pwātawitāw kā tipēyihcikēt? ita kā asotamātān mina ki ka otihtitin, ispisipayiki iyikohk, ēkosi sērah kita okosisiw. 15sērah māka ki ānwētam ē itwēt, namawiya ni pāhpin, cikēmā ki sēkisiw, ki itāw māka, sāsay ani ki ki pahpin.

16aniki māka ayisiyiniwak ēkota ki ohci pasikowak, ē ki itāpicik sātamihk isi; ēprēām māka ki ati wicēwēw ē nomakē ati nosawāpamāt. 17kā tipēyihcikēt māka ki itwēw, ni ka kātamawāw ci ēprēām kā wi ayisicikēyān; 18wiya ēprēām kēhcinā kita ati kihcāyiwit mina kita sokēyitākosit ē piskitaskānēsit, mina kahkiyaw kā tahtoskānēsicik ayisiyiniwak askihk kita sawēyitākosicik wiya ohci? 19cikēmā ni kiskēyimāw kita kakēskimāt ot awāsimisa mina kā tahtokēt, kita kanawēyitamwak māka ot isitwāwiniyiw kā tipēyihcikēyit, kita totahkik kwayaskitātisiwin mina oyasowāsiwēwin; kā tipēyihcikēt kita itotamawāt ēprēāma anima kā ki itāt. 20kā tipēyihcikēt māka ki itwēw, cikēmā mistahi pēhtākwan sātam mina kamāra, mina cikēmā o macitiwiniwāw ayiwākēyitākwaniyiw; 21ni ka itohtān ēkwa kita natawāpēnikēyān kispin tāpwē kā isihcikēwākwē anima kā ititākwahk kā otihtikoyān; kispin māka namawiya ni ka kiskēyitēn. 22aniki māka ayisiyiniwak ēkota ki ohci kwēskiwak sātamihk itēhkē isi ē ati itohtēcik, māka ēprēām kēyāpic ki otiskawikāpawistawēw kā tipēyihcikēyit.

23ēprēām māka kisiwāk ki itohtēw omisi ē ki itwēt, ki ka nisiwanācihāwak ci okwayaskitātisiwak kiki omacātisiwa? 24kispin nikotwā niyānanomitanaw okwayaskitātisiwak ēyāwākwē pihci ēwako otēnaw; ki ka nisiwanācihtān ci ēkosi ēkā kita manācihtāyan aniki ohci niyānanomitanaw okwayaskitātisiwak ēkota kā ayācik? 25namawiya ētokē ēkosi ki ka itotēn, kita nipaacik okwayaskitātisiwak kiki omacātisiwak, ēkosi okwayaskitātisiwak kita isinākocikēcik tāpiskoc omacātisiwak; namawiya ētokē ēkosi ki ka ihtotēn; nama ci kā oyasowātahk misiwē aski kwayask kita ihtotam? 26kā tipēyihcikēt māka ki itwēw, kispin miskawakwāwi sātamihk niyānanomitanaw kwayask otitātisiwak pihci otēnāhk, ni ka manā nisiwanācihtān misiwē, ēwakonik ohci. 27ēprēām māka ki naskwēwasimēw omisi ē ki itāt, mātika ēkwa, ni ki otinamāson kita kitotak kā tipēyihcikēt pisisik ē asiskiwiyān mina ē pihkotēwiyān; 28kispin nikotwā niyānan nohtaw ihtasicik aniki niyananomitanaw okwayaskitātisiwak, ki ka nisiwanācihtān ci misiwē otēnaw piko niyānan nohtaw ē itasicik? ki itwēw māka, kispin ēkota miskawakwāwi nēmitanaw niyānanosāp, namawiya ni ka nisiwanācihtān. 29kēyāpic māka ki ayamihēw, omisi ē ki itwēt, kispin kanakē nēmitanaw miskawatwāwi. ki itwēw māka, namawiya ēkosi ni ka totēn nēmitanaw, kispin ihtātwāwi. 30omisi māka ki itwēw, kiyām ēkāwiya kā tipēyihcikēt kata kisiwāsiw, ni ka pikiskwān māka; kispin kanakē nistomitanaw miskawātwāwi ēkota. ki itwēw māka, namawiya ēkosi nika tōtēn, kispin nistomitanaw miskawākwāwi ēkota. 31ki itwēw māka, mātika ēkwa, ni ki otinamāson kita ayamihak kā tipēyihcikēt: kispin kanakē nisitanaw miskawatwāwi ēkota. ki itwēw māka, namawiya ni ka nisiwānācihtān nisitanaw kispin ihtātwāwi. 32ki itwēw māka, kiyām ēkāwiya kā tipēyihcikēt kata kisiwāsiw ni ka pikiskwān kēyāpic pēyākwāw; kispin kanakē mitātaht miskawātwāwi ēkota. ki itik māka, namawiya ni ka nisiwanācihtān mitātaht kispin ihtātwāwi. 33kā tipēyihcikēt māka ki ati sipwētēw, ispi kā poni ayamihāt ēprēāma: ēprēām māka ki kiwēw.

Currently Selected:

cēnisis 18: KKMR

Highlight

Copy